خطوبتي انفسخت..

السلام عليكم ورحمة الله وبركاته



أختي الحبيبة sadlove

رجعت لموضوعج السابق علشان أذكر نفسي فيه وشفت أن ما كان في شي بينج وبينه

غير سالفة البعد إللي بتخليج ما تعرفينه عدل وما تعرفين طبعه.. وما كان فيه سبب يذكر

يخليج تتخانقين معاه.. ورديت عليج وقلت لج موضوع البعد عادي وصدقيني حتى بالتلفون

ممكن تعرفين طبعه وصفاته وأخلاقه.. حالتي مثل حالتج والحمدلله كل يوم أعرف عنه شي جديد

وحلو وقادرين ناخذ ونعطي مع بعض على رغم المسافة إللي بيننا فما أشوف إن فيها شي

بس أنتِ مكبرة الموضوع والسبب شوقج له وإحساس قلبج بفراقه وما تنلامين على هالشي

بس لازم تحمدين الله سبحانه على الزوج إللي رزقج إياه وإللي بإذن الله يكون صالح لج ولعيالج

ودايما حطي في بالج مهما طالت المسافة والمدة راح تجتمعين معاه في بيت واحد فلا

تضايقين نفسج..


قريت موضوعج هذا وانصدمت من موضوع إنفصالج وعلى إيش على موضوع ما يسوى

إيه نعم ما يسوى، يعني بسبب ظروفه راح يأجل موضوع الزواج تقومين تزعلين وتتخانقين معاه؟

هو وليش بيأجل؟ مو علشانج ؟ مو علشان يجمع لج ويدبر موضوع السكن؟؟

عيل ليش تزعلين منه وهو قاعد يسوي هالشي علشانج؟ مو مهم متى بتتزوجون المهم إنه الحين

خطيبج وبإذن الله بيكون زوجج الحين ولا بكرة..

أما بخصوص عصبيته أنتي ذكرتي السبب بس ما أنتبهتي له، السبب هو الغــــــيـــــــرة

أنتي أثرتي غيرته حبيبتي بكلامج عن الشخص المتقدم وأنا لو مكانه أكيد بفهم كلامج غلط

أنتي حسستيه بالنقص وأنتي مو حاسة بنفسج وبنفس الوقت هو قاعد يذبح نفسه علشانج

وهو بعيد عنج، تبينه ما يعصب؟؟ تبينه ما يتضايق؟؟

عصبيته كان سببها الغيرة وليش يغار لأنه يحبج ولو ما كان يحبج ما كان بيغار عليج وبيحترق

قلبه جذي .. مهما قال لج من كلام تأكدي هالكلام كان أثر العصبية ، وأي واحد

بوقت العصبية يقول كلام أحيانا ما يكون من قلبه علشان جذي الرسول عليه أفضل

الصلاة والسلام نهى عن العصبية..

أختي أسمحي لي بس أنا أشوفج أنتِ الغلطانة وأنتِ كبرتي الموضوع الحين بعد

وقررتي الإنفصال وتركه وهو يحبج علشان موضوع أنتِ كنتِ السبب فيه...

نصيحتي لج، صلي ركعتين الحاجة وأطلبي من الله أن يألف بينج وبينه ويجمعكم على خير

وأدعي من الله سبحانه أن ييسر أمرج وأمره وتتصالحون ويكون هذا كله ماضي :)

بعدين أتصلي فيه أو ارسلي له مسج أو إيميل تعتذرين فيه وتحسسينه بعظم الأشياء

إللي قاعد يسويها علشانج وتحسسينه أنج لا يمكن تبدلينه بأي شخص كان حتى لو كان مليونير


وأعتقد جميع البنات بيتفقون معاي أن عصبيته كانت من أثر كلامج والسبب إحساسه بالنقص


الله يوفقج في حياتج وإن شاء الله الموضوع يعدي على خير وما راح تنفصلين إن شاء الله

بس أنتي بالغتي حبتين .. صالحي ريلج وهذا أخر كلامي :)


و السلام عليكم ورحمة الله وبركاته

الله يهديج اختي

اتصلي في خطيبج ورمسيه

لانه لو ما كان يحبج جان ما اشتغل ليل ونهار حتى يفرحج

الله يصبرج ان شاء الله:)

السلام عليكم..

