تجمع جديد لرابطة شهر سته سابقا وحاليا امهات تجربة الولاده ومابعدها

[grade="00BFFF 4169E1 0000FF"]هلا حبيبتي عروس اغسطس
تدرين انا ما جربت المكسرات .. وفعلا راح اجرب الجوز
مشكورة حبيبتي والله يعين الجميع
ويخلي لج عزوز

شهد حبيبتي انا عندي نفس المشكله
ولدي بيكمل شهر ولما الحين رضعاته مب منتظمة
والسبب اني ارضعه طبيعي وما يشبع واضطر اسوي له صناعي وما يشرب الا نص الكميه وعقبها بساعه يصيح جوعان وهكذا معاه طول اليوم
الله يهديهم ان شاء الله بس تعب حلو
الله يخلي لج ولدج يا رب

يلا اخليكم ولا اطولون تراكم توحشوني وتوحشني سوالفكم
وهالسوالف تخفف علي لأني احس اني محبوسه في البيت
مب قادرة اطلع وبصراحة مليت لدرجة ان امي للحين تقول لي نامي
على ظهرج ولا تتحركين واا مليت بس انا بصراحه ما اسمع كلامها
الله يعين

مع السلامة[/grade]

مراااحب بالغاليات ^_^
..

شهد ومووون اشلونكم .. واشلون الصغار الحلوين .. عسى ما امتعبينكم هههههه
..

بخصوص الرضاعه الطبيعيه انا ناوية اوقفها عن ولدي .. أحسه ما يشبع ..
وفي نفس الوقت مابي اخبص يعني مابي اعطيه طبيعي على صناعي بنفس الوقت ..
جذيه بتتعب معدته .. ما شاء الله العيال كبروا ويحتاجون كمية حليب أكثر ..
في حريم ما شاء الله يتم الحليب بصدرهم سنة كامله .. وانا من الحين بدا يقل حليبي ..
الله كريم إن شاء الله ..
..
ما قلتوا لي شخبار الوزن عندكم .. نقص وزنكم ؟ والا زاد ؟
انا الحمدلله باقي لي كم كيلو وارجع وزني الطبيعي .. قبل الحمل ..
بس ترا الرضاعه الطبيعية لها دور كبير في شد البطن والرحم سبحان الله ..
..
مووون بقولج شي ..
اغلي لج حليب نيدو وحطي معاه الحبة الحمرا واشربي بيزيد لج الحليب ..
وحتى الحسو نفس الشي بعد يزيد الحليب .. جربي والله كريم ^_^ ..
..

شهد وينج يالقاطعه ..
وما طمنتيني على ولدج ان شاء الله احسن الحين ؟؟
يارب يكون بخير وصحة وعافية ..
..

على فكرة شهد اتصدقين من يومين كنت في الاهلي مراجعة دورية ..
وسألت عن اسعار التطعيمات عندهم .. قالوا لي كل تطعيم سعره يختلف عن الثاني .. !!
سبحان الله يحبون الفلوس في هالمستشفى بس ما شاء الله شطار درجة أولى ..
..
ياللا ما بقى شي على التطعيم الثاني .. إن شاء الله
..

بخصوص شهادة الميلاد والجواز .. طلعتيهم له والا لين الحين ؟

..

والحين بخليكم ياحلوين واشوفكم عن قريب مع آخر المستجدات ..
: )

مون وام عزوز

فديتكم نصيحتي لكم لا تقطعون الحليب الطبيعي عن عيالكم ابدا
لو رضعه وحده في اليوم طبيعي وباقي صناعي

انا عانيت وايد من الصناعي والله متعب لرضيع وايد
كل اشوي اركض فيه المستشفى
والله تعب لو ارضع طبيعي مايتعب مثل ماترضعين صناعي

