أنا وخدامة أم زوجي!!!! ساعدوني

الغاليه
المفروض ام زوجك تأدب الخدامه بس الظاهر غيرة ام الزوج الله يهديهم والله ماخربتهم الا المسلسلات
ومثل ماقالوا البنات زوجك متكفل بك ولازم يجيب خدامه لك
انا اخوي يوم كان في بيت الوالد يايب خدامه حق مرته وكان يحط في البيت الفين ريال شهريا يسلمها للوالد من نفسه ، بالرغم ان الوالد غني ولله الحمد ، بس اخوي هذا عنده ضمير
أما العود قعد كم سنه ولاكان يحط ريال
والناس اجناس
بس تفاهمي مع زوجك وهاتوا خدامه وريحي بالك
وسوي نفسك زعلانه عليه وصيحي شوي خل يحس انك تعبانه نفسيا بس لاتروحين بيت هلك لاتكبر السالفه وخاصه ان امه ممكن تزيدها في راسه
والله يسخرهم لك

اييييييييييييييييييييييه عندنا وعندج خير انا حبيبتي تقريبا نفس مشكلتج بس الأختلاف ان انا عندي خدامتي بس للأسف الشديد ان خدامت عمتي تحاول تنرفزها علشان ما تخليها معاها بالغرفة وتخليها تنام بالمخزن فوق بالسطح تخيلي خدامتي تنام بالمخزن بدون مكيف ولا مروحة وخدامتهم طاردتها ولا تكلمت ام زوجي بأي كلمه وطبعا عيب انا اكلم خدامة مو مالتي عيب علي طبعا هي ما بتتكلم وخدامتي المسكينه ميته من الحر وفوق ذيه كل ايضا زوجي العزيز ما تكلم ونفسج انا الحين ميته من القهر بس ما اقدر اتكلم لان اخاف منها تسوي شئ باعيالي

البنات ماقصروا

انا عندي كلمه بسيطه

الخوات اللي طلعن عن الموضوع و ينتقدن راي باقي البنات ترى هذا مب مكانه
و الاخت تعرف تختار شو هو اللي بمصلحتها و هيه ادرى بحالتها ... ياليت تقولن كلمه في الموضوع و تكون خير بدال الانتقاد ...


اختي اول شي اذا ريلج ما يصرف عليج .. هو ملزوم غصبن عنه يصرف .. و اللي تقولج لا سيري عند اي شيخ او رجل دين و بيقولج بلا .. و الريال على ما عودتيه .. اذا تعود انجح انتي تصرفين على عمرج عيل شو فايدته اسم ريال ؟؟ ترى القوامه بما انفق بعضهم على بعض .. بس انتي الاكيد بتحاسبين عليه يعنى لا ترهقينه بالطلبات بس عوديه هو اللي يصرف عليج ...

ثاني شي سالفه الخدامه و عمتج .. اكيد الخدامه ما خلت دموع على كلام حلو على تمثيل عسب تطلع في الاخير مظلومة ..
اول شي اشكي لربج لان الشكوى لغير الله مذله و ادعي انج لو كنتي مظلومه الله ياخذ حقج من الخدامات لان عمتج مظلومه معاج و محتارة ...
بعدين سيري عند عمتج .. و لا تحاولين تحطين في بالج الا شي واحد رضى عمتي و قوليلها انا لو ظلمتها الله يسامحني بس هي لو ظلمتني الله ياخذ حقي منها و جدامكم .. و انا الخدامات اصلن ما يهمني المهم رضاج انتي

و بعدين لا تضايقين .. ادري السالفه تقهر و ادري يوم تشوفين النظرات و الكل يعتبرج ظالمه و يايه تسوين مشاكل .. بس دايما خلي ايمانج بالله قوي ترى كله ابتلاء من الله احمدي الله على كل شي

و طمنينا عليج يالغاليه

[grade="00008B FF6347 008000 4B0082"]كلامج عين العقل اختي مجنونه زماني ...[/grade]

:clap::clap::clap:

