تهويدة البيبي

الله حلو

انا بصراحه ما عرف شو اغنيله

احس ناسيه كل الاغاني مال الاطفال

فاغنيله توينكل توينكل
و الاناشيد مال الروضه
واحيانا استخدم نفس اللحن بس مع كلمات من تأليفي و خرابيط :)

انجل ايز اسمعي الوالدة ولا عمتج لين خذوا ولدج عندهم... والله شحلوها تهويدات الامهات..



انا عاد نسيتهم الحين... يبيلي مرة ثانية اقعد يم اامي بورقة وقلم اكتبهم وهي تقولهم عشان احفظ لي كلمتين انيمهم فيه

ما في حد شارككم من عمان حد نحن لما جدتي تقول يطلع الكلام شــي ثاني
وامي كانت تنوم اختي كنت اقوم بسرعة عشان اكتبه واقوله حال اولادي "جاين في الدرب بإذن الله"
واللي اذكره
****************************************
وطلعت فوق الجبل ارعى صخيلاتي
وانهد علي الجبل وانكسرن نطيلاتي " نوع من خلخلال القدم"
وسافر سافر "خوي" شلنه الخشب الكبار
الله يعوده علينا وهو من خلق ما سار
وسافر سافر "خوي" شلنه خشب الكويت
الله يعوده علينا وهو سراج البيت
*******************************************************
محد وصفلي " مريم " رايحة تغتسل
لابسة هذيك الحلق من غواها تقتل
محد وصفلي "مريم " رايحة بيت خالتها
متحلية بذهب حمراء شيلتها
******************************************************
يو دار بسألج ما مروا عليج اهلي
قالت نعم مروا عند طلعة الفجر
جروا خشبهم وخلوا دمعتي تجري
تجري شرا الغاف والغفغاف والسدر
يو دار ما اسكنج يو دار خنتيني
خنتي العمايم الكبار وانا ما حشمتيني
**********************************************
ولين يقوم الطفل من النوم الصبح يقول له
صباحك صباحين
صباح العرب مرة وانت مرتين
يصبح به العوافي
ورزق من ربه وافي
************************************************
بنات امانة اللي عندها جدات او امهات تنقل هالتراث لعيالها
بدل من الاغاني والكلام اللي ماله معنى

لولووووه يا وليدي

لو لوووه يا حبيبي


نام نوم الهنيه

نومة الغزلان في البريه

نام و لك ربن ... عينه ما تنام


و لبنتي

لو لوووه يا بنيتي


لولوووه حبيبتي

نامي نومة الهنية

نومة الغزلان في البريه


====

الله الله يا معبود
يا راعي الكرم و الجوع
اللي يعطي بلا حدود
يعطي عبادي عاداته


الله الله يا ولي
يكبر عبادي و يستوي
و يدور دورين في الحوي

====

فديته يوم وخا
كندورته ملخا
ماشي يصوخ فتخه
من حمقته كفا
فديته يوم ياني
عن مرته بداني
صبحني من غبشه
بعده الفجر ما باني
طعمني رم ايدينه
و مبزر بخناني


====

وايد من هويدات يدتي بس انساهن

يوم يذكر شي بكتبه لكن

بس احلى ما في الموضوع اللحن :)×

أنا ساعات أقرى حق ولدي قرآن وساعات أغني له من الرسوم وساعات أألف له من عندي وشويه أغني له بالعربي وشويه بالنجيليزي

ومض الحياة

نوووسه

angel eyes


جمـــانة


أم نونية

UMABDULRAHMAN



سحايب دبي





اشكركن ع مشاركاتكن القيمه

أم نصرال11
شكرا ع مشاركتج