ما هي احسن مستشفى للولادة بالبحرين.... وماهي الأسعار والخدمات؟؟؟؟؟

هي يسمونها مشتركه بس مايخلون معاك احد يعني بروحك
انا الدكتوره قالت لي حجزي غرفه مشتركه وانا اضمن لك ان محد بيكون معاك فيها
لان اهم شي عندهم راحه المريضه يعني حجزيها وانتي متطمنه انك بتكوني فيها بروحك محد وياك

عيل ليش يسمونها مشتركة وسعرها اقل؟؟؟؟؟؟؟انا بتصل المستشفى الحين بجوف شالسالفة لاني رحت لهم شخصيا وراووني الغرف وقالت لي مشتركة غريبة؟؟؟؟؟؟؟ بس حتى السيمي (المشتركة) 390 ليلتين و 470 حق ثلاث ليال

انا عن نفسي ولدت بشهر 3 بمستشفى التخصصي ممتاز جدا طبعا انا اخترت عملية قيصرية كلفتنى مع غرفة خاصة 4 ليالي الف واربعمائة دينار لكن اهتمام ونظافة ومتابعة من قبل الدكتورة والممرضات ممتازين مع العلم ان ولدى على طول كان بغرفة الحضانة الله يحفظه ومع اهتمامهم فيه عند طلعتنا من المستشفى زوجى عطى كل ممرضة بالحضانة اللي كانو يهتمون بولدى 20 دينار.....

هاااااا خواتي...

مافي آراء اكثر عن مستشفيات البحرين... وبعدين ذلين حوامل البحرين؟؟؟؟؟؟

ما قلتو رايكم في مستشفى السلمانية والولادة فيه وغرفه الخاصة والخدمة والأسعار؟؟؟

اللي عندها الخبر تفيدنا ارجوكم....

السلمانيه تتوقعين شنو راي البنات فيه اختي ماتسمعين سوالفهم؟ :)

انتي وحظك يا يكون على حظك طاقم يفهمون وضعك ويراعون اللي انتي فيه

والا اللهم يا كافي يجيك طاقم شوي ويكفخونك على بالهم الوحده تتدلع

وحتى سالفه الخياطه بالحظ .. اما وحده تراعي ضميرها بالخياطه ولا وحده تبي تمشي شغل وتخيط من بره بره وتنادي : اللي بعدو :)

ههههههههههههههههههه ضحكتيني اختي مراوي....
طبعاً عن جد هذا اللي نسمعه...

بس بالنسبة للمراجعة الدورية للحامل انا سمعت من كذا شخص ان مراجعة المركز احسن من المستشفيات الخاصة لأنها تسوي تحاليل (طبعاً مجانية) وتهتم بالحامل وهذا ما سمعته من عدد من الأخوات اللي راجعوا خاص وحكومي وشافوا الفرق

حبيبتي انسيك لوفر من قال ان اهتمام المراكز الحكومية احس من الخاص..الفرق بس (مجانا) بس طبعا كلش مافي مجال للمقارنة بالخاص من اول اسابيع تجوفين في الالترا ساوند وتتطمنين..
بالنسبة لمستشفى السلمانية اذا انتي بحرينية وعايشة بالبحرين فأكيد تعرفين يعني مايحتاج تعليق...

موضوع حلو ومفيد للحوامل والله يقومهم بالسلامه

الى اختي نور المدينة والى كل من جربت الولادة في المستشفى التخصصي عند دكتورة فرح؟

انا حاليا اتابع عند د. فرح وبصؤاحة جدا مرتاحة علشان كده قررت اولد عندها

حبيت من اللي جربت الولادة عندها تخبرني اكثر وصحيح عندهم الولادة بدون الم سمعت عن كرسي خاص؟؟؟

