سؤال يبيله اجابه صريحة هل كل ماتقرأينه من أفكار تطبقينه للمتزوجات

حبيبتي
ممكن بالسنه تسوينها مرة بالعيد
والا بتاريخ غالي على قلبكم

ولا تقولين كأنه ما صار شي بالعكس هذي الليلة يمكن تكون الوحيدة اللي بتتذكرينها من السنة كلها
ضبطي لها ميزانية خلال السنة
وجمعي الاغراض على شوي شوي ..

ومو كل ما ينكتب بالحرف الواحد على حسب ذوقج وذوق زوجج

وموفقة يالغلا
وحلللللللوة جملتج ((حياتنا مافيها اكشن ))

تحياتي لج

السلام عليكم ورحمة الله وبركاته...............


يمكن يكون بعض كلامج صحيح ولكن....................... كلشي تبينه يصير اذا انتي عندج الاستعداد

اشلون.....................

اولا بالنسبة للاغراض مش شرط انك تشتريها مرة وحدة وفي يوم واحد لازم قبل كل شي تحددين اليوم اللي بتسوين فيه المفاجأة

وقبل باسبوع او اسبوعين تبتدين تشترين الاغراض حتى انك ممكن تشترين الاغراض قبل شهر بصراحة انا اتبع هاذي الطريقة واقرب مثال ذكرى زواجي بيكون في شهر 2 وانا بديت اجهز لذاك اليوم من الحين كل ما توفر عندي مبلغ بسيط او توفر عندي الوقت والسيارة اروح اشتري على مهلي

ومب لازم تكون الاغراض كثيرة ومب لازم اطبقين الفكرة بحذافيرها انتي ممكن تلغين بعض الاشياء اللي انتي اتشوفينها مب ضروروية او تضيفين بعض الاشياء الجديدة من عندج

وانتي ممكن تطلبين من احد خواتك او صديقاتك انهم يساعدونك في شراء الاغراض يعني ممكن تطلبين من الاغراض اللي تبغينها وهي تروح تشتري لك اذا قدرت

وفي فكرة انا اشوفها حلوة بصراحة ،،، انتي ممكن تشوفين خواتج المتزوجات او حتى صديقاتج اللي يحبون يسون لأزواجهم مثل هاذي المفاجات وتساعدون بعض مثلا كل وحدة منكم تحط مبلغ ولما يجّمع مبلغ عندكم تشترون الاغراض وتتبادلون وانا اقصد بالاغراض مثل الشموع و الاكسسوارات الخاصة بالليلة ( الشمعدانات الكروت المخدات اللي على شكل قلب ...... الخ )

انا وبنت عمي وصديقتها نتبع هاذي الطريقة تزوجنا احنا الثلاثة مع بعض تقريبا وكل ما شرت وحدة اغراض وسوت الليلة لزوجها تعطي الاغراض للثانية عشان تسويها وبالطريقة ذي صرنا نوفر جزء كبير من الفلوس

وبعدين ياحبيبتي مثل هاذي الاغراض ما تخرب اذا حافظتي عليها زين وممكن تستخدمينها اكثر من مرة وفي اكثر من مناسبة ماراح ترمينها بعد استخدامها

وممكن تستخدمين نفس الاغراض وحتى نفس الفكرة لكن مع تغيير لبسك وشكلك بس حطي في بالك انك اذا بتكررين نفس الفكرة لازم تكون المدة بين المرة الاولى والثانية كافية عشان زوجك يكون ناسي المرة الاولى

ثالثا بالنسبة للعيال انتي ممكن تودينهم عند اهلك كم ساعة مثل ما قلت لج خلي حد من خواتج يساعدونك او حتى خوات زوجك وصدقيني راح يساعدونك واذا كان هذا الشي صعب عليكي حاولي تنيمينهم من وقت عشان تتفرغين لزوجك

واذا كان بعد صعب عليكي هذا الشي خلي المفاجأة بحدود غرفة النوم بس واتركي باقي البيت لعيالك عشان يمرحون ويلعبون فيه
هههههههه