الله يعين

حاسبوا يااخواتي وبعدين ماباقي شئ شهر واسبوع وعيالنا
بيخلصون 3 شهور باذن الله

انا باذن الله حجزت على بدايه شهر التاسع على العمره
تخيلوا مافي حجوزات كل محجوز
ابي اروح العمره واشكر ربي على النعمه اللى عطاني اياها
وعلى سلامتي وصحتي


ام عزوز انا اليوم كنت عندهم اليوم سالتهم قالولي التطعيم لبيبي شهرين
اربع تطعيمات بــ 650 ريال

انا بشوف اول شئ مركز الصحي واذا كان موضوع سهل
ماافي زحمه ولا اجراءات تشيب الراس
بطعم ولدي هناااك
واذا سالفه تعور الراس بوديه عند دكتور مامون

تدرين يحب ولدي وايد لانه يوم كنت اولد وهو عندي كان يحاتي
على زوجة ولده لانها كانت تربي في الخور
وجابت ولد بنفس الوقت اللى انا ربيت فيه
1/6/2006

شهادة ميلاد تخيلي قدمنا قالوا بعد اسبوع
راح زوجي لهم قالوله لا تعال بعد 20 يوم !!!!!!!!!!

ماادري بيطلعون شهاده الميلاد ولا جواز دبلوماسي الله يهديهم ههههههههههههه

الله كريم

عزوزي طلعتيله جواز فديته ؟!

والله عروس حليب الصناعي وايد متعب يقولي مامون لو رضعه وحده طبيعي
على الاقل اقوله والله صدري نشف ماافي شئ
هو ينصحني بالطبيعي لو رضعه وحده لان لو ولدج فيه امساك
انتي تشربين عصير برتقال يمشي بطنه
اذا شربتي حلبه يعطي عافيه لولدج

اي مرض يصيب ولدج تقدرين تعالجينه بحليب الطبيعي

ماادري ويش اقولكم

والله تعبت نفسيا بسبب الغازات والمغص
وولدي صوته راي من الصياح ياقلبي

الله كريم

مراحب شهد ..

الله يسلمج حليبي اصلا صار ما يشبعه وايد قليل ..
ومو زين حق ولدي يوم اخبص له الانواع تتعب معدته ..
يا أني اوقف الطبيعي وارضعه صناعي ..
او اني اعطيه الطبيعي لين يجف صدري ..
بس بهالطريقة بضطر ارضعه كل ساعة لأنه ما بيشبع ..
..
انزين ليش عانيتي من الصناعي اي نوع حليب
تستخدمين ؟؟ يمكن المشكلة في نوع الحليب
انا استخدم حق ولدي حليب ابتاميل مافيه سكر
وخفيف وايد على المعده .. الحمدلله مافيه غازات ..
..

بتروحين العمرة ^_^
ما شاء الله .. والله حتى انا بخاطري ..
يالله عمرة مقبوله مقدما .. وبما انج بتروحين
عندي لستة أدعية ههههه لا تنسين تدعين لي فديتج ..
..

بخصوص التطعيم ..
ما يندرا بجرب في المركز الصحي وبجرب في الاهلي ..
وبشوف شنهو الفرق بين الاثنين ..
..

دكتور مأمون طيب يحليله وشاطر ..
وقال لي عن حفيده هههههه كان وايد فرحان ..
الله يخليه له ^_^ .. وصح ولدج انولد بنفس التاريخ ..
ياحظ ولدج عيل يحبه ههههه ..
..

وان شاء الله تطلع شهادة ميلاده عن قريب : )
..

الجواز لا لين الحين .. بس طلعت له الشهادة ..
انا ناطرة أبوه يرجع من السفر ويسوي له الجواز بإذن الله ..
انا ما معور قلبي ومضيق لي خلقي غير زوجي اللي ماقعد مع
ولده الا ساعات قليله بس وسافر .. الله يرده بالسلامة يارب
..

والله يعينج ويقويج على تعب الياهل ..
بس تعبه راحة وعسل صح ههههههه الله يخليه لج ..
..

