بنات ..محتاجة دعائكم مرة..

ليه التشاؤؤم الله يرزقك بابن الحلال اللي يسعدك بس قولي أمين

أختي عليك بقيام الليل والدعاء وان شاء الله يرزقك واكثري من الاستغفار

اللهم ارزق اختنا بالزوج الصالح العابد

بس لاتفكرين بهالامور

عدم الزواج لا يعني نهاية الحياة

نحن عندنا هالسن 24 صغيره
وبعده الطريق جدامج ان شاء الله

واتمنى لك التوفيق

حبيبتي ليلى الله يوفقك ياارب ويرزقك بالزوج الصاالح وانتي تو الناااس بعدج صغيرة انا اشوف البنااات الحين مايتزوجوون غير من سن 26 سنة واكثر وتفائلي خير ولاتقنطي من رحمة الله وكل تاخيرة فيها خيرة
واذا تضايقتي رددي ( ومااشتدت الا فرجت باذن الله ) وبتلاقي الامور تيسرت باذن الله ولا تنسي حسن الظن بالله

هاي ياقلبي
ليش هالتشاؤم صدقيني بتتزوجين وقولي فدك قالت انا توه من 3 شهور متزوجه وترى عمري 25 وصدقيني حالتج هذه صادفتني مو مره ولا مرتين وااااااااااااااااااااايد وكنت أحس الناس تطالعني بنظرة عطف وتقول ياحرام للحين ماتزوجت مع العلم الحمد لله مو جميله ولا قبيحه بس الكل يقولي مملوحه بس والله بين يوم ولليله تزوجت صدقيني راح تتزوجين وتقولين ياي حياتي كانت أحلى لو صاير عمري 30 وبعدها تزوجت وايد أحسن:D2

اختي عيشي حياتج ولاتفكرين وايد بالزواج لأنه هذا نصيب من عند الله متى الله كاتب بيي لا تستعيليين الامور وانتي عليج إنج تدعين دعاء الزواج وتكثرين من الاستغفار وقيام الليل ولاتخلين هذا الشي ياخذ كل تفكيرج وفكري في امور ثانية افضل وتفائلي بالخير.. والله يرزقج الزوج الصالح يارب آمين

لالالالالالالالالالاحقة على الاوامر والملاحظات اللي يقولها الريل( هذا حلو هذا مب حلو هذا شين هذا زين) لا تستعيليين باذن الله لو ربج كاتب لج تتزوجين ما في حد بغير هالشئ

اختي يمكن انتي بيئتج تحسسج بالنقص

انا و خواتي كلها كنا نقول
لو قالوا عانس أفتخر و اقعد وسط الميالس

لان نحن مب قبيحات بعد مب محبوبات في العايله و هذا سبب ما عرفت له حل طول عمري و نحن اصغار محد يحبنا هههههههه
مب مشكله و حتى لما خطبونا من العايله رفضنا مب محبوبات و والحينه ياخذونا حق عيالهم عز الله تبهدلنا هههههه

تزوجت و انا في عمرج .. و لو الود ودي ما تزوجت الحينه و على فكرة محد دق بابي ابد و زوجي اول واحد في حياتي يخطبني ..

و الغريب اني اول ما ملجت 3 بغوا يخطبوني شفتي العجب هههههههه

الواحد ما يقول غير الحمدالله على اللي الله رازقنه


و ان شاء الله اييج ولد الحلال اللي يهنيج

عزيزتي أنتي بعدج صغيرة والله في ناس أكبر منج وبعدهم ماتزوجوا وعايشين حياتهم عادي ..
لا تكونين حساسة وايد وبالنسبة لكلام الناس ترى مايخلص ( رضى الناس غاية لا تدرك )
والله أعرف ناس فوق الثلاثين وماتزوجوا وعايشين حياتهم
لا تتضايقين ولاتتكدرين والزواج قسمة ونصيب .. وكل تأخيره وفيها خيرة
عيشي حياتج وأرضي بالنصيب إنشاله ييج واحد يستاهلج ...
أتمنى لج التوفيق في حياتج ..:flower::flower::flower:

السلام عليكم و رحمة الله و بركاته

هلا بيكي أختي...

24 سنــــة...صارت عانس ؟ّ!!!!!!!

ليش أختي تقسي على نفسك ؟ طيب ما التشاؤوم اللي إنتي فيه يكبرك 20 سنة على عمرك الأصلي...

عيشي حياتك...لأنه تشاؤمك و زعلك لن يقدم و لن يؤخر في الأمر شيئا...

الله كاتب لك يوم...و راح ييجي إن شاء الله...

