تعالوا يابنات نوفمبررررررر نقول قصص ولاداتنا

اهلين بنات ... واخيرا بنزل قصة ولاداتنا .... انتظروني بجهزها لكم بعد ما انوم ولدي حمد

ام احلي حمودي ... ولاء..... بعد مره ثانيه الحمد لله علي السلامه ...

اشوفكم علي خير ودمتم.

احلى نوواعم ياهلا بييج :) انا وانتي ولدنا بنفس اليوم يالله ننتظر القصه بأسرع وقت

هلا مره ثانيه رجعت عشان اكتب قصه ولادتي وانا وام احلي حمودي موعدنا ب0 2/11 وولدنا بنفس اليوم 13/11 اتفقا قبل ما نولد ما نخون ونولد بنفس اليوم ...هههههههههه وسبحان الله ولدنا بنفس اليوم .

وانا طبعي اخذ موعدي واطوفه احيانا 1 بس في دكتوره خاصه قالت لي موعدج في 14/11 وانا ما صدقت خبر وفرحت وابغي افتك من الثقل والام الظهر والوجع الخفيف
وفي يوم 12/11 رحت الدوام وخلاص مب طايقه نفسي ومره تعبانه .. واقول لزميلاتي انا خلاص اليوم لازم اولد وبشرب زيت خروع ومتعوده اسويها ...وفعلا وانا طالعه مريت واشتريته وشربته الظهر وجاني اسهال عزكم الله بس كانت الام في الظهر كالعاده بس هذي المره اقوي

قلت بمشي ومشيت نصف ساعه وانا امشي اشوف الالام تجي وتروح تشبه الام الطلق بس مب منتظمه وانا امشي دخلني الخوف وطبعت ادعيه الولاده الموجوده في المنتدي وظليت اقراها وانا امشي

والساعه 9 حسيت بالم فضيع في ظهري بس ما احس باي الام في الرحم مثل ولاداتي اللي قبل ..قلت لزوجي كأني اليوم بولد وما اقدر استحمل الام الظهر هذي وظليت لين الساعه 12 اشوف وقاعده مكاني وفيني خوف وعلي فرح وعلي عصبيه عصبت علي زوجي المسكين يروح ويجي ويطالع عيوني ويقولي متي بتروحين المستشفي المهم اختلطت عندي الانفعالات ورحت الحمام ونزل عندي اشويه دم

وعرفت اني اكيد خلاص بولد قلت لزوجي شكلي بروح الساعه 5 الفجر روح نام انت .. دخلت الحمام واستحميت بماء دافي وشيكت علي اغراضي واغراض البيبي وبعدها الامي في الظهر ..

والساعه 1 قالي زوجي الطريق دبي الشارقه زحمه ويمكن ناخذ ساعتين من الزحمه والناس رايحه دواماتهم الصبح
وانا خفت اولد بالسيباره قلت له خلنا انروح الحين وطلعنا الساعه 2 وبديت احس بالام تحت بس وجع الظهر اكثر

وانا بالسياره وصلت المستشفي وفحصتني الدكتوره وقالت لي 6 سا نتي يالله علي غرفه ما قبل الولاده وطلعوني الساعه 3 وانا فوق تيني الام بس في الظهر وكانني بولد من ظهري

ومر الوقت من تبديل الملابس والتحاليل وقياس الضغظ والسكر واسئله الممرضه وصارت الساعه اربع ونصف وقالت لي الممرضه بفحصك وفحصتني وقالت لي خلاص عشره سانتي

وانا الامي كله في الظهر وجد كنت مستغربه من نفسي كيف بولد وانا موحاسه باي الم في الرحم الم خفيف بس قالت لي بفتح ماي الجنين عشان يجيك الوجع وفتحته وانا ولا هني وكل الامي بالظهر ونقلوني غرفه الولاده
والستر تقلي خلاص لازم تدفعين اقول لها كيف ادفع وانا ما تجيني الالام الدفع مثل ولاداتي اللي قبل

وما اشوف الا ثلاث سترات يقولولي يالله ابسرعه ادفعي دفعت بالغصب ويقولولي تدفعين غلط اقول وانا اصرخ من وجع ظهري اني مايستوي احس جسمي تحت مسكر وهم يقولي بس ادفعي ودفعت غلطت

وفتحت الجراحه القديمه وطلع البيبي راسه والا اسمع الستر تقلي صبري لا تدفعين البيبي مختنق والحبل السري ملتف علي رقبته ووجه ونبغي نقصه وقصوه وما اشوف الا الدم اندفع علي جدار غرفة الولاده و منقط علي وجهي وعلي الفراش والاجهزه

وطلع ولدي حمد وكان مزرق ومختنق المسكين والحمد لله الله حفظه لي

وكنت احس بحرق شديد وقالت لي الستر هذا من التمزق وجت الدكتوره وجلست تخيط فيني وبعد ما طلعت كنت ما اقدر امشي من الام الظهر والام عضلات الرجل وظليت علي هذا الحال لمد ثلاثة ايام .

