لبنات الامارات وخاصة دبي

افاااااا عليكم
ماهقيتها منكم الحين خمس حلوات يقرووون الموضوع وما يردوون علي
كل هذا بخل افااااا

:confused: :confused:
:confused:

الظاهر انكم تبغوني ازعل عليكم

ين الكرم ياهل زايد هذا وانا ضيفتكم

:confused: :confused:

مرحبا وجة القمر:) :) :) :)



مبروك الف ................الف .................مبروك;)


الله يسعدج ان شا الله


ويا مرحبا فيج في دانة الدنيا



دبي وفي دار بوخليفة الله ايحفظة


بنسبة لسؤالج عن المحلات والمراكز

طبعا دبي معروفة بمراكزها

وهذي قائمة با اهم المراكز التسوق في دبي

مركز الغرير
هاتف: 2232333 4 (00971).
من أوائل مراكز التسوق في دبي به المئات من المحلات وقطاع ضخم من متاجر السلع المتوسطة والعالية القيمة. ساعات العمل 09:00 صباحاً-1:00 ظهرا ومن 5:00 مساءاً - 10:00 مساءاً.
___________________
مركز برجمان
هاتف 222 3520 (009714)
أحد أشهر المراكز الجديدة في بر دبي ويضم قطاعاً من أشهر المحلات البريطانية والأمريكية.
ساعات العمل: 09:30-1:00 ظهرا ومن 4:00 عصرا - 9:30 مساءا

____________________

سوق الذهب
يعد واحداً من أكبر أسواق بيع الذهب بالتجزئة في العالم، ويباع في هذه الأسواق مختلف القطع الذهبية بدءاً من السبائك الذهبية حتى القطع والمشغولات المختلفة، إضافة لمنتجات اللؤلؤ والأحجار الكريمة بأسعار تنافسية. ويتواجد في السوق العديد من المتاجر الصغيرة المكتنزة بالمشغولات الذهبية والمجوهرات من مختلف أرجاء العالم.

_____________________________

مركز حمر عين
هاتف: 2661164 (9714+)
مركز تجاري حديث يحفل بالديكورات الراقية والتي تضم النوافير ونباتات الزينة، كما يضم ركن للمأكولات والمتاجر الراقية. يتردد معظم الزوار على هذا المركز بهدف شراء التحف والمشغولات اليدوية المحلية.
ساعات العمل من 10:00 - 1:00 بعد الظهر ومن 4:00 - 10:00 مساءً
_____________________
مركز الجميرا بلازا
هاتف: 3497111 (9714+)
مركز تجاري عصري يضم تشكيلة واسعة من المنتجات.
ساعات العمل: من 7:00 صباحاً - 11:00 مساءً
_________________________

سوق نايف
سوق تقليدي أعيدت صياغته بشكل كامل
_________________

مركز وافي التجاري
هاتف: 3367125 (9714+)
يحتل هذا المركز الذي يضم العديد من المتاجر الراقية والمبني على شكل الأهرام المصرية العريقة موقعاً مميزاً على مقربة من جسر القرهود. وتعرض متاجر المركز العديد من المنتجات والأزياء المميزة.
ساعات العمل: من السبت حتى الأربعاء من 9:30 صباحاً حتى 1:00 بعد الظهر من 4:30 بعد الظهر حتى 9:30 مساءً. الخميس: من 9:30 صباحاً حتى 1:00 بعد الظهر من 4:30 بعد الظهر حتى 10:00 مساءً. الجمعة من من 4:30 بعد الظهر حتى 10:00 مساءً.
_______________________

وفي مراكز يديد فاتح في جميع الماركات العالمية وشكلة الغريب في جميرا ميركاتو

____________

مركز الواحة اتحصلين كل شي من ملابس اطفال وكبار واثاث البيت ومجوهرات والاسعار اتناسب الجميع
_______________________

مركز ستي سنتر من المراكز المهمة في دبي واتحصلين كل شي وكل الماركات من اغلي شي لين ارخص شي

_______________________

وهذي وصلة عن الفنادق في دبي


بس انا راي فندق جميرا بيتش من احسن الفنادق في دبي

http://go.3roos.com/EtdvPO6WOw2


وهذي الثانية
http://go.3roos.com/RIDAcycaFkf


واذا تريدين اي شي انا في الخدمة يالغالية






:D :D :D ;) ;) ;) ;) ;) ;) :rolleyes: :p :p

ما شاء الله الحرمان معلوماتج وفيرة لو يحطونج ضمن خدمة اهلا دبي بتبيضين الويه......

عزيزتي مثل ما قالت اختي الحرمان بس حبيت اضيف السيتي سنتر لازم

تزورينه وفي ميركاتو في الجميرا هذا مركز حلو وايد بتصميمه المميز....

وطبعا بالنسبه للفندق سيري برج العرب وانتي مغمضة عيونج واعتقد

الحين في عروض عشان المهرجان ......

وممكن تزورين في الشارجة صحارى والميغا مول ......

اتمنى اكون افدتج واي خدمة احنا حاضرين........

ماشاء الله البنات ماقصروا معاج

مثل ماقالوا المجمعات


وبصراحه انا اكثر عجبني من المطاعم

قرية البوم يخلونج في جو رومانسي

هلا والله وغلا

وجة القمررر

وينك ؟؟ غايبة عنا

أنصحك بفندق ( جميرا بيتش ) بصراحة رووووعة

ورايق جداً ، وراقي

ما شاء الله البنات ما قصروا في المراكز

اما الفنادق
عندج برج العرب

بس انا انصحج بفندقين وان شاء الله ماراح تندمين
وهم رويال ميراج ورتس الصراحة الجو فيها يمون رومانسي وهادي ( اسال مجرب )

والمطاعم موجودة في المراكز وعندج مطاعم في شارع الشيخ زايد وطبعا في في الفنادق

حبيباتتي : الحرمان وعروس دبي والحنونه وهمسة ولورا
اشكركم مرررره واتمنى الله يسعدكم

بس بطمع بكرمكم الحاتمي :o :o :o
واتمنى تزودوني باسماء مطاعم بليييييييييييييييييز
:o


:o :o

بنات وينكم واحد وخمسين قارئ وخمسة اللي ردوووا حرااام عليكم

بس مااقول الا الله يخلي الحرمان وعروس دبي والحنونه وهمسة ولورا

يللله ساعدوني علشان ادعي لكم ;) ;)

هلا عزيزتي وادللي الغالية.......

عندج مطعم القيصر .....أكله هندي وفيه كابينه يعني تاخذين راحتج......

ومطعم الدار بعد فيه كابينه ...أكله لبناني في جميرا......

وشارع الرقة كله مطاعم ...

والمراكز بعد......

وفيه قرية البوم بوفيه وبعدين تركبين في المركب جولة مجانا......

ولا تحاتين المطاعم في دبي كل شارعين في مطعم.....:D

أبالغ بس قصدي ما بتتعبين انج تدورين مطاعم......:D

اتمنى اكون أفدتج........

الله يسلمك عرووووس دبي وتضلين عروس على طول

والله مشكوره وماقصرتي

بس العتب على هالخمسين اللي دشوا وماكتبوا اه من كيد الحريم

:mad: :mad:

ماشاء الله اعداد القراء في زيادة
لكن للاسف الردود في تناقص

:mad: :mad: :mad:

اختي اسمحيلنا معظم البنات الي يدخلن اساسا مب من دبي وما عندهن معلومات عن الاشياء الي تبغيها عشان جذى ما يردن فأعذرينا اختي وحياج الله في دبي وان شاءالله تسنانسين في الامارات ,,,
طبعا انا مب من دبي لكن ازورها احيانا ,,,
أختي دبي كلها مجمعات يعني ابدا ما بتتعبين في البحث والشراء
يعني كل الماركات وكل المحلات التي تبغينها بتحصلينها بس انتي لفي وبتشوفين العجب ,,,,
أختي بالنسبه للفنادق ممكن يعجبك فندق رويال ميريديان شفت عنه اعلان في التلفزيون عجبني مررره ويطل على منظر رهيب ,,, طبعا بعد برج العرب لكن غالي يعني اذا كنتي ناويه تطولين في دبي احسن تاخذين فندق راقي واسعاره معقوله ,, وعلى فكره ممكن تسألين في المطار وهم بيعطونح ملحق كامل عن الفنادق واماكنها واسعارها وكل شي تبينه
يعني اذا تبين فندق بنص السوق او فندق مطل على البحر او او او او
بتحصلين كل شي موجود بس اسألي في المطار وهم ما بيقصرون ..
بالنسبه للفنادق الباقيه بصراحه ما عندي خلفيه واعذريني فيها,,
الحين باقي المطاعم وانا اتعشيت من فتره في مطعم القيصر اعتقد ذكرته لج وحده من الاخوات وكان حلو وتقدرين تاخذين لج غرفه لوحدك انتي وزوجج واكلهم رائع جدا جدا جدا ,,, هذا الي اقدر افيدج فيه واسمحيلي تراني مب من دبي ,,,,

