ما عندي احد اشكيلة همي.......غيركم

ط

طايره في السماء

عروس رائعة

20-10-2006 | 07:39 AM

حبيباتي العرايس أبي أطلع إللي بداخلي كلة عشان أرتاح مع أني لما شفت
مشاكل الأخوات أنصدمت والله وجلت في نفسي ليش أكتب مشكلتي واهي صغيرة بالنسبة
لغيري
المهم أني قررت أفضفض والسلام للي يبي يساعدني
أولا أنا متزوجة صار لي سنة وكم شهر ,وجبت ولد قبل 3 أشهر
أحب زوجي لأبعد الحدود ...
وهو بعد يحبني موووووت
تربينا مع بعض من كنا صغار لأنه أبن خالتي
ويمكن ماتصدجوني لو جلت لكم أننا حبينا بعض من الطفولة
أدري أني طولت عليكم
الزبدة
الناس وأمي وخالتي أم ريلي ويدتي
كلهم دخلوا في راسي الوسواس
(أعوذ بالله منه)

يجولون أن ريلج رح يتزوج عليج
في المستقبل

تعرفون ليش يجولون هالكلام
لأن عمي.أبو ريلي.
وجده
كلهم تزوجوا على نسوانهم
بعد قصص حب عميقة

فمثلا والدين ريلي

كانوا يحبون بعض بطريقة غير طبيعية

كان قصة حبهم ذايعه بين كل الناس

بس فجأة وعلى غفلة من خالتي وبدون أعذار تزوج عليها

عمي قبل 11 سنة وللحين بعدها تحت الصدمة

والله هذا الموضوع متعبني وايد

حتى أني بعض لأحيان أبكي طول الليل

وأنا اطالع وية عمري وهو نايم بجنبي
وأغلب الأحيان اصحية بسبب اصياحي

ويجعد طول الليل يهديني

ويجول مستحيل أطالع مرة غيرج

وتجولين باعرس عليج

والله
مستحيل

أف أبي أرتاح وانام دون

ما أفكر بهالموضوع

بليز ساعدوني

للمعلومة

زوجي مايرفض لي طلب

ولو قلتله ييب لي الجمر بيجيبة لي
بس هم افكر ان عمي كان نفس الشي مع خالتي

اسفة طولت عليكم
:sad: :sad: :sad:

ا

اسيرة قلبه

مشرفة سابقة

20-10-2006 | 08:20 AM

بعد قلبي والله

عورتي قلبي

ياحبيبتي لاتقعدين توسوسين صدقيني الوسواس هو اللي يجيب هالشي

انتي ارضي زوجك وعيشي حياتك طبيعي معه ولاتمللينه من كثر ماتصيحين

وادعي ربك دايم يحفظ لك زوجك

ولاتوضحين لزوجك نقطة ضعفك!!

بالعكس خليك عاديه جدا وقومي بواجبك تجاه زوجك والله يرضى عليك ويوفقك

ان الجميع مسافرون (احجزوا مكانكم من الآن)

تـــجــــمع لبنات التقويم (اللي حاطين تقوووووويم اسنان)

طريقة السينامووووووون وبالصووور

ا

انفينيتي

عروس مبدعة

20-10-2006 | 08:34 AM

اختي ليش تسوين جيه بعمرج؟؟؟
ليش تشترين الهم وتسوين له مكان في حياتج؟؟

أول مره اعرف ان زواج الزوج على الزوجه ممكن يكون شي وراثي الريال يورثه من ابوه وعمه
ويده. مستحيل هالشي يكون قاعده لحكمج على ريلج وتقييمج للأمور. بتقولين هذا مب تفكيري
انا هذا تفكير امي وخالتي ويدتي؟ انا اقول لج انه استوى تفكيرج انتي بعد واستويتي مثلهن
لأنج ابتديتي تحاكمين ريلج بعد. انتي ما تعرفين شو اللي كان بين ابوه وامه وشو هي الأسباب.

لو مثلا وحده ريلها يخونها ، هذا مب معناته ان ابوه يسوي هالشي!!! انزين ليش ما تكون الحرمه مثلا مثل امها بعد لو كانت راعية مشاكل او ا و او؟؟؟؟؟

اختي انتي ما تعرفين الغيب ولا تعرفين شو ممكن يستوي.. ليش تنكدين على عمرج وعلى ريلج بسبب هالظنون. مافكرتي انج بهالطريقه ممكن تزرعين سالفة الزواج في بال ريلج؟ ما فكرتي ان الزواج ممكن يحلى له؟؟ صدق ليش لا؟ مدام انج في شك ليل ونهار، ممكن يقول حتى لو تزوجت عليها ما بيكون شي مفاجيء بالنسبه لها وهي تقول اني مثل ابويي ويدي!!!

