أم زوجي كيف اتصرف معاها؟؟؟

يا اختي سحابة صييف شكلك ماجربتي وماعرفتي شي عن ام الازواج وانا ما اقصد الكل لكن اقصد البعض ....


البعض منهم يحبون يكونو مسيطرين على اولادهم حتى بعد مايتزوجون وحنا بشر ولنا طاقه ..

امه صحيح على العين والراس ولها حق ... لكن كذلك الزوجه لها حق بعد .....



يعني والله لو اتكلم من اليوم الى بكره عن مشاكلي مع ام زووجي كان شاب راسك ....

علماً اني تزوجت صغيره وكنت على نياتي معهم بالمره ... لكن حب السيطره فيها .. والزوج الصامت يعني علشان مايزعل امه فيخليها على كيفها والمشكله ان بناتها اللي ماتزوجو هم اللي يترسون راسها بالكلام علي .. كان له دور كبير في مشاكلي فلكل انسان له طااقه .......


انا ما اقول ان الرجل يترك امه ولايوصلها .. بالعكس حنا مسلمين ونخاف الله .. ونخاف يجي يوم نزوج عيالنا ويصير لنا عقوبه ..

لكن لكل شخص له حقه ....... الزوجه لها حق ... وام الزوج لها حق ........



وكاان الله غفور رحيم ......

انحاشو في نصف الليل

اختي العزيزة ام قليب معاج حق بس الدنيا دار ابتلاء والدنيا ما كملت لاحد حتى لو طلعت لبيت لحالج راح تييج مشاكل من طرف آخر ، هذي هي الدنيا يعني اصبر جميل واختي تقولين انه حب السيطرة وتملك عند الأم يسبب مشاكل ,اختي الأم كان هذا الولد ملكها وحبت انه يفرح وتفرح لفرحة لكن اذا حست ان بعد الزواج ولدها تغير عليها ما صار يحب يقعد كثير معهم او كان يطلعهم دوم ودوم يسأل عنهم وعقب ما تزوج صار لا يخطف ولا يمر اكيد راح تحس ان السبب هذي الزوجة الي غيرت الولد عليهم لانه ما عرف يرتب امورة وصار من الشغل للزوجة للربع مب فاضي لاهله تكفيه طابوقه وحدة فراسة (اقصد امرأة ) تحن وتزن فوق راسه ابي واريد وصار واستوى فليش يعور راسه بالقعدة عند امه وخواته وبما ان النساء رقيقات وحساسات راح يزعلوا ليش اخوهم تغير صوبهم واذا الزوجة مثل ما تقولين ما تعرف سبب الهجوم فهذا واحد من الأسباب الي راح تخليهن يكرهنها حتى لو كانت مب هي الي تقوله لا تروح عندهم لا تطلعهم لانها غلطت فانها ما نصحته انه يروح يقعد معهم وكانت انانية تبي زوجها يوم يرجع للبيت يقابلها هي بس واذا بتطلع تقوله ابي اطلع لوحدي نست ان الأم والخوات يحتاجون انهن يحسن ان اخوهم يهتم فيهن وبعدين تقول يسبوني وانا مسويت شيء ويغلطون علي وانا ما غلطت على حد منهم ليش ليش ليش !!!!
لان الزوجة كانت انانية وما حست لا بالأم ولا بالخوات إلي يريدن نفس الي تريده وانهن مثل ما هي ضاقت وتبي تغير جو هن بعدن ملانات ويبن يطلعن من بين الأربع جدران ولازم بيشلن في خاطرهن اذا كانن يالسات يترينه عند الباب وكل وحده الدز الثانية علشان يقولن له طلعنا بس خايفات يكون مشغول او مب فاضي وفجأة يطلع متهندس من غرفته مستانس واليد باليد مع زوجته العزيزة وشكلهم بيطلعون احليلهن يحسن ان احلام الطلعة خلاص تبخرت وراحت مع الزوجة الي ما حست لا هي ولا الأخو انه كان شيء في خاطرهن يبن يقولنه لكنهن ما قدرن يقولنه ويقعدن من الغيض يسبن ويشتم في الزوجة لانه يت وسرقت اخوهن من بين ايديهن
خواتي العزيزات فكرن في الأم والخوات بعد، لا تفكرن في نفسكن بس لانه راح يكرهنكن بعدين اذا حسوا ان الأخو الحبيب والمنجد الي كان يحب يقعد معاهن ويوصلهن تغير عليهن ،ان حياتهم تبدلت خصوصا اذا ما كان فيه اخو بديل يعوضهم النقص الي راح يصير مكان الأخو (و السموحة )

السلام عليكم ورحمة الله وبركاته

أختي الغالية سحابة طيف...