ربي يسترها معاكم دنيا وأخرة .. ويفرح قلوبكم .. عمري ما بلاقي حد ينصحني مثلكم

خواتي ترى هو يوم عصب علي قال كلام مهين جدا صعب اكتبه لكم هني..وتهديدات فظيعه ما ترضاها وحده على نفسها تهديدات ممكن تدمرني .. كلام ممكن يمسني انا كبنت .. موب قادرة أشرح اكثر .. اتمنى تفهمون قصدي.. كلامه الفظيع وتهديداته هي اللي خلتني افكر في الانفصال.. اذا من الحين ونحن على البر بيلعب بسمعتي بوكرا يوم اجتمع معاه في بيت واحد شو بيسوي فيني..

انا مش فاهمه شي.. ممكن كلامكم صح انه من الضغط اللي هو فيه عصب وقال اللي قاله.. بس يابنات ياللي سبقتوني في الزواج او الخطوبة يوم كنتوا تتخانقون انتوا وزواجكم او اللي مخطوبين لهم هل كانوا يطاولون عليكم لدرجة المس والتهديد بالسمعه ؟ بس رجاء لا يروح تفكيركم لبعيد وربي اللي خلقني وخلق هالكون انا ما سويت شي غلط يغضب ربي احنا انخطبنا وكان يزورنا عادي في وجود اهلي لمدة اسبوع فقط وعقبها سافر وقبل السفر بيومين عطيته سكارف او منديل صغير من اللي ينربطون على الرقبه وعليه ريحة عطري المفضل كذكرى مني عشان يتذكرني هناك .. عطيته هالشي بيني وبينه يعني ماحد يعرف.. هو عاد يوم عصب علي امس في التلفون قام يهدد انه بيقول لأهلي اني سلمت له نفسي والدليل وجود هالمنديل معاه وعليه ريحة عطري.. انا طبيعي بخاف رغم اني مسويت شي غلط .. لكن مهما كان البنت مالها غير سمعتها ومجرد الكلام حتى لو كان كذب ممكن يترك تأثيره عند الاهل..او بوادر شك..ويوم هدت اعصابه قالي انا موب نذل العب بسمعة بنت وبعث رساله انا احبش واموت فيش.. الحين شو فايدة هالكلام عقب ما لعب بأعصابي وهاني وبهدلني معنى هذا انه انسان سهل عنده قذف المحصنات وهذا عقوبته موب سهله في الدين.. الحين هل ضغط العمل وغربته تشفعله في اللي سواه فيني واني ارجعله..؟؟؟؟؟؟؟؟

انا الحيت قلت لكم السالفه من اولها لأخرها.. وانتوا الحكم ..

ياريت اقدر اكتب كل اللي قاله بس كلام صعب جدا..

اللهم هونها علي...انا راضيه بحكمك..

انا ماعرف شو اقولج بس اقدر ادعي لج الله يهدي سركم ويكتب اللي فيه خير لكم امين

بس اختي لا تنسين ان انتي مب مالجه للحين يعني حرام عليج ترمسينه لانه بعده مش زوجج ولا يصير لج شي غير انه خطيبج ..
وسبحان الله يمكن لان ربج مب راضي على هالشي ما يكتب لج التوفيق والسعاده معاه للحين


بس اتمنى ان الله ايسر امرج ويهدي خطيبج ويجمعكم على خير امين

اختي اذا انتي متأكده اذا اهلج بيوقفون معاج لا تخافين

قوليلهم كانت هدية مني له

أو انكري موضوع المنديل اذا كنتِ تخافين على نفسج من أي ضرر بيمسج اذا حد عرف بالسالفة

