(( - - تجمع التاجــــرات الإماراتيات - - ))

أنا لي الحينة ملتزمة بالحضور:shy:

مرحبا اختي قوارير كيف بيكون عن طريج النت ... يا ريت اتخبريني

ويــــــــــــــــــــــــــن باقي التاجرات

مثلا على المسنجر
شرايكم؟؟

السلام عليكم,

تاجرات أبوظبي....ويييينكن ؟؟؟؟؟؟؟؟؟؟؟؟؟؟؟

ليش جي........ما في تجاوب مع الفكرة....:(

مع أني راسلت الأخوات مباشرة على الخاص.......واستمريت في التواصل معاهن....بس للأسف ما في رد...


طبعاً أشكر:

شما المحيربي
صبح وليل

هن الي تواصلن معاي....والتزمن بالحضور

وأيضاً الأخوات لي أعتذرن عن الحضور وهن:

دمدماني
مرمورة الأمورة.

على الأقل عطني ويه....وأعتذرن...


أنا بتلاقى مع الأخوات الي ألتزمن بالحضور....مع أختي وصديقتي...يعني بيكون التجمع 5 أشخاص....

مرحبا أختي - دمدماني -


للاسف......التجمع ألغي......لان في أخت صار لها ظرف طارئ وأعتذرت في أخر لحظة...وما تبقى غيري والأخت شما المحيربي...فقلت أحسن نأجل...بما أن المجموعة صغرت...وأنا كنت ناوية أزور الأخت شما في محلها بس قلت مرة ثانية ان شاءالله

بس تشرفت بمكالمة هاتفية مع شما المحيربي....وسولفنا شوي...وتعرفنا على بعض....وسوينا تجمع صغير على التلفون :)


بس أنا كنت أتمنى أن يكون في تفاعل مع الفكرة....من جميع الأخوات.....

وأنا مول محد رد عليه وانلبست

فانا اقترح عليج اختي شدون انا نتلاقى مع بعض ....شرايج

- ندى دبي -

إن شاء الله ....ليش لا....يوم بسيير دبي...بتصل فيج...وخبرج....اذا كانت ظروفج تسمح....ممكن نتلاقى

ندى انا رديت عليج

حتى شوفي ردي فوق

بس ما رديتي علي؟؟؟؟؟

إن شالله نلتقي فالأفرااااااااااااااااااح ((( الاخت بتخطب :) )))

يالله معليه خيرها ف غيرها إنشالله

في البداية أقول، شكراً ثم شكراً للأخت شدون لتفاعلها ومجهودها يزاها الله خير والله اللي سوته وتبرعت في من وقتها ما كان ممكن واحدة اتكلف نفسها فيه...أنا اللي اعتذرت للحضور...لأن صار لي طارئ في آخر لحظة وأنا سايرة في الدرب للقاء بالأخوات.. كان خاطريه أني أتعرف عليهن ونفيد ونستفيد من بعضنا...وأكرر تشكر على المجهود وأن شاءالله لنا لقاءات آخرى بأذن الله...

العفو أختي - صبح وليل - .... أنت ما تنلامين...لان فعلاً تواصلتي معاي وكان عندج رغبة في المشاركة ....

بس كنت أتمنى كل الأخوات يتفاعلن مع الفكرة.....لكن للاسف ما شفت اهتمام....يمكن لان التجمع مش رسمي.....بس أنا قبل كل شي بغيت نلتقي ونتناقش الأمور الي تهمنا كتاجرات...وشو ممكن نسوي مع بعض لمصلحة الكل....


يعني مثلاً ننضم معارض....مع بعض....بس طبعاً لازم المجموعة تكون كبيرة....علشان نقدر نحجز قاعات....ونرتب للموضوع...وما بيكون في شركة تستفيد من ورانا...بس ندفع تكاليف تأجير القاعات...بنفسنا....

وعندي وااايد أفكار....

ممكن كمجموعة....نشكل قوة ضغط...على المؤسسات...بالتفاعل معانا ..والاهتمام بدعمنا.....