عروس اغسطس

ومو زين حق ولدي يوم اخبص له الانواع تتعب معدته ..
يا أني اوقف الطبيعي وارضعه صناعي ..
او اني اعطيه الطبيعي لين يجف صدري
؟؟!!!

من قالج هذا الكلام
لا فديتج هذا مهب صحيح
انا مامون كان يقولي يريت لو تعطينه رضعه وحده بس طبيعي
وبتنحل كل المشاكل الغازات معااااه والبلغم

اليوم كنت بالاهلي ولدي وايد تعبان من الغازات
مالقيت دكتور مامون لقيت دكتوره عطيه هي على ماعتقد باكستانيه
اكثر من رووووووووووووووووووووعه اتجنن فديتها كانها رزفي
وايد وايد حلوه نصائحها واسلوبها وعطتني ادويه ريحت الولد على طول

انا اعطي ولدي حليب ابتاميل كمفورت 1 يساعد على الهضم
وايد زين ولدي مرتاح عليه ولكن وايد اضطر اجديه
والغازات ملعوزته هذي يومين
اعطيه اليانسون ولا في فائده

دكتوره عطتني ديسفلاتيل 10 نقاط في الفم وتخيلي ربع ساعه
وطلعت كل الغاازات منه ما شاء الله

الصناعي يدخل الهوا في البطن الطبيعي مافيه الهوا لذلك
مايتعذب بالغازات

عروس اغسطس جربي رهش انا جربت الحلبه وجربت حبة الحمرا
وبالاخير الرهش
والله من اكلت رهش انجنيت صدري بغا ينفجر
تسخنت وولدي الله يهديه مارضا يرضع
كنت اشفط واحطله الى ان نشف صدري

تخيلي دكتوره تقولي لو في صدرج حليب لحين
عطيه لو رضعه وحده باليوم تقيه من الامراض وتفكه من
الغازات
حتى لو باقي صناعي سبحان الله

اي عن وزني لاني مارضع وتغذيتي كانت عاديه
رجع وزني خلال 20 يوم من بعد الولاده
لدرجه رحت لموعد والله العظيم انا جالسه في
قسم الانتظار والنيرس تنادي في اسمي وتدور علي
ويوم قمت وكلمتها تقولي لا مستحيل انتي ام خالد ههههههه نووووووو نووووو
لاني نزلت 23 كيلو في 20 يوم تخيلي

والحمد الله ولكن اللى مخرب علي الكرش
احس يبيله وانا بديت اسوي تمارين بطن ولكن احس بطني مايرجع مثل قبل
في كرش من منطقه اللى تحت السره

اي والله عطيني ادعيه وانا باذن الله بدعي لج ولعزوز فديته
اخبار الضفدع ؟

الله يرجع ريلج بالسلامه وترتاحين ياعمري
واحسن لج لحين بيرجع وبيكون عزوز في سن حلووو
بينتبهله وبيلعب مع ابوه
انا ريلي كل يوم يقولي متى بيسولف على ويبلعب معاي ههههههههههه

تخيلي عروس ريلي بدا يفتح موضوع نجيبله اخو ومادري ويش
حرام يتم بروحه عصبت عليه وصحت قلتله انت ماتحس
انا اللى اتعب ومافي حمال اللى بعد سنه ونص او سنتين
المصيبه دكتوره رزفي مانعه عني لولب والابر والحبوب منع الحمل
وكاتبه لي بس تحاميل قبل الجماع

الله يستر ياعمري

مافيني احمل والله تعبت وايد
انا ماتعبت من الحمل ولا القيصريه

اللى تعبت منه رضاعه وتبديل والرعايه
والسهر عن جد نفسيتي كانت زفت
مهب متحمله نفسي

وريلي ويش عليه ينام بروحه ومرتاح لا سهر ولا شئ

اي عروس تطلعين مع عزوز واشلون اذا تبين تروحين معاه
سيتي ؟ اشلون تتجهزين للطلعه
انا هذا السبت اول مره بطلع معاااه وخايفه يسولي حفله في السيتي
ابي اطلع استانس مابي اصيح هههههههههههههههههههه

