ساعدوني .. وخبروني شو اسويلها

أنا كنت أستخدم لبنتي سودو كريم وحفاظ بامبرز من وهي نونو لييييييين صار عمرها سنة على التطعيم حق السنة ارتفعت حرارتها ومع ارتفاع الحرارة جاها طفح بسيط وكالعادة حطيت لها سودو بس هذي المرة زاد الطفح وبدأ يصير حبوب حمرا في المنطقة الأمامية زي ما قلتي واستمر معاها إلى قريب السنتين ومع ان عمرها الان يقارب 3 سنين وبطلت لها الحفاظ لكن جلدها صار حساس أحيان يصير في احمرار بسيط وحكة ..ما خليت نوع حفاظ أو دوا أو كريم أو وصفة شعبية إلا وجربته ووديتها ثلاث دكاترة بين جلدي وأطفال وأكثر شي نفعها مرهم كيناكومب الطبي الأصفر بس ما حبيت أستخدمه باستمرار لأنه طبي وبيتعود الجلد عليه .. ومن الوصفات الحلوة موية الورد مع النشا تسقيها على المنطقة وتخليها تتهوى لين تنشف وبعدين تحطي الحفاظة أهم شي تغسليها بالموية بس وتنشفيلها على طول وتغيري لها الحفاظ أول بأول عشان البلل يزود الالتهاب وفي كريمات حلوة زي درابولين الوردي أو بالمرز حق الأطفال ممتاز أنا الان بأستخدمه بعض الأحيان لما أشوف يبدا عندها احمرار .. لكن البودرة ما أنصحك بيها لأنها ما تعمل طبقة عزل بين الجلد وبين البلل والله يشفي بنتك يارب ..

جمانه شكلي بعد اليوم ما بوديها ... لا و انا اليوم مرضت بعد ...


الرايقه ... مشكورة على النصايح مثل ما تقولين تماما .. احمرار و احسه بدا يصير انتفاخ بسيط
بس انا احس البودة فادت وايد صح ما عالجتها و بعده مستمر الاحمرار بس احسن عن اول بوايد ...
و امس انا بروحي في البيت ادور فازلين ما لقيت ... و انا تعقدت من اي كريم .. ما ابا احط لها كريمات .. يمكن بس بجرب فازلين لين ما ياخذنا ابو الشباب للعياده


مشكورات يا بنات على الاهتمام

لا جد والله زينك اويل وااايد مفيد والدليل ان المستشفيات تعطي لكل الاعمار ..

تخيلي ربيعتي تستخدمه لها هي ..

وتمدحه .. ( لانها يوم تستخدم اي نوع من ... وقت العاده اييها طفح ) بس من تستخدم الكريم يصير زين ..

انتي استخدميه وشوفي النتيجه ..

ان شاء الله البجعه .. انا اليوم كلمت ريلي اول ما ياياه و قلت له ما يخصني توديني العياده يعني توديني .. انتفخت المنطقه عليها ... و انا ما عندي فازلين سرت عند عمتي و طلبت منها ... باجر ان شاء الله اقول للطبيب و اسأله عن زينك اويل

[grade="008080 FFA500 FF0000 4B0082"]اختي ودي بنتج لدكتور وهو بعطيج كريم تحطينه لبنتج وان شاء الله كم يوم ويروح :) [/grade]

أنا من راييي مثل ما يصير لبنتي و خاصه لما تشرب الحليب الفرش مثل المراعي أو ندي أو أي حليب من هالنوع يصيدها اسهال و بعد يسلخها من الحرار في منطقة الحفاظ و الدكتوره كانت تكتب لي كيناكومب و يفيد من أول أستخدامين بس لما عرفت أنه خطير و يحتوي على كورتيزون و بتركيز عالي تركته و صرت أداوم على الفازلين و حتى لو صادها حرار أداوم على الفازلين و يروح بروحه و خاصه بعد كل تبديل حفاظ تنشفين المنطقة زين و بعدين تحطين الفازلين و هذا أحسة آآمن على بشرتها من أي كريم ثاني

و ماعليها شر بنتش

ملحوظه: ما بيظهر نتيجة أستخدام الفازلين الا بعد يومين أو ثلاثة و بشكل بطيئ بس آآآمن على بشرة الطفل من أي كريم له مفعول سريع و يؤثر على بشرة الطفل

حبيبتي
البيبي في هالوقت يكون كثير الحركه
فالبامبرز يحر على جسمه بسرعه

نصيحه خذي من البيبي شوب مثل البامبرز قابل للغسل يكون برع بلاستيك و داخل قطن

خذي منهم كميه ... و خليهم لفترة الضحى او العصر ريحيها من البامبرز
حرام ترى اجسامهم تهلك منه
ولو كان سبب الاحمرار فطريات بالتهويه و الطريقه هاذي بتروح
و بالنسبه لسودو كريم انا اداوم عليه لبنتي دايما و خصوصا بالليل اكثر الكميه شويه لانه البامبرز يكون عليها فتره طويله

اما في النهار فابدللها باستمرار ... و اريحها من البامبرز و احيانا في الصيف احط ماي معتدل الحراره في البانيو و اخليها تلعب فيه علشان يبرد جسمها و بعد الحمام اخليها فتره بدون بامبرز عشان ينشف جسمها عدل و تروح منه الرطوبه عقب البسها


اتمنى اكون أفدتكم

صراحه تعبت وايد .. و هو يقولي باخذلها موعد ... بموووووووت قهر ....