ارجوا الرد

انا كنت اراجع في التخصصي و في المركز بنفس الوقت

ماكنت اعتمد على تشخيص المركز يعني وانا بالرابع و كان عندي طلق مبكر وانا بجر على عماي مادري ان هذا طلق ولا قالو لي شي وبكشف المستشفى يوم قلت للدكتوره على طول عطتني راحه اسبوعين و مهديء للرحم

----------

مرمر
مافي ولاده بدون الم بس في وسائل تخفف الالم يمكن انتي تقصدين البالونه
عندهم بالونه النقازيه اذا تعرفينها وقت الطلق تقعدين عليها انا جربتها هي فعلا تريح
يعني مو تناقزين عليها بس تتحركين عليها حركه دائريه
وعندهم يفعدونك بالجاكوزي عشان يخفف الالم ويسون لك مساج الظهر اذا تبين وايد يريح

اللي بتولد بالتخصصي ان شاء الله بترتاح 25 قيراط :)

أول مرة أسمع عن البالونة ياريت تخبريني أكثر عن تجربتك وهل ولدتك الدكتورة فرح؟ عطوك ابرة تخفيف الالم في العضل؟ وشلون الوضعية اللي كنت عليها اثناء الولادة؟

سوري كثرت عليك الاسئلة بس بدي اطمن لاني انشاءالله راح اولد بالتخصصي؟

وعندي سؤال ثاني اذا تعرفين من وين اشتري ملابس للمستشفى تكون حلوة واسعارها مناسبة؟

بنات هلا شلونكم.. الابر اللي في الظهر سمعت ناس يمدحونها وناس لا..يقولون الولادة الطبيعية احس مالج بهالسوالف.. هي التخصصي كأن قيمتها 115 دينار وبإبن النفيس 150 دينار..
بنات مابغي اخوفكم وايد عن مستشفى السلمانية بس اعرف وحدة لو تتخيلون لاي كثر استهتارهم بالحوامل ومشاعرهم..كانت هالوحدة بالشهر الثامن وياها طلق وراحت وكان قبلها بيومين عندها موعد مع دكتورتها وطمنتها ان كل شي اوكى بس لما راحت تولد طلع ان البيبي ميت في بطنها ( بعيد الشر عنا) وعرفو هالشي وهي توها بتطلق قالو لها ان بنتج في بطنج ميتة؟؟ تخيلو ؟؟؟؟ شنو اللي يخلي الوحدة تتصلب وتطلع اللي في بطنها غير انها تبي تجوف قرة عينها .. بس قالو لها انهارت وتمت تضرب روحها وكأن اغمي عليها ولا صار عندها مقدرة ولا دافع للولادة وظل البيبي ميت فيها لين عطوها كأن طلق صناعي..ويوم اهلها هاوشو المستشفى ليش قلتو لها قبل الولادة جان صادها شي الحين قالو عشان لاتقولون منا لبيبي مات واحنا مب مسؤولين؟؟؟انا صراحة لو بعد يسوون جناح خاص بروح ( بي اي بي ) هناك مافي مثله بالبحرين بعد مااولد عنده هذا غير معاملته الاخس من زفتة..

مرمر
البالونه تعرفين اللي لها مسكتين يمسكونا اليهال ويقعدون يناقزون عليها
نفسها يستعملونها هناك اذا زاد الطلق و نزل الراس كلش تحت يصير ضغطه مؤلم وايد فاذا انتي قاعده على شي لين يخف الم ضغط الراس عن لو كنتي قاعده عالسرير

ولدتني دكتورتي كيران وطلبت الابره اللي تخفف الالم بس مالحقو يعطوني اياها لاني كنت على ابواب الولاده :)

وضعيه الولاده اني كنت واقفه واول ماتجي الطلقه اقعد وادفع واذا راحت ارجع اوقف
هالطريقه تخليك ماتحتاجين وقت طويل حق الولاده

و الملابس انا فصلت لي عند الخياط و شريت بيجاما مرتبه من دبنهامز بلون ازرق عشانه كان ولد :)