ممكن نسوي دورات تعليميمة....في التجارة وتطوير المهارات....في مختلف المجالات الضرورية في التجارة مثل المحاسبة والكمبيوتر ...

ممكن نسوي دعايات لبعض....عند معارفنا وزباينا.....


غير أن....لما نقعد مع بعض ونتبادل أفكار...وخبرات....ممكن نتوصل لمعلومات من بعض...ما نعرفها..أو ما مرت علينا من قبل....


المهم.....أتمنى أشوف تفاعل مع الأخوات....حتى لو حالياً من خلال هذا الموضوع....بأن كل وحده تعطي نبذة عن بدايتها مع التجارة...وبضايعها...وتفاعل الزباين معاها....شو رايكم؟


(f)

أولاً بعطيكم نبذة عن نفسي:


الحالة الاجتماعية: متزوجة و عندي ولدين واحد عمره 2 و سبع شهور والثاني عمره 8 شهور

الدراسة: دبلوم عالي في المصارف والخدمات المالية + بكالوريوس في ادارة الأعمال من كليات التقنية العليا

نوع البضاعة: الملابس النسائية وخصوصاً قمصان النوم + أطقم السرير + قريباً الكريمات ..

بداية التجارة: شهر 4 سنة 2004 يعني من سنتين و شهرين


أبتديت التجارة من خلال البيت....بأن تشاركت أن وأختي وخالي في راس المال...بمبلغ 2500 درهم لكل واحد...يعني راس المال كامل كان 7500 درهم....وأشترينا في البداية....جلابيات هندية ...وفساتين وقممصان أمريكية...والحمدلله كان في أقبال على البضاعة...

وبعدين طورت موقع إلكتروني....وقمت أسوق البضايع عليه.....وهذا ساعد بأن توصل بضايعي لزباين في المدن الثانية وخارج الدولة...

وبعدين شاركنا في معرض المرأة العصرية....وبعده معرض رمضان والعيد...وكل ما نطلع فايدة....نشتري فيها بضايع يديدة....

بعد سنة قررنا نزيد راس المال ونفتح محل....وشهر 3 سنة 2005 افتتحنا محل شـــــــــدون للأزياء في أبوظبي....براس مال حوالي 70,000 درهم....لتغطية تكاليف افتتاح المحل...من إيجار أول ثلاث شهور...وديكور وتراخيص..ودعايه...وبضايع للمحل....

والحمدلله...المحل في تحسن مستمر....وأهم شي أنه مغطي على كل الخساير...وفي أقبال من الزباين على نوعية البضايع الي نييبها...



يله..كل وحده تخبرنا عن نفسها (f)

السلام عليكم الغاليات

تسلمون والله على المجهود اللي تسوونه في لم شمل التاجرات الاماراتيات بس المشكلة انه مهما حاولتوا ما راح تكون في استفادة للجميع ولو تاخذون برايي راح يكون اسهل بالنسبة لواااااااااايد من التاجرات انهن يلتقن مع بعض عن طريق الماسنجر يعني لا الوقت والضروف تساعد الجميع على اللقاء خارج النت انا عن نفسي خاطريه احضر مثل هاي التجمعات بس ظروفي العائلية ابد ما تساعدني يعني حرام ان بعض التاجرات يلتقن مع بعضهن وبعضهن لا يعني لو صدق تبون انا نستفيد من هاي التجمعات المفروض انا نسهل على التاجرات مو انصعب عليهم انا متأكدة ان وااااااااايد تاجرا ت عندهم ظروف اما مثلي او اي شي يمنعهن من انهن يظرهن من بيوتهن علشان مثل هاي اللقاءات يعني يا عزيزتي شدون انتي لا تقيسين ظروف الناس على ظروفج انتي واااااااااااايدات اللي ما يقدرن ويمكن بعد هن تجرات واهلهن ما يعروفون بشغلهن هذا يعني اسهل طريقة في نظري هي الماسنجر يعني نحدد يوم معين وساعة معينة يكون فيها اللقاء ولو كان في اي اوراق تحبون انوا توزعونها علينا او شي تقدرون ترسلونها عن طريق ارسال الملفات عادي وااااااااااااااايد راح تسهلون على انفسكم وعلى الاخرين بعد

