خواتي العمانيات....الجار للجار....!!

حبيبتي تنفع افكار من صلاله
ظفاااااااااااااااااااااااااااااااااااار ارض اللبان؟؟

أكيد تنفع أختي a7laa 3roos
ومشكوووورة ع الرد....

هلاااااااااااااا والله حبيت الموضوع إختي مشكورة على إقتراحك للفكره بالنسبة لليلة الحنا عندنا تختلف من منطقة للثانية يعني مثلا إحنا عندنا 6 مناطق فيعني عندنا اكثر من لبس عندي الصوري من المنطقة الشرقيه واللواتي من مسقط والبلوشي من الباطنة والثوب من مسندم والظفاري من صلاله وغيره وغيره هذا للبس اما الحفلة فهذي قصة ثانية :)
من وين أبدى ياربي أخاف أقصر لأن إحنا عندنا أكثر من حفلة بس أنا بقولك عن حفلة الحنا
في منطقة الباطنة العروس تلبس العماني الأخضر وتكون متغطية طبعا ولابس الحيول الذهب في رجلها يزفونها للمكان اللي بيحنونها فيخ والمسمى بالحجله ويكون هناك 2 حريم يحنونها ياريت لو أقدر أحطلك الصور بس ما اعرف كيف أسويهم صدق ببتخبلين عليهم إذا شفتيهم إيش رايك تحضرين حنتي وتشوفي :) يكون أحسن أسفة للإطالة بس صدقيني هذا يعتبر ولا شي على فكرة إغنية الجسمي لارو لارو عمانية يغنونها ليلة الحنا وقت مايحنون العروس :)

مشكورة أختي &فارسية& على الرد....وشكلها ليلة الحنه صدق حلوة عندكم...:)
بس ياليت لو تقدرين توصفين لي المكان اللي تيلس فيه العروس...كيف يكون؟؟؟ وإذا بندخل معاها بنات صغار شو ممكن يشيلون؟ وإذا حابيين يكون في توزيعات للمعازيم شو تقترحين؟؟؟
ياليت أي حد يقدر يفيدني ما يبخل علي.....

اختي العادة إن العروس خوات العروس او بنات عمها او قرايبها يعني يزفونها هي تكون بالنص وهم حواليها و إذا كان في يهال طبعا يدخلون قبل مع المبخرة ويرشون ماي الورد على المعازيم وممكن حد يكون قدامها وشايل مصحف واليهال يكونون ماسكين صينية الحنا وشلون اوصف لج المكان اللي تكون العروس جالسة فيه امممممممممم يكون تراثي يعني مثل الكوخ :) والله ما اعرف حتى اوصف اسمحيلي انتي ارسلي لي ايميلج وراح احاول ارسل لج صور هذي الاشياء ومايصير خاطرج الا طيب حبيبتي والجار للجاااااااااااااااااااااااااااااااااااااااااااااار حبوبة

موضوع حلو اختي....
اختي اذا تبون ادخلون معاها بنات صغار على ما اعرف يشلن مبخركبير
بنسبة لتوزيعات ما في محدد على راحتكم
اما الكوشه ما اقدر كيف اوصفها ..

موفقين

او وعادة إحنا نوزع حنا على المعازيم او بخور :)
يعتمد وايد أشياء بس إحنا نفضل الطيب

مشكوراااااات فديتكم.......
ما قصرتوا والله......
أختي &فارسية& بطرش لج إيميلي.....
وبانتظار أفكار جديدة......

وياليت من خواتي في الإمارات يساعدوني وين ممكن أفصل لبس عماني راقي للعروس؟؟؟

أحنا أكثر الأزياء المشهورة عندنا هو الزي الصوري والي يكون عبارة عن دشداشة فستان قصير لتحت الركبة عشان يبين جمال الصروال او البنطلون مطرزة الأكمام ويكون التطريز يدوي وبنطلون يكون من تحت كذالك مطرز باليد ومن ثما ثوب القبعة ويكون لونه أسود وممكن يكون الوان ويكون عليه تطريز من ورا وقدام ممكن اكثر لو شفتي الثوب الكويتي وثوب النشل البحريني قريب منه لكن طريقة اللبس تختلف لنه يرفع شوي على فوق.