هلا وغلا أمهات شلونكم عساكم بخير
وحشتوووووووني كلكم،،،لي فترة اقول بدخل وبكتب قصة ولادتي بس جواد ماعطاني فرصه
يادوب وقت اللي ينام احاول ارتاح،،،،صج الحمل مو شي قدام هالتعب اللي نحس فيه
قصة ولادتي ياحلوين ::

طبعا أنا كان محدد لي اولد 20/5 بس تأخرت 10 أيام فكان لازم طلق صناعي لان الدكتورة تقول مايصلح تتأخرين أكثر،،،وعلى هالمشي اللي مشيته بالتاسع ماكان عندي أي بوادر ولادة ولا ماعدا تقلصات خفيفة مرة تروح وتجي
المهم اليوم العاشر بتاريخ 29 دخلت المستشفى عشان موعدي مع الطلق الصناعي وأخذت أول تحميلة الساعة 11 الظهر وقالوا لي خلال 6 ساعات راح تحسين بألم عقب بيشتد وانشالله على الفجر بتولدين

مرت ال 6 ساعات وماحسيت بشي ويقولون الجهاز مسجل انقباضات بس مرة خفيفة والرحم مانفتح عندي ابد لغاية 8 بالليل،،،حطوا لي التحميلة الثانية وهاذي عاد حسيت فيها بالم في البداية كان خفيف عقب صار يزيد وزوجي معاي يقرأ قران ويخفف عني شوي لاني خفت،،وقالوا لي تمشي شوي حتى يساعد شوي الرحم ينفتح
الالم يزيد ويجون يكشفون يقولون الرحم مانفتح،،،انا خلاص جاني إحباط،،،عقب الألم خف ورجع زاد وكل خمس دقايق يجوا يكشفو،،بعدين قالوا لي الرحم فتح 1 سم،،انا استانست قلت بدت تنفرج،،واطالع في هذيك الساعة الغبية اللي بوجهي والوقت مايمشي والالم يروح ويرجع،،لغاية 7 الصبح وانا كل مايجي الكشف يقولون 1 سم،،، حطوا لي التحميلة الثالثة وقالوا لي 6 ساعات واذا الرحم يظل مايستجيب للطلق راح تولدين عملية لأن مانقدر نعطيك تحميلة زيادة لان الجرعات الزايدة تسبب مضاعفات
انا هني خفت،،لاني ماتهيات ابد للقيصرية،،على بالي بولد طبيعي،
المهم هالتحميلة كانت مووووووووووووووووووووت،،،، والله تعذبت عذااااااااااااااب الألم يذبح والتقلصات تزيد وجسمي متكسر علي وكل ماتج الدكتورة تكشف تقول لي 1 سم،،،انا هني قمت اصيح لاني خلاص تعبت حيل والساعة 2 الظهر قالوا لي خلاص راح تدخلين العمليات على الساعة 6 اذا ما انفتح الرحم غير هال 1 لأن مانبي نتأخر عليج
وقع زوجي على الاوراق وجوا لي الاخصائييين حق التخدير والقلب واللي منو،،،وعملوا لي الفحصوات اللآزمة،،وكانوا خايفين لاني ماصرت اتنفس عدل من التعب

بعدها وقبل لا ادخل العمليات صار ينزل علي وانتو بكرامة دم،،وزاد الألم بشكل فظيع حتى ناديت عليهم وانا اصرخ تعالوا اكشفوا علي اكيد انفتح الرحم وايد لان الالم صار لايحتمل وزاد
ولما جوا كانت المصيبة انه لسه 1 سم،،،قال لي الدكتور اللي كشف علي انه ماراح ينفتح اكثر لان عنق الرحم صاير لورا،،والبيبي رافع راسه شوي ومو مستقر في الحوض والرحم ماقاعد يستجيب
من الافضل القيصرية،،،توكلت على الله ودخلت العمليات على الساعة 6 وشوي المغرب،،وانا مرعوبة لاني اخاف من التخدير،،،وانا طلبت منهم نصفي بس مارضوا كنت ابي اشوف ولدي لحظة مايطلع
الساعة 7 الاربع طلعوا لهم جواد برا،،وانا ظليت بالعمليات وماصحيت الا على 9 خلوني بالملاحظة ساعة وعقب وودوني غرفتي وانا مو مستوعبة اني افتكيت وولدت،،كان ريلي ينتظرني بالغرفة وجابوا لي عقب ولدي بس قمت اصيح لاني ما اقدر احمله
حاولت انام بالليل ماجاني نوم،،،يوم ثاني كان لازم اقوووم من السرير،،،يالله على هاللحظة تحسين بالمووووووووووووووت والله ألم فظيع والحمام و و و يالله مابي اتذكر هالالم،،ماكن يخف علي الا بالمسكنات،،ظليت بالمستشفى 5 ايام،،ختنوا ولدي ثاني يوم من ولادته،،حاولت ارضعه بس حليبي كان قليل
يوم ورا يوم وانا بالمستشفى احس حالي احسن بالذات مع المسكنات،،ظليت آخذها لمدة اسبوع عقب ماطلعت من المستشفى،،يوميا لي ابر،

فترة النفاس كانت مرررة صعبة ،،انا بالاساس مازدت في حملي الا 8 كيلو،،،نزلت 6 بأول اسبوع وعقب صار وزني كل ماله وينقص لغاية مانزلت 6 ثانية في هالفترة وصار وزني اضعف من وزني قبل الحمل،،،لأني ما آكل عدل وما انام شي،،،انا ارضع طبيعي وصناعي لان ما احس حليبي يكفيه،،وعلى آخر الليل احس صدري ينشف من الحليب فلازم استخدم الصناعي

لا وصابتني حمى النفاس وهذاك اليوم ارتفعت حرارتي للأربعين وظليت بالمستشفى ساعات عشان تنزل ونزلت شوي،،،وبنفس اليوم الفجر انخفضت حرارتي عن المعدل الطبيعي وصابني برد خلاص كنت راح اجن،،وظليت يومين على هالحال لغاية ماصرت اوكي
ولدي متلعوز من الغازات والمغص وماخليت شي ما استخدمته،،شاي اعشاب جميع الانواع ،،ادويه مو فايد معاه شاي
حتى انا ما آكل اشياء فيها بهارات ولا تسبب غازات ممكن تنتقل له،،بس احس الحال مو متغير
الدكتور يقول هذا طبيعي وماراح تخف الغازات الا اذا بدا الطفل يآكل،،،يالله صج يتعذبون اليهال

الحين انا خلصت من الاربعين من فترة ورجعت شقتي صار لي شهر،،،وهات يالسهر مافي نوم ولا راحة
ابي ارجع لحياتي قبل بس ماكو مجال البيبي مآخذ كل الوقت
ابي اطلع على راحتي،،اذا بروح اشتري له شي لازم اوديه لاختي او امي عشان مايفضحني قدام الناس
بس الحمدلله وجودهم بحياتنا وعلى الرغم من تعبهم نعمة،،،وانا ما اتخيل حياتي بدون ولدي

الله يحفظ لنا عيالنا ويحرسهم من كل شر

اسمحوا لي طولت عليكم،،،بس بايالله حصلت لي فرصة ومادري متى بدخل عقب

[grade="00BFFF 4169E1 0000FF"]هلا بأحلى امهات
اشلونكم واشلون عيالكم الله يحفظهم

عروس انا ما خليت شي ما سويته عشان الحليب والحين اعطيه
تقريبا رضعتين في اليوم مع انه ما يشبع عقبهم اسوي له الصناعي
بس ما ابي اقطع عنه الطبيعي وانتي بعد حاولي ترى الطبيعي احسن
والله يعين ويهديهم بس


