ساعدوني في الزهبة بارك الله فيكم!!

شوفي يا اختي انتي قلتي انج ما تبي تكلفين ريلج فلا تطلبين وايد انا بصراحه مهري كامل 70الف درهم والحمدلله رب العالمين مكفيني والله اشتريت وايد اشياء ومن محلات زينه ولكن نصيحه لا تاخذين اشياء وايده ولا تتخبلين شرات بعض البنات والله انهن يضحكن جانه السوق بيبند من يعرسن هههههه...الله يهديهن ...شوفي اولا شي أكيد بتيج بعض الهدايا من ربيعاتج واهلج....وثانيا اذا سافرتي اكيد بتتسوقين من هناك...وثالثا مرات بتطلعين ويا ريلج سناتر وبتشوفين اغراض وبتشترينها ..شو بتسوين بكل ها الاشياء عقب؟؟؟؟ فلا تطلبين منه وايد احسن....والله يوفقكم

هممممممممم

اختي مشكوووووورة....

شوفي انا فكرت اطلب 30 الف او 40 الف..غير المهر اللي هو 20 بقرار من الشيخ زايد الله يرحمه

فما ادري هل بيكفيني 30 او 40 ؟؟؟

و غير قمصان النوم اللي هرووونا فيها البنات هههههههههههههه نص المبلغ على القمصان..

انا عارفة شو الاشيا اللي اشتريها بحكم اني قريت موضوع عن المستلزمات الخاصة للعروس...

بس مو عارفة شو الميزانية اللي احطها حق الاشيا اللي باخذها

و هل المبلغ هذا بيتضمن فستان العرس و الصالون...و لا الفستان و الصالون بيكون عليه!!

خاصة انه كل شي غالي هاليومين؟؟

انا المهر والتجهيزات 50الف بس والحمدلله

لي رجعه ان شاءالله
انا في نص تجهيزاتي

على حسب العقد عليهم و الا عليج و الساعه

و الفستان بتفصلينه والا بتأجرينه

اذا من هالبيزات بتزهبين و بتاخذين عقد و بتفصلين فستان..عيل اقولج مستحيل يسدن

الحين ارخص فستان عروس محترم ب 30 الف

شوفي كيف نظامج و خبرينا و بنساعدج

مرحباا الغالية اول شي الله يتتم عليج ويسر امورج ان شالله اختي اذا مهرج بيكون 40000 او 50000 ان شالله بيكفنج بس اذا فكرتي تاخذين فستان العرس ايجار طبعا ،، واما عن العقد اذا هل ريلج بيبونلج اوكي اما اذا لا فحاولي انج تدورين عند اي حد معرس يعطيج اياه وعقب تردينه ، وااااااايد يسوون هالحركة ووخذيلج اشيا ناعمه وبسيطه من الذهب او الماس وعلى فكرة الحين الكل يلبس اكسسوارات يعني الحلق الكباار حق الاعراس او غيره من المناسبات وبتحصلوون وايد في الامارات موول ، وافي وغيره من المحلات اللي موجودة في دبي ولاتكثرين من الثياب لانج اكيد بتملين منهم وبتفصلين
غيرهم عقب العرس واستغلي فترة التنزيلات وخصوصا محلات قمصان النوم والملابس الداخلية ،،،

هذا اللي اقدر عليه الغالية وان شالله البنات يفيدونج اكثر والسموووحة منج الغالية

دبي ليدي .... اسمحيلي اقوولج المبلغ الي بتطلبينه ما يسون شيء ابدا ...
انا عطوني 80000 الف ولا كفن بعد ماسويت شيء وهليه حطوو زياده 20000 ..........
لا تنسين انج بتفصلين كنادير عربيه وفيهاا فصوووص وكنادير من غير فصووص حوالي 20 أو أكثر وكم تكلف الكندووره .. وبتسوين مغربي على الاقل 3 ... وخمس لبساات نعووول أو اكثر ... خمس اصقم عبايه مع شيلهن وسااده وحده .. أمممممم ملابس دااخله وقمصاان نووم ....ولا تنسين اهم شيء الحنااء يكلف اقل شيء 1000 والمكياااج والتسريحه 5000 والفستااان اقل شيء 30000 .... الله يعينج يا الغاليه ذكرتيني بزهبتيه ...

خلاص خواتي مشكووورات ما قصرتوا...

اتفركشت السالفة...و لا بعرس ولا هم يحزنون.,...

انا كنت مخطوبة..و البارحة اكتشفنا صفة هب زينة في الولد...و رفضناه...

بس مو مشكلة..اهم شي اني استفدت منكم..عشان اكون جاهزة حق المرات الياية...