اللبس العماني أو لبس أهل مسقط ومعظم المناطق عبارة عن دشداشة وصروال وشيلة كبيرة وهذي كلها تكون مطرزة بالخياط بالتطريز المعروف .


الثوب الظفاري طبعا الكل يعرفة الي كون قصير من قدام شوي وطويل من الخلف.

وطبعا كل هذي الأزياء تلبس معاها الحلي العمانية المتنوعه من ذهب الراس والمرتشحة والحواجل في الرجول وكل صبع له خاتم.

يعني أختي أنتي يبي لك زيارة لعمان وأسهل لو تعرفي حد من البنات العمانيات الي عندكم ساكنات هناك واتوصيها أتجيب لك لبس متكامل.

والف مبروك اختي

مشكوووووورة الغالية أم أنوار......
بحاول أشوف وحدة عمانية تقدر توفرلي ياه....
وأرجع أكرر طلبي إذا في حد في الإمارات يعرف وين ينباع اللبس العماني، أو وين ممكن أفصله...
بلييييييييييز لا تبخلون علي......

اختي مثل ماقالت اختي فارسيه احنا مثلا عندنا في الباطنه تكون ليلة الحنا مميزه بلبس العماني التقليدي ونحاول نلبس اغلب ملابس المناطق تكون الحفله كوكتيل من الملابس التقليديه وتكون هم الكوشه تقليده الحريم يسونها من الخصف ومرصعه تكون بالمرايا والملابس وفي محلات الين بدوا يتفننوا في عملها ووتكون العروس لابسه اخضر ولابسه كل ذهيها وتجلس في الكوشه التقليديه احنا انسميها(الحجله)وتجلس بنت تجنيها ويتم رقص تقليدي واحيانل نوزع هدايا عباره عن هنا مطحون واشياء تقليده : واحيانا تقوه حرمه تحط في يد كل وحده شوي من حنة العروس هذا اللي الحين اذكره بس صج فكرتج حلوه

وخذي بعد بافكارالفارسيه :
والملابس التقليديه والفضه بتحصليهن في مسقط منطقه اسمها مطرح في سوق كبير وخاص بالاشياء التقليده فيه اشياء حلوه

والله يهنيكم

واي استفسار انا حاضره من عيوني

ينقل الي ركن استفسارات العروس

هلا اختي

انا بخبرج شو سوت حرمة اخوي يوم الحنا مالها ... وان شاء الله افيدج

هي جمعت مابين التقليد والحداثه ...

اول شي بالنسبه لملابسها هي لبست ثوب وكندوره لونها اخضر والتفصيل بحريني وعلى فكره هي مفصله الثوب والكندوره في الامارات واستأجرت الذهب اللي هو عباره عن الطاسه اللي يحطونها فوق الراس والمرتعشه والمريه والجف وعلى فكره هي كانت متحنيه قبلها ف الصالون

بعد استأجرت جلسه لونها اخضر طقم كامل يعني ... المخاد واللي بتيلس عليه حتى علبة الكلينكس خضرا وياي وياها مصحف محطاي في علبه خضرا بعد ... وطبعا تعدلت وتمكيجت

سوون الاكلات كلها تراثيه ... الهريس والخبيص واللقيمات والعيش واللحم عشان المعازيم

حطت كل اغراضها اللي مجهزتنهن اللي نجول عنها الزهبه في مكان مفتوح يعني مثل العرض عشان اللي يدش يشوفهم ... وبالنسبه للذهب سوت له صندوق خاص مزين ومعدل وحطته وحطت عليه اناره اكثر يعني طالع ملفت للانتباه

طبعا يابت فرقه شعبيه مع الطجاجات ...

