بنات قطر-نسوي مرجع للقاعات-

هلا اختي انا بساعدج وبقولج الصراحه اذا هم عندهم خبرة ويبون يسيطرون خليهم احسن عشان تفتكين والله من عوار الراس والقلب ترا الدوحه نااار ومحلات واايد انا كلفت اخت زوجي وافتكيت وخلها تسيطر على كيفها بالاول والاخير العرس في وجهم اهم شي عندي فستاني ومكياجي وتصويري بس حبيت اقولج اذا تقدرين خليهم يسوون كلشي وافتكي اذا انتي حاابه

المهم نجي القاعات صااارت ناار وكل مالها تزايد مستمر بالاسعار

اوكي اول شي بقولج شي متعارف بالقاعات كلها بقطر يعطونج مثلا خذتي 300شخص موغصب نفس العدد لا اي عدد يعطونج 50 كرسي فقط من طاوله مجانا
وطبعا البوفيه عليهم وسويت للعروس وخدمه عاملات اللي يضيفون الناس بكل قاعات الدوحه اوكي

اتمني فهمتي

وبقولج البوفيهات
درجات اخذي اقل واحد لان عادي ناس ماراح تفرق تبي تاكل وبس

القاعات

الريتز كارلتون فخمه وكبيرة ولازم كوشه كبيرة لكن غاليه واايد شخص ب193 مع خدمه والبوفيه وليله سويت للعروسين يعني لو تبين 350شخص وطبعا بيعطونج 50مجانا فقط كراسي واذا تبينها لازم تحجزين بسرعه مافيها حجوزات بسبب كثرة مؤتمرات

ضربي 193 ضرب عدد الاشخاص اللي تبين تحجزينهم مثلا 350 يطلعلج الله يسلمج حوالي 70الف

وبعدها قااعه فخمه فندق الشيراتون قاعه سلوي ويعطونج نفس الخدمات سويت وبوفيه و50مجانا وكل شي اوكي سعرهم 165 للشخص عاد انتي حطي عدد الناس وضربيهم بالسعر ونفس شي ماتحصلين حجز بسبب مؤتمرات

وبعد الله يسلمج قاعه الدوحه للاحتفالات هذي كبيرة واحس رااقيه ومناسبه للسعر وسعرهم 95 للشخص وااايد احبها هالقاعه احسها حلووة ونفس الشي ماتحصلين حجوزات

وعندج ريجنسي عندهم قاعتين الزرقاء والحمراء ونفس الباقي 50مجانا وسويت وكل شي من خدمات واسعارها اعتقد 120 للشخص او160 للشخص نسيت

وعندج نادى الدانه 120للشخص وكبيرة واايد ونفس خدمات الباقي

وعندج فندق ماريوت بس قاعه ضيقه وصغيرة تصلح ل300بس

وعندج انتركونتينتال وحلوة ونفس السعر 165 للشخص ونفس خدمات الباقي لكن تصلح ل350 فقط اكثر بتكون زحمه


هاي اللي اتذكرهم واذا تبين تستفسرين زياده اتصلي بالاستعلامات واخذي ارقامهم اسئليهم

بس انصحج حجوزات يالله بزوور بتحصلين وغير هذا الاسعار كل مالها نااار احجزي من اللحين

اتمني اني افدتج

حبيبتي كل قاعة مع البوفيه يعني لما تحجزين القاعة تحددين عدد المعازيم مثلا 450 وسعر البوفيه اعتقد 100 وطالع لكل شخص وعلى هالأساس يطلع سعر القاعة...

