لو زوجج انقلبت الدنيا فوقه تمشين وراه؟

الله يجزاج خير اختي الموناليزا للاسف اهي بحيره وللحين ما قررت بس الراي الي بيكون اول شي اهو انهاا تتخلى بعد شتسوي كل واحد يشوف مصلحته والله يوفقنا اجمعين

الله يجزاج خير اختي الموناليزا للاسف اهي بحيره وللحين ما قررت بس الراي الي بيكون اول شي اهو انهاا تتخلى بعد شتسوي كل واحد يشوف مصلحته والله يوفقنا اجمعين

هلا غالية
انتي سالتيني شو كان بيكون موقفي
راح اجاوبك وبصراحة ماكنت بتخلى عنه وعن مستقبل عيالي كنا بنتصرف انا وريلي
يمكن نهاجر الى وحده دول الاوربية المهم كنا بنتصرف وتعرفين اليد وحدة ماتصفق
لازم انا اكون مع شريك حياتي في الحلوة والمرة
اجل ليش انا تزوجته اذ مابتحمل معاه ومابسانده في كل ظروفه
وفي نهاية هذا اختبار من ربنا
والله يوفقها وما اوصيج خبرينا شوراح تسوي واي قرار بتتوصل له

بصراحة الله يعينها قرار صعب بس التفكير لازم يكون بالعقل قبل القلب وتفكر بمستقبلها ومستقبل اولادها واذا كانت عنده فرصة لتحسين اوضاعه وتصحيح وضعه في بلده يكون احسن

الله يوفقها ان شاء الله

انا معاج اخت بعيده المنال بس الهجره ماصارت سهله مثل ما نذكر اهو قاعد يحاول يهاجر بره وانشالله يقدر عشان ما تتخلى عنه .... الفكره اهي انه اهلها مو راضين في الدوله الي اختارها ااهو للاسف دوله فقيره ماعندها شي وين بتعيش بنتهم هناك؟؟

صحيح اهو اختبار من ربنا والله يسرر امورها انشاله ونشوف شنو ترسى عليه.... اشكرج اختي

تسلمين اخت رومي علي مرورج وصح القرار لازم يكون بالعقل....


العقل يقول خليه باجر يجي نصيبج مع الاحسن والقلب يقول لا تمسكي فيه اهو يحبج مافي وحده لاقيه زوج يحبها مثله...

الله كريم

بس بقول شي واحد
تخيلو ينطرد من بلاده ومحد حوله
والكل يتخلى عنه؟
حتى زوجته وحبيبته بتهده؟؟؟؟؟

لو انا بتم معاه

لو تحبه صج تستخير

بس أحس إنها بتتبهدل وهي بعدها صغيرة في بلد الغربة وخصوصا لو يمكن إمكاناته المادية صعبة وبعديج باجر لو حملت من بيساعدها باجر العيال بيتهذلون يعني ما أدري أحس ها الزواجه بتكون صعبة ومتعبة ولو تطلقت بتكون معذورة من الناس وبتلاقي اللي أحسن منه

بس بالأساس خلها تستخير سبحان الله يمكن يكون سعادتها في هاذيج الدولة مع ها الريال ربج الوحيد العالم

شكرا لكم خواتي وعلي ردودكم الي تثلج الصدر والله

احيي فيكم روحكم الطيبه وخبرتكم في الحياه

شو صار حياتي ان شاء الله توصلت لقرار مناسب

ما ادري ليش ببالي ها السالفة الله يعينها وطمنينا عليها

لاحول ولا قوة الابالله والله صدق صعبة

عليها با لاستخارة والله يوفقها انشاء الله

أنا في نفس عمرها ولو منها رحت معها وماتخليت عنها لان مثل ماقالت خيتو صعبة المنال الحياة فيها الحلو والمر
بالعكس بعدين راح يكونون اسعد زوجين بغض النظر عن الاشياء الثانية ,, والوحدة لابد وفي يوم راح تحمل مسؤلية أكبر من هالشي
ولو حصل بعدين وجابوا عيال الله ماينسى عبده ( الله كريم ورؤوف بعباده ) وهالشي ابتلاء من الله لهم هم الاثنين


تحياتي

لو عن نفسي انا والله العظيم ما أهده حرام كفايه اللي صار له
بحط نفسي مكانه لو اطردوني من البلاد وحتى زوجي قال ما يبيني وتركني ..شنو بسوي؟؟؟؟؟؟؟؟؟؟؟
اقل شي بسوي بكره نفسي وبكره كل الناس لان الدنيا انقلبت على راسي وفي الوقت اللي كنت محتاجه فيه لوقفة زوجي.. خيب ظني وتخلى عني ...؟؟؟

حرام عليج والله انتي الحين مب خطيبته ؟انتي الحين زوجته يعني ما تخلين حد يتدخل في حياتج انتي وياه انا انصحج انج توافقين عليه صدقيني بتكبرين في عينه وبيحطج في عيونه بيتم طول عمره يقول فديت زوجتي اللي وقفت معاي وما تركتني

استغلي هالفرصه وكوني قريبه منه قد ما تقدرين لانه في هالوقت يبيج تكونين جمبه اكثر

لا تخيبين ظنه فيج لا تخيبين ظنه

شوفي قلبج شيقولج وسوي اللي بيريحج..

وعن سالفة العيال... تخيلي لا سمح الله واسم الله عليج..تخيلي انج تطلقتي منه وتزوجتي شخص اخر ولا جبتي عيال ... شنو بتسوين؟

بتقعدين تتحسرين طول عمرج وبتقولين يا ليتني ما تطلقت من حبيبي و زوجي..

اسم الله عليج انشالله يرزقج بالذريه الصالحه

وهاي زوجج وطبعا الخيار الاول والاخير لج ...

وبعدين البنات اللي يقولون كيف بتعيشين بعيده عن اهلج .؟؟

انا اقولج شي .. هاي زوجج يشاركج بكل شي يعرف اشياء اهلج ما يعرفونها له حق عليج اكثر من اهلج بينسئل يوم القيامه عنج مب اهلج .. يعني هو أولى انه تفضلينه وتعيشين معاه.. والاهل تزورينهم وتكلمينهم عادي

اعتبري انج في شهر عسل طويل ويلا لا تصيحين اظحكي و وافقي

والله يوفقج

والله انا اقول لا اتهده ولا تاخذه....ايه والله ...اهيه بالاول تستخير وما خاب من استخار وبعدين اهلها وبعدين رابها اهيا لانها بصراحه اهيه صغيره وايد وما اتوقع انها تقدر تتحمل الغربه والبعد عن الاهل والدراسه وبعدين الاولاد وغيره وغيره وغيره...خليها اتحكم ربها وعقلها واتخلي قلبها على صوب ...والله يوفقها للخير يارب

إذا كانت تحبه وعنده مصدر دخل ثابت .. تتوكل على الله وتتزوجه .. ومن عارف يمكن ما تلاقي اللي احسن منه في المستقبل..
استخيري ربج..

شوفي حبيبتي انا اعرف وحده صارتلها نفس الظروف بس زوجها راح دولة خليجية وهو ريال راهي حييييييييييييييييييل و بفلوسة اشترا بيت وحول البزنس ماله هناك لا وبعد في ظرف شهر خذ جوازهم وهدت بلادها واهلها وتزوجته لأنها تحبه........................بعد سنه ولأنها ما حملت مع انه كل شي طبيعي تزوج عليها و ماقدر انها تغربت عشانه وانها وقفت وياه في اصعب ظروفه النفسية..........بما تقدرين تحكمين عكل الريايل خلها تستخير والله بينورلها بصيرتها

ماشاء الله على الخوات كفوا ووفوا

بس لو آنه مكانها ادوس على قلبي وافكر في مستقبلي ومستقبل عيالي وتنشأتهم واذا على الحب يروح مع الأيام

السلام عليكم ورحمة الله وبركاته



أسفة على التأخير بالرد ولكن باين إلى الآن صديقتج ما أتخذت القرار .. وإذا أتخذته يا ليت تبلغينا

أنا رايي يمكن عكس بعض البنات إللي قالوا تفكر في مستقبلها وما ادري شنو..

