لحقو عليي ولدي طاح و000000

حبيبتي والله عورتي قلبيه..فديته حبيبي :(

الصراحه ما اعرف شو اقولج لانه ما عندي خبره ..اتمنى البنات يساعدونج..بس اتوقع السن بيطلع له لما يستوي عمره 6 ستوات..لان هذا موعد ظهور الاسنان الدائمه...
ماعليه لا تحاتين..الحمدلله الطيحه يت على جيه...
الله يحفظه لج

هلا اختي غداري
اول شي ما يشوف ولدج شر ، واهم شي انه اهو الحين بخير

بالنسبه للسن اللي طاح فلا تحطين مكانه شي لانه بيطلع له طرس دائم اذا وصل عمره 6 سنوات

وبالنسبه للسن اللي اسود لونه اسود فذي الشي صار مع بنتي وعمرها 3 سنوات وكان نتيجه انها طاحت مرتين على حلجها ونفس الشي طلع دم لها بس في البدايه ما بين شي وبعدها تميت اشوف السن لونه متغير

طبعا اللون هذا لان الدم اللي يجري بالعصب داخل السن متوقف وما يالس يتجدد بيصير لونه اسود شوفي اذا ما يعوره ولا يطلع منه صديد معناته انه بتم له بس بيصير لونه اسود طبعا في حل تجميلي اذاكان مضايقج يسوون له عميله تنظيف للسن يسوون فتحته ويطلعون الدم ويتم بس شكليا السن
او انج اتخلينه على حالته لين ما يطيح ، طبعا الحين اكيد بيالمه لانه توه طايح

وفي احتمال واتمنى انه يصير لولدج لو انه ما صار لبنتي انه مجرى الدم يتجدد والسن بعدين بيرجع لونه عادي

لا تحاتين اهم شي اهو بخير وبسلامه ولو اعرف ان الموضوع مب هين على قلبج لاني مريت فيه

شكرا لكم بنات على ردكم
بس اخويي اقول ان السن اذا كان طايح بروحه يطلع في سن 6 سنوات لكن اذا كانو شايلينه يتاخر وايد معقولة هالشي صحيح؟؟؟؟؟؟

عشان ترتاحين اختي روحي لدكتور اسنان واستشيريه
بس اذا طلع السن 6 او بعدها ما لج الا تنتظرين لان السن اللي طاح لبني مب دائم لو كا دائم تقدري تركبين له سن بس مثل ما قلت لبني

انتي ما بترتاحين الا اذا سمعتي الكلام من دكتور وفحص ولدج مثلي ما ارتحت الا عندما شافت بنتي دكتوره وشرحت لي شصاير لها

اذا تبين عياده الدكتور صادق شرف عنده دكتوره اطفال وايد حليوه مع اليهال روحي شوفيها

اتمنى اني قدرت افيدج

السن اللي قلعوه ان شاء الله بيطلع بداله سن دائم
اما بخصوص السن الاسود او الرمادي فهذا عادي السن من الايام بيطيح وبيطلع بداله سن دائم

ومايشوف شر

ما يشوف شر والف الحمد لله على السلامة انا من رايي لا تحاتين وايد وتتعبي نفسيتج هو للحين صغير وان شاء الله بيطلع له السن سليم والحين ما ينخاف من هالعيوب لانها كلها تتغير ، بس علشان ترتاحين اعرضيه على اخصائي اسنان وان شاء يفيدج.

يوووووووووووووو فديته والله


ما يشوف شر ان شاء الله ............والله ما عندي خبره ابد

ان شاء الله ترجع الامور لمجاريها

الحمدالله على سلامة ولدك
ومايشوف شر يارب
ولا تكدرين خاطرك

حبيبتي غداري اعرضيه على طبيب الاسنان وهو راح يعطيك اقتراحات عشان ترقيع الوضع ..

ما يشوف الحبيب شر..

