اللي ولادتهم في فبراير الجاي...حياكم

اهلا بيكم يا حوامل
انشاء لله دايما بخير وتعدي فترة الحمل علينا كلنا بسلام ونفرح بشفت البيبي
والله حبيبتي زوجة راشد انا ماعندي خبره بالحركه ولا اعرف هي عباره عن ايه اصلا بعد انا بالرابع بس ما احس شئ
شمووووووووووعه
فعلا احنا الان الحمد لله خلصنا من الثلاثة شهور المتعبه ودي احسن فتره في الحمل والشهيه تكون حلوه
علشان كده انا عندي اقتراح ان كل واحد تدخل وتقول هي اكلت ايه اليوم او ايه الطعام اللي تقترح ناكله النهارده ايه رايكم

أنا حسيت بالحركة في نصف الرابع وكان مثل النبض وماتحسي فيه إلا وإنتي نايمه على ظهرك وبعده باأسبوعين حسيت بحاجة مثل الحيه في بطني بس على فكرة حركة البيبي بطيئة الحين بسبب صغر حجمه في الاسابيع الجاية تحسي أكثر لأنه ماشاء الله يكبر الحجم
بالنسبة للأكل عني انا النفس مسدودة لو مش الخوف من الله على إلي في بطني ماأكلة
عندي أستفسار للجميع عارفين رمضان جاي وأنا شاكة في قدرتي على الصيام وراح أسأل دكتوري موعدي معاه الأربعاء هدا بس برضوا أنتوا إش رايكم في الموضوع................؟

حبيبتي ضي القمر
انا مثلك في موضوع الاكل بس انا المشكله اني فيه شهيه بس مش للاشياء المفيده اشتهي اكل مش مفيد خالص ومش قادره امنع نفسي
بالنسبه للصيام انا اناويه اصوم
ولو تعبت بفطر

صح انا كنت راقده على ظهرى وحسيت بشي ... يمكن هذى الحركه بس شعور غير


بالنسبه للاكل انا اول شهور الحمل اهتميت بالاكل عدل مدل على قولتهم فواكه وخضره وحليب ولبن واجبان
بس الحين مالى خلق ...... يعنى عادى اكل فاكهه الصبح وكافي العصر وفليل ممكن اتعشي عشا خفيف

والله احس بتانيب الضمير بس مالى شهيه

الله يعينا يا حوامل
علي موضوع الاكل
فعلا المشكله في تانيب الضمير
وبالمناسبه حبيت اقولكم الدكتوره قالت ايه لما جوزي قالها اني مش باكل
ضحكت وقالت احسن توفر وما انزعجت ولا حاجه ههههههههههه

صحيح قولوا انتوا تستخدموا شئ عشان التشققات ولا لا
انا بعد ما استخدم

التشققات شي لا بد منه ... بس فيه اشيا اتخفف من هالتشققات... المشكله انه طول فتره الحمل البطن صافي ولا فيه اثر وبس الوحده تولد اتبين البلاوي
عنى انا من بدايه الثالث بديت استخدم زبده الكاكاو من ماركه بالمرز ... وفيه كريم ثانى اسمه ستريش مارك شريته من الصيدليه عليها وحده حامل ... ومرات لما اتهايز ارش زيت اللوز اللى من ماركة جونسون ........

وعلى فكره تجنبوا الحك والهرش عالبطن ... لانه ايزيد العلامات مع انه والله مرات ايينى احساس خاطري اييب مشط واحك بطنى .

انا سمعت عن زبدة الكاكاو بالمرز وان شاء الله اجيبها

ايه اخباركم حوامل يلي احكوا

هههههههههههههههههه


ماشي صفينا انا وانتى يا عروس حيرانه


حوامل فبراير شكلهن وايد كسولالالالالات

هلا هلا والله وغلا بالحوامل وعرايسنا
وحشتوني الصراحة
والسموحة صار لي مده ما دخلت اللنت
شخباركم و وشخبار عيالكم ?????????
آنه أمس رحت للدكتورة وطمنتني عالبيبي وشفته وشفت القلب والرجلين لأنها كانت بتشوف نوع الجنس وأعتقد إحساسي بمحله والدكتورة قالت نفس الكلام بس ما بقول لكم عشان أفاجأكم بالولاده .
بالنسبه للتشققات بس في صدري وآلام ممله
أما البطن مليان كله شعر مع العلم أول مره يطلع لي بالبطن شعر أثناء الحمل !!!!!!!!!
ما أدري ساعات أقول يمكن من الأدوية اللي آخذها
بنات تكفون اللي صار لها نفسي طمني هل يطيح بعد الولاده ?????????
بالنسبه للنساه أحسن بوايد خفت والحمد لله

السلام عليكن

يا حوامل فبراير ...


اشحالكن عشان بخير


أنا الحمدلله بخير
بس ما ادري ليش هالكسل ضاربني ابغي افتح ملف واراجع ...