شهد انا بعد ولدي عنده غازات وامساك الله يعزكم
وديته عند مهند وغير لي حليبه وصرت اعطيه سميلاك ادفانس
صار اول يومين زين لكن رجع له الامساك مرة ثانيه
ومحتارة ايش اسوي والله تعبت من كل شي


بالنسبه لشهادة الميلاد كل يوم زوجي يروح لهم وما في فايده
انا محتاجه لها عشان اقدم اجازة امومة للشغل
ولما الحين ما طلعوها لي ما ادري ايش سالفتهم[/grade]


ام جواد هلا حبيبتي والله عورتي قلبي
لكن الحمد لله على سلامتج بصراحه القيصريه مع اني ما جربتها
احس انها صعبه وايد الله يكون في عونكم
مع اني عند الولاده لما كنت اتألم قلت لهم خلاص ما استحمل ابيكم تسوون لي قيصريه
صج من الألم الوحده ما تدري ايش اتسوي
يلا الحمد لله افتكينا

عموما طولت عليكم وايد اخليكم الحين وهالله هالله باليهال
الله يحفظكم أجمعين

تسلمين يا Mooooooon 14
والمغص والامساك كلنا نعاني منه مع أطفالنا،،انا ما خليت شي ما استخدمته لكن ماكو فايده

انتو ليش تطول شهادة الميلاد عندكم؟؟؟انا من اول اسبوع خلصناها

[grade="00BFFF 4169E1 0000FF"]هلا ام جواد
بخصوص شهادة الميلاد هذي اول مرة اطول جذي
لما سألهم زوجي اول شي قالو المسؤؤل كان مسافر
والحين يقولون التأخير صاير من الداخلية والله اعلم
الله يعين بصراحة جذي راح اتأخر لما تجيني الموافقه على اجازة الأمومة واخاف
ان ما تجيني بسرعة واظطر اني اداوم لأني الحين خلصت شهر واربع ايام
وما باقي شي
الله كريم ويرجع المسئول بالسلامة هههههههه[/grade]

ام جواد والله عورتب قلبي ياعمري
وذكرتيني بالقيصريه اااااااه الله كريم

المهم امج بخير وجواد احسن

موون انا اروح لمامون ودكتوره عطيه اللى بتخصصي وايد مرتاحه معاهم
بدلولي حليب ابتامل كومفورت يساعد على الهضم وايد
زين يالغاليه ولكن في غازات ولكن مافي امساك عند ولدي
وارحم من قبل الحمد الله


عروووس خلاص بودي ولدي للاهلي للتطعيم ياعمري

ام جواد والله عورتب قلبي ياعمري
وذكرتيني بالقيصريه اااااااه الله كريم

المهم انج بخير وجواد احسن

موون انا اروح لمامون ودكتوره عطيه اللى بتخصصي وايد مرتاحه معاهم
بدلولي حليب ابتامل كومفورت يساعد على الهضم وايد
زين يالغاليه ولكن في غازات ولكن مافي امساك عند ولدي
وارحم من قبل الحمد الله


عروووس خلاص بودي ولدي للاهلي للتطعيم ياعمري

انا وخلودي زكمنا والله يعين

ياامهات ويش اخباركم مع ملابس عيالكم كفتكم الكميه
انا متبهدله

انا شريت في حملي ملابس مناسبه وكميتها كويسه
واللى ساعدتني في الشرا قالت ماراح يكفي

وانا انصدمت من كلامها

واليوم مصدقتها تدرووون انا كنت شاريه 12 فنيله داخليه
بعد الولاده شريت 15 فنيله اضافيه
ويش كثر يسرب ولدي والله تعبت وانا ابدل
غير يوم يرجع وبذات هذي الايام لان اعطيه دوا بلغم

