بنات الخليج المتزوجات..عندكم هالمشكلة؟؟؟

لبى قلب وليدي

انتي من وين..وشلون اسعار الأجارات عندكم؟؟

اتصدقين مشكلة أزواجنا على هالبرود..

ما أدري شلون نسخنهم :think:

يبيلنا مكرويف اكس اكس لارج هههه


الله يهديهم إن شاء الله

فراشة بوظبي

هلا فييج نورتي الموضوع..

ماشاء الله..الله يرحمة و يغمد روحه الجنة..

أتصدقين والله احنا انحبة عيل شلون انتوا؟ :smile:

عندي صديقات وايد من خلال النت اماراتيات..بس لم الحين ما تزوجوا..فما أدري عن الموضوع..

لكن أصدقاء زوجي كانوا معاه بالدراسه يقولوه حتى الأعزب يطلعله بيت صح..؟؟

بس هل اهي بيوت ترضيكم و بمكان مناسب..


احنا عندنا نفس الشي بيوت حكومة..لكن لو تشوفين المنطقة...:angry:

حيييييييل بعيده..

و صعب على اللي طول عمرهم عايشين بمناطق داخلية يروحون هالمناطق البعيده بالبر..و مافيها خدمات كافية..

و طبعا مثلكم..على الأقدمية بالطلبات..

لكن اللي يبي شي مرتب يدفع من جيبه..و احنا عندنا الحكومة تعطي قرض للي يبي يشتري و بعدين تستقطعه من راتبه لم يرجع كامل..

انتوا نفس الشي قرضكم؟؟

غدران..ألف مبرووك إن شاء الله على الأرض..

و ست سنين حلوه اذا كنتوا مخططين انكم اتيمعون من البداية..

لكن لو مو اميمعين شلون تبنون من غير القرض؟

موضوع وايد حلو
بالنسبة للبيوت اللي تبنيها الحكومة في الإمارات الحمد لله وايد مناسبة وفي أماكن معقولة، أكيد مب في مركز المدينه لكن مكانهم زين ومعظم الخدمات متوفرة، بس الشرط أن العدد يكون وايد، أعتقد 7 وأكثر مب متأكدة، أما اللي تحت العدد المطلوب يخصصون له أرض وقرض كان مليون ومئتين ألف وسمعت أنه زاد مع ارتفاع الأسعار إلى مليون وسبعمئة ألف حسب اعتقادي، بس المشكلة في القرض أنه واااايد يطول لين ما ينزل، ويتسدد على 30 سنه....
أسعار الأراضي في مدينة بوظبي ناااااار، في مدينة خليفة (مع أنها مب في المركز) يوصل سعر الأرض إلى 4 ملايين وممكن أكثر...
هذي بعض المعلومات اللي أتمنى أنها تكون مفيدة

وأنا مثلكم..

ساكنة بشقة في بيت أهل زوجي..

بنيناها بالقروض..

وبأنتظار بيت أسكان..

وبإذن الله بعد ما نكمل القروض يعني سنة 2010 نفكر نشتري أرض حق علاوي..

تسلمي أختي مرموم على تعليقك على موضوعي . لكن أنا أستهليت موضوعي بكلمة (الله أعلم) وحاشا لله أني أفتي بشئ وأنا جاهلة عنه وعندما قلت بجواز القرض هذا الكلام جاء من أحد المحدثين تقريبا كنت أشاهده من أحد القنوات المشهورة ما أذكرها . كلنا نعرف ان الربى حرام والرسول صلى الله عليه وسلم حرمه وأنا مقتنعة به .(والي فهمته من كلامة أن قال أن الواحد لما ياخذ دين من الدولة غير من أنه يستدين من شخص يتم هذا الشخص يطالبة ويهدده إذا ما رجعت دينك في الفترة المحددة راح يزيد المبلغ. وايضا أستهليت موضوعي بكلمة من وجهة نظري.

لكن لو تعملي إحصائية بتحصلي أن 99% من أمة محمد صلى الله عليه وسلم بإختلاف جنسياتهم ودولهم عايشين وهم عندهم قروض بنكية مهما كان سبب هذي القروض. وليش الواحد يا خذ قرض غير إذا كان مضطر ولحاجة ماسة فشو راح يعمل.

وتفسير(الضرورات تبيح المحضروات) جائت من الهموم والمشاكل الي يعاني منها المسلمين في هذا الزمن

1-مثل واحد يريد يتزوج شو يعمل (يروح يدور له متعه حرام أو أفظل له يتزوج ؟ طيب يتزوج من وين وهو حتى راتبه ما يكفية لنهاية الشهر؟

2- طيب نفرض أن تزوج وين راح يسكن ؟ وطبعا الكل عارف مشاكل سكنتة الأهل وإذا ما كانت في مشاكل راح يكون زيادة عدد الأولاد ومالهم مكان ينامو فيه.

3- واحد يشوف ولده أو بنته أو زوجته أو حد من اهلة يموت قدامة ولازم يتعالج بالخارج من وين يجيب ؟

وغيرها وغيرها أختي مرموم من الأمثلة الي أتشيب الراس الي خلت الواحد يضطر أن يعمل هالأمور مع علمة انها حرام .

صدقوني يا اخواتي مافي شي أسمة بنك إسلامي وبنك غير إسلامي كلهم لهم فوائدهم أجل هم أيش مستفيدين يعطوكم قرض وانتو أتردوه بعد 10 او 20 سنة نفس المبلغ؟؟؟؟ يستحيل كلهم واحد .

أختي ام فروحة تشكري عن كلامك الطيب عن البنات العمانيات صديقاتك واتمنى انهن يكونن موجودات يسمعن كلامك وأدعي رب العالمين يرزقك باللي تتمنية بس عاد لا تنسي تعزمينا بعدين في البيت الجديد إذا الله أراد وبنيتو بيت. بالنسبة للأسعار أختي أحنا عندنا نفس الشي الأسعار زادت كثير غير عن اول وخاصة في مسقط ممكن اتحصلي أرض ب10.000 ألاف ريال عماني على ارض بعيده عن الخدمات ومساحتها 600 متر لكن الحين أقلها أرض أتكلف كثير ويعتمد طبعا على موقع ومكان الأرض .

ام فروحة الغالي
الأراضي عندها غالية نااااااااااااار الحين
اقل أرض 50x50 القدم الواحد ب 12 دينار او أكثر والله احسبيها

واذا بتشوفين معاشات البحرين يا دوب اتكفي يعني اذا بشتري ارض يبي له 10 اي 15 سنة علشان يسكن فيها

يعني مأساه
الله كريم انشاءالله بتفرج

ريحانة القلوب:
تسلمي أختي مرموم على تعليقك على موضوعي . لكن أنا أستهليت موضوعي بكلمة (الله أعلم) وحاشا لله أني أفتي بشئ وأنا جاهلة عنه وعندما قلت بجواز القرض هذا الكلام جاء من أحد المحدثين تقريبا كنت أشاهده من أحد القنوات المشهورة ما أذكرها . كلنا نعرف ان الربى حرام والرسول صلى الله عليه وسلم حرمه وأنا مقتنعة به .(والي فهمته من كلامة أن قال أن الواحد لما ياخذ دين من الدولة غير من أنه يستدين من شخص يتم هذا الشخص يطالبة ويهدده إذا ما رجعت دينك في الفترة المحددة راح يزيد المبلغ. وايضا أستهليت موضوعي بكلمة من وجهة نظري.

لكن لو تعملي إحصائية بتحصلي أن 99% من أمة محمد صلى الله عليه وسلم بإختلاف جنسياتهم ودولهم عايشين وهم عندهم قروض بنكية مهما كان سبب هذي القروض. وليش الواحد يا خذ قرض غير إذا كان مضطر ولحاجة ماسة فشو راح يعمل.

وتفسير(الضرورات تبيح المحضروات) جائت من الهموم والمشاكل الي يعاني منها المسلمين في هذا الزمن

1-مثل واحد يريد يتزوج شو يعمل (يروح يدور له متعه حرام أو أفظل له يتزوج ؟ طيب يتزوج من وين وهو حتى راتبه ما يكفية لنهاية الشهر؟

2- طيب نفرض أن تزوج وين راح يسكن ؟ وطبعا الكل عارف مشاكل سكنتة الأهل وإذا ما كانت في مشاكل راح يكون زيادة عدد الأولاد ومالهم مكان ينامو فيه.

3- واحد يشوف ولده أو بنته أو زوجته أو حد من اهلة يموت قدامة ولازم يتعالج بالخارج من وين يجيب ؟

وغيرها وغيرها أختي مرموم من الأمثلة الي أتشيب الراس الي خلت الواحد يضطر أن يعمل هالأمور مع علمة انها حرام .

صدقوني يا اخواتي مافي شي أسمة بنك إسلامي وبنك غير إسلامي كلهم لهم فوائدهم أجل هم أيش مستفيدين يعطوكم قرض وانتو أتردوه بعد 10 او 20 سنة نفس المبلغ؟؟؟؟ يستحيل كلهم واحد .
.

السلام عليكم ورحمة الله وبركاته

أختي...على الأقل البنوك الإسلامية ما تتعامل بالربا...لكن تعاملاتها تشمل التالي...

- الاستصناع : لتمويل أعمال الإنشاءات والبناء
- مرابحة : لتمويل شراء الأراضي والأملاك
- المشاركة المتناقصة: مشاركة مع البنك منتهية بانسحابه وتملكك للعقار في نهاية الفترة
- الإجارة: صيغة إيجار تنتهي بملكية العقار أو الأرض في نهاية الفترة

و إن شاء الله ما يكون فيها اي شبهة ربوية...لأنه الإسلام قدم حلول مصرفية إسلامية شاملة...

أنا معاكي في الكلام اللي قلتيه من صعوبة المعيشة...و هذه على الناس كلها...لكن يجب على الإنسان أن يتقي مواطن الشبهات...فما بالك بالواحد متأكد 100% إنه البنك و قروضه يتعامل بالربا ؟

و صدقيني اللي يمشي في الحلال ربي بيغنيه من حيث لا يحتسب...

الله يزيدك و يزيدنا من فضله العظيم يا رب :)

انا ليلحين ما تزوجت بس وااحد من اهم شروط اهلي ان زوج المستقبل ايعيشني في بيت مستغل او حتى ملحق في بيتهم بس له باب منفصل .

أم فرووحه:
فراشة بوظبي

هلا فييج نورتي الموضوع..

ماشاء الله..الله يرحمة و يغمد روحه الجنة..

أتصدقين والله احنا انحبة عيل شلون انتوا؟ :smile:

عندي صديقات وايد من خلال النت اماراتيات..بس لم الحين ما تزوجوا..فما أدري عن الموضوع..

لكن أصدقاء زوجي كانوا معاه بالدراسه يقولوه حتى الأعزب يطلعله بيت صح..؟؟

بس هل اهي بيوت ترضيكم و بمكان مناسب..


احنا عندنا نفس الشي بيوت حكومة..لكن لو تشوفين المنطقة...:angry:

حيييييييل بعيده..

و صعب على اللي طول عمرهم عايشين بمناطق داخلية يروحون هالمناطق البعيده بالبر..و مافيها خدمات كافية..

و طبعا مثلكم..على الأقدمية بالطلبات..

لكن اللي يبي شي مرتب يدفع من جيبه..و احنا عندنا الحكومة تعطي قرض للي يبي يشتري و بعدين تستقطعه من راتبه لم يرجع كامل..

انتوا نفس الشي قرضكم؟؟

هلا اختي ام فروحة

البيوت اللي تتوزع تبعد عن المدينة نص ساعه بس خلاص الكل تعود لان بوظبي صارت صغيرة بالنسبة لعدد السكان عسب جي لازم يصير توسع وتتسوى مدن يديدة والمناطق يزودونها بمدارس وبمعظم الاحتياجات يعني نحن مثلا بيتنا يبعد عن العاصمة نص ساعه بس الله يخلي الشوارع الحديثة وماتحسين بالدرب

وعلى طاري الاعزب مايعطونه بيت بس الحين في قرار يديد اللي ماياخذ بيت على الحكومة يعني ايجار او عايش في ملك يعطونه بدل سكن يوصل 70% من راتبه الاساسي وبعد هالقرار ارتفعت رواتب موظفين الحكومة بشكل سواء المتزوج او الاعزب يعني اللي الدولة تعطيه 250 الف للسكن سنويا وعنده بيت ملك صار ينزله 13 الف بدل السكن غير الراتب

الحمدلله على كل حال الحكومة ماقصرت والقروض عندنا نفس حالتكم .... يسحبون من الراتب لين مايخلص القرض بس ماتحسين بالنقص في الراتب لانه 3 الاف على ما اعتقد شهريا يعني كانج ساكنة في بيت الاجار ويخصمون منج ....

