قالت قصيمي قلت فخر ومعزه أهل الكرم والحلم والباس
قالت قصيمي قصدها بي تهزأ ماتدري اني بفتخر وارفع الراس
الحمد لله روسنا دوم رزة اللي خلقنا بس نحني له الراس
صافي نسبنا والحسب في عزة أصل وفصل والعرق دساس
أهل الوفاء والدين صافي منزه عن كل ماشاب العقيدة من أدلاس
حنا العقيلات انشدي رجال غزة حنا هل الدنيا وللدين حراس
حنا سنايد نجد في كل حزة لاخانت حلوق الرجاجيل الانفاس
حنا جبال يعجز الريح هزة حنا لنجد حزام وعصابة الراس
نارد حياض المرجلات ونلزه مانمشي دروب الرذيله والأدناس
من يغلط علينا لسانه نجزّه واللي يحقر قدر الرجاجيل ينداس
منّا العدو تكفيه بالعين خزّه يقضي عليه الخوف مع كل هوجاس
من ذكرنا بقلبه تثور نزه من طاري القصمان يبلاه وسواس
نومه كوابيس وروعه وفزّه دقت نواقيس الخطر والأجراس
وان هو لقي له من علينا يوزّه هون له الصعبات وابليس خنّاس
مايدري انه للمهالك يدزه عجلن على مبناه يمحي من الساس
يابنت حنا من نخانا نعزّه يامن بنا الملهوف وتهابنا الناس
مرسولنا للخير دايم نكزّه ولصرخة الملهوف نرخي الأكياس
تاريخنا مجد لبسناه بزّه نشمي بوسط السوق ماندحم الساس
لك ماتركنا بكأس الأمجاد مزّه واجد عليك ولمثلك حثالة الكاس
وش جاب حرّ الطير لفريخ وزه منهو يساوي جوهر الماس بنحاس
لا تحسبين انك لنا مستفزه وش باخذ البعوض من ريش قرناس
------------------------------
من الايميل..
تحية للقصمان من ســوســو