وغير كثير من الملابس اضطريت ازيييييدهم
ماكفت

الله يعين المصيبه مافي وقت اطلع واتشرى
وبذات جونا زفت تخافين على الياهل


انتم ويش اخباركم ماشوف لكم اردود يالغاليااااااات

هلا شهد شلونج ياقلبي وشلون خلودي؟؟ماتشوفون شر انشالله
والله انا بعد قالوا لي لاتكثرين ملابس للبيبي ،،،وسمعت الكلام وماكفاني عقب طلعت عالسريع واشتريت له ملابس اضافيه من جديد
بس رحت لحالي وخليته عند اختي لأن مايمدي الواحد يطلع معاه في هالجو الزفت

البنات ماكو منهم ردود لان الكل مشغول بمسؤليات اليهال،،يالله من جد تعب ومسؤلية كبيرة
بس يستاهلون عسى الله بفرحنا بشوفتهم كبار ويحفظهم لنا

انا احس حياتي كلها تغيرت،،،حتى ريلي كاسر بخاطري ما اقعد معاه كثير ،،الاول طلعات وجيّات وسفر،،انا تعودت لاني سنتين كنت مأجلة الحمل والحياه وناسة وماكو التزامات
الحين الوضع تغير
الحمدلله على كل حال
تصدقون عاد يبنات نزلت علي الدورة من يومين،،تضايقت لاني توقعت بكون مثل خواتي ماتجيهم الا عقب سنه او 9 شهور
بس خاتي قالوا لي عادي لانج ترضعين صناعي وطبيعي فمابتكونين مثل حالتنا لانهم يرضعون بس طبيعي

ليلة عرسي وينح وحشتينا يالقاطعة
باقي البنات طمنونا عليكم وننتظر اخباركم

هلا يام خواد
اي والله فديتج تغيرت حياتنا وين كنا بدلع ووناسه هههههههههه

لحين ريلي يالله اجلس معاااه والمصيبه كلامنا صار كله عن خالد ماافي رومنسيه
دائما افكر في ولدي وفي ريلي مااابي اقصر بحق احد فيهم

الله يعيييييييييين

ريلي دائما يطلع لحاله قبل انا معاااااااه 24 ساعه كان يترك ربعه
ويطلع معاااااي لحين يدور على ربعه مايعطونه وجه هههههههههه

الله لا يحرمني منه ان شاء الله يكبر خالد ونطلع انا وخالد معاااه

وحشتوني والله

هلا والله أم خالد
مو كأن مافي الا انا وانتي في هالموضوع؟؟ماحد صاير يدخل
انا عموما ما ادخل المنتدى على طول،،بس من يجيني ايميل ان فيه رد عالموضوع ادخل
انا امس صابني اكتئاب من وضعي،،احس ان حياتي منقلبة فوق تحت،،مقصرة مع ريلي والبيت ومو عارفة شلون اوفق بين كل شي
بس انشالله فترة وبتعدي

اليوم طعمت ولدي اول تطعيم،،تاخرت يومين،،بس الحمدلله ارتحت،،،عقبال عندك ياشهد>>قلبتها مصري
شلون خالد عساه بخير وشلونج انتي
باقي البنات وين وحشتونا والله

[grade="00BFFF 4169E1 0000FF"]السلام عليكم
هلا بأحلى امهات ...
شهد حبيبتي اشلونج وما تشوفين شر ان شاء الله
بغيت اقول لج ان شهاده ميلاد ولدي اطلعت واخيرا ,, وعلى طول قدمت على
إجازة الأمومة ان شاء الله يوافقون عليها لأن لو ما وافقو باقدم استقالتي ولدي اهم من الشغل