واخيرا حبيبتي انتي قلتي ان هذا مضيعة للفلوس وانكم تصحون اليوم الثاني وكأن شيئا لم يكن
اسمحيلي اقولك انك غلطانه كثييييييييييير ليششششششششششش

لأن زوجك ما راح ينسى هاذي الليلة وراح يذّكرها على طول ويمكن يقولك بعد فترة ابغيج تسوين لي نفس ذيك الليلة

وبعدين ياحبيبتي الفلوس تروح وتجي واذا راحت على سعادة زوجك وسعادتك ما اعتقد انها خسارة

ابغيك تسألين نفسك هذا السؤال ( هل يستحق زوجك ان تخسري بعض النقود لأجله ؟؟؟ )

بس اجاوبين على هذا السؤال ان شاءالله بتتيسر امورج ، و في النهاية اللي تسوينه مب حراااااااااام

بالعكس لازم تسوينه قبل فوات الاوان وخصوصا انك قلتي انه صارك سنتين متزوجة

ان شاء الله اكون فدتج اسمحيلي طولت عليج

تحياتي........................

اختي الحبيبة

اللي تقرينه هني مو خيال
وانا واحده اطبق كل شي موجود
اهم شي عندي محبة زوجي
وعلشان أنا أحبه مستعده اسوي كل شي علشان أملك قلبه
مستعده أخسر ... لأن خسارتي ما راح تضيع
وبعدين هذا كله يعتبر من السحر الحلال للزوج
والوحدة إذا ما تبعلت حق زوجها تتبعل حق من

وكل عصر له احتياجاته وأفكاره

وعصرنا هذا يحتاج منا انا ننفكر بأشياء رومانسية عديدة علشان ما نخلي أزواجنا يلتفتون لأشياء ثانيه
وانتي تشوفين حواليج اللحم الحرام موزع وببلاش فليش ندفع ازواجنا دفع لهذي الأشكال

اما بالنسبة للمال انتي ممكن من بداية السنة تبتدين اتجمعين فلوس حق ليلة معينه تحتفلين فيها كل سنة
يعني موكل يوم ولا كل شهر

اما العيال ... الله يخليلنا الأهل مو مقصرين لما تطلبين منهم يتحملون العيال يوم واحد
وصدقيني عن تجربه ... لما تعملين الحركات هذي راح تملكين قلب زوجج وراح يحبج اكثر

واللي تحب حقيقي راح تسوي أكثر من جذيه علشان تسعد قلب حبيبها
اتمنى لج كل خير وسعادة

اختي العزيزه

اول شي بجيب على سؤالك :هل كل مانقرأه من أفكار في المنتديات نطبقه ؟؟
طبعا لا مو كل شي ممكن ان يطبق ..... كل شي يعتمد على شخصية الزوج و الزوجه يعني الفكره الي احس زوجي بحبها ممكن ما تعجب زوجك وطبعا انتي بتكوني ادرا شنو يحب وشنو ما يحب
وبعدين الافكار الي تقرينها ممكن تكون لج " جايد" يعني انتي شوفي شنو تاخذيم من الفكره وبعدين لازم تظيفين لمساتج الخاصه عشان انتي وزوجش تحسون بالاندماج .............>> ما ادري اذا فاهم قصدي بس لازم انه هذي الليله ما تصير كوبي وبيست من الي قريتينه ..... لا لازم يكون شي انتي اخترعتي وحابه تسوينه

وبخصوص التكلفه تراها ما تكلف ذاك الزود اذا تبين تسوين فعلا راح توجدين الف شي وشي
تقدرين تروحين محلات بو 200 فلس وتاخذين شموع وزهور وخرابيط حلوه ........ انه عن نفسي اخذ منهم وبعد استغل فرصة التخفيضات الي تصير واخمخم اشياء احس انها راح تفيدني في احد المرات ( احب اخذ شغلات من هوم سنتر ) تلاقين حركات حلوه
وطبعا هذي الاغراض ممكن تستخدمينها اكثر من مره بس كل مره بطريقه مختلفه

واما اللبس فهذا شي اساسي يعني لازم تشترين لبس جديد من فتره للثانيه .......... فستغلي الفتره الي تشترين وسوي مفاجاه