هئ هئ هئ هئ ام فروووحة..

يعورني قلبي وراسي وكل جزء في جسمي لما ينفتح هالموضوع..

ابي اعرف فلوووووس ارتفاع اسعار النفط وين تروووح؟
معاشات المواطنين مكانك سر..


الحمدلله انا ساكنة بشقة فوق بيت عمي.. لها بابها المنفصل.. وشقتي واسعة..
بس طبعاً هذا ما راح يغنيني عن بيت ملكي.. واهم شيء حووووش واسع..



ربي يفرجها ان شاء الله..

الله يفرجها عالجميع ان شاءالله

بالنسبة للامارات .. يمكن شعب ابوظبي اكثر شعب محظوط بصراحه

اما باقي الامارات الله يستر عليهم ..

وبنفس الوقت شيوخنا الحمدلله ما مقصرين ..

الواحد يقول الحمدلله .. والرزق من رب العالمين

فعلا موضوع يعور القلب..لكن لازم نلقاله حل..

يعني بالنسبه لي ساكنه بشقه الحمدلله لكن أجارها غاااااااالي يعني نص المعاش يروح على الأجار..

غير هذا ساكنين فوقي جيران .. الله يسامحم مزعجيين..

و جدام الشقه بعد جيران نفس الشي مزعجين..

فوالله ودي احل هالمشكله لكن مو عارفه شلون..

فقلت آخذ آرائكم شنو أفضل الطرق أن نيمع و نحصل على منزل ملك..


تقبلوا تحياتي و بانتظار ردودكم الحلوه :)

اييييييييييييييييييييييييييييييه كلنا في الهوى سوى

منو ما يحلم في بيت الاحلام

و مع هذي الظروف ....و بسبب تطور الخليج السريع و المشاريع الي تطلع لنا كل يوم .....زاد العقار و كل يوم يزيد اكثر عن الي قبل .....

و الي بينطر ارض و لا القرص او المنحه ...بيخلص عمره و ما بيحصل شي ....و كل يوم الشروط تزيد و تصعب ...

و قرص الاسكان ما ادري منحه جيمتها 300 الف درهم ...(حتى ملحق في هذا الزمن ما يبي لج ) مب ملويون مثل ما قالت وحده من الاخوات ...المليون تابع حكومه اماره وحده بس مب كل الامارات

و الاراضي كانت تطلع بسرعه و كل سنه تزيد يعني قبل اكثر شي يكولون 5 سنوات و تطلع الارض لكن الحينه 15 سنه و طالع ....

و في بعض الامارات قارب اراضيها على الانتهاء ...يعني مافي مكان للسكن مافي اراضي تتوزع ..مما رفع قيمه الاراضي اكثر

يعني مصيرنا اخر شي نستوي مثل غيرنا من العرب ....نحلم بالشقه التمليك بل البيت او الفيلا...

و بما ان الشقق التمليك بعد باهضه الثمن هذا يعني راح كل عائله تكتفي بشقه صغيييييييييره و بتالي بيقل عدد افراد الاسره ...يعني اذا متوسط عدد افراد الاسره مابين 6 الي 8 مع الواليد راح يقل و يصير 4 مع الوالدين ...يعني بنصير انجليز ياهلين و بس

و هذا ما اتصوره مستقبل الاسره الخليجيه

مرمر ما توقعت بالامارات هالمشكله !

الله كريم..طلعنا كلنا بالهوى سوا :(

اي والله صدقتي..

و الله يستر ما يسولنا نفس الصين..و يفرضون علينا ياهل واحد و اذا يبنا اكثر ندفع ضريبه !!!!