لحظة طيش وتصرف غبي !!محتاجه لاي كلمه المهم تخففون عني

انتي قاعده تركضين ورى وهم وآخرتج بتطيحين ومابتقدرين حتى تقومين ..

ياحبيبتي الدنيا ماوقفت عند هذا الشاب ولا وقفت عند غيره الدنيا قسمة ونصيب وكلنا لازم نرضى بنصيبنا المفروض تحاولين تبتدين حياتج من جديد وتفكرين في مستقبل افضل وتنتظرين زوج يحبج يحافظ عليج

والخطبة هذي فترة لاثنين يتعارفون على بعض اذا الوضع استقر بينهم انتقلو لمرحلة الزواج اما اذا ماصار نصيب خلاص فكو الخطبة وانتي لازم تبين سبب ليش تركج مايصير تعيشين نفسج بعذاب ماله اول وتالي

نفرض قالج انه مايحبج مايبيج وش راح يتغير ... صدقيني راح تنقهرين اكثر وتتحطمين وايد .. ابتعدي عن هالاشياء ياما ناس متزوجين انفصلو بعد عشرة عمر وناس خطوبة دامت سنين وانتو توكم مخطوبين وانفصلتو بس السبب اكيد قاله يوم اللي راح يطلقج اذا كانت الخطوبة بعقد طبعا اكيد يسأله الشيخ سبب الطلاق يعني انتي تعرفين السبب ..

اما عن روحتج المحل انتي عرفتي انها مب عدله يعني لاتعيديها مرة ثانيه لان مب بصالحج كلش مب عدله بحقج تسوين جذي خلاص يالغاليه من عافنا عفناه ولو كان غالي وكرامتي وعزة نفسي ابدأ من كل شي ثاني

وهذي تجربة في الحياة والانسان معرض للفشل في اي لحظة بس مو معناتها نستسلم لليأس ونخاف من اي تجربه نقدم عليها بالعكس رحمة الله اوسع من كل شي وماخاب من توكل على الله سبحانه وتعالى ..

اماني .. ((امسك حلــوة تذكريني ببنت عمي))

اختي هونيها وتهــون ...

الله ما كتب لكم العيشــة مع بعض .. لانها خير لك ...

حبيبتي الله بيرزقــك .. الخير ..

والله غيرك تعرض لمصائب جمــة ..

والله الحيــن اشوفهــم ع احســن ما يكون

مطنشيــن الدنيــا .. وحاسيــن ان ما احد مثلهــم

لان الله رحمهــم ...

حاولي تنسي وطنشي والله بيكرمك بقدرتــه يا رب العــالميــن

الغاليه الزمي الاستغفار والدعاء والله يرجعه لك أو يرزقك أحسن منه

بس اسمحي لي هو شخصيته ضعيفه والا كان صارحك أو اهله كلموا اهلك

عيب جذي

وانتِ عليك بقراءة البقرة يوميا ثرى تاخذ ساعه بس مب وايد وأذكار الصباح والمساء

ولاتحطين في خاطرك

طنشــــــــــــــــــــــــي

والله اختي هو الخسران والله ان شاء الله يرزقك بالي احسن منه انا اعرف وحده انخطبت اربع مرات والبنت ما شاء الله ما تتعيب لكن ما كان لهم خير فيها والبنت كانت راضية بقضاء الله وعوضها بالي احسن منهم

اللي نساج انسينه وربي يعوضج انشاء الله

MaNalOoH:

فديتج لو عرفتي بالسبب شو بتسوين !!!!

انا اقول ما عليج منه .. انسي و لا تركضين وراه ... سويله طاف ..و عيشي حياتج ... . و مثل ما قالوا البنات يمكن هالشي خير لج انتي ..:shy:
..

:ok:

اايدها في كل اللي قالته

اختي اماني

طبعا انا اصغر عنج مادري اذا كنت بفيدج ولا لا

بس يتني هذي الفكره يمكن ماسويتيها ويمكن يت في بالج مادري الله واعلم

بس انا حبيت اقولج هذي يمكن يرد عليج ويخبرج شو السبب

اختي اماني

طرشي له مسج وخبريه قولي لها شو السبب اللي خلاك تتركني
انا ماريد منك شي غير تقول لي السبب بس
واللي عندج خبريه به

ان رد عليج كان بها

واذا مارد عليج تركيه ولا تهتمين بسالفه ابدا
ولا تحطين في خاطرج اي شي انسيه مثل ماهو تركج

وانتي واثقه من نفسج انج ماسويتي شي غلط

والله يعوضج باللي احسن عنه

هلا الغاليه...

الله يعوضج بالزوج الصالح اللي يهنيج و يسعدج...

