ساعدوني الله يخليكم

دخيلكم ردوا علي يامشرفات وياخبيرات ترا صدق نفسيتي تعبانة بسبة هالموضوع .. وماكتبته الا بعد ماطفح فيني الكيل

الله يكون بعونك اختي شوفي اثمد انتي روحي المدرسة واحكي مع معلمة ابنك انها تهتم فيه اكثر وتحاول انها توجه الكلام اله وهي اللي تطلب منه انو يجاوب على الاسئلة وتكافئه كمان

يعني انتي خديلها لعبة مثلا وملصقات حق تشجيع الطلاب واعطيها للمس من غير ما ابنك يعرف وقولي لمعلمة ابنك انها هي اللي تقومه وتطلب منه يجاوب يمكن ابنك يستحي من المدرسة ولما ابنك حيجاوب حتكافئه المعلمة وتشجعه بعباراتها الحلوة

يعني باختصار اطلبي من المدرسة حقة ابنك تساعدك وباذن الله بيروح الحياء
ولا تتعب نفسيتك ولا شي كل الاطفال تقريبا بيمرو بمتل هالحالة بس الاهم انه نساعدهم على تخطيها وربي يكون بالعون ياااارب

مشكورة اختي الدمشقية بس انا هالشئ سويته لما كان ف الكي جي لدرجة ان لما كان يغيب عن المدرسة كنت اييب له هدية واخبره ان المس اتصلت وسئلت عنه ورسلت الهدية ويستانس ويحب المدرسة والمس بس مايتكلم .. ولايشارك وسويتله سالفة الملصقات بعد مااتفقنا انا وابوه مع المس بس ماشي فايدة .. ومرة سجلنا صوته وهو يقرأ ووداه حق المس وسمعته ومدحته بس بعد كأنه حالف مايتكلم ف الصف.. ابا شي غير.. شي يخليه يتكلم

اثمد:
مشكورة اختي الدمشقية بس انا هالشئ سويته لما كان ف الكي جي لدرجة ان لما كان يغيب عن المدرسة كنت اييب له هدية واخبره ان المس اتصلت وسئلت عنه ورسلت الهدية ويستانس ويحب المدرسة والمس بس مايتكلم .. ولايشارك وسويتله سالفة الملصقات بعد مااتفقنا انا وابوه مع المس بس ماشي فايدة .. ومرة سجلنا صوته وهو يقرأ ووداه حق المس وسمعته ومدحته بس بعد كأنه حالف مايتكلم ف الصف.. ابا شي غير.. شي يخليه يتكلم

أختي ابنك ما فيه شي لكن يمكن خجل ومثل ما ذكرت الدمشقية لن يحلها إلا المعلمة في الصف أطلبي منها أن تبدأ معه أن تنشيء علاقة جيدة معه ثم تطلب منه يجاوب ولو بحرف ثم كلمة ثم إن شاء الله لن تستطع إيقافه ...

على فكرة عندي بنتي لليوم هكذا ووقت ما تحب تجاوب وقت ما تحب لو طارت مدرستها لن تنطق ...

لكن كذلك ممكن تطلبي منها إنها لما تسأله ورفض ينطق تطلب منه أن يكتب الإجابة على السبورة وتشجعه وتمدحه ثم تطلب منه أن يخبرها بالإجابة في أذنها .. ثم تطلب منه يخبر الإجابة لصديقه أو زميل معه في الصف وهكذا ستتلاشى المشكلة ... :clap:

ماشاء الله الأخوات الدمشقية وأسماء،، عطزك أفكار عجيبة،، الحمد لله ولدك ذكي وماعنده مشاكل في النمو والذهن،، يمكن هو خجل ولازم يزول،، أمس كانت زايرتنه حرمة في بيت جدي بس هي بنتها عندها مشاكل في السمع وأعتقد عندها شي ثاني لأن الطفل الثاني مايتكلم الا بصعوبة، البنت ماتتكلم بالمدرسة ولا تشارك ولا حتى تمسك القلم،، والحين ناطرين رد الوزارة بخصوص الحالة...
بس أنت الحمد لله دام يتكلم معاكم بالبيت ويتفاعل فمالك الا المدرسة تحاول تدمجه بالصف وقكرة الأخت أسماء عن الكتابة عن السبورة بعد حلوة، جربوها والله يسهل إن شاء الله وطمنينا على الحال...