أنا حطيت نفسي مكانها وعشت الدور وتوصلت إلى الحل التالي:

أول شي طول ما الله سبحانه وتعالى موجود بإذن الله ما راح تضيع وهي لو وين راحت ومع منو

كانت لا تنسى أن الله سبحانه وتعالى موجود بكل مكان يعني ليش الخوف؟ وكلكم تشكون في

قدرة الله عز وجل ؟ وجود الله سبحانه وتعالى مو كافي بالنسبة لكم؟ لا تنسون: عاشر من تعاشر

فلابد من الفراق.. الناس ترى بتفارقونهم اليوم ولا باجر وما دايم غير الله سبحانه..

وأنا مو معاكم في سالفة الحب يروح مع الأيام.. الزوجة المحبة لزوجها والمخلصة له، حبه صعب

أحد ينزعه من قلبها.. عيل إذا الحب يروح مع الايام بكل سهولة ممكن البنات يحبون غير أزواجهم..

شي ثاني أنتي تقولين مظلوم وما قلتيها إلا لأنج متأكدة من هالشي، ما تعرفين أن دعوة

المظلوم ما بينها وبين الله حجاب؟ وهل تشكين في قدرة الله أن ياخذ حقه من إللي ظلموه؟

سؤالي لها، لو كانت متزوجة وعندها عيال منه، هل كانت بتتركه؟

إذا ما وقفت معاه في موقف مثل هذا وهو مظلوم فيه ترا بكرة ما راح تلقى من يوقف معاها..

وإذا هي تحبه شلون تبيعه بهالسهولة.؟. لا تقولون مستقبل ما مستقبل.. المستقبل

ما يعلم به إلا رب السموات والأرض ولو قعدت 10 سنين تفكر بالمستقبل والله ما راح تعرف شنو

بيصير فيه..

قولي لها خليها تفكر عدل وإذا كان الرجل يستحق هالشي فلا تبيعه وتبقى معاه ولا تخاف من

بكرة طول ما الله سبحانه وتعالى موجود..

لا تحتار، تمسك السجادة وتقابل القبلة وتصلي ركعتين تستخير الله .. وتصلي مرة ومرتين و3

إلين ما الله سبحانه يختار له الطريق الصح ، قولي لها اتركي كلمة لو و لو و لو تراها

تفتح عمل الشيطان ... صلاة الإستخارة فيها الحل..

ومن رايي ما تبيع الرجال وتوقف معاه وباين عليه زين.. لو ما كان زين كان ما سألها إذا

كانت تبي تستمر ولا لا.. كان فرض عليها الزواج.. بس من طيبه وحبه لها سألها وأخرتها تبيعه

علشان شي ما يعلم فيه إلا الله سبحانه..؟؟


نصيحتي لها: صلي الإستخارة حبيبتي ووكلي أمرج لله عز وجل واتركي وساوس الشيطان..

الله ييسر أمرج ويرزقج كل الخير إن شاء الله..


و السلام عليكم ورحمة الله وبركاته

بصراحه الأشياء السلبيه اكثر من الأشياء الإيجابيه

فالبتالي ما لها في هالزواج،،،


بس الحلو في الموضوع إنها قريبته ومن ثوبه،،،



سفيرة فوق العاده

وفيه آيتين خليها تحطهم قدام عيونها،

" وَعَسَى أَن تَكْرَهُواْ شَيْئاً وَهُوَ خَيْرٌ لَّكُمْ وَعَسَى أَن تُحِبُّواْ شَيْئاً وَهُوَ شَرٌّ لَّكُمْ وَاللّهُ يَعْلَمُ وَأَنتُمْ لاَ تَعْلَمُونَ " سورة البقرة



"وَأَنكِحُوا الْأَيَامَى مِنكُمْ وَالصَّالِحِينَ مِنْ عِبَادِكُمْ وَإِمَائِكُمْ إِن يَكُونُوا فُقَرَاء يُغْنِهِمُ اللَّهُ مِن فَضْلِهِ وَاللَّهُ وَاسِعٌ عَلِيمٌ " سورة النور



والله يوفقها