و بإذن الله تبشرينا قريب :)

وعليكم السلام ورحمة الله وبركاته



أختي (**ليلى**)

عندج الوحدة بسن 24 عانس؟؟؟ حرام عليج

عيل أنا كان فايتني القطار وأنا ما ادري :)

حبيبتي أستغفري الله وهدي بالج ترا سنج مو سن عانسات

الحمدلله في بنات كثير يتزوجون في سن ال30 بس ما فقدوا الأمل

كل شي بيد الله سبحانه وراح تتزوجين باليوم إللي الله كاتبه لج

وحتى لو محد دق بابكم راح يجيج إللي الله كاتبه لج فلا تيأسين من رحمة الله

أنا عمري 25 وتوني ملجت والله ما يأست وأنا بسنج وكنت أقول للناس توني صغيرة

وكنت أقول لهم إذا جاني النصيب بعدين بتزوج بس ما خليت الناس يتشمتون فيني

ولا أهتميت أصلا لكلام الناس لأنهم ما يهموني ، المهم عندي أني كنت أطلب الله يرزقني

زوج صالح أرتاح معاه مو أتزوج أي واحد بس علشان أرضي الناس وعلشان الناس

ما يقولون عني عانس.. باب الله مفتوح حبيبتي روحي أطلبيه وبإذن الله ما بيردج خايبة

ونصيحة مني لا تخلين هالموضوع شغلج الشاغل، أشغلي نفسج بأمور كثيرة

وبتشوفين النصيب يايج وأنتي ولا على بالج ..



الله يرزقج بالزوج الصالح إللي يكون لج قرة عين والله يرزق جميع بنات المسلمين

الله ييسر أمرج ويفرج همج


و السلام عليكم ورحمة الله وبركاته

هلا اختي

انا بعد تقريبا عمري 24 و محد دق بابي ... احيانا احس انه ما في امل و ربيعتي اتحبطني زياده تقولي اغسلي ايدج تعرسين

بس الله بيفرجها ان شاء الله و نحصل الزوج الصالح

الله يرزقج الزوج الصالح اللي يسعدج و يفرح قلبج.....امين

انارح ادخل 24سنه ان شاء الله
ولا اكذب لج لحد الان مااحد دق باب بيتنا
ومع ذلك انا مستانسه بحريتي اهو صدق
غير يوم يدخل احد في حياتج ويشاركج اياه
بس هذا مب اني اياس الانه مااحد جاني
بالعكس عيشي حياتج لليت الله مايفرجها
لج ويكتب النصيب

اناولا عمري فكرت بهذا تفكير
ليش ماانخطبت؟؟ ليش مااتزوجت؟ظ

الاني مؤمنه بالله تعالى وواثقه بانه

اكيد الله كاتب لي نصيب بس الصبرر والانتظار جميل

ليش اعور روحي وقلبي على هذه سالفه

وكله بيده الله قول لي

وان شاء الله

الله يرزقج بزوج صالح في دنيا والاخرى
ويرزقج بذريته صالحفي دنيا والاخرى
ياااااااااااااااااااااااااااااااارب
امين

بعدي عنج هذا تفكير:)
وانصحج اقرأي هذا الموضوع
والاهم ردود البنات مشاء الله عليهم
على صاحبة الموضوع :)
http://www.3roos.com/forums/showthread.php?t=148361

اختي ادعي بسجودك

اللهم ارزقني زوجاً صالحاً يحبك ويخافك ويتقيك

أللحي بالدعاء وتحري اوقات الاستجابة وبالسجود وصقيني كلها مدة بسيطة ويجيك احلى عريس

ولاتنسين الاستغفار وفضله العظيم بكل وقت عودي لسانك عليه وربي ان شاء الله بيفرج همك ويزيل غمك

حبيبتي داومي على قراءة دعاء تعجيل الزواج موجود في المنتدى في هذا القسم بشرط تقرينه من خاطرج وتداومين عليه وانشاءالله باذن الله تعالى بتتزوجين باقرب وقت ممكن


وما عليج من كلام الناااااس ............ ناس حاسين بالنقص وما همهم الا التجريح عسب تطلع لهم سالفة يرمسون فيها ..... أهم شيء ما تكونين مكسورة جدامهم وكل ماشافوج قوية ومب مهتمة بالعرس بيقل كلامهم عنج ( لكن انتي اهتمي بالدعاااااء ولا تقولين لهم عنه ) عسب ما يقولون كلام يجرحج جدامج


والله يفرج همج وهمي وهم كل انساااان مسلم يااااااااااااااااارب قووووووووووووووووووووولووووووو آمييييييييييييييييييييييييييييييييييييييييييييييييييييين

وعليكم السلام ورحمة الله

حبيبتي شيلي هالتفكير من راسك لأنه والله العظيم بتقعدين تشيلين وتحطين بنفسك على شئ ربي كاتبه وان شاء الله بيكون قريب حبيبتي فكري كيف تهتمين بنفسك وتعيشين حياتك تبين اذا جا احد يخطبك والا انتي من الهم ماتنشافين ؟

بالعكس حاااااااولي تطلعين من الجو اللي انتي فيه صديقات وطلعات وتهتميين بنفسك واسواق وحركات وانسي هالموضوع لأنك مارح تقدمين ولاتأخرين فيه اذا فكرتي
بالعكس بيبان عليك انك مهمومه على الفاظي وانتي الخسرانه لأنه مارح يلتفت لك احد اذا سويتي بنفسك كذا

والله يوفقك يارب ويرزقك الزوج الصالح اميييييييييييييييييين

الله يرزقج الزوج الصالح ان شالله

يا اختي انتي حساسه زياده عن اللزوم اذا سولفوو بالجمعات العائله سولفي ما فيها شي
ليش تفكرين بهالطريقه انتي متعبه نفسج


هالكلام تقوله وحده عمرها 30 واكبر مو 24


الله يرزقك الزوج الصالح اللي يسعدج
الله يوفقك ان شالله ادعي وانا بدعيلج

السلام عليكن جميعا ورحمة الله وبركاته:
ما توقع انه يوم وراح توصل الردود الى صفحتين مع ان نفسيتي مؤثرة مرة على جسمي واحس بتعب بس حبيت ارد على كل وحدة فيكم وهذا اقل شيء اسويه:


يومي بسنة
شكرا جزيلا لدعواتك الحلوة ولو كنتِ مكاني كان عرفتِ ليش التشاؤم عن جد احس بضيقة في صدري وساعات صعوبة بالتنفس


نوووسة
يمكن عندكم في الامارات لكن عندنا في السعودية الوضع مختلف يعني انا مو بس عانس الا عانس مع مرتبة شرف وعلى اية حال انا غاسلة ايدي من الموضوع ومشكورة عزيزتي لردك

ام يزن
شكرا عزيزتي ... بس مثل ما قلت للاخت نوووسة احنا في السعودية وبالذات في منطقتي ..الوضع غير

فدك 1980
مشكورة عزيزتي على ردك ... تقولين لي ليش التشاؤم؟؟؟
انا اعذركم ..لاني بصراحة ما راح اقول احسدكم لأ ....اغبطكم يا باقي بنات الخليج....وانا حالي مستحيل يتغير وانا عارفة بهذا الشي


طلوع الفجر
شكرا جزيلا لردك
بس والله ثم والله ثم والله ما صرت اقدر لا اصبر ولا اتحمل ..اجري على الله على اية حال

الجميلة 78
اولا شكرا
ثانيا ..اي لاحقة واي سابقة الله يهديكِ ...انا متاكدة ان مالي نصيب بس ادعوا لي اني اقدر اصبر

jami
شكرا جزيلا على مرورك
وما اتوقع ان ولد الحلال راح يجي ابدا ...والحمد لله على كل حال



احلى قطوة
شكرا جزيلا عزيزتي
انا لا انا صغيرة ولا شيء..شكلكم كلكم فهمتوا اني بعمر 24 لا انا اكبر بس مو كثير.. والحمد لله على كل حال


مرموم
اهلين مشرفتنا وشكرا لمرورك
تقولين لي عيشي حياتك ..ليش ظل فيها شي حلو اعيش علشانه


همس القلوب
شكرا لمرورك عزيزتي
اي انا عانس وهذا مو كلامي كلام مجتمعي..والله يوفقك ويهنيك


فيف
هلا اختي وشكرا لمرورك ودامك مو من السعودية اكيد راح يجيك نصيبك ان شاء الله

حورية

هلا ومشكورة على مرورك وان شاء الله الله يعطيك على قد نياتك


dandonah

اهلين ومشكورة على ردك اختي والله يوفقك دنيا وآخرة


اثير
اهلين اختي ومشكورة على الرد
انا الحين ما ابغى الا الصبر..والله يعين الجميع اما موضوع الزواج...

اختي اسيرة قلبه


هلا وغلا .. صدقيني حاولت بس ما فيه فايدة...


وردة العشاق
هلا ومشكورة على الرد
صدقيني هذي مو حساسية اذا الكلام والتجريح ممكن يجي من اقرب الناس لك..شنو ظل للغريب...والا اذا قلتِ شيء يقولون لك ما لك شغل انتِ اش فهمك بذي السوالف لانك مو متزوجة.. ايش تبغيني ارد ..مو السكوت والانصراف بهدوء او عدم الحضور افضل


المعذرة اخواتي ادري ان كلامي وردودي جافة .. بس صدقوني غصب عني انا اكتب ودموعي على خدي ..احس نفسي بديت افقد كل احساس حلو...
وشكرا

شفتي ياحبيبتي مثل ماتوقعت نفسيتك اثرت على جسمك
طيب بسألك بينفعك جسمك من الهم اللي انتي فيه اذا جا احد يخطبك ؟ طبعا لا عشااااااان كذا والله بتندمين وبتنهمين اكثر اذا ماحد تقدم لك بسبة اهمالك لصحتك وقتها بتقولين ليتني على الاقل اهتميت بنفسي عشان الكل يشوفني زينه ويخطبني