من كمن يوم شهيتي مفتوحه الحمدلله ..ما اخلي شي ما اكله ولو ما لقيت شي اكل جبس ههههه احس بالوناسه وانا اكل الجبس يم يم ...يعني تقدرون تقولون احب الجبوس استويت
طبعا الدياي استوت ما احبه فكل يوم اكل سمج ...بس عندي مشكله الامساك سبحان الله يوم اسير بيت اهلي واتغدى ما يصيبني امساك بس في بيت اهلي لازم يمكن من طريقه طبخ العيش ...

ومن امس الصبح واانا نايمه احس مثل رجفه خفيفه بس اليوم اكتشفت ان هالشي من دقات قلبي احسها دبلين وبقو هههههههه خصوصا يوم اكون طايحه على ظهري

بنات انا سمعت من عمتي ان من حركه البيبي تعرفين اذا بنت او ولد يله كل وحده منكن اتقول لي متى حست بحركة البيبي

وانا مثلج ... استويت ما احب الدياي واشم فيه ريحه مووول مووول مب شي .... عشقت السمج في فتره الحمل وايقولون الاشيا اللى اتحبين تاكلينها ولدج والا بنتج عقب يحب ياكلها ....

وبالنسبة للامساك كثري من الماى ......وترا الحديد اللى ناخذه سبب من اسباب الامساك ...

وصدقج عروس كتكوته من كمن يوم وانا طايحه اسمع دقات قلبي في اذنى من كثر ما هو الصوت عالي ومثل الرجفه

يابنات انا في حملي الأول كنت استخدم من البداية زيت اللوز الصافي وماشاء الله تبارك الرحمن مافيني ولا تشقق واحد!!!! وفي حملي هذا انشاء الله بابتدي استخدمة مرة ثانية.. صدقوني مافي احسن من الأشياء الطبيعية لانها كثير ممتازة...

امس الحمدلله رحت عن الدكتورة وطمنتني كل شي كويس وشفت البيبي.. انا الحين 14 اسبوع بالضبط... انشاء الله تعدي الأيام بسهولة وتكون ولادتنا خفيفة يااااااااااااارب

هلا حوامل
اخباركم كلكم ايه
انا بعد كرهت الدجاج وكمان مااحب السمك بس نفسي مفتوحه للحمام المحشي هههه
وكمان مثلكم اسمع دقات قلبي
بس لسه مش حاسه بحركة الجنين وده قالقني انا في الاسبوع ال16

مساء الخير ..

شخباركم ياحوااامل ..؟؟

عروسة حيرانة ..

عادى انج ماتحسين بالحركة انتظري لين الشهر الخامس ..

يسلمو حبيبتي نعانع طمنتيني

بنات أن من جد حاسة إني في مشكلة أنا الحين في الأسبوع17 طوال فترة وحمي -النساه-كرهت ريحة زوجي مع أنه يكون مستحمي وريحة لغيري تعتبر طبيعية إلا أنا ماأستحملها أبدا وإلى الآن هدا الأمر مستمر معاي وحاسة أن زوجي بدا يبعد عني بدون مايقصد شي وأنا مش حابه كده ممكن يستمر هدا الأمر إلى آخر حملي................؟
أمس رحت الدكتور والحمد الله طمني على كتاكيتي الصغار بس مش قادر يقولي ولد أو بنت وطلب مني في الأسبوع 22 أعمل أشعة عندطبيبة الأشعة المتخصصة.
سلامي لجميع الحوامل وبالأخص الكتكيت.

مرحبا

حرمة راشد

ههههههههههه تراني اقول ولدي بيطلع يحب السمج ..وريلي هله هل بحر تقريبا ويقول لي عفت السمج 30 سنه وانا اكل منه ههههههه ااما انا بدويه اكثر شي عندنا اللحم والدياااي بس عفته يا ختيه احس السمج خفيف عالجبد ...

وبالنسبه للامساك الله يعين بس اليوم احسن لاني سرت بيت هلي وكلت ههههه وعالغدى شربت سفن اب عشان اهضم خلاص قررت اشرب مرتين في الاسبوع شوه اسوي بعد ...


زين يوم طمنتيني لاني خفت قالت ام ريلي ما تاكلين بيضربج فقر دم بعيد الشر ...عني وعن الجميع
وبالنسبه لدقات القلب والله ساعات اتبهدل ابات ليلي احس برجفه خفيفه ودقات قلبي تزيد خصوصا يوم اكون طايحه ريلي قال بلاج تنتفضين بردانه ههههههه


بس ما احس بحركه اتقول عمتي اللي تحس في البدايه اتكون حامل بولد واللي تحس في الخامس تكون حامل ببنت انا ما احس والله ما ادري اذا يتحرك بدون ما احس ان شاء الله يكون ولد خاطري يكون بجري ولد واللي من الله حياه الله في الاخير هم عيالنا ونحبهم لو ولد او بنت





السموحه نسيتكن يا حوامل فبراير

قولن لي شخباركن وشخبار الحمال وياكن

وهل حلمتن بأحلام معينه والا لا

اخر دورتي 3-5
وتاريخ ولادتي 25-2 ان شاء الله اذا الله كتب لي

اهلا بيكي نونو
وربي يكملك علير خير