ام جواد اشلونج واشلون الصغير
والله انا مثلج احس ان ما عندي وقت حتى زوجي ما اشوفه
وصايرة خوافه اذا زوجي شل ولدي اقول له لا يمكن تعوره يمكن ما حطيته عدل
احس اني مللته ...
والله هو بيسافر بعد يومين ويقول لي تعالي معاي بس انا رافضه لأني ما ابي اغربل ولدي
والا العاده انا شاله شنطتي قبله ... الأول تحول ههههههههههههه
لكن الحمد لله احس ان ولدي غير حياتي وكسر الروتين

وايد تكلمت بس ايش اسوي من الحبسة .. ابي افضفض

اخليكم الحين وبوسو لي عيالكم الله يحفظهم
مع السلامة[/grade]

ام جواد

الله يعينج يالغاليه للمعلوميه انا حاسه فيج
انا مثلج مهب قادره انسق بين الولد وابوه
وقتي كله لولدي وريلي مادريبه

ولكن لحين اشوي اشوي بديت احاول انسق اخاف يمل الرجال ويهج هههههههه

صح عيال نعمه ولكن انا احس انها مسئوليه غير طبيعيه
وايد متعبه بصراحه مافي وقت حتى لنفسي

قصيت شعري وصبغته وشريت ملابس جديده متنوعه علشان تغير
وسويت حمام مغربي لنفسي لاني اعرف وحاولت اعدل من جسمي

ولكن اتفاجاء مافي وقت البس واتعدل

لحين ممكن احاول اسوي وتعدل لاني نضمت رضعت ولدي على 3 ساعات
احس في وقت اشوي

حتى الصلاه معاااد اقدر اصلي بوقتها الله يرحم قبل كنت اتوضا وانتظر
واصلي واطول واخذ راحتي

لحين كان احد يركض وراي استغفر الله الله يرحمني ويغفرلي


مووون انا بعد شهادة ولدي الحمد الله
سافري وغيري جوو واستانسي
انا مهب مسافره تعبانه نفسيا مالي خلق

باجلها الى ان ولدي يصير عمره كذا 8 الى 9 شهور باذن الله واسافر براحتي

الله كريم

مبررروك عليكم يابنات اعيالكم والله قصصكم حلوة انا حامل بثالث وتعباانه حدي لوعه ودوخه وحاله وامساك وغازات حالتي مأساة

بغيت منكم الله يسلمكم رقم المساده؟ اللي عندها دزلي بالخاص

وبغيت اسئلكم من احسن دكتورة بالولادة مسائي ابغي اخذ موااعيد ؟

سمعت عن دكتورة نجاح صج ممتازة وشو جنسيتها؟

خواااتي وينكم؟

امدحولي 3 نجاح ونجاة ومريم فلامرزي

[grade="00BFFF 4169E1 0000FF"]السلام عليكم
اشلونكم يا امهات ... واشلون عيالكم ؟
عسى ما شر مافي ردود على المواضيع .. كنت اعتقد اني بروحي طلعتو انتو معاي

بصراحة انا ما عندي وقت ... صج اني قدرت انظم رضعات ولدي والحالة مستقرة الحين
بس كل يوم احس يطلع فيه شي وكل يوم رايحه عند الدكتور
الحين هو عنده اكزيما احسه تعبان وايد
وبعد 3 ايام بيكمل الشهرين وعنده تطعيم الله يعين

هذي اخباري باختصار ... بس انتو طمنوني عليكم
شهد وام جواد اتمنى تكونون انتو وعيالكم بخير

اختي كريشما .. آسفه على التأخير في الرد ..
عموما انا كنت اراجع عند الدكتورة سميرة في العياده المسائية وهي زينه
بس بصراحه انا كنت اروح لها لأنها تعطي اجازات بالهبل

والدكتورةمريم فلمرزي يمدحونها بعد ونفس الشي الدكتورة نجاة بس انا ما مرة رحت لهم
الله يسهل عليج وتولدين بالسلامة

مع السلامة[/grade]