والحمد لله قمنا بالسلامه وهذي قصة ولادتي



يالله امهات نوفمبر وينكم نكمل القصص ..

مبارك لك أختي أحلى نواعم أحلى حمود
و يخليه لك و لأبوه

الف مبروك لكل امهات نوفمبر وعقبال امهات ديسمبر

الف مبروك حبيبتي احلى نواعم:)

الف مبرووووك احلى نواعم ,,
يتربى في عزك حمد..

يالله يابنات نوفمبر ويينكم للحين مشغولين مع البيبي :)

أهلين أمهات نوفبر والحمدالله على سلامتكن

هذا قصة ولادتي

موعدى كان 15 نوفمبر ومن دخلت التاسع وانا حاسه انى ثقيله وكاره نفسي واريد اربي خصوصا انه اغلب الحريم في عائلتنا حوامل وعاطينهم موعد عقبي والكل ربى وانا بعدني :sad:

كنت امشي واركب الدرج وجاء يوم 15 وماربيت

رحت عياده خاصه قالت عادي التأخير خصوصا انى بجر بس قالتلى الماى على قد البيبي وروحي المستشفي إلى بتولدى فيه يسوي تخطيط حق البيبي

انا هذيك الساعة تروعت اروح المستشفي قلت بتريا وان شاء الله بربي

رجعت البيت ما خليت شئ ما سويته كل الاعشاب جربتها ما خليت شئ ما جربته كل مره حد يقولى اشربي هذا وبزيد عندج الويع

كل ليله يزيد آلام ظهرى واقول خلاص الصبح بربي ما استحمل الويع والصبح عادى يخف

احتشر على زوجي وقعد يخوفنى زيادة وروحت عند دكتوره ثانية سوتلى فحص وقالتلى مفتوح واحد سم بس الماى ناقص وايد على البيبي روحي بكره المستشفي واليوم اشربي زيت الخروع وان شاء الله بتربي

رجعت البيت وشربت زيت الخروع وتميت تعبانه طول الليل في الحمام عزكم الله وآلم بظهري :sad:

الصبح نفس الحاله بخير وعافيه يعنى مابربي:cry:

وروحت المستشفي انا وامي دخلت عنبر الولادة فحصتنى الدكتوره وقالت 1 سم

وخلونى في المستشفي عندهم طول الوقت وانا المشي في الغرفه احوس فيها وكل ما ارتاح شو تقولى امى امشي الصبح اليوم الثاني ما اقدر اتحرك إلى بمساعده امي قمت ارتجف واحس الالم يزيد في ظهرى وانا طول الوقت صابره وساكته

يات الدكتوره وفحصت 3 سم انصدمت كل هذاك الالم و3 سم :cry:

هذيك الساعه حسيت نفسي انهرت وقعدت اصيح متى بقتح 10 اذا يوم وليله كامله وآلام فضيعه 3 سم

امى المسكينه قعدت تهديني وتقولى توكلى على الله وهدى نفسج طاقتج تروح على الصايح ادعى واذكرى الله واقرى آيات أن شاء الله تربي بسرعه وهديت

بعد شوى يات النرس قالتلى يالله على غرفه الولاده استغربت كيف الحين تقولى 3 سم وهذا تقولى ولادة

روحت مع النرس وهذيك الساعة ياني خوف فضيع قعد اقول حق امي نرجع البيت وامي تضحك على

طلع راس البيبي وايد نازل وقالتلى الدكتوره بعطيج طلق صناعى

في غرفه الولادة حطولى التخطيط للبيبي وقالتلى النرس تمى على ظهرج لا تتحركى وانا خلاص بموت من ظهري ما استحملت انام عليه اتحركت وحتشرت على قالتلى صبرى 20 دقيقة وعقب بعطيج ابره قعدت وعيوني على الساعه مب طايعه تتحرك وخلاص احس ظهرى بتكسر عقب 20 دقيقه عطتنى ابره ما اعرف شو سوت غير احس انى ابا انام وآلام زيد وحطولى الطلق الصناعي
وإلا ريلي داق خبرته انى فى الولاده وياء هو وعمتى طول الوقت يلي يهوس على ظهرى على الساعه 11:30 حسيت الالم يزيد يقد اقولهم همزولى ظهرى يات امي قلتلها ما ترومى خلى ريلي يلست تقولى مسكين من الصبح هو قاعد عندج تعب الريال قلتلها ما يخصنى هو يهمز ظهرى هو يريد عيال وامى تقولى خلاص فضيحه فيه وانا محتشرته
عقب شوى فحصت النرس 10 سم