القاعات الموجوده في الدوحة:
ريجنسي (الحمرا + الزرقا)
الريتز (قاعة الوسيل)
الدانه( الجيوان)
قاعة الدوحه للاحتفالات
الشيراتون(قاعة الدفنة+قاعة سلوى)
الانتركنتنتال


طبعا اي محل بتروحين له عشان الكوشه بيسألج عن القاعة

واي استفسار انا حاضره

عروس الدوحه

مشكوره وضحتي لي وايد امور

مب مشكله بخلي كل شي عليهم

بس ماحب ذوقهم وبعد يفرضون رايهم

وعرس اختهم كان دون المستوى

وشرايج انهم يبون يختارون كل شي بمزاجهم

وانا ادفعه من المهر و بدون نقاش

خطيبي مسكين يقتنع بسرعه

وهم يقنعونه بكل الي يقولونه

يعني لو اني ماسكت بيقتنع بكلامي بسرعه

عشان جذي مابيهم يتعلمون يتحكمون فيه و فيني بعد

زين اغلب القاعات فهمت انهم يعطون 50 كرسي مجاني

وباقي الناس شلون

يعني المحل اللي يسوي الكوشه و الطاولات يحطون كراسي ؟

مادري والله مافهم شي

عن قاعة الدفنة للاحتفالات ماحبها كلش

حتى ما اتشجع اروح اي عرس فيها

وبشكل عام ما اروح اعراس ما تشوفيني مافهم شي

فراولة قطر

ما قصرتي اختي بس على حسب الي شفته

عجبتني قاعة سلوى حلوه و ملمومه عكس الدفنه مالت الشيراتون صعب تنملي

قاعة الجيوان في الدانه بعد عجبتني

بمر اشوف القاعات اليوم

و بخبركم عن الي يصير معاي

بسئلكم بنات

عدد المعازيم بالغالب شكثر

يعني معدل طبيعي

450 او 500 زين ولا شوي

السلام عليكم...........

عزيزتي بالنسبة للقاعات البنات ما قصروا وضحوا لج كل شي

بالنسبة لمحل الكوشة ما لهم خص بالكراسي انتي تبلغينهم ان عدد الطاولات مثلا 35 طاولة وكل طاولة عليها 10 كراسي يعني العدد 350 كرسي وبس والمحل يوفر لج شرشف الطاولات والكراسي باللون اللي انتي تختارينه

بالنسبة لعدد المعازيم يعتمد على هلج واهل ريلج شوفي معازيمكم شكثر ومعازيمهم شكثر وعلى هاللأساس حددي عدد المعازيم والطاولات مثلا اذا كانوا معازيمكم 200 شخص ومعازيم اهل ريلج 200 سوي عدد الطاولات 35 والبوفيه حق 350 شخص لأن الفندق بيعطونج 50 زيادة

وحطي في بالج ان مب كل اللي بتعزمونهم بيجون العرس يعني مستحيل تعزمون 400 شخص ويجون كلهم ولهسبب لا تكلفين على نفسج وخصوصا ان كل شي عليج من المهر حسب ما فهمت

اما خوات ريلج حاولي انج تكسبينهم وفي نفس الوقت سوي اللي انتي تبينه يعني اسمعي افكارهم وآرائهم واذا ما عجبتج قولي لهم انا في بالي فكرة ثانية وعاجبتني او كل ما قالوا لج شي قولي انشالله باشوف وبعدين سوي كل شي على كيفج،،، ومدام انتي اللي بتدفعين حق الكوشة والعرس من الألف غلى الياء سوي اللي انتي تبينه واللي يريحج

اتمنى اني اكون فدتج


تحياتي...............................

هلا اختي ام لولوة ماقصرت

القاعه اللي بتحجزينها يعطونج طاولات وكراسي اللي عليج تروحين محل تختارين كوشه وشراشف طاولات واللي عليها

ومعازيم جيبي ورقه وقلم وكتبي اهلكم كلهم وصديقاتج واللي بتعزمونهم واسئلي ريلج كم اهلهم وجذي حجزوا مثلا هذا افتراض انتي هلج 150 وهو هله 150 يعني 350 فحجزي 300 و50 مجانا

واي شي تبين مايردج الا لسانج وعلى الخاص سئليني مثل ماتبين انا تحت امرج والله يوفقج