اختي انا برد عليج من خلال اللي قريته...

لا تزعلين مني و لاتفهميني غلط...

ما بين الخوات عتب...

انتي قلتي انج ما تتعيبين و خطابج كثار....

والحمدالله يعني هذا فعلا اللي يشوفج يتمنى يرتبط فيج...

بس هل فكرتي في شخصيتج...؟؟؟

انتي تلحقين الريال من مكان للثاني و تتصلين و رسايل...

هل قلتي لنفسج يمكن شخصيتي تكون السبب!!!!!!

يمكن يحس انج ممكن تتنازلين عن الناس كلها عشانه...

تسمعين كلامه في شئ...تطيعينه طاعه عمياء...

او تسألينه عن كل صغيره و كبيره...ممكن مرات تتصرفين تصرفات طفوليه

و الريايل ما يحبون هذا الشئ...بيقولون اذا من الحين هي جيه

كيف بعدين؟؟؟

ادري انه اصلا الكلام في الخطبه حرام المفروض بعد الملجه...

بس حاولي تعيدين حساباتج...

وبالنسبه لخطيبج السابق...انسيــــــــــــــــــــــــــــــــــــــه

اللي باعج بيعه...و حسسيه انج مب راميه نفسج عليه

وانه هو اللي خسران...و احسن منه يتمنونج...

بس اذا ظليتي وراه...ما تدرين الكلام يتناقل...

يمكن يقول حق حد...والكلام بيكثر...

واهم شئ للوحده سمعتها...فخليه و ان شاء الله بيعوضج باللي احسن...

ادري كلامي جارح...بس والله والله اني قصدي مصلحتج

و مرات الالم يكون حافز للعلاج..

تحياتي لج و اتمنى لج كل خير...

اختج في الله

حبيبتي والله انج دره
وهو اللي ما يستاهلج
فري ورا ظهرج
وابدي فكري بنفسج
لا تخلين حياتج تتوقف عند هالنقطه
اهتمي بنفسج وبدراستج او شغلج
والنصيب بيي لين عندج باذن الله

ولا تنسين تدعين الله بانه ييسر امورج

الغالية خلج واثقة من نفسج و دام انتي ما تتعيبين ما عليج من شي و كل واحد ياخذ نصيبه و قولي الحمدالله على كل حال و عليج بهالدعاء
اللهم اجرني في مصيبتي و اخلفني خيرا منها
و اللي باعج برخيص بيعيه بتراب ولا تفتكرين فيه
وتوكلي على ربج هو اللي خلقنا و هو اللي يعرف نصيبنا وين بيكون
والسموحة منج غناتي

عزيزتي اماني

ماشاءالله عخواتي ما قصرن..اول شي..ما بتفتكين من طاريه الا بالانشغال

اكيد وراج دراسه او شغل او صديقات

وقبلهم كلهم صيغي علاقتج مع ربج بطريقه اقوى واحلى

ربج كبيييير ورحيم وما يتخلى عن عباده ابد

ادعي الله يوفقج ويرزقج بالزوج الصالح الي يستاهلج وما يتخلى عنج مدى الحياة

بقولج نقطه صغيرة عساها تهون عليج..يارب
شو الاخف تنفصلين وانتي مخطوبه ولا لا سمح الله بعد الملجه

شفتي شكثر ربي رحيم فينا بكل تقاديره

الغالية امسحي رقمه نهائيا..لا تفكرين بيهتم باتصال ولا مسج ويمكن يحن

طبع الرياييل غييير عنا..

الله يوفقج ويسعدج ويهنيج وتطلعين من هالموقف ويتقدم لج الي يستاهلج ويصونج

هلا بك يالغـلا..

عسى الله يفرج همك ويرزقك بإلي احسن منه.

لكن سؤالي ملك عليك ولا بس خطبه عاديه؟

إذا خطبه عاديه لا تعبين نفسك

وإذا ملك هنا نضع خطوط لماذا؟

لكن ويش بينفعك السبب؟

انتي مو واثقه ان العيب مو فيكّ!

والدليل هو تراجع من نفسه؟

ويتهرب؟

اي شخص يتهرب اعرفي ان العيب فيه

تجربتي مع زوجي السابق. انه طلقني بلا سبب محدد

حتى اهلي ماتعبوا انفسهم يسألونه ليه ولا انا؟

تدرين ليه لأنه سفيه اصلا.. وكان شخصيته ريموت كنترول بيد اهله.

سوا مشكله سخيفه اتعب وانا اقول لك سخيفه؟

وليته طلق مثل الناس إلا بحركه خدعه وغباء؟

تخيلي ما واجهني!

وياما عدد أسباب سخيفه للناس

لا تدورين السبب. إنما أبذلي جهدك. لنفسك. ابحثي فيها هي.