اما التوقيت فاختاري يوم مميز بحياتكم وخططي ليه من قبل حتى لو كان قبل سنه اهم شي تخلين الفكره في راسك وكل مره تجمعين لها شي
والاطفال فاختي اذا تقولي انه صار لك سنتين من تزوجتي يعني الاطفال بعدهم صغار ممكن انج تنيمينهم او ترسلينهم بيت اهلك او اهل زوجك

وصدقيني ما راح ينساها بالمره وعلى طول راح يذكرج بيها ويقول اش قد انه استانس وممكن انه هو يبادر ويسوي ليله حلوه لكم (زوجي سواها) :ok:

انا مع البنات

شوفي انا اليوم عندي امتحان و طول هالاسبوع كان عندي امتحانات يعني ما امداني اشتري او اجهز

بس حاطه في بالي ان اسوي سهره حلوه في البيت حق راس السنه لان هذي اول سنه لنا مع بعض

فبطلع بعد الامتحان مباشره بروح اشتري هديه ( في بالي تلفون و عطر) و بعدين بوديهم يغلفونهم

وبعدين بطلع بشتري لي ثياب جديده خفيفه حق السهره و شغلات شموع و شمعدانات و هالسوالف فرصه هوم سنتر عنده تخفيض :)

وبعدين محلات بو ريالين ماقصرو .. عندهم كل اللي تبينه من شموع الى حاملات الشموع الصغيره

حلو الواحد يغير بنمط حياته شوي و مو لازم يكون شي كبير .. كفايه شي بسيط غير عن روتين حياتكم اليوميه :)

صباحك ورد وياسمين,,

سؤالك رائع لأنني برضه سألت نفسي هالسؤال في البداية لكن احكيلك شغلة,,
الفكرة من هاي المواضيع والأفكار الحلوة هو أننا نتبادل الخبرات والأراء وبعد كل ذلك
كل واحدة تطبق الفكرة بحسب امكانياتها ووقتها ولازم كل واحدة تضع لمساتها الشخصية يعني مايكون النقل بحذافيره
لأني بالنهاية كل واحدة لها شخصيتها وتراثها وبيئتها وكل زوج له طبايعه واسلوبه

بالنسبة لي صرت احب هالافكار عشان صرت منظمة اكثر في عملي ودراستي لأنني صرت اضع خطة زمنية
واحاول انسق مابين الدراسة والعمل والبيت والأوقات الرومانسية

وفي كتير من هالافكار بسيطة وعملية مابتاخد من وقتك شي, اما الأفكار الي بدها شغل كتير وادوات وطبعا فلوس لشراء بعض
الزينة فاكيد لازم تخليها لمناسبة خاصة او كل اسبوعين حركة مميزة هيك يعني, وبحس انه الفكرة الي بدها شغل وتعب بتخليكي تحسي بحلاوتها وايضا زوجك بتفاعل معك لأنه كل شي بعد التعب بكون له طعم خاص.

بتمنى اكون افدتك

هلا حبيبتي..

أنا معك أحيانا الوحده تكون بمزاج ما يسمحلها تسوي هالأشياء خصوصا لو قصرت معها الفلوس..
بس مو ضروري تطبقين الأفكار بحذافيرها.. خذي اللي يناسبك..
وبالنسبه للأغراض كل ما نزلتي السوق إشتري اللي يعجبك..
ومو ضروري تشترين كل مره من اللي موجود بالبيت.. يعني مستحيل ما يكون فيه شموع عندك.. وكاسات عصير حلوه ومعجنات وحلى خفيف..
والبسي واتصلحي بشي ناعم صدقيني هذا كافي بإنه يبهر الزوج.. لأنه بيحس إنك إهتميتي فيه..

وبعد كذا انتي بالتدريج بتزيدينها حبه حبه وممكن تخلين الأفكار الثقيله لمناسبه مهمه يعني مره أو مرتين بالسنه.. وبالميزانيه اللي تناسبك..