احس عمتج وايد مدلعه الخدامات

المفروض هم يخدمونج مثل مايخدمون اهل البيت لانج انتي منهم وفيهم

عسى الله يفرج همك ويبعد عنج المشاكل

ولا تضايجين اختي واستانسي وانسي السالفه

اناا مع اختي مجنونة زماااني بكلامهااا وحبيت اضيف يالغااالية اناا قلت المفروض تقولين حق عمتج السالفة وبما ان الوقت كان متاخر تهاوشين الخدامة فلحظتهاا وثاني يوم على طول تقولين حق عمتج اللي صار عشان يكون عندهاا علم وهالامور بين الخدامات وامور البيت مايفضل انج تدخلين زوجج لان هو اكيد راح يكلم امة وهني امة راح تعصب وتغير ان ولدي جاي يهاوشني عشان الغريبة وانا امة حتى لو كلمهاا بالطيب دوم امهات الريل يفهمون العكس وان زوجة ولدهم بيحرضون عيالهم عليهم فتعلمي بهالامور اشتكي عند عمتج على طول وصدقيني هي راح تاخذ حقج واعتبريها مثل امج عادي لو تهاوشج هي نفس امج بس مب تمصخهاا كل شي لة حدود

حسبي الله عليهم والله يا ناس بلاويهم اكتر من كذا عشان كذا انا مريحه نفسي وما ابغى شغاله لو اموت من التعب ترى زوج صحبتي اتزوج عليها شغالتها والله ان صحبتي زي القمر والشغاله حبشيه ومو حلوة حسبي الله عليهم

هلا اختي انا ااايد كلام اختي مجنونه قطر والله كلامها ماشاءالله ماعليه زوود

وانا ماراح انصحج واقولج ليش وليش خلاص المشكله صارت

وحابه اقولج شي رحتي جيتي انتي غريبه في البيت ومومن حقج تاامرين وتنهين صج زوجه ولدهم بس بعد لو شنو صار انتي غريبه؟

واتمني تفهمين نقطه عدل واللي لج ببيتهم غرفه وحمام بس هذا من حقج فقط

واقولج احسن شي جيبيلج خدامه وافتكي لانها بفلوسج محد بيقولج شي او قولي حق اي وحده تشتغلج شهريا بمبلغ كذا فقط مسااعده صدقيني حق الفلوس ماراح يقولون لج لا

بس اقولج الاحسن جيبي لج خدامه

وانصحج لو تقدرين اخذي بيت ايجار ان شاءالله بس غرفه وصاله المهم بيتج في الاول والاخير وملكج تسوين فيه اللي تبين

ومافيها شي اختي زوجك يساافر ياما بنات سكنوا ببيت لحالهم وانتي اختاريه بمنطقه سنعه فيها عرب ولاتخبرين الكل ان زوجك يشتغل بامارة ثاانيه واذا خايفه كلش روحي بيت هلج

او اخذيلج شقه يكون افضل عشان انه يساافر ويكون كلها عوايل خليجيه محترمه

وعن ام زوجك عمتك اخذيها بسياسه مهما صار هي كبيرة وخبرج عواجز خليج شووي عندنا هههههههههههه كله يزعلون ويبون كلمتهم تمشي غصب

انتي عادي بكرة روحي وحبيها على راسها قوليلها يمه انا اسفه اذا غلطت بحقج وهو سالفه جذي جذي وانا عصبت يعني اشلون تصارخ على وماادري شنو معليش اختي استحملي شوي موعشان ام زوجك لانها مراة كبيرة مثل امج ولج حسنه صدقيني
وبتشوفين اشلون بتغير معاملتها معاج

وااانصحج نصيحه لاتحتكين معاهم اللي بالبيت واايد خلى معاملتج رسميه عاديه والله نصيحه اخذيها مني لانج كل ماقربتي منهم يمكن تصير مشاكل

واتمنالج السعااده

اولا

اي بشكاره دامها ماضرتج ولا ضرت حد من عيالج حرام تنضرب او تنهان تراهم بشر حالنا حالهم

ثاني شي


انا مرت اخويه ماعندها بشكاره بس شاطره تعرف انها مب هيه اللي تعطي المعاش وتبى خداماتنا يخدمونها


دايما تتعامل ويا وحده وكل مادش عليها عطتها عشر او عشرين وبالاعياد امية درهم


عشان تلين خاطر البشكاره وماتستلعن عليها


يعني اذا الطرفين عنيد اكيد المشاكل بتكبر



ترا الضرب والاهانات لو حتى بالنظرات مب زينه تسوينها لاي من الخدامات لان الخدم يخلون في خواطرهم وفي منهم ينتقمووون


وبعدين الشي اللي صار عادي يصير في كل بيت ,, بس انتي سايسي البشاكير


يعني خدامات موجودات بس وقت فراغهن اكبر عن شغلهن .. بدال ماتمشين معاش وتخسرين على وحده يديده ايلسي اعطي وحده منهن هدايا او فلووس بتحصلينها دووم يايتنج ركض


وبس الموضوع اللي صار حاولي انج تغلقينه خلاص ولا تكبرينه

ترا الموضوع كله الا عن خدامات والخدامات مايدوومن سنه ولا سنتين ويردن بلادهن

يعني لاتخلين لاي مجال من الحساسية يصير


مع التحية

عين العقل مياسه...كل جلمه قلتيلها ...


