ساعدونى بخبراتكم

بس انا شايفة ان لسه بدري جدا
ولا انتي عايزة تعمليه قبلها كتجربه عشان تعيديها على الفرح تاني؟
بصي انتي ممكن تخلي لون شعرك الاصلي وتعملي فيه هاي لايت غامق كام خصله كدة وزعيهم بين الشعر دة لذيذ اوي وف نفس الوقت انتي احتفظتي بلون شعرك
وكمان اللون الغامق دة اللى انتي عملتيه لو عملتيه كيرلي بيبقى حلو اوي ويعتبر تغير بردو
زانتي في كل الاوحوال ومش انتي بس دة كل الناس لما بتعمل حاجة جديدة بتبقى مستغربه شكلها في الاول ف بلاش انتي تحكمي على نفسك خلى مامتك واخواتك واصحابك هما اللى يحكموا ويقلولك

ممكن تعملي شعرك بني نفس لون عنيكي هيبقى لذيذ اوي
وبالنسبه للماسكات والحاجات دي لو كانت طبيعيه ابدأي من دلوقت لكن لو كانت كريمات وحاجات من اللى بتتباع جاهزة من الصيدليه او محلات التجميل يبقى ممكن تجربيها دلوقت وتشوفي نتايجها ايه وبعدين توقفي استخدمها وترجعي تستخدميها تاني قبل الفرح بشهر ونص مثلا
لكن الشعر ابداي غذيه من دلوقت
وانا انصحك بانك تدعكي جسمك كل يوم بزيت زيتون وليمون وملح خشن
بجد هتشوفي نتيجة هايلة انا عن نفسي بعمل كدة كل يوم

متقوليش كدة يا قمر احنا هنا بنحاول نساعد بعض عشان لو ماساعدناش بعض مش هنلاقي حد يساعدنا
المهم انتي عايزة ماسكات لايه بالظبط؟
بصي انا هقولك لكل حاجة
للشعر :
اسهل حاجة انك كل يوم تدليكي شعرك بنوع زيت طبيعي من عند العطار زي مثلا زيت خروع ، لوز،جوز هند ، زيتون

البشرة :
للتقشير اسهل حاجة زبادي وترمس مطحون
ادعكي وشك باليمون بس من غير حاجة وسيبيه شوية وبعدين اشطفيه (بس لو وشك احمر خلاص وقفي متعمليش بس هو هيحرق شوية في الاول بس)
نضفي وشك بميه ورد

للجسم :
زي ما قلتلك زيت زيتون وملح وليمون كل يوم
وانا مع دة بعما حمام مغربي مرة في الاسبوع

ولو عندك اي اساله تاني قولي اوك ماتتكسفيش هههه