و اللي بسويه الحينة اني العب رياضة عشان اشد جسمي

و بعتني ببشرتي و اخذ راحتي لين اذا الله راد و جاني واحد غيره

بارك الله فيكم يا بنات و دعواتكم انه ربي يعوضني باللي احسن منه :)

عسى الله يعوضها عليج حبوبة و يرزقج بولد الحلال اللي يستاهلج :)

الله يعوض عليج ويرزقج بولد الحلال اللي يستاهلج ويحطج في عيونه ان شالله اهم شي انج ما تفكرين في هالسالفة واهتمي بنفسج مثل ما قلتي يا عيوني

والسموووحه منج

:confused::cry:

دعواتكم لي خواتي

ربي يعوضني...

صدق متضايقة وااايد...

اعرف مافي انسان كامل...

بس دعواتكم انه ربي يرزقني بواحد اقدر اتقبل عيوبه..

والله احس بتعقد...ما اعرف شو رايكم بالنسبة للريال اللي يدخن

اخر واحد رفضته بس عشان الدخان

ما اقدر اتحمل ريحة التدخين ...هل انا على صوااب...

امي تقول تقدرين تغيرينه بعدين...بس انا احس ما اقدر اغير حد :cry:

مرحبا الغالية لا تضيقين بعمرج انا خطيبي يدخن مع اني ماطيق الدخاان وبسرعه اصدع بس ما عتقد انه سبب يخليج ترفضينه وصدقها امج تقدرين تغيرينه وواايد رياييل كانو يدخنون وعقب بطلو والسبه حريمهم يعني بامكان اي وحده تغير هالشي وعسى الله يقدرني واخلي خطيبي يبطل هالدخان وعلى قولته انا قبل العرس بقطع التدخين بس ما ادري ان شالله خير

عسى الله يسر امورج الغالية ويعوضج باحسن منه ولا تنسين تستخيرين وتوكلين امرج لله

والسموووحه منج غناتي

قدر الله وما شاء فعل

الله يعوضج خير حبيبتي..وعسى ان تكرهوا شيئا وهو خير لكم...
انا ريلي كان يدخن بس الحمدلله من ايام الخطوبه خليته يترك...ووايدين جيه..يتركون يوم يعرسون...

بس حبيت اعلق على مسأله المهر

حبيبتي..
المهر مسأله شخصيه تختلف من شخص للثاني...ومن اسره للثانيه..يعني فيه ناس هم يحددون المهر..وناس ثانيين اهل المعرس يهدونهم المهر..واللي انا اشوفه ان الحاله الثانيه احسن...عشان ما تكون السالفه كأنها بيع و شرا...لان العروس مب سلعه...
اللي بيقدمه لج ريلج اقبليه ...عشان تكبرين بعينه و عين اهله...وعلى قد المهر رتبي امورج لان اكيد اذا ريلج بيقدر يدفع اكثر عمره ما بيقصر...عشان ما تبدين حياتج بديون و مشاكل...
وبالنسبه للتجهيزات...فيه كلمه قالتها الاختcamberlight الصراحه تستاهل :clap:...السوق ما بيطير..هههه ...شوي شوي على عمرج يوم بتزهبين..عشان الاشيا ما تطيح في جبدج....:)

والله يوفقج

نصيب .. هذا كله نصيب ..

ولا تحطين فخاطرج .. الانسان اللي مكتوب لج بي انشالله ..

وأنا متأكدة إنج ما رفضتي هذاك الانسان .. إلا وإنتي مقتنعه بالقرار اللي اتخذتيه ,,

وما أتصور إنه الدخان هو السبب الوحيد ..

ذكرتيني يوم ياني ريلي يخطبني .. توها المكالمات جاريه بين الوسيطة اللي بينا وبينهم ، صفيت حق اميه أسأله في ورقه وخليتها

تسألهم .. وكان سؤال ( الولد يدخن ...؟؟؟!!! ) من بين الأسئلة .. وحليلها قالت أنا ما أعرف خليني أكلمه ورد أكلمكم .. واتصلت فيه ..

وقالها : أنا ما أدخن إلا مرة في اليوم .. هذا اذا كنت مضغوط في الشغل ... وبس ..

قلت هذا مقدور عليه .. وبعدين بيني وبين نفسي .. تميت أفكر .. قلت بالعقل ما أقدر أرفضه عشان تدخين (إلا إذا كنت أعاني لا سمح

لله من أمراض في الصدر ) .. ووافقت عليه .. وطلع إنسان والحمدالله (الله يحفظه ) ما يعيبه إلا الدخان ..

واميه قالت لي عن خالي .. قالت مرت خالج عيزت وياه .. تبغي تخليه يودر ما رامت .. بس صدقيني محد يعامل حرمته وعياله أحسن

عن خالج ..

وبرد أقولج هذا نصيب ..