إسمحيلي...

إحنا ما قلنا تاخذه من أمه...ما في حد يقدر ياخذ ولد من أمه...و يصير وقتها العيب على الزوج اللي بسهولة فرّط في أمه و سمع كلام زوجته...



لكن...



الأم ما تاخذ زمانها و زمان غيرها ؟!

يعني مش معقول ما تترك ابنها يخرج مع زوجته ؟!

طيب و هو صغير كانت تتركه يروح المدرسة لوحده...

لمّا كبر كانت تتركه يروح يسهر مع أصحابه...

ليش جات على زوجته...و صارت الأم الحين تقول حشاشة جوفي و ما أريد أتركه ؟


ليش الأم ما تكون سعيدة لما تعرف إنه ابنها سعيد و فرحان و خارج يسهر و يغيّر جو مع زوجته ؟!

يمكن في بينهم مشكلة و يريدوا يتفاهموا فيها بعيد عن جو البيت...

يعني الأم مش عارفة إنها بتضيّق عليهم بخروجها معاهم ؟ إلا تعرف...و فاهمة كل شيء كمان...


بصراحة أحس هذه أنانية من الأم...و لازم تكون متفهمة شويه عن ذلك...

و أقول لك لماذا...لأنه صدقيني لو بنتها جات و اشتكت لها من حماتها و قالت لها تعمل و تسوّي...الأم هذه نفسها ما راح تسكت و راح تعمل مشكلة في سبيل بنتها...

يعني حلال على بنتها و حرام على زوجة ابنها


المشكلة إنه في أمّهات أول ما يزوجوا عيالهم...ينسوا إنه زوجة الإبن هذه واحدة محترمة...لها عيلة و ناس و حياة حلوة...و تقوم تتحكّم فيها و تفرض عليها شخصيتها...


لكن إن الزوجة تقطع الوصال بين الزوج و أمّه..فهذا غلط طبعا...و الدنيا دوّارة...و كما تدين تدان...


و شكرا أختي...حبّيت بس أوضح وجهة نظري...

بصراحة مرموم كلامها عين العقل

اختي سحابة صيف لاتنظرين لكل الزوجاات بمنظاار اسوود ..... في منهم المظلوماات وبقووه بعد ...


هذا انا تزوجت وكنا نطلع مع ام زوجي ونتمشى وناخذ خواته معنا ... وحتى لو شرى لي اي شي .. حتى انواع من الشوكولاته وربي اعطيهم منها يعني ... ماياكل شي ابد عليهم ... وكل شي يقوله لامه اي شي يصير والى يومك باار بأمه ... وانا ا الله يشهد علي انا ما اكبر خااطره على امه حتى لو صار بينهم خلاف لاني اخاف من ربي .......


لكن مثل ماهم يبون حنا نبي ...... لاهو حرام ولا عيب ....... في نااس يذوقون المررر من اهل الزوج ومش معناتها انهم على حق .. ليش لانه ولدهم .. مش حق هذا ولا هو منطق ........


كذلك هي كانت زوجه في يوم الاياام وعاشت مع زوجها وعاشت حياتها واخذت الولد من امه على قولتك ويوم جاء وقتنا تقوول ستوووب ؟؟


كلام لايعقل


وانا اشووف ان الام المسيطرره واللي تبي كل شي لها ... انها ماتزوج ولدها وتخليه عندها .......

وتراها محااسبه عند ربها لانها ظلمة بنت النااس ....



اتوقع ان الموضوع اخذ مما يستحق وطلعنا من صلب موضوع الاخت ... السمووحه اختي صاحبة الموضوع ...


وعفواً ليس لي رد مرتن اخرى ....... فالاراء واضحه لكل منا .......

السلام عليكم ورحمة الله وبركاته
اختي الغالية مرموم وام قليب الصراحة ردودكن ما راحت بعيد عن رأيي انا اعرف ان الله خلق الزين والشين وان الزوجة ممكن تكون الخير كله واهل الزوج هم الشر كله وانه يمكن يكون العكس بس الي حبيت اوضحه ان ردودي كلها كانت تدعو الزوجة انها تصبر وان أجرها راح يكون عند رب العالمين لأني ما حبيت اكتب رد آخذ اثم من وراه فانا ضد اني اشجع صاحبت الموضوع على الأم وانها تسوي حساسية بين الولد وامه لان الدنيا دواره
لكن الي خلاني مثل ما قلت يا أم قليب انظر للزوجات بمنظار اسود هو رد احدى الأخوات الي كتبت تجربتها واضح انها تفتخر انها خلت ولدهم يطلع من بيت اهله وان امه المسكينه تمت تدعي عليه وعليها وان خواته مثل ما قالت ما زارنها في بيتها الجديد والعبارة الي استخدمتها عي فكه منهم ، هالرد هو الي شعلني وخالاني اكتب انتقاد لهالأسلوب في المعاملة فكان اسلوبي يمكن يكون شديد ومنتهى الشدة على الزوجة .
والسموحة وارجو من صاحبة الموضوع انها تسمحلي لاني طلعت عن موضوعها

السلام عليكم ورحمة الله وبركاته

والله الله يعينك حبيبتي بس عاد سالفة شهر العسل قوية حاولي تصارحي زوجك واكيد ان شاء الله بيتفهم

ام قليب بجد انقهرت لما قريت ردك يعني تنزل من سيارة للثانية عشان تلحق على الطلعة لو أنا يتجيني سكتة قلبية بلحظتها الله يعينكم

انتي مش متجوزاه ؟؟؟ وهو حلالك؟؟؟؟؟؟؟؟؟؟
يبقى نصيحتي ادلعي عليه ودايما قولي له عايزه ابقى معاك لوحدنا بس لو لازم مامتك تيجي وانت حتبقى مبسوط يبقى خلاص اللي يريحك بس ياريت ابقى معاك لوحدي علشان اعرف اخد راحتي معاك ولما ربنا يكرمك وتخرجوا لوحدكوا حاولي باي شكل انك تخليه سعيد اعملي اي حاجه تسسيه انكم لوحدكم احسن ويكون مبسوط معاكي وانتم لوحدكم اكتر من خروج والدته معاكم
ويارب نسمع عنك كل خير

ايههههههههههههههههههههههههه وياما بتشوفين مدام انتي قاعدة معاهم بتعانين نفس ما انه اعاني من اربع سنين وللحين اعاني جوفي هذي ترى غيرة الأم اتموت لما تشوفني متعدله وباطلع احس عيونها بتطلع معانا وبس توني بقول لها تعالي معانا إلا عبايتها وصلت قبلها انا اقول لها مجامله حق زوجي بس اهية تنطرها من الله

كل شي الواحد ممكن يتحمله الا سالفه شهر العسل .. اختي على قولتنه احنا البحرينين بطي البرمه وقولي حق ريلج ........ ما بقى الا شهر العسل .. جان تبي تتفسح الام الكريمه .. ليش مزوجه ولده جان خذته خلته يلف فيها العالم قبل لا يعرس .. بعد ليش يتزوج .. انا ابي اعرف زوج الام هذا اذا عايش وينه ماله حس ... يييعني زوجها متوفي لاسمح الله ولا بس ماتبي تقعد معاه .. ؟؟؟؟؟؟؟؟؟؟؟؟

الله يعينك

اشكر كل من ساهم في الرد على مشكلتي
بس راح ارد على سحابة صيف تدرين حبيبتي كل وحدة تحب تمتلك ريلها وانه يكون لها وبس ...بس ماتوصل لحد الانانية
بالعكس انا وام ريلي سمن على عسل مثل مايقولون اخوانا بس هذي مشكلتها يعني اي مكان ابي اطلع تبي تطلع معاي
يعني مايصير انه نطلع بروحنا...حتى لو عشا عادي تقول بسير معاكم....يعني انا يهمني انها تكون راضية على ولدها
والحمدالله انها راضية عنه....يعني انا من جريب معرسة وماعندي عيال مايحق لي اني اطلع معاه...
يعني صدقيني لو قلت الها بسير دبي بقعد يوم او يومين تغير جو صدقيني انها بتقول انها بتي معانا...يعني هذي حاله
ابي اغير جو مع ريلي وفي الاخير هي تيي معانا....