واحب اضيف للاخت انه تراضي عمتها وتكسبها ..ولا تخسرها عشان خدامه..

صح المفروض ان الخدامات يخدمن اهل
البيت كله بس لو انا مكانج ما بطلب مساعدتهن
إلا في اضيق الحدود....

اصلا الخدمات يساهمن في المشاكل بين الوحده
وأهل ريلها وعشان ما تشتغل زياده تسوي هالحركات
ودوم تشتكي عند اللي يعطيها ويه ويسوي لها قدر...

اختي لا تخلين البشكاره تكون سبب في المشاكل بينج
وبين ام ريلج.......هي بييها يوم وبتذلف لكن ام ريلج علاقتج
بها بتستمر وعشان جيه طنشي سالفة البشكاره ولا تخلينها تفرق
بينكم ابدا....انتي تحملي شوي لين ما ريلج اييب لج وحده
وعلى قد ما تقدرين خليها تسوي لج كل شي ولا الحاجه
للثانيه........

وبعد انتبهي لا تكون خدامتج مستقبلا سبب في مشكله بينج
وبين اهل البيت....أغلبهن نفس الشي....ينقلن أسرارج ويسون
مشاكل....مثلا تتضارب ويا خدامات البيت او او او.....ما أبغي
احبطج أبدا بس ابا تكون عندج فكره عشان تاخذين احتياطج..

خلي علاقتج ويا باقي الخدامات في أضيق الحدود ولا تحاولين
تطلبين منهن شي......وأهل ريلج يوم بيشوفنج كيف تعاملين
خدامتج بالطيب والزين، اكيد بيغيرون رايهم....

اهم شي الحين انج ما تشلين في خاطرج من ام ريلج ابدا
اكيد البشكاره لعبت في راسها شويه....وفهميها بكل هدوء
انها غاليه عندج وما تبين زعلها منج.....اكسبيها عشان
تحبج أكثر وتحس بغلطها...............والله يوفقج

:bigsmile: ادري بعمري طولت في ردي..........السموحه

((قلب حساس)):
مع احترامي وشكري لأخواتي اللي فوق


اسمحولي بس أرد على اختي العزيزة (((عروس الموج)))

الغالية الله يسلمج ليش ما اتصل لريلي؟؟؟؟

يعني حلوة في حقي أتريا عمتي تتصل له وتقلبه علي وتخبره بالموضوع حسب ما سمعته هي من الخدامه؟؟؟؟

خل أقوله الموضوع على طول وفي وقته وايد أحسن لا يروح يسمعه من غيري وبإضافات ما أضمن كيف تكون

بعدين الغاليه بقولج شي....

أنا كاتمه أشياء وايد من زمان ومتحمله وصابره وياء هالموقف وفجر كل شي ...

يعني القشه اللي كسرت ظهر البعير!!!!!

هي حتى ما كلفت نفسها اتيي عندي وتسألني شو صار؟؟ وإلا عالأقل ترفع سماعة التيلفون وتسألني؟؟؟؟

مب اتيي تواجعني ثاني يوم عشان الخدامه؟؟؟؟

هذا قدري يعني الحين عندهم؟؟؟؟ يرضيهم يعني أنهان على آخر عمر على يد خدامه وانا بنت عرب ومعززه ومكرمه في بيت هليه؟؟؟؟؟

يكون في علمج ان خدامتنا اللي كانت في بيت أهلي من عرست ما طاقت تقعد في البيت وردت بلادها بعدي ...

تقول البيت بعدج تغير .... يعني أنا مب شينه في الخدامات فديتج ...

لكن خداماتهم من النوع البطران وسادات كل شي عن ام زوجي عشان جيه ما تبا حد يقول لهن شي ....

وللعلم .,,,


انا من النوع اللي يتحمل وتخيلي عندي خواتي الكبار عمري ما اشتكيت منه وإلا من أهله جدامهن ....

مع أنهن يحاولن يسألني .... بس من تزوجته وأنا حريصه على صورته في عيون أهلي كل الحرص .....

ودايما أمدحه جدامهم عشان يقولون ونعم ما خذت بنتنا ويتطمنون علي .... ما أريد أشمت حد فيني ....

بعدين الموضوع ما يحتمل تأجيل كان لازم يعرف اللي صار ....