قبل كل شئ من الضروري مراعاة التعاليم الشرعية قبل اي عمل

أختي بصراحة أعاني عند التجهيز لهذي المناسبة والسبب أن أبنائي كبار في السن [مو مرة] هذا سبب مهم لي
أما الأغراض من شموع وغيره الله يخلي لنا محلات أبو ريالين وهوم سنتر وجيانا غيره
والكاسات بعشرة ريالات للكاسين ولن توثر على الميزانية وتستعمل وقت المناسبات بس
حاولي كل دخله للسوق شراء شئ صغير وبسيط من احتياجاتك
أتمني لي ولك والأخوات ليالي سعيدة نقصد بها وجه الله أولا ثم رضي أزواجنا

سووووووووووري يابنات آسفة تأخرت عليكم والله مرة مستحية منكم بس الظروف توني اليوم بدأت اجازتي وفضيت لكم الله يقطع الدراسة
والف شكر لكم ياحبيباتي والله انكم رهيييباااااااااااااااااات ترا ماني ماعرف امدح احد حتى زوجي ماعرف امدحه :D
وبصراحة عطيتوني امل في اني اتغير واغير حياتي
كنت بصراحة باسوي حركات في العيد بس ماعندي وقت :cry:
بس اوعدكم اني اسويها في عيد زواجي يااااااااااااااااااااااامن يعيش
بس بنات السعودية الله يخليكم اذا كنتو في جدة قولولي من فين اجيب الاغراض اللازمة

هلا حبيبتي..

أغراض لازمه مثل إيش؟؟

أذا شموع تلاقينها عند سيتي بلازا.. أو حتى أرخص محمود سعيد..
غير كذا وش تبين؟؟

اقولكم خلاص هونت تزاعلت انا وزوجي خليه يولي :angry:
واف شكر يابنات معليش مع الزعل نسيت اشكركم اول

افاااااااااااااااااا مدام عزيز ليه تهاوشتي انتي وزوجك

الله لايجيب الزعل بينكم يارب يارب الله يبعد عنكم الشيطان ويخليكم لبعض

تعوذي من ابليس واستهدي بالله ولاتخلين الشيطان يوسوس لك

مشكورة اسيرة قلبه على النصيحة والدعوة والله اني محتاجتها اعوذ بالله المشاكل كثرت بينا فجأة
والله كنا أول نهبل ومرت سنه كاملة ونص ولا أذكر انا تهاوشنا بس الحين انقلب حالنا بس ماراح اخلي الشيطان ياخذ راحته يا أنا ياهو واعتمادي على الله ثم عليكم وعلى افكاركم
الله يسعدك ياقلبي ويخلي لك زوجك
ويسعد كل البنات اللي شاركوني بردودهم والله ماقصروا

عزيزتي أنا تقريبا ظروفي مثلك
للحين ما تخرجت و ما عندي وظيفة يعني ميزانيتي محدودة و ما أخذت الليسن للحين و ما عندنا سيارة غير سيارة زوجي و بصراحة فشلة أطلب من أخوي يوصلني علشان أسوي ليلة رومانسية لزوجي لااااا أستحي
بس إذا كان عندي مناسبة عزيزة أخطط لها قبل بفترة طويلة علشان الميزانية
يعني مثلا عيد ميلاد زوجي خططت قبل بست أشهر و حطيت قائمة بالأشياء اللي أحتاجها و كل مرة أروح السوق مع زوجي أو خواتي أشتري شغلة أو ثنتين و أكيد لما تشتريها بهالصورة ما بتكون ملفتة و علشان المصاريف بدل ما أجيب كيكة من مخبز عملتها بنفسي مع إني ما عندي مطبخ فاضطريت أسوي الأكلات ببيت أبوي و علشان محد يعرف سويت من كل شي كمية نصها لزوجي و نصها لبيت ابوي و انكسر ظهري ذاك اليوم هههههههههه بس لما شفت ابتسامة زوجي كل التعب راح
عزيزتي مهما كان ظرفج أي شي تبينه راح تقدرين تسوينه لو كان عندج أولا تخطيط و ثانيا إرادة

مشكورة ياقلبي طفوف عالمشاركة الله يسعدك ويهنيك مع زوجك يارب