طولت ليت ما طلعت يزوي ساعة كامله

والنرس تبى ريلى يدخل وانا اقولها لا لا (بالانجليزي طبعا) وامى المسكينه مب فاهمه شو تريد النرس عقب ما طلعت من الولاده خبرتها

ربيت تاريخ 27 نوفبر

وعمرى ما بنسي هذا اليوم

حمدالله على سلاامتج فردوس الاحلام

الف مبروك لكل امهات نوفمبر

االله يبارك فيكم خواتي :shy:

والف مبروك فردوس الاحلام

ووين الباقين نتظركم؟؟؟؟؟؟؟؟؟؟؟؟؟؟؟؟:salam:

يالله ياباقي البنات وينكم :)

اجر وعافيه ان شاء الله

يتربى في عزكم وعقبال ماتشوفو عريس يارب

الله يسهل لكل الحوامل

ام شمه مشكوره حبيبتي

السلام عليكم يا أمهاااااااااااااااااااااات
الحمدلله على سلامتكم..وكل عام وانتوا بخير مقدما..
هذي أول عيد لنا ويا بيبياتنا الحلوين..هاااااا شريتوا لهم ثياب؟؟؟ :)
المهم بقولكم قصة ولادتي..


آنه كان موعدي 22-11 بس تأخرت وايد..ولدت 30-11 عشان ما اطلع من رابطة أمهات نوفمبر هههه

عقب ما طاف موعدي شربت خروع وشربت اعشاب ورحت امشي ولا فاد..يوم 29-11 قالت لي
الدكتورة بسوي لج طلق صناعي بكرة الصبح..خفت وايد ..وفي نفس اليوم فحصتني من تحت..وقالت لي مفتوحة 1 سم بس مافي الم كلش..
المهم رجعت البيت ..وقمت احس بآلام خفيفة وكان ينزل علي دم..تميت لي الليل..ومن ساعة 9 بالليل صار يجيني مغص كل 7 دقايق وبعدين على الساعة 2 صار كل 5 دقايق..خفت آنه..بس صبرت بعد..على الساعة 4 زاد الالم بس تم كل 5 دقايق..قومت زوجي من النوم وقلت له خلاص ما اقدر استحمل ودني المستشفى..وخبرت امي ..واول ما وصلت المستشفى على الساعة 5عند باب المستشفى انفجر كيس الماء وحسيت بشي دافئ ينزل علي وخفت زيادة..
دخلت وجردوني من ثيابي ولبسوني ثياب المستشفى وعطوا كل اغراضي حق زوجي ..وفحصتني النرس وكنت مفتوحة 3 سم بس..ولكن حدثت مشكلة..كانت فيني كحة ويوم قاسوا درجة الحرارة كانت شويه مرتفعة..ويوم سوو لي تخطيط لقلب البيبي كانت نبضاته مرتفعة وايد ونقلوني للعمليات بسرعة على الساعة 6 ونص تقريبا..
وعطوني انتيبايوتك عشان ينزلون الحرارة..وهاوشوني قالوا لي ليش ماخذيت ادوية للصخونة..وقلت انا اصلا ما ادري انه فيني صخونه..المهم من الساعة 7 الى الساعة 3 حطوا علي 3 سيلان وطقوني 4 ابر في الورك..وصرت في حالة لا يعلم بها الا الله..تعبت من الطلق وايد حسيت اني بموووت..وكنت اذكر الله على طول ..وامي وزوجي ما خلوهم يدخلون علي وايد.. :(
كنت انام واصحى لين يجيني الالم..يعني كل 5 دقايق..بس ما صرخت الا يوم حمى الطلق وزاد الالم..
وكانت النرس مو موجودة..وحسيت اني ابي اروح الحمام الله يعزكم..واصارخ على النرس واحس كانه دفع لا ارادي..المهم جت النرس وفحصتني الا تقول انتي مفتوحة 10 سم..فرحت..ونادت على البقية..وجهزوني للولادة..وقالوا لي وقت الالم دفعي..وكنت ادفع..مع ثالث دفعة خرج راس البيبي وتزحلق جسمه على الساعة 4 الا ربع.. وحطوه على صدري واول ما حطوه عطس يحليله..وقمت ابكي من الفرحة واحمد ربي انه صاحي..وكان طول الوقت قدامي واهما يفحصونه ويوزنونه..وبعدين خيطوني لمدة ساعة وشي تقريبا لانه وايد شقوا لي..بس ما حسيت بالم والحمدلله..وبعدين طلعوني وولدي عشان يشوفونه اهلي وزوجي..وخذوني بعدين على غرفة النقاهة عشان ارضع البيبي ويعطوني اكل ويخلوني ادخل الحمام الله يعزكم..ورحت على غرفتي على الساعة 9 مساءً..
وهذي قصة ولادتي بالتمام والكمال..
ومسامحة على الاطالة..