ابنتي عمرها ستة سنوات وثلاثة شهور سقطت عندما كانت في الثالثة من العمر وسنها انخلع تماما من مكانه فقمت بغسل فمها بالماء وأعدت السن مكانه وقمت بإمساكه بالمحرمة الورقية وظللت أدفعه داخل اللثة في نفس مكانه وهي تصرخ والدماء تخرج بغزارة من مكانه ... وقمت بالاتصال بطبيبة الأسنان في بيتها .. فقالت لي هاتيها في العيادة ساعة المغرب ..


وفعلا كان فقامت بإعطائها مضاد حيوي وجل يوضع على اللثة نفسها لأنها كانت متهتكة ومتبهدلة لأنها سقطت على يد الكنبة في الصالون ...

وقامت بإلصاق السن بالسن الذي بجواره بنفس المادة التي يقومون بحشو الضروس والأسنانبها (الحشو المؤقت) وأخبرتني أنه سيسقط بعد يومين وعليّ العودة إليها بعد اليومين وفعلا حصل ذلك فأعادة إلصاقه مرة أخرى .. وظللت أعطيها كل طعامها على شكل سوائل حتى الأرز والدجاج أضربه في الخلاط ولم تكن تستعمل ملعق ولا شوكة ولا أي شيء كانت تأكل بيدها وتضع الطعام عل جنب ...

تعرفي بعد سنة سقطت في بيت والدي وكنا في مصر وأصيب نفس السن والسن الذي بجواره ... وتهتكت اللثة أكثر من ذي قبل .... ولما ذهبت لطبيب الأسنان قال سنخلعهما قلت له وتظل بدونها قال أيوه .. قلت له لأ ...

كتب لها مضاد حيوي ومسة للثة ولما خرجت من العيادة سألتني أمي هل ستعودين بعد أربعة أيام لخلع السنين كما قال؟ قلت لها: لأ .. أنا كنت محتاجة المضاد الحيوي والمسة وأخذتهما ورجعنا مرة ثانية لأكل باليد والسوائل حتى أكرمها الله ...


والحين عمرها عدّ الستة سنوات وتغير لون السن فذهبت للطبيبة وأنا مرعوبة لكنها قالت لي طبيعي لأنه خلاص راح يتبدل ...

لكن تعرفي كانت قد قالت لي إذا تغير لون السن وأصبح غامقا لا بد من خلعه لأنه وقتها بيكون حامل لمكروبات ومن الممكن أن يؤدي لإلتهابات فألحقي بابن وأذهبي لطبيب الأسنان.

فديييته ياربي ,,

سلامات مايشوف شر ,,

لا الغاليه لا تخافين ,, احيد استوى جي و يا خويه ,, جلعو له الظرس ,, عقب كمن شهر ,, ظهر له ظرس غير ,, و طبيعي يعني ,,

اما الظرس الي لونه غامج ,, فاظن انه ميت ,, لان خويه بعد جي استوى له ,,

بس ماذكر اانهم جلعو له الظرس الاسود ,,

يالبي ,, حبيبتي لا تخافين عليه ,, دام عمره 4 سنين يعني هالاسنان اللبنيه ,,

يعني اصلا جي و لا جي بيطيحن ,,

ماعليه شر انشالله ,,

ما يشوف شر فديته

وحمد الله على سلامته

انا صار لي جديه واانا صغيره طلع لي 7 سنوات تقريبا طاح وانا عمري 5 سنوات وطلع لما وصلت 7 سنوات وطلع عادي واجلعته مره ثانيه عشان يكتملون اضروسي وبس

شكراااااااااااااااا لكل الاخوات اللي ردو عليي وانا اسفة تاخرت في الرد لان النت كان مقطوع عندي

المهم الحمدلله ولدي صار احسسسسن بوايد وقام ياكل وانا تعودت على شكله وهو بعد خلاص تعود بس ليل نهار يسألني ماما متى بطلع لي ضرس؟؟ وانا عاد استغليت الوضع وقلت له اذا اكلت خضروات وفواكه والاشياء الصحية بطلع لك خخخ وان شالله بوديه لطبيب اسنانه علشان اطمئن عليه اكثر

وشكرا مرة ثانية على ردودكم واهتماكم