يمكن في ناس حكوا عنك كلام.ز وإلي يصدق فيك لا تفكرين ترجعين له

يمكن وحده ثانيه لافه عليه. برضوا إلي يرخص فيك رخصي فيه

يمكن أهله قلبوا راسه؟

يمكن هو أنسان لعاب ماعنده اهتمام ومسؤليه؟

كل شي جايز

لكن هل العيب فيك لا حشاك وعداك العيب.

اجتهدي على نفسك.

يمكن في ناس يبونك. ويسعون جاهدين لتخريب اي علاقه تربطك بشخص آخر

ويستنونك تيأسيين ويجونك.

انتي أقرأي البقرة يوميا.(وتحديدا الفجر ولا المغرب قبلهم بساعه) ورشي نفسك
واشربي منه. وإذا قدرتي ترشين أبواب الشارع يكون افضل.

وإلي باعك بيعيه. لاتفكرين فيه ولا في الحركه غلي سويتيها. لأنك بذلتي سبب
ولا نجي نحاسبك مو من حقناز لأنك بحاله سيئة تتصرفين على حسب عواطفك

لكن ألجمي عواطفك وفكري بعقل ساعتها بتشوفين نفسك ما يحتاج.

انواااااااااع الافكار الحلوة. وبترتبين افكارك.

لاتلومين نفسك ابد. لكن لا تتعودين الحركه او غيرها من أنك تلاحقينه.

خلك قويه.

واستمري على القرأءة لا توقفين ابد. حتى بعد زواجك. بإذن الله.

وابحثي عن سبب رفضك للخطاب لماذا؟

لاتفكرين بأن امه كذا واخوه كذا
ابحثي الشخص نفسه لا اهله.


وابحثي شخصيته مع اهله لتعرفي مفاتيحه.

الله يوفقك يارب. وطمنينا عليك.

وغيري رقمك يا حلوة..

الغاليه .. فتحي صفحة جديدة بحياتج وانسيه

وحاولي يوميا ترقين نفسج .. احتمال خطبتج ما اتم بسبب عين وحسد لا سمح الله

العرايس ما قصروا
ولكنلا يجوز العلاقة في الخطوبة ولو كان الكلام

خليه يولي ..والله هالريال مب ويه حشمه و لا يستاهلج ... زين يوم الله فكج منه

لو فيه خير عل الاقل جان قالج السبب بس لانه جبان و شخصيته ضعيفه ماقدر

عزيزتي... أقول لك حل كي تنسيه؟ أذكري دائما سيئاته وليس حسناته... أعرف النسيان صعب، ولكن لا جدوى من لحاقه. أنا متأكدة من أنك عندما تتوقفين عن ملاحقته سوف يبدأ هو بملاحقتك. يعني سيحاول العودة والاتصال... ولكن عليك نسيانه وعدم الاهتمام بالسبب من جانبه. أنت انسيه لأن لا نصيب معه. ولا تقولي لن تتزوجي فهذه كلها بيد الله سبحانه وتعالى وكله مقدر وكتوب.

شوفي حبيبتي يمكن تحصلين واحد يكون احسن منه ويمكن تكون له اسباب خاصه ولا تضايجين ان شاء الله بيرزقج ربج بريال يعوضج عنه والله يصبرج

حطي في بالك ياقلبي

انه هو الخسران مو انتي ...

وربي راح يعوضك بالي احسن منه وراح يجي اليوم الي بيتندم فيه

: أماني ::
السلام عليكم

يابنات بليز طولو بالكم علي ابي اي كلام المهم تخففون عني

الله يشهد علي اني اكتب الموضوع ويدي ترجف وعيوني كلها دموع

انا كتبت بموضوع قبل اني انفصلت عن خطيبي

بس المصيبه اني لحد الحين مو عارفه شنو السبب الحقيقي وليه تخلى عني

عجزت ادق عليه ارسل رسايل ما يرد

وياما شفته بالصدفه في الشارع امر عليه كأني غريبه ولا كأنه في يوم من الايام كنا مع بعض

انا مجروحه حتى من كثر الجرح تغيرت شخصيتي صرت قاسيه / عصبيه / انانية / ومتنرفزة واحب اجلس لحالي حتى طلعاتي دايم لحالي

اليوم كنت طالعه السوق خطيبي السابق ابوه عنده كم محل ماادري اشلون خطرت
على بالي الفكره وسويتها رحت من جنب المحل بالسياره طبعا شفته هناك قلت
الا انزل واكلمه يمكن لما تجي عيني بعينه يستحي ويقولي اماني مااحبك وارتاح