حطيت لها فازلين ... صح احسن عن اول .. بس بعده ما تغير شي ...

انا قمت اشك انه البامبرز ...لان النقط الحمرة وصلت لين البطن و صار فيها احمرار ...

بحاول اسوي كل اللي تقولون عنه ... لان صج ما استحمل اشوفها جذي و كل ما ايي تزيد الحبوب

الغاليه جربي غيري البامبرز شوفي انتي شو تستخدمين
انا كنت استخدم لبنتي Pampers و في مره رحت الجمعيه ما لقت مقاسها قلت باخذ لها شي ثاني خذت Fine
و الله يجيركم حساسيه في منطقة الحفاظ و وين يتسكر البامبرز طلعت لها حبوب حمر و طولت وبعدين غيرت على بامبرز Alzain
و الحمد لله وايد اوكي كل الحساسيه راحت
بس الاهم الغاليه في هالفتره تريحينها شوي علشان الحراره تروح من جسمها و جربي مغطس الماي خليها تيلس فيه عشان يبرد جسمها صح بيحرقها شوي في الاول بس عقب حطيلها العاب و خليها تنسى الماي
و خليج على السودو كريم ترى مفعوله و الحمد لله زين بس اصبري لن يخف الالتهاب عنها
و الله قلبي عندج و حاسه فيج
بس هدي اعصابج
تفهي وضع ريلج
و حلي المشكله روحج
غيري البامبرز
ريحيها من البامبرز فترة الضحى او العصر او اذا كانت تمشي علشان ما توصخ لما تنام شيلي عنها البامبرز و افرشي لها برع السرير و حطي تحتها مشمع ..و بس تقوم سبحيها و خلاص بتكون ريحت شوي
استمري على السودو كريم حتى في فترة ما تكون بدون بامبرز
بعد التغسيل لا تلبسينها البامبرز على طول لانه الجسم يكون رطب بعده و رطوبه على رطوبه تسوي التهاب

و الله يعافيها لج
و طمنيني عليها

انا قمت اجرب مغطس الماي بس هيه ما تطيقه ما ادري ليش عسب الجو يمكن

و انا سودوه كريم وقفته بعد ما حسيت انه سودلها المتنطقه و جعدها

و امسات وصلت حدي وزعلت منه و تضايقت
بس حرمت اخوه عطتني كريم و قالت بس فيه كورتيزون قلت لها اي شي بس يخف عليها ..

و الحينه بس استخدمته 3 مرات .. امس مرتين و اليوم مرة .. بس غيييييييييييييييييييييييييييييييير

صج خف عن اول بوايد وايد الحمدالله ... و هيه قالت لي مع الوقت خفيه و خليه مرة وحدة و بعدين اقطعيه ...


مشكورات خواتي .. و الله ما تدرون اشقد هالموضوع كان مضايقني

سحايب دبي ... بغيت اسألأج انا وايد سمعت عن الزين هذا ...

احسن عن البامبرز ؟؟؟؟

هلا Jami

بصراحه انا ما كنت اعرفه و تعرفت عليه بالصدفه كنت رايحه الجمعيه و ما باقي من بامبرز بنتي الا حبه وحده من الكسل كل يوم اقول بروح و ما اروح و رحت ذاك اليوم الا و الله بيوريني نتيجة الكسل و ما لاقيت مقاسها توهقت وش آخذ وش آخ1 و منطقتنا ما فيها الا جمعيه وحده و رحت الف و الف و الف و خذت فاين و الزين
فاين من ثاني يوم رميته لانه سببلها طفح بسم الله عليك وصل لمنطقة البطن ... و قمت و خذت الزين و استخدمته ما شاء اللله و الله خفييييييييييييف و رفيع و مريح في نفس الوقت
مثل البامبرز و اخف و بعد و اللله ارخص في السعر يمكن الفرق 12 درهم
و الحين ما اعور راسي على طول اخذ الزين لانه متوفر بالجمعيه على طول و مقاسه مناسب بنتي اكثر من البامبرز
و صارلي عليه مده و الحمد لله مرتاحه منه :)

اختي انه بنتي توه صايدها نفس الشي بس لان وانتو بكرامه صايدها اسهال
المنطقه متسلخه عليها وكله حبوب حتى الجلد احسه يابس صاير
اهم شي اختي انج تجففينها زين ما زين بعد ماتغسلينها وتحطين لها كريم الحفاض انه استخدم جونسون ومرتاحه معاه
ومره في النت دكتوره قالت ممكن نستخدم زيت الزيتون الدافى عشاشن ندهن به المنطقه

وما تشوف شر بنتج

سحايب ان اشاء الله اول ما يخلص البامبرز اللي عندي بجرب الزين


او الريم الحمدالله من يومين حرمه اخوه عطتني كريم و مفعوله غريب و عجيب من اول يوم ياب نتيجه
و اليوم رجعت عاديه مع شوي اثار للي كان اول

بس مشكلت الكريم فيه كورتيزون و من يومين احط لها مرتين في اليوم اول ما تنش و قبل النوم ..
اليوم قلت بس بحطه لها قبل النوم لان الحفاظ يطول معاها لما تنام