عزيزتي اول شئ وعسى ان تكرهوا شئ وهو خير لكم
ربما هالرجال ماينقصه شئ لكن ماتدرين عن بعدين وش يصير
مانستبق الاحداث
يعني ماحصل انفصال رسمي
عمر المسافه ماكانت سبب في تفاوت التفكير وصعوبة التعامل
يمكن كل واحد منكم عنده شئ مزعجه وحطيتوا حرتكم ببعض
عزيزتي اذا هو فعلا يحبك وانتي تحبينه
يعني مو بس تبغينه لانك كبيره بالعمر وكلمتك ان فرص الزواج تقل مع ان الزواج ماينتهي بعمر
فالاحسن انكم تدخلون شخص كبير في العايله في الموضوع ابوك اخوك خالك عمك
يعني رجل ناضج اذا كان الموضوع يستاهل التدخل
لكن اذا تقدرين تحلينه بنفسك فيكون افضل
باللين يرجع كل شئ


لكن لما قريت الرد الثاني اتوقع كرامة الانسان فوق كل شئ
يعني انه يهددك بهالشئ فهي قويه
انتي علمي امك او ابوك بهالشئ وانهي علاقتك فيه لانه باين عليه انسان في لحظة غضب يرتكب حماقات فمايهمه يقذف او يشهر حتى لو ماوصل الموضوع لاحد كفايه اسلوبه
وانتي شوفي الي يناسبك
هذا رئيي والله يكتب لك الخير

عزيزتي دامه يحبج مستحيل إنه يقول لأهلج شئ

صدقيني الضغوط تجبر الواحد يقول كلام ما يقصده ...

إنته خليه إشوي لين ما يهدا و بعدها كلميه و لا كأنه في شئ و إذا فتح الموضوع رديه عليه بكل طيبه و حنيه

الغاليه 6 شهور تهون على سنين

عيل أنا صابره سنين لين ما الله يوفقنا و يجمعنا في بيت واحد

استحــــــــالة اقول اي شي غير انك لابد ان
تستخيري الله

حبيبتي
كلام الاخوااااااااات عددل وحاولي تصلحي سوء التفاهم او خبري اهلج ان يتدخلوا بالامر او ابوج واخوانج وكبير العاااائلة واهدي ياقلبي وكل مشكلة لها حل بالتفاهم طبعا مو بالعصبية وكان مفروووض ان ما تتسرعي ويصير كل هذااا وباذن الله الواحد الاحد تردووون لبعض وماكو بيت خالي من المشااكل وكل مشكلة لها حل عند رب العباااد

وطمنيا عليج حبيبتي
تقبلي تحياااااااتي

السلام عليكم ورحمة الله وبركاته
فى البداية احب ان اقول كل شى اسمة نصيب لكن نحن بشر ولذلك من حقق ان تحزنى
لكن لا تجعلى الحزن يؤثر على حياتك
ان شاء اللة يرزقك بأبن الحلال مع تحياتى

صلي استخاره اول شي اهم شي الاستخاره ولا تقولين طافني القطار ولازم اتزوج باستخاره او بدون لانه الاستخاره ضروريه
شي ثاني اختي انتي غلطانه والف غلطانه بعد الريال بعمره ما يحب انه حد يقارنه بريال ثاني ويقلل من قيمته وقدره وانتي بدون قصد عايرتيه بالثاني وعنده حق يحنق..عنده كل الحق يعني الريال يكد ويكدح عشان خاطرج وواضح انه يحبج تقومين انتي تعقين عليه كلام يحسسه انه كل اللي يسويه على الفاضي..بدال لا يقلى كلامه يعطيك العافيه والله يقويك ويطول بعمرك..تقوليه فلان وعلان
كلامي قاسي عليج بس ماعليه انا مع الحق..والحق في صفه..وذا ظروفه ما اسمحته يتزوج الحين ولازم مهله عيل اكيد في سبب وهو انه بعده عاجز عن الاستعدادات للعرس..بعدين ليش ما تساعدونه وتخففون عليه اعباء العرس يعني قللو المهر مثلا عشان يروم الريال على الزواج وتكاليفه والرياييل مخابر مب مخابي ولا مناظر