راح اقول لكم شو صار اليوم

خلاص عاد طفح الكيل ...مب بس امه لا بعد بنات اخته...تدرون عاد شو صارـــــــ شكلي بقول لكم قصة حياتي
بخبركم شو صار انا اله يسلمكم ادرس في الجامعة وبحكم ان الجامعة بعيدة عن الامارة الي نحن عايشين فيها طبعا نقعد في سكن داخلي من الجمعة لين الاربعاء بس انا دوامي يخلص الاثنين وريلي حليله ينزلني في هاليوم...
عاد بنات اخته مصخوها مع انه عندهم دوامات الثلاثاء بس من جم اسبوع قاموا يطنشوا وينزلون وياي...
عاد انا طفح عندي الكيل قالي انهم بييون معانا انا هني عصبت قلت له يعني مايستوي نكون بروحنا قالي ليش يعني قلت له ياخي انا مااروم آخذ راحتي معاك بس انا اسوي كل هذا عسب آخذ أجر بس عاد مايمصخونها كل مرة وينزلون ويانا
وعاد فتحت له كل المواضيع...وقلت له لاتزعل من صراحتي لك...طبعا اعرف ان ريلي ماخذ على خاطره شوي ...بس انا من النوع الي مايقدر وايد يكتم لاني لو كتمت بنفجر...
يعني اي مكان ممكن انهم ايون معانا...مثلا انا رحت السوق في دبي طبعا وحدة منهم راحت معانا...
وتخليلوا الاسبوع الي بعده قلنا بنسير وهم اليوم الي قبله سايرين للسوق وفوق هذا كانوا يبون يسيرون معانا
ليش الناس جم مرة يسيرون السوق...بس الحمدالله انه ماكانت لي نية اني اروح والا جان بضايج
الله يعين شو بيرد علي لانه للحين ماخلصنا نقاش في هالموضوع الي مب راضي يخلص ويريحني

الله يعينك والله

واااااااااااااااي ما ابغى أولعها زياده بس بصراحة قهر

الله يعينك

وهم يعني حلت لهم الرجعة معاكم

بصراحة هذولا ما يراعون مشاعر الغير

شوووفي اختي هذي امه واذا اهي ما تاذييج اخذيها معاج
الام حااسه بغيرة على ولدهاا وفاقدته بعد زوااجه
لا تتمللين منها واحتسبي عند الله وبعدين في زوارتج لاهلج مثلا زرتيهم يوم الخميس وتب ترجعين بيت ريلج الجمعه لما يجي ياخذج طلعي وياااه طلعه خاصه فيكم
انا اعرف ان كل وحدة تحب تستفرد بزووجها وهذا من حقج بس اذا هى ما تاذيج حاولي قد ما تقدرين تكسبينها علشان الاجر من الله ولكسب ود زوجج وتذكري كم تدينين تداانين بكرة ولدج لما يكبر بيسوي نفس اللي تسوينه انت وابوة فعملي حسااب هذا اليوم

والله اختي بقولج مثل ذكرتني فيه والله كسرتي خاطري حيل ...


يقول المثل أن لم تستحي فافعل ما شئت ...:angry::mad2: وهذولا شكلهم مافي احساس كلش

تحياتي مقهوره والله عليج

بنات اصبروااااااااااااااااااااااااااااااااااااااااااااااااا

اسمحولي اقول انه سحابه صييف كبرت الموضوع وطلعت كل الحريم غلطانات وانهم مجرمات في حق ازواجهم وامهاتهم ..اختي انا اشوف اذا الله رزقج ب ام زوج طيبه وحنونه مب معناه انهم كلهم نفس الشي في الزين وفي الشين بس انتي اتشوفين الحياه من جانب واحد يمكن انتي ماره عليج تجربه حد من اهلج او معارفج وخذتي موقف سلبي من الزوجات ..يعني نحنا صح اتأثرنا بموضوع الاخت بس ما قلنا انه الغلط منها لانه من كلامها انه الغلط من ام الزوج ..والخوات نصحوها انه اتصارح زوجها وهذا مافيها شي وفي نفس الوقت قالولها اطيب خاطر ام الزوج وما تبعد زوجها عنها ... ويكفي انها عايشه وياها في بيت واحد واكيد انها تاكل وتشرب معاها يعني ما فيها شي اذا خذت ريلها واتعشوا برع بعيد عن اهله ..والله يهديكم ويهدينا

انا سجلت لانى قريت موضوع وحده تشتكي ان ام زوجها تطلع معاهم دايم وماتخليهم على راحتهم
وسجلت عشان اعطيها الحل بس مافعلنى المنتدى الا الحين ودورت مشاركتها ومالقيتها في 3 صفحات

الحل

تكلم وحده من خوات الزوج الفاهمه الي تعيش معاهم بالبيت وتقول لها قولى لامج بس بطريقه
انج ماتقولين انها انا بمعنى
تكلم امها وتقول لها يمه انتى كل يوم طالعه معاهم مايصير امهات المتزوجات مايسون جذى
بهذا المعنى وراح تفهم لان ام الزوج يمكن ماحست ان انتم يالمتزوجات تعانون منها خصوصا
لما تقولين لها شرايج تطلعين ويانا

مافي مشكله مالها حل بس المهم تكلمين وحده من بناتها العاقلات الي لهم كلمه مسموعه
عند الام

في منهم ولا يفيد وياهم بتقول انت شدراج هاي حيه لازم اطلع وياهم