بالنسبة للمطاعم مثل ما قلت لج في المراكز في زكن خاص بالمطاعم
وعندج بعد مطعم تنور في البر الثاني اكله هندي ووايد حلو وفي نفس الشارع في مطعم كواليتي وتندور ومقابل هذا الشارع مطعم موغل وهذيل كلهم اكلهم هندي وبعد في قصر الهند في القرهود
وعندج في شارع الشيخ زايد بعد مركز مزايا مطعم سي وورد سي فود المطعم بحري وبيعيبج وايد بس شوية غالي
وبالنسبة للمطاعم اللبنانية عندج الاتوماتيك وعندج الدار ويامال الشام
والايراني عندج مطعم حاتم وصدف والبرز والطاولة الحمراء
وهذيل اللي اتذكرهم حاليا وان شاء الله كل ما تذكرت مطعم بكتب لج اياه

وعلى فكرة
المفروض انج اتسوين برنت حق هاي الصفحة عشان ما تنسين الاماكن يوم بتين دبي
وعلى العموم التكاسي ما راح يقصرون معاج يدلون كل مكان

السلام عليكم ورحمة الله
:p الي كنت بقوله كلكم قلتوه ؟
شو اسوي الحين انا لووول
المهم اختي اول شي ركزي على مركز الغرير وماركاتو وستي سنتر عشان فيها كل المطاعم الحلوة والتسوق ولا تنسين مركز ابوهيل عشان تتسوقين زين اهناك عندهم شيل وعبايات واسعارهم حلوه
احسن فندق عندي انا ابراج الامارات وااااااااااااااااااااايد حلو اذا ماقدرتي تسيرين الحين روحي في الصيف عندهم عروض هائلة السعر يخلون نسبة 50% دايما من شهر 6 الين شهر 7 على مااعتقد ونفس المكان فيه مطاعم وااايد حلوه مثل مطعم فرايدز وكوكوز كلهم
اما اذا رحتي فندق ماريون فهو رائع جدا مابتتعبين لانك من تنزلين من الغرفة بيكون مركز حمر عين ومركز وربة تحت مره انزيلي برجليك لووول
اما فندق ستي سنتر فهذا رائع تطلعين من الغرفة على طول مجمع التسوق والمطاعم كله في نفس المكان بتستانسين وااايد
اما المطعم شليز - مطعم حاتم في ستي سنتر - مطعم بيلا في مركز وافي ( مركز راااائع جداً بس لا تروحين مطعم جوديز الي فوق تراه مو شي )
واتمنى لكي التوفيق في زواجك والذرية الصالحة انشاء الله ولجميع الاخوات
اختكم المحبة

ملاحظة اختي اذا ضيعتي ولا شي نحنا حاضرين في اي شي .. انشاء الله
خلينا على الماسنجر ونحن حاضرين للطيبين الي مثلج :)

بنت القبيلة
لورا
نور القمر

اموووووت فيكم حبيباتي
مشكورررين وماقصرتوا

والله اني ادعي لكم من كل قلبي;) ;)

;) ;) نسيت اخبركم عن مطعم قصر الهند من المطاعم الراقية وفي فندق حياة رجينسي المطعم الدوار



وان شا الله بدور لكم ;) ;) ;)

مرحبا بج في دبي دار الحي

و اهلا و سهلا

و اله يوفقج انشاء الله


اختي بالنسبة لفنادق
اذا حابة تسكنين في مكان يطل على البحر
فعندج الفنادق الي في منطقة الجميرا

جميرا بيتش
برج العرب
رويال ميراج ( و هاذا روعة )
المريديان
الريتز
شيراتون
جميرا هيلتون


اما اذا حابة في و سط الاسواق
فعندج الفنادق الي في و سط البلاد

فندق السيتي سنتر ( طبعا تابع لمركز التسوق السيتي سنتر )
فندق ماريوت ( طبعا في نفس المبنى الي فيه مركز حمر عين )
فندق شيراتون ديرة ( و هاذا يطل على خور دبي )
فندق هيلتون ديرة ( و هاذا ايضا يطل على خور دبي)
ميتروبوليتان بالاس
تاج محل
فندق حياة ريجينسي

و كلهم قريبين على الاسواق الي في ديرة


وفي فنادق اخرى على شارع حيوي في دبي
الي هو شارع الشيخ زايد

فندق ابراج الامارات
فندق فيرمونت
فندق هوليدي ان كراون بلازا
فندق دوست




و على ما اعتقد ان الاخوات ذكرو لج بعض من هاذي الفنادق


انشاء الله تستفيدين من هاذي المعلومات
و اي سؤال احنا في الخدمة

مثلا اذا حابة تسالين عن محل يبيع غرض معين
او اي شئ

لا تترددين

و شكرا