السلام عليكم
البنات ما قصروا معاج
بس حبيت انبهج لشغله وهي ان اهل ريلج يبون يتحكمون في اختياراتج يمكن هم شافوج صغيره واكبر وحده بوسط اخوانج حبوا يساعدونج لا اكثر وبعدين هم اهل المعرس اكيد بيتدخلون لانه عرس ولدهم بعد ولا تخلين هالامور التافهه تسبب حساسيه بينكم من البدايه اي شي قالوا لج قولي انشالله بشوف انشالله بسال يعني مشي الامور وانشالله امورج كلها بتتسهل
ودام ان انتي اللي بتدفعين فلوس القاعه او الكوشه والطاولات اختاري اللي يناسب ميزانيتج وذوقج بالاول والاخير هذي ليلتج مره وحده بالعمر واختاري الالوان اللي تحبينها على ذوقج
وبخصوص الكوشه والقاعه في قاعات سقفها عالي تناسبها الكوش الفخمه والكبيره مثل الريتز والدفنه شيراتون والجيوان
لكن باقي القاعات مثل سلوى وريجنسي و .... ارتفاع السقف اقل فلازم تاخذين كوشه ارتفاعها منخفض وحجمها اصغر

ومن ناحية القاعات بكتب لج بالترتيب من الافضل
الريتز كارلتون قاعة الوسيل
الدفنه شيراتون
الفورسيزون
قاعة سلوى
الجيوان في نادي الدانه


وقاعات ثانيه مثل ريجنسي والانتر كونتننتل والمؤتمرات والمختصر بالريتز كارلتون وو النادي الدبلوماسي


واذا عندج واسطه احسن واحسن بعد انشالله بتلاقين القاعه اللي تعجبج بالسعر اللي يناسبج
وانتي احسبيها عدل مثلا اذا اخترتي قاعه راقيه اكيد خدماتهم ارقى وغير الغرف اللي بتكون لج تتجهزين فيها انتي واهلج والسويت اللي بتنامون فيه وبعضهم يعطونكم فري سويت في عيد زواجكم الاول عاد انتي احسبي هالاشياء كم تكلف

واكيد كل ما زاد عدد المعازيم بتزيد المصاريف من تنسيق الطاولات والبطاقات ووووو ...
واي سؤال انا حاضره والله يوفقج يارب

خواتي

والله ما قصرتوا وان شاء الله الله يقدرني واخدمكم بالافراح

شكلي اقتنعت بقاعة الوسيل في الريتز

ادري مللتكم معاي بس هي تقريبا تكفي معازيم شكثر؟

و شنو الخدمات الي تكون معاها ؟

هلا والله اختي اولا الف مبروك الله يتمم لج على خير

بالنسبه للمشاركه عندنا وعندج الخير لكن وحياتج بسياسه واسلوب حلو وذرب خليت كل شي انا اختاره وزوجي هو اللي دفع بعدمب انا ماخليت خوات زوجي يتدخلون بشي ابدا رغم محاولاتهم المستمره حتى اللون اللي اخترته ماعرفوه الا توهم من يومين شوفي وانا عرسي بعد اسبوع تقريبا والحمدلله زوجي مساعدني في هذا شي يقول لي انتي العروس اختاري اللي تبينه ماعليج من احد...
تخيلي عرس اخوه كان من اسبوع وامي راحت العرس الا تقول التجهيزات كلش الله بالخير وخواته يقولون لي احنا سوينا وسوينا بنشوف انتي شبتسوين عاد انا احرجهم واقول لهم اكيد مابسوي الا كل خير اللي يبيض ويهكم فمن رايي ودام ان انتي اللي بتدفعين بعد والله سوي اللي بخاطرج بس بسياسه محنكه تحملي يحسون فيج ان انتي ماتبيغين ذوقهم لان فشيله الصراحه .

الله يتمم لج على خير

بالنسبه للقاعات بصراحه على حسب الميزانيه شوفي اللي يناسبج والبنات ماقصرو معاج حطو لج الاسعار بعد .

هلا اختي قاعه الوسيل تشيل لين الف شخص وخدمات سويت للعروس غرفه لاهل المعرس ليله للعروس +عشاء+فطور ليوم ثاني

طبعا مع بوفيه وطاولات وكراسي وعاملات اللي بيوزعون الاكل اللي في سلال +يوزعون طول الليل عصاير

اتمني فهمتيني انتي حصلي حجز قبل لانه هالقاعه متروووسه مؤتمرات وماتحصلين الا بزززور

وعلى فكرة غاليه شخص 193