اتمنى انه يكون الاقتراح مفيد للأغلبية

والله يوفقكم وييسر لكم الخير دنيا واخره

@ اختكم في الله @

- شما المحيربي -

أفا والله.......ليش زعلتي....:(

ما نرضى على زعلج ...... شو الحركة الي زعلتج مني؟؟ علشان ما قدرت أزورج في المحل؟؟؟ ......بس أنا قلت لج أكيد لنا زيارة...في يوم ثاني......صدقيني......هذاك اليوم كانت عندي أرتباطات ثانية...في بيت هليه...ناس زايرينهم...وأنا كنت ناوية أروح التجمع العصر لمدة ما تزيد عن ساعة.....وبعدين....أرجع للضيوف.!!

أنا بعد ضيعت وااايد من وقتي....ووقفت الشغل على تطوير موقع شـــــــدون الإلكتروني وكل وقتي أرسل رسايل خاصة للتاجرات...وأحاول أنسق بينهن....حتى موضوعي عن الموقع الإلكتروني أهملته لان ما كان عندي وقت أرد على كل الرسايل الخاصة...........وغير أني.....قعدت أستعد للطلعه....وخليت عيالي بالساعات ما عطيتهم ويه...حليلهم.....!!!


المهم.....اذا بدر منا شي ضايقج.....السموحة منج ومن حرمة أخوج.....ولا تشلين في خاطرج....أحسن أنج قلتي الصراحة علشان لا أثقل عليج مرة ثانية...


وبالنسبة للتجمع على النت.....فكرة حلوة...وأسهل على الجميع......وأنا فعلاً أبتديت الفكرة....بأن حطيت نبذة عني وعن تجربتي في التجارة.....وتمنيت الكل يشارك بالمثل.....

السلام عليكم الغاليات

اوكي اختيه شدون انتي بديتي وان شا الله ما ينتهي الدرب اللي بديتيه الا بالخير

وهاي نبذة عني ان شا الله انها ما تكون ثقيلة عليكم

الحالة الاجتماعية : متزوجة وعندي 3 اطفال الكبير عمره 6 سنوات الوسطانية عمرها 4 سنوات الصغيرة عمرها سنتين و6 شهور

عمري : 30 سنة ادري عيوز بس يلله شو نسوي شكلي صاير مثل المثل اللي يقول بعد ما شاب ودوه الكتاب وانا بعد ما عيزت دخلت التجارة بس الله يعين

درجة تعليمي : ثانوية عامة ادبي - دشيت الجامعة سنة بس الله ما اراد اني اكمل وقعدت سنة في البيت وعرست بعدين وكنت دفعة 1994 في جامعة الامارات في العين لاني كنت في العين اول ويوم عرست ييت بوظبي

بدايتي في التجارة بالضبط : بتاريخ 17 - ابريل - 2006 يعني قبل شهرين تقريبا وليش علشان اطلع من حالة الحزن اللي كانت مخيمة علي بعد وفاة الوالد الله يرحمه يغمد روحه الجنة ان شا الله وعلشان نساعد نفسنا شوي بالحياة الصعبة والغالية اللي حاطة علينا هالايام
موضوع التجارة شراكة بيني انا واخت ريلي بس اللي بتشوفون ويهها على طول في المنتديات هو ويهي انا لانها اولا ما عندها كمبيوتر ونت وثانيا واعتقد انه هو الاهم انها ما تعرف لسوالف النت مع اني اريد اعلمها احسن علشان يوم ما اكون فاضية هي تراعي مصالحنا بدالي بس ان شا الله تتعلم وتشوفونها بينكم بعدين

نوع التجارة : حاليا بيع العطور العربية والمخلطات والعطور الفرنسية المعباة والدخون والعود المعطر والعود التايلندي اللي ما يفرق عن الكمبودي اي شي بالعكس احسها احسن منه واقوى بعد والعود الازرق التايلندي بعد بالاضافة الى عمل الصناديق والتوزيعات للي حابين طبعا والحين اشتغل على بعض تصاميم التوزيعات علشان انزلها ان شا الله اول ما اخلصها ادعولي اتوفق ان شا الله

طموحي في التجارة : اذا الله وفقني ممكن اسوي لي انا واخت ريلي واختيه محل شراكة بينا احنا الثلاث ان شا الله ولغاية هذاك الوقت بتم موجودة ان شا الله في النت

طريقة بيعي : بالمفرق والجملة

ما ادري هاي النبذة كفاية والا في شي بعد ناقص احس اني قلت كل شي عندي يعني اصلا ما عندي شي اقوله

والله يوفق الجميع ان شا الله وييسر الخير للجميع ان شا الله دنيا واخره

@ اختكم في الله @

عسى بس الأخت شما المحيربي ما تضايقت من ألغاء الموعد، ما عليه أن شاءالله بتكون في أفكار وأقتراحات ثانية لمتابعة أمور التاجرات بدون ما نقطع أشغالنا، واتزاماتنا...


بالنسبة لبطاقتي الشخصية....

أنا متزوجة من أربع سنوات، عندي بنت 3سنوات و3أشهر، ولد عمره سنة و8 أشهر...خريجة ثانوية عامة سنة 98، وجرست في جامعة زايد سنتين بس ما كملتهم، وتزوجت بعدها بسنتين، وبعد ما يبت عيالي قررت أدرس الثانوية العامة هالسنة، علشان أدش الكلية وأكمل دراستي العليا...((أم مثابر فديتني)) بديت التجارة بالضبط قبل 6أشهر...والحمدلله كانت بدايتي لي الحين حلوة...وما فيها مصاعب، راس مالي استلفته من زوجي، ورجعته والحين أتاجر في مختلف الأشياء اللي لها اقبال في السوق مثل الماكياج(أستورده من الكويت) وصوابين معطرة...


عمري 25 سنة...وساكنة في ضواحي بوظبي...وأهلي في بوظبي...من ناحية التجارة بس أتاجر في النت، وما عندي أهتمام أني أتاجر في الخارج(عن طريج محل) وفي مشروع موقع الكتروني في بالي بس لما تستقر ميزانيتي، وأكمل سنة من التجارة...


ويعطيكم ألف عافية...

- نجمة الفجر -

شكراً على مداخلتج.........والنبذة الي عطيتينا أياها عنج وعن تجارتج.....

الله يبارك لج في عيالج.....ويجعلهم قرت عين لج :)

ليش تقولين 30 سنة عيوز :) بعدج شباب...والعمر كله جدامج.....تراني من حوليج...عمري 28 سنة

الله يرحم أبوج ويغفرله ويسكنه فسيح جناته.......سبحان الله....وأنا نفس حالتج.....أبوي الله يرحمه توفى ...وأنا قاعده أحضر لافتتاح المحل....وكان أكثر واااحد يساعدنا ويشجعنا على التجارة....الله يغفرله...


ما قلتي لنا....كم راس المال الي أبتديتي فيه التجارة..؟؟؟


بالتوفيق....والله يزيدج من فضله

------------------------------------------------------------------------------------------------------------------

- صبح وليل -

الله يخليلج عيالج....ويبارك فيهم...ويجعلهم قرت عينج....:)

بعد ما قلتي لنا....كم راس المال الي أبتديتي فيه؟؟؟؟

والله يوفقج....ويوسع عليج أبواب الرزق

السلام عليكم الغالية

والله اول راس مال بديت به كان 1000 درهم تقريبا لاني اشتغل شوي شوي يعني احاول اني اخذ على قد الطلبيات اللي تييني بس تعرفين المركب اللي ليها ربانين تغرق بس ان شا الله ان مركبنا ما تغرق يعني مرات اضطر اني اطلب اكثر من المطلوب واتوهق فيه بعدين بس ان شا الله اني اعرف كيف اصرف اللي عندي بطريقة تريحني وتريح الزباين

والله يوفقد يالغالية وييسر لج الخير ان شا الله دنيا واخره

وتعرفين انا عندي بعد افكار واااايد عن التعامل من بينا بس كل شي في وقته حلو

@ اختكم في الله @