مشكورات خواتيه ع الرد .. الحمد لله اختيه رانيا هو ماعنده مشاكل لافي السمع ولا النطق ماشاء الله عليه ابو لسانين بس لما كان صغير سووله عملية القلب المفتوح .. بس ماظن ان هذا هو السبب ..و بجرب الي قالت عليه الأخت اسماء وان شاءالله يفيد وياه ..

مرحبا اختي اثمد...

اليوم لما كنت بالمركز الصحي عشان تطعيم ولدي.. كانت الممرضة اللي هناك تسولف عن ولدها.. ويا سبحان الله .. بالضببببببط مشكلتج اهي مثلها.. حتى شكيت انها انتي هههههه

المهم ان الممرضة قالت للمدرسة بعطيج هدايا واعطيهم اياه كنوع من التشجيع.. المدرسة قالت انا سويت هالشيء معاه.. حتى كانت فيه هدية كل الاطفال ميتين عليها وقلت ما بعطيها الا لفلان تقصد الطفل.. ولا رضى يجاوب بعد !
تقول طفلج ذكي بس ما قادرة اقيمه وللحين ما حطيت له درجات.. الاطفال اللي معاه سمعّوا حديث وسورتين وهو للحين ولا شيء .. رافض بتاتاً حتى مجرد الكلام.. رغم اني بس اطلع من الصف اشوفه يقوم ويلعب ويصارخ مع بقية الاطفال يعني عااااادي جداً..

المهم انها بالاخير حددت موعد مع الاخصائية الاجتماعية بالمدرسة ( المشرفة الاجتماعية عندنا في البحرين .. ) ولازم تحضر الام بس وتقعد مع الاخصائية يمكن تقدر تتوصل الى السبب الحقيقي..
اذا المس عندكم للحين ما سوت هالشيء.. اطلبي منها اذا ما تجاوب الطفل معاج انها تحدد لج موعد مع الاخصائية وروحي شوفي هناك شو صاير... بس تحملي يحس الطفل بوجودك او سببه.. عشان م يصر على موقفه اكثر..

سألت زوجي ( وهو مدرس ) وقال فعلاً بعد استنفاد كل الطرق والوسائل نطلب من ولي الامر مراجعة الاخصائي

بالتوفيق ان شاء الله..

مشكورة اختيه جمانة .. ورحنا انا وابوه للاخصائية اكثر من مرة وشفنا المس ومدحته ان هو حبوب ومؤدب بس مشكلته لو بتطلع روحها مابيرد عليها بكلمة .. سالفة الحلاوة سويناها .. والاستكرات .. ومانفع .. بس مرة يبت له سمكة حية ف قلاص شكله حلو وقلت له انها من عند المس واستانس لا وهددنا بعد لو ماتت انييب له وحدة ثانية ووافقنا :sad: .. وراح اليوم الثاني ولما سألته عن اسمه رد عليها .. زين ماماتت المس من الفرحة
احينه هو يحن ويزن يبا دراجة .. حلم حياته الدراجة .. فقررنا انا وابوه ناخذ له بزل ع شكل دراجة ونخبر المس كل ماجاوب تعطيه قطعة .. واذا مارد عليها ترد وتاخذ عنه القطعة .. ولما بيجمع كل القطع بناخذ له الدراجة وفهمناه هالشي وشكله متحمس .. ترا الدراجة بالنسبة له الحلم العربي:dd: وويارب يارب تنفع وياه .. فديته حبيبي يغمضني ومرات يعصب بي .. دعواتكم