كل يوم بفقد من انوثتي بسبب الشغل شو اعمل

مرحبا
يمكن انا مشكلتي مش كتير تشوفوها كبيرة بس هي فعلا مأثرة فيي

المشكلة تكمن بطبيعة عملي وطبيعة عمل خطيبي وبالعلاقة ما بيني وبينه

بالنسبة الي انا مهندسة مدنية وحاليا شغلي بتركز بمشاريع اعادة تاهيل طرق خارج بين المدن والقرى وبصراحة انا شغلي ما في ولا بنت غيري يعني كل اللي بتعامل معاهم هم مهندسين من الاشراف والمقاولات رجال . وبما اني بين رجال هدا الشي بيحكم علي اني اكون قوية الشخصية جدا وما اعطي عين لحدا . بالاضافة انو شغلي كمان بيعكس على طبيعة لبسي يعني لازم اكون سبورت اكتر بالملابس العملية والسيفتي شوز والطاقية الخاصة بتواجدي بالموقع.... الخ

هدا الاشي عكس تماما شغل خطيبي هو بيشتغل بشركة اتصالات شغله مكتبي طبعا كل القسم عنده بنات اكيد التعامل بالشركة كتير محترم وجنتل والعلاقة بين الموظفين بتحسوها راقية ( مقارنة بشغلي انا ) طبعا ما تنسو لبسهم بالشغل كيف بكون لازم دايما لبس رسمي بدلات وربطات عنق وحذاء دايما بلمع ( مش متلي انا مرات بروح مغبرة من الشغل) .

كمان طبيعة شغلي بيعكس علي مرات في كلامي يعني كتير خطيبي بسالني عن شغلي كيف ماشي وكيف اموره وطبعا انا كل كلامي عن البيسكورس والزفتة و العبارات وما الى ذلك من الكلام الدفش ( لغة طرق وشوارع)

يمكن انتو تسالو حالكم انو شو جابرك على الشغل اللي بدي تعرفوه انو شغلي في شركة كتير كبيرة ومشاريعها كتير كبيرة وضخمة وانا مهندسة مكتب مش موقع يعني ما بضل 24 ساعة في الموقع بس طبعا بنزل جولات على الموقع وحاليا انا بشتغل بمشروع راح ينتهي بعد شهرين تقريبا بس هدا مش اول مشروع الي بشتغله وطبعا توبة بعد هالمشروع ما راح اعيدها واكمل معاهم

يعني انا هلا صرت متورطة معاهم وصعب جدا اني اترك الشغل هلا لانه بصراحة ما في حدا بديل عني بالشغل لانو شغلي كان بتوصية من الشركة الممولة وهي شركة اجنبية اشتغلت معاها بمشاريع قبل هيك وكان شرط هاي الشركة الممولة انو انا اشتغل بالمشروع مع شركة المقاولات وازا تركت الشغل هلا كتير بسبب ارباك للشركة وممكن انهم يتاخرو بتسليم المشروع .

والمشكلة هي انو انا حاسة حالي كل يوم بفقد اشي من انوثتي ونعومتي كبنت ..... عالم الرجال بصراحة دفش كتير واحيانا مقرف .... وانا خايفة انو هدا الشي ياثر علي خصوصا انو اكيد ممكن خطيبي يقارن بيني وبين اي بنت معاه بالشغل اللي كتير بهتمو باناقتهم ونعومتهم

بدي احكيلكم انو با لاصل خطيبي كتير مدايق من شغلي ورافض وضعي هدا خصوصا لاني بين رجال وهو من النوع اللي بغار وكتير بيجي عندي عالموقع فجأة من شان يطمن عالوضع طبعا دايما ما بعجبه اشي ودايما بحكيلي انو بعد الزواج ما احلم بشغل ابدا وانا عن جد محتارة لا انا مرتاحة بوضعي هيك ولا حاسة انو خطيبي مرتاح ومش عارفة شو اعمل

بدي منكم تحكولي شو اعمل المشروع لسة راح ينتهي باخر شهر 5 وانا عرسي المفروض راح يكون بشهر 8 ولهلا انا ما جهزت اشي لا لبس ولا أثاثا ولا اشي

شو اعمل ...شو اعمل؟؟؟

ياريت تفيدوني