المهم على ما صفطت السياره دخلت المحل الا ماهو موجود سألت الهندي اللي هناك
قالي تو طلع احسه يتهرب مني مو قادر يواجهني ويقولي اي كلمه دقيت على جواله
رد علي خويه يقولي هو بالعمل وهذا مو هو اللي بالمحل هذا اخوه التوأم بعد قلت يمكن
الهندي ماسمعني وانا اقول اسمه مع اني متاكده انه كان هوووو وانه نصاب مخلي خويه
يرد علي اجل وش بجيب جواله عند خويه وهو بالدوام
المهم الهندي جلس يناظر من زجاج المحل الحين بروح يقوله جت وحده معها سياره كذا تسأل عنك وبيعرفني والله اني طلعت ارجف ومااشوف دربي الحمد لله ما صدمت بالسياره وخايفه يدق علي يقولي لو سمحتي لا تسألين عني مرة ثانيه

ادري تصرف غبي بس حرام عليه يسوي فيني كذا يحطمني طول عمري ابي سبب يا ناس

بموت من القهر ليش سويت هالموقف وما مسكت نفسي

يابنات كل بنت ممكن تنخطب وممكن انه يصير شيء وما تكتمل الخطبه وانا خطبوني شباب كثير ابي افهم ليه لما ابتدي افكر جديا في واحد مايصير نصيب مرة بسبب اهله وواحد ثاني بسبب امه وهذا راح بدون اي سبب وانا والله ما اتعيب والا ما كان خطبوني كثييييييييييير

صعب لما البنت تحس انه الرجال ما يبيها

انا خلاص والله العظيم تعقدت واقسم بالله ماابي اتزوج بس من حقي اعرف السبب اللي خلاه يتخلى عني

احس اني بنفجر

السلام عليكم يا غالية

اشوف سبب واحد منك و انا متاكدة انو هو سبب تهربه منك و انا لمسته من طريفة كتابتك للموضوع يمكن السبب راجع لصغر سنك . و السبب واضح وهو - عدم الثقة بالنفس - ترى يا الغالية هذا الامر موووو هين بالمرة .

لازم تنتبهي و انا اقول بدل ما انتي قاعدة تبكين حاولي تثقين بنفسك اكثر و لااا تنسي الدعاء بلي فيه الخير .

اتمنى اشوفك واثقة اكثر حبيبتي و بالتوفيق لك يا رب

خجلتوني جد يابنات انا من كل قلبي اشكركم على تجاوبكم بصراحة ما توقعت كل هالتجاوب

البنات اللي قالو اني صغيره انا ماني صغيره عمري 23 وقريب بخلصها بعد

والحمدلله عندي عملي وغيره انا طموحة وجالسه ادرس كورسات بعد العمل
وربي واثقه من نفسي وعارفه اني ماني شينه بالنسبه للشكل ياما سمعت ناس
تتكلم عني ويحسبوني ما سمعتهم حتى تو قبل كم يوم رحت مع امي عزاا في
كذا حرمه مسكوا امي بعد ما طلعت قدام خلق الله بالعزا يقولون لها بنتك سبحان
من صور جميله انا زعلت لما امي قالت لي وش فايده دام مالي حظ

كل اللي حولي يقولي اني قويه لاني تخطيت مشاكل كثيره انا مهما ضعفت
وانهرت واسودت الدنيا بوجهي كلها ايام وارجع اقوم واقول ربي سبحانه موجود
وعسى الايام الجاية احسن ويمكن ربي كاتب لي السعاده قدام ويظل الامل موجود

لكن لما يتكرر الجرح ويجي حظرته ويدوس على الجرح نفسه وهو عارف اني مجروحه
بسبب غيره قبله وكان هو اللي احتواني وبعدين هو يرجع يكرر الجرح نفسه ولكن
اعمق بكثير لانه راح بدون اي كلمه

تعرفون احس اني مثل السفينه اللي ضربت فيها الامواج لحد ما تكسرت ساريتها
وصارت تسبح في البحر بدون طريق محدد

لكن مع هذا كله مااقول غير اني والله ما راح ارجع ادق عليه كفايه اللي سواه ولحد هنا
وكفايه نزلت نفسي بما فيه الكفايه مع اني بنت عاقله وعمري ما ذليت نفسي لولد
حتى لو كان على حساب قلبي لكن هذا كان خطيبي قدام الله وخلقه ولاني ماشفت منه طول علاقتنا اي خلاف او زعل علشان كذا كنت مستغربه من تصرفه

مااظن اقدر اغير نظرتي في الرجال بعد اللي شفته وماانكر اني كرهتم لكن الله كريم

بليز خواتي لا تنسوني من دعاءكم واشكركم مره ثانيه وعسى ربي يحقق كل امانيكم