ويابت اشياء تراثيه يعني مخاريف والمراش والمجامر اللي فيهن البخور ... وحطت ف المخاريف ورد مجفف... فلما طلعت من الغرفه بيزفونها عشان يشوفونها ... يابوا وحده من الطجاجات وشلت الحنا وهو عباره عن مبخره كبيره يزينونها ويحطون فيها مرايا واذا حابه تحطين فيها بيزات هذي بعد عاده جديمه وتحطي فيها الحنا وهذي المبخره اهم شي في حفل الحنا ...الطجاجه شلت المبخره اللي فيها الحنا على راسها ومشت جدامها ... ويابت بنت اخوها الصغيره وعطتها المصحف اللي ياي مع طقم الجلسه ومن وراها ثلاث بنات لابسات نفس الشي وحده شاله مخرافه وحده مجمر البخور وحده المرش ... والباجين كانوا شالين مخاريف وجفير واشياء تراثيه يعني

وزفونها على اغنية لا اله الا الله يعني ايقاع عماني ... ومشت جدام المعازيم الموجودين كلهم وبعدين رجعت ويلست على الجلسه اللي مسوتنها واللي ايي يسلم عليها ويبارك لها ... وطبعا ام العروس تعطي الطجاجه هذي بيزات من عندها يعني اونه قدر بنتها ومقياس فرحتها

وبعدين يحطون الاكل للمعازيم

بالنسبه للتوزيعات يعني مب شي محدد على راحتج اللي تحبينه


بالنسبه لحنا المعرس .... نفس الشي بس الحنا اللي يحطونه في المبخره اللي تصير مثل الكوشه تكون محطايه ف بيت احد من اهل المعرس ويكون بعيد عن بيت المعرس ويروحون يبونها من ذاك البيت في زفه وطبعا الفرقه اهم شي ولازم الحنا يحطونه في السياره اللي فيها الفرقه

لما يوصلون البيت يكونون مجهزين له جلسه خضرا ... ويلسونه ويبدون يحنونه ولازم اثنين من اهله او من ربعه يتحنون معاه ... واللي يبي ينجط ممكن هذيج الحزه وهم يحنونه ... بعدين اييون ربعه ويشلونه عشان يغسلونه وممكن يسوون فيه مقلب يعني نوع من الضحك والفرفشه ... مثلا يجطون عليه رمل او يرشونه بالماي

ويعني هذا اللي اعرفه واتمنى اني فدتج ولو بشي قليل واي استفسار انا حاضره

واااااايد أفدتيني أختي alreeem044، ماشاالله شكلها كانت حفلة حلوة وايد....
بس مسكيييين المعرس بيكون أخوي انشاالله، ما أتخيل يجطون عليه رمل او يرشونه بالماي :)
مادري الغالية إذا عندج فكرة وين فصلت مرت أخوج اللبس؟؟؟
ومشكووووووووووريييييين كلكم ع التواصل

سلام يا حلوووين :)
حبيبتي اريام هذا الموضوع ان شاء الله بيفيدك كثير
وفيه الكثير من الازياء العمانية:shy: :shy:

http://www.3roos.com/forums/showthread.php?t=164381&highlight=%E4%E6%C7%E1+%C7%E1%E5%E6%CA%ED
وموضوع اخر :shy:
http://www.3roos.com/forums/showthread.php?t=142076&highlight=%E4%E6%C7%E1+%C7%E1%E5%E6%CA%ED


(f) (f) (f)

Aryam:
واااااايد أفدتيني أختي alreeem044، ماشاالله شكلها كانت حفلة حلوة وايد....
بس مسكيييين المعرس بيكون أخوي انشاالله، ما أتخيل يجطون عليه رمل او يرشونه بالماي :)
مادري الغالية إذا عندج فكرة وين فصلت مرت أخوج اللبس؟؟؟
ومشكووووووووووريييييين كلكم ع التواصل

شوفي الغلا هي استأجرته من عند وحده في الشارجه تبيع وتأجر فساتين للعرس وحفلات الحنه وغيرها

وبصراحه كان يهبل .... كان وايد فيه شغل والطرحه كانت رهيبه

ألف شكر الغاليات......
أختي عمانية، الملابس اللي في الروابط بصراحة......













رهيييييييييييييييييييييييييييييبة،،
إذ ما لقيت لبس جاهز باخذ الموديلات وبوديهم عند المصمم يسوي لي مثلهم......
وقريب انشاالله بحط لكم فكرة العرس عشان تساعدوني فيها...