انا اخر مرة جتني الدورة تاريخ 2 \3 وانا الدورة تجيني كل 24 او كل 25 يوم ... وللحين ما نزلت الدورة مع العلم ان الالتهاب اللي احس فيه عادة قبل الدورة يجي ويروح ..
امس سويت تحليل حمل في المستشفى " بول " وطلع negative وحمدت ربي .. بس اليوم وحدة من البنات خوفتني وقالت ان ممكن النتيجة ما بينت الحمل للحين بما انها توها متأخرة .. او ممكن يبين بفحص الدم .. وخلتني ارد اخاف بعد ما تطمنت امس ..
المشكلة ان في ناس ما يبين الحمل عندهم بالتحليل الا بعد فترة .. وانا بحملي بحسون ما سويت تحليل الا بعد حوالي اسبوعين من موعد الدورة لاني كنت وقتها توني متزوجة وظنيت ان الدورة متأخرة بسبب تغير هرموناتي .. يعني ما ادري من اي نوع انا !!!
مع العلم ان في مادة بنية تنزل علي من يومين بس الدم للحين ما نزل ، وهالمادة نزلت علي اول مرة الدورة اللي طافت ونزلت بس نص يوم ويوم ثاني ما قمت الصبح الا الدورة نزلت .. وبعد انا قلت للدكتورة امس عن الالتهاب وقالت لي اخد موعد على الفحص النسائي عشان اسوي الفحوصات والمشكلة ان اقرب موعد يناسبني بعد اسبوعين ..
واذا كنتي يا جمانة متخرجة والحمد لله فأنا للحين ادرس وما كملت .. وصعبببببببببببة اني ارد احمل قبل ما اكمل دراستي ..
الله يستر علي .. ادعوا لي
بنات مثل ما قلت لكم ان اخر دورة جتني تاريخ 2 \3 واليوم تاريخ 2\4 وللحين ما نزلت الدورة .. وانا خايفة مووووووووت من موضوع الحمل ، وكل كوابيس وتفكير وساعات اقعد اطالع ولدي واصيح لاني احسه بعده صغير وما ابي اظلمه بانجاب طفل ثاني عليه .. وافكر في دراستي واقول اذا طلعت حامل شلون بكمل دراستي .. نفسيتي تعبااااانه وااااااااااااااااااااايد:down:
وانا مستغربة لان الغلط اللي صار بيني وبين زوجي كان في اليوم 18 للدورة ، وانا سألت اذا ممكن يصير حمل فالجواب كان : اي .. ممكن يصير حمل اذا التبويض كان متأخر ، مع ان هالشي صار قريب الدورة وغريبة ان يصير في حمل .
والمشكلة ان انا مثل ما قلت لكم سويت التحليل بعد حوالي 3 ايام من الدورة وما طلع حمل واخاف ان الفترة ما تكون كافية عشان يبين الحمل في " البول " خصوصا اذا كان الحمل فعلا صار في اليوم 18 من الدورة ، والشي الثاني ان انا ما سويت التحليل من الصبح والمعروف ان يستحسن حق تحليل الحمل ان التحليل يكون من الصبح " عينة البول اول ما تقومين من النوم " هذا غير ان عطيتهم في المختبر كمية بول قليلة ..
ادري بتقولون قاعدة اخربط بس انا قاعدة احط لكم افتراضاتي الناتجة عن مخاوفي من الموضوع .. انا قعدت من شوي حق صلاة الفجر ولما شفتها ما شرفت صليت وما عرفت انام وجيت افضفض لكم هني لاني اعتبركم مثل خواتي ..
انا من خوفي ساعات احس اني اتوحم .. يعني مثلا يوم الخميس اللي طاف قعدت من النوم الصبح وانا احس بالغثيان وكأني لايعة جبدي وبرجع واستمرت هالحالة للظهر وبعدين راحت ، وامس في الجامعة الظهر ما حسيت الا فيني صداع ولوعة واستمروا معاي للمغرب وبعدين راحوا .. مع العلم ان هالاعراض ما أثرت على قابليتي للاكل :o وساعات اقول لنفسي هذا مو وحام لان الوحام يكون مستمر ومتواصل ومو متقطع .. واقول حق نفسي اصلا تو الناس على الوحام لان انا بحملي بحسون ما جاني الوحام الا في نهاية اليوم 12 من الدورة ..
فهل ممكن اكون حامل ؟؟ وشنو تنصحوني اسوي ؟؟ ومتى اقدر اروح اسوي تحليل ثاني ؟؟
اللي مخوفني اكثر ان اذا ما طلعت حامل وما نزلت الدورة شنو بيكون السبب ؟؟ وهل الالتهاب اللي يجيني من كذا شهر قبل الدورة ممكن يكون له دور ؟؟ انا اخذت موعد مثل ما قلت لكم عشان الفحص الدوري النسائي بس الموعد بعيد شوي 17 \ 4 .. مع العلم ان مثل ما ذكرت الالتهاب حاليا قاعد يجي ويروح يعني مو مستمر معاي وحاليا انا احس نفسي اوكى من ناحية الالتهاب .. يعني ما احس فيه من امس .
افيدوني بنصايحكم بنات :cry: