تعرفون ماهو حلمي الأكبر؟ ....متى أنام ست ساعات متواصلةّّ

السلام عليكم ورحمة الله وبركاته..


لا زلت اعاني من تقطع نومي طول الليل، والسبب طبعاً هو استيقاظ حسين وطلبه للرضاعة.. بشكل متكرر..

تقريبا كل ساعة وربع او بالكثير ساعة ونص يقعد..
ويمكن مرة وحدة بس باللليل ينام ساعتين متواصلتين..


لما ولدته قالوا اصبري .. لين صار ولد 4 شهور بينام الليل... وصبرنا..

يوم صار ولد 4 شهور قالوا اصبري لين صار ولد 6 وبدأ ياكل ، بيشبع وبينام الليل.. وصبرنا ولا شفنا!

قالوا اصبري لين يصير 9 شهور بيحبي ويتحرك كثير وبيدوخ وينام الليل، وصبرنا وبعد ما شفنا
!!!!!!!!!!!!!!

عمره الحين سنة وشهرين...
والحال كما هو ما تغير..
مستحيل يزيد نومه عن ساعتين متواصلين..
ومرات نادرة ينام 3 ساعات !! بس اذا كان ماخذ دواء يسبب الخدر ينام هالمدة!!


البعض يقولي السبب انتي، لأنج عودتيه على رضاعة الليل..
اقول لهم شسوي ... ولدي من النوع الصيااااااااح، وصوته مررررعب! مو لأنه ولدي اقول هالشيء، لكن عمتي وامي واختي وكل اللي حواليني يشفقون علي لين فتح بوزه وقعد يصيح!

اذا قعد بالليل يسوي جذي مالي الا اعطيه يرضع عشان ينام وانام انا بعد!
وراي جامعة واذا كنت باجازة ابوه مب باجازة..


صدقوني مافيه شيء ، مو مريض ولا عنده مغص، ولا جوعان لأني ما اقصر في تأكليه ابد..
ولا محتاج حنان لأنه اصلا نايم بينا انا وابوه!
بس دلاعة !!

وحتى لين ينام ، جميع الحركات الي يسويها وهو قاعد يسويها بنومه ، حتى الشقلبة تصوروا!!!

ساعات اشك انه نايم .. اقعد اطالع عيونه .. مسكرة او لا..!


استغفر الله .. ساعات اقول يا ربي ليش ولدي جذي :(
حركي وعفاس وصياح .. ليش مو مثل ولد اخوي او بنت حماتي... او اي ياهل من اولاد الناس... هادئين و لايتعبون امهاتهم..



قولوا لي شسوي... خاطري اناااااااااام 6 ساعات متواصلة بالليل!!:cry:


شلووووون؟