وبعدين هو لما كلمته كان راجع من عرس ... يعني كان عايش حياته هذاك اليوم .... ما كدرته ولا هم يحزنون بالعكس تم يحاول يخفف عني ويضحك عشان يخف توتر الموضوع .....

الغاليه كثر الضغط يولد الانفجار ... وكل شي وله حد ... ولا يكلف الله نفسا إلا وسعها ....

وبس فديتج .....

اسمحيلي يعني ..
احس ان سويتي حركة مدارس من يسر يخبر الاخصائيه قبل هو الربحان..
تراها عمتج حسبت امج لو امج كنتي بتسيرين اتخبرين ابوج يعي..
يعني عادي انتي تجلبين الولد على امه بس هي تجلب ريلج عليج مايستوي ...غريبه والله

العموم حبيت ابدي براي
والسموحه

صج انهن وغدات وما يستحن على ويوهن بشاكير احينه جيه بعد الله ياخذ بليسها انشالله

شوفي حبيبتي انتي لا تتحسسين من المشكله وايد لانج انتي ما غلطي وعاملي ام ريلج طبيعي واحسن من قبل وسويلها الاشياء

اللي هي تحبهن وااايد وفاجئيها دايما باشياء وصدقيني انها بتراجع نفسها وبتقول ضلمتها هاي البنيه ومستحيه تجدم عليج بشكاره

بس هي يمكن رحمتها واايد لانها مرضت بس انتي تحملي واهم شئ انتي وريلج ما يهمونج الباجين ..........



بس لا تعصبين وحالولي اتكونين طبيعيه وقولي حسبي الله ونعم الوكيل والله بيعوضج

هلا عزيزتي .. كلام اختي مجنونة قطر عين العقل ..
حاولي تستقلين ببيتج لو شقة صغيرة
والخدامة جبيلج وحدة ولا تعورين راسج معاهم
وام ريلج حاولي تكونين عادية معاها عشان ما تصير بينكم مشاكل اكثر من جي

صادفتني مشكله مشابهه لك وهي ان خدامتي المسكينه احترقت ايدينها و اضطريت اريحها كم يوم و اعتمد على نفسي خالتي حبوبه كانت تقولي اخذي خدامتي تساعدك و انا ادري لو اهد حيل الخدامه خالتي ماراح تقول شي بس انا اعرفها الخدامه جمبازيه ( فيها عياره ) ما كنت اناديها الا عشان تقط الزباله كرمكم الله كانت الكلبه حشاكم تنزل تمسك خواصرها و ظهرها تقول مدام في شغل وايد كل يوم كل يوم هي ينادي انا عشان يغسل بيت كله خالتي تعرف عيارتها لانها تعرفني انني ما اتدخل بخداماتها ولا لي شغل فيهم وانا من النوع اللي يعتمد على روحه و يمشي حاله و نصيحه هذولا أوادم مثلنا رضينا ولا لأ لازم تساحلينهم شوي يعني اذا شفتيها اضحكيلها و سلمي بس لا تطيحين الميانه و اذا طلبتيها تساعدك و شغلك وايد عطيها بيزات بس مو كل مره تعطينها يعني حيريها هالمره تعطينها و المره الثانيه طنشي

أنا شخصيا مع الأخت مجنونة قطر في كلامها وعلى فكره نحن في البيت نعاني من نفس المشكلة ولكن العكس حرمة أخوي هي اللي معذبه الشغالات عكسج أنت تماما تأمر عليهم وبأسلوب وقح (تقولهم يا حماره -يالكلبه -تف عليج )يكرم السامع وتتريى منهم أفضل خدمة وأهم يحليلهم ما مقصرين فيها وبرغم من ذلك دايما تنتقد شغلهم وتقوللهم أنتو ما تعرفون تشتغلون واهم الصراحة ما مقصرات في شيئ شايلات البيت شيل .............واتخيلي من كثر معاملاتها اللي موبزينه اربع شغالات سفرنا والأربع كلهم يرددون نفس الكلمة (هذا بيت ما في يجعد شغاله ابدا يوم حرمة ولد مال أنت موجود ) واتخيلي وحده منهم إلى اليوم تتصل فينا تسلم وتنشد عن أخبارنا وتكلم الوالدة طبعا لأن أمي واايد طيبة مو معهن بس حتى الدريول بعد يشهد علىطيبتها واحترامها لهم كبشر أولا وأنهم في غربه .واختم كلامي بموقف من حياة الرسول صلى الله عليه وسلم (كان للرسول خادم يقول أني عملت عند رسول الله لعشر سنين لم يسألني قط لما فعلت هذا ولما لم تفعل )