اختي استهدي بالله وابعدي عنج الشيطان والوسواس تراج انتي ممكن تدمرين سعادتج وابإيديج تخربين بيتج. كل ما تحسين انج ابتديتي توسوسين، افتحي كتاب الله واقري لين ما تحسين ان نفسج هدت مب تسيرين تقومين ريلج من النوم وتقولين كذا وكذا:mad2: ترى الريال بيمل
وزيدي اهتمامح وخلي هالاهتمام مستمر بإذن الله لين ما اثنينتكم تكبرون وتركبون طقم ضروس بعد

ط

طايره في السماء

عروس رائعة

20-10-2006 | 08:50 AM

والله كلامج صح في صح ليش

أتعب نفسي وريلي

وأنا عايشه حياه روعة ولا كنت أحلم فيها

الحمدلله يارب على نعمك

شكرا على نصايحكم حبايبي
وهالكلام رح أجطة ورا ظهري

ولا كأني فكرت فيه يوم

وبعدين ليش أشك فيه

ليش

تعرفين أنه ماعاد يروح لربعة بعد ماتزوجنا

عشان لا يروح من عندي ولا لحظة

وإذا يبي يروح مشوار صغير يلزم ياخذني

معاه

فديتة يارب

ربي يخلية لي ياااااااارب

ربي لك الحمد والشكر

و

وفا زايد

عروس متألقة

20-10-2006 | 08:55 AM

[grade="FF7F50 D2691E A0522D"]قلبي معاج حبيبتي.. ولاتظنين ان مشكلتك نشوفها سهلة
بالعكس حبيبتي اتأثرت وايد بكلامج
وأكثر شي زعلني .. انج مب حاسة انج بهالأفكار تتعبين نفسك وزوجك أكثر معاك .. لأنك تظلمينه
لأن الوحدة منا لما تزعل وتكون مضايقة .. ماراح تعطي .. وماراح تحسس شريكها بالراحة النفسية .. اللي هي أهم شي في بيت الزوجية .. وبدونها حتى لو كان فيه حب جنوني راح يكون فيه اضطراب وشك وخوف وتردد
فليش حبيبتي تظلمين زوجك بهالأحاسيس اللي انتي مب عارفة ولامتأكدة منها.. الا من تجارب شفتيها وكلام أهلك
صدقيني ياعمري مب كل الناس نفس الشي .. وممكن زوج عمتك كان يحبها أكثر من حب زوجك لك ..لكن انت ماتعرفين شو الظروف اللي خلته يتخذ هالقرار .. بالعكس حبيبتي لو أنا مكانك بتاكد انه الحب وحده مب كافي لانجاح العلاقة بين اثنين
والدليل هالتجارب اللي شفتيها .. هناك أشياء من وجهة نظري لاتقل أهميتها عن الحب في استمرار بيت الزوجية ..
مثل الاحترام المتبادل .. الصراحة .. الثقة ثم الثقة ثم الثقة ولازم تحسسين زوجك انك نصفه الثاني واللي تكملينه
خليه يرتاحلك ويفضفضلك دايما ولاتنتقدينه .. وامدحيه دايما وشجعيه .. فالحياة مشاركة في مرها قبل حلوها
فلا تنكدين عليه حبيبتي أكثر بهالأفكار .. وتعوذي من الشيطان .. ومادام هو يحبك كل هالحب .. احمدي الله على هالنعمة العظيمة .. وحافظي على بيتك بالهدوء والاستقرار .. ويمكن كان كلام أهلك عشان يخلونك تهتمي أكثر بنفسك ..بمظهرك.. بلبسك ..بتعاملك معاه.. ماأدري شو كان قصدهم.. بس الأكيد هم حبوا ينصحوك تهتمين أكثر..لكن الله يهديهم خوفوك وزرعوا في نفسك الشك .. لكن ماعليج أختي ومثل ماقلتلك عيشي حياتك بكل حب وراحة واطمئنان وشوفي الحياة وردية
وارمي هالأفكار ورا ظهرك بآلاف الاميال .. وعوضي زوجك عن هالفترة المأساوية ..وأكيد بعد أهملت النونو بدون ماتلاحظي.. فارجعيلهم حبيبتي لأنهم محتاجين حنانك.. وانتو تعتبرون بعدكم عرايس ماكملتوا غير سنة وشوي..والعيد بعد كم يوم وريه شطارتك .. واهديه هدية حلوة ..وابدي مرحلة ثانية سعيدة ان شاء الله
ربي يوفقك حبيبتي.. وادعيلك من كل قلبي ربي يحفظ بيتك وحياتك .. ويخليلك ابنك ويبارك فيه يارب
مع محبتي ... وفا زايد[/grade]

ق

قلب صافي

عروس مشاركة

20-10-2006 | 09:45 AM

ان شاءالله يبعد عنج الوسواس

و دايما احمدي ربك على النعمة الي انتي فيها .. و ان شاءالله ربي يزيدج من فضله و نعيمه

لانه بالشكر تدوم النعم

و ادعي انه رب العالمين يثبت قلبك و اكثري من قراءة المعوذات

و ان شاءالله تدوم حياتكم بخير و سعاده

ب

بحرينية أصل

عروس ماسية

20-10-2006 | 09:59 AM

مثل ماقالت اسيرة لا تخلينه يحس بنقطة ضعفج واهم شي تكوني واثقه من نفسج ان مافيج اي شي يخليه يتزوج عليج

حاولي تهدئين وماتخلين الوسواس يصيطر عليج .. دايما اقري المعوذات

أ

أسماء زكي الدين

مشرفة سابقة

20-10-2006 | 08:21 PM

أعجبني جدا كلام الأخوات خصيصا الأخت "وفا زايد" ... وأحب أضيف لك شيء بعد تعرفي ليش تزوج عمك على زوجته وجدك على جدتك؟؟!

لأنهن كن صماءات .. بمعنى الواحدة زمان كانت تفتكر لو أنجبت الصبيان والبنات وكثرت منهم زوجها ما يقدر يبعد عنها وهذا بالعكس هي تنشغل فيهم وتنساه وتروح أيام الحب والدلال وتحسسه (بالفعل) أنه شاخ وراحت عليه خخخخخخخخخخ فيحب يجدد شبابه .. لأنه مقتنع إنه بعده صغير .. ويجيب واحدة تعيد له أيام الشباب الأولى ...

أما أنت فلست خالتك أو جدتك ..أنت تعلمت أفضل منهن .. ودخلت النت واستعملت الكمبيوتر وكتبت لكل أخواتك في كل العالم مشكلتك ... إذا فأنت مختلفة ... لذا فسوف تشعرينه أنه شاب ومدلل وبعده عريس الأمس حتى بعد (شبعيييييييين شنه، وطقمين أشنان) .... فاهمة عليّ حبيبتي ؟؟!!

خخخخخخخخخ لو طلاسم قولي لي أوضح لك ...

ترى هن اتعقدن .. ويبو يعقدوك هههههه افرحي بعمرك وأسعدي زوجك وتهني معاه وسيبك من كلام الجدات والأمهات ... اللي هن على عينا وراسنا لكن كن دائما مكسورات الجناح وضعيفات ...

ط

طايره في السماء

عروس رائعة

21-10-2006 | 04:35 AM

أيه أعرف السبب إللي خلا عمي يتزوج على خالتي

هو مو مثل ماجلتي بلعكس ماشاالله معاهم عيال كثير أولاد وبنات

لا وبعد خالتي ملكة جمال ومازالت أجمل الجميلات

وتدلع زوجها وتحاول تخليه يحس بأنة بعده شباب

أما السبب إللي خلاه يتزوج عليها أن عيال عمامة تجمعوا عندة
وأقنعوة يتزوج على بنت عمة أهي مرة كبيرة ومطلقة ومعاها بنت
وقدروا يقنعوه بسهوله وتزوج على خالتي رغم حبه لها وهي الحين عايشة معاة بس بجسد بلا روح من القهر.....

أما انا لا توصوا حريص لأني دايما احب أريح زوجي لأبعدالحدود
وعشان كذا ما يحب يطلع من البيت....

ومن ناحية شكلي الحمدلله دايما أحب أظهر جمالي
وأسوي له إللي تسوية كل إمراة تحب زوجها واكثر.....

والحمدلله هالوسواس طلعتة من راسي

مشكورات خواتي

والله اني احب هالمنتدى والعضوات إللي فية

غ

غداري

عروس مبدعة

22-10-2006 | 02:57 PM

البنات كفو ووفو

والله يهدي بالج ويسعدج مع زوجج يارب

أ

أسماء زكي الدين

مشرفة سابقة

23-10-2006 | 07:32 AM

لا لإله إلا الله محمد رسول الله

أختي فعلا هي كارثة والمثل يقول: "الزن على الآذان أمر من السحر"

لكن يا أختي الموضوع ما يتم كده إلا في حالة إن الزوج نفسه عنده استعداد ...

وأحس إن زوجك غير ما شاء الله ربنا يحفظه لك ويخليكم لبعض.

طايره في السماء:
أيه أعرف السبب إللي خلا عمي يتزوج على خالتي

هو مو مثل ماجلتي بلعكس ماشاالله معاهم عيال كثير أولاد وبنات

لا وبعد خالتي ملكة جمال ومازالت أجمل الجميلات

وتدلع زوجها وتحاول تخليه يحس بأنة بعده شباب

أما السبب إللي خلاه يتزوج عليها أن عيال عمامة تجمعوا عندة
وأقنعوة يتزوج على بنت عمة أهي مرة كبيرة ومطلقة ومعاها بنت
وقدروا يقنعوه بسهوله وتزوج على خالتي رغم حبه لها وهي الحين عايشة معاة بس بجسد بلا روح من القهر.....

أما انا لا توصوا حريص لأني دايما احب أريح زوجي لأبعدالحدود
وعشان كذا ما يحب يطلع من البيت....

ومن ناحية شكلي الحمدلله دايما أحب أظهر جمالي
وأسوي له إللي تسوية كل إمراة تحب زوجها واكثر.....

والحمدلله هالوسواس طلعتة من راسي

مشكورات خواتي

والله اني احب هالمنتدى والعضوات إللي فية