انا من رايي عقب الاستخاره واذا حسيتي بعدج انتي تبينه..صالحيه وابد لا تقارنيه بحد وعلى فكره معلومه بس احب اقولها لج وكل خواتي العرايس..صح الريال برجولته وعقله وشخصيته القويه والواثقه..بس بعد كل ريال في داخله طفل صغير في حاله الزعل يطلع منه كلام طفل عمره 10 سنوات ويمكن اقل هالشي ما يتعارض مع رجولته لانه هذي طبيعتهم..

احتويه حبيبتي وخففي عليه وعطيه الكلمه الحلوه اللي تكون حافز له ولا تهديه بالكلام القاسي وكأنج مب حاسه فيه
وبعدين خبري هلج انه يبى مهله ومافيها شي..خذوهم فقراء يغنيكم الله..واصبري عليه انتي حصلتي حد يتقدملج غيرج يتمنى ومب طايل..انتي بأيدج تفرحين ولا تقولين عن عمرج الحزينه ولا تيبين القراده لنفسج..اصبري وادعي الله وخلج قريبه من ربج ثم ريلج وان شاء الله الله يرزقه من حيث لا يعلم ويفرج عليكم وتتزوجين ونفرح فيج ويا العرايس كلهم يا رب

من راي صلي الاستخااارة ووكلي امرج لربج ................. وصدقيني اذا كان من نصيبج بتاخذينه حتى لو شو ماصار بينكم .......لكن ااذ مب من نصيبج ما بتاخذينه حتى لو تاسفتي من اليوم لباجر حقه

يمكن هذي عين وماصلت على النبي
أنا أعرف وحده كذا أنخطبت لأنسان يحبها كثير لدرجة ماتنوصف
وكانت سيرة بين الناس وكيف كان يحبها
وكان نهايتها الإنفصال
كرهته لدرجة الجنون و في نفس الوقت كانت تحس أنه ونعم الزوج أخلاق ودين وياربي من فضلك
لاتتسرعون أستخيري الله وكثري من الأذكار
وربي يكتب لك اللي فيه الخير

ولكم فائق تقديري وإحترامي
دمتم بخير

طيب اصبري شوي.. الموضوع ما بينتهي بهل سهولة من خلاف بسيط او حتى مو بسيط على التليفون... خلي بالك طويل وانشالله بتتصالحو

السلام عليكم و رحمة الله و بركاته

هلا بيكي أختي sadlove...

شوفي...طبعا ما ننكر إنه غلط...و غلط كبير كمان...

بس في حالتك أحس اللي صار بسبب إنه عصّب مرة واحدة...و حس إنه كرامته أهينت...لما فهم إنه تدوري على واحد ثاني...غيره...بعد كل اللي عمله معاكي...

الموقف في صالحك إنتي...بالذات بعد ما اكتشف إنه غلطان..و بعث لك إيميل يعتذر...

نصيحتي لك...ردي على إيميله رد فيه عتاب قوي...

قولي له مشكلة صغيرة تقول لعني هالكلام...عمري ما توقعت و لا تخيلت...حبّيت فيك أشياء حطمتها بكلامك الجارح...

قولي له كل إتفعالاتك ...خليه يحس بيها...

و شوفي ردة فعله...لأنه مفروض يعتذر...و يصلّح اللي صار...

و عن فكرة تأجيل العرس...ما كان حقك تتكلمي فيها...هذا الكلام يكون بين الأهالي...مرة