فيني قهرررر

سلام بنات

عندي مشكله .. شنو تنصحوني اسوي فيها

المشكله اني من انخطبت وتزوجت وبديت اتعرف على اهل زوجي لاحظت ان بنت خال زوجي وحده مغرورة ومتكبرة علي ، ما تكملني ولا تعطيني وجه بشكل محرج .. كان في البداية على بالي انه مجرد غرور ، وصادفتني حوالي 3 مواقف معاها " بس زوجي ما يكون موجود " تتعمد فيها ان تتجاهلني وحتى اذا اسلم عليها يا ما ترد او ترد ببرود على عكس امها واختها ..

وبعدين مرة كنت قاعده مع زوجي وقلتله عنها فابتسم وقال لي ما عليج .. طنشيها ، ولما سألته قال انها تبيه قبل ما يخطبني وكانت على طول تتصل له وتكلمه وتحاول تتدلع عليه وتطلب منه مشاوير الى اليوم الى رجع فيه بيتهم وكانت هي هناك وقالت له بتشوف مفا<اة في غرفتك ولما راح غرفته شاف رساله منها تبين له انها تحبه وتبيه يكون زوج ليها وانها ما تقدر تعيش بدونه وما تقدر تكون زوجه لغيره " بنت خاله هي في نفس عمر زوجي ، زوجي اكبر بأشهر بس " .

بس زوجي يقول انها اصلا ما تعجبه لانها وايد خفيفه ووهو من الاساس ما يبي وحده من العايله ، بعد كم شهر لما قرر يخطب اختارتني اخته ورشحتني له ولما تقدر وقعدنا مع بعض صار الاعجاب وانخطبنا لمده 4 اشهر وبعدين تزوجنا .

المشكله هي مثل ما قلت لكم .. بنت خاله على طول مطنشتني .. وانا ما يهمني ،، اللي يهمني هو لما يكون في جماعه واهي تتعمد انها تطنشني .. وفوق هذا للحين اذا شافت زوجي قامت تتدلع وللحين تطلب منه يوصلها للمكان الفلاني او تسوي روحها تسأله عن الشغله الفلانية او تسوللف معاه وتقوله تتذكر ذاك اليوم ،، تتذكر لما كنا صغار ووو .. الخ

وفوق هذا اذا شافت زوجب تسوي روحها تاخذ حسون " ولدي " وتلاعبه وتبوسه ، واللي يقهر انها ذاك وبكل جرأة قدامي وما استحت تقول ان ولدي " يجنن .. يشبه ابوه " ، ومرة اختها قالت ان ولدي حلو ويشبهني قالت لا .. يشبه ابوه هو ..

كلمت زوجي كذا مرة عنها . . بس هو يقول ما عليج منها ، طنشيها انتي بعد .. وانا اعرف حق حركاتها .. وحطي في بالج ان انا احبج .. ولا تغارين منها لان انا لو ابيها كنت خطبتها من زمان وخصوصا انها هي اللى رمت نفسها علي ..

بس ماني قادرة .. توني امس تلاقيت معاها في بيت عمي .. وكالعاده ما تركت عنها حركاتها اللي تقهر .. واحس ان فاض بي الكيل وجيت افضفض لكم ..


شنو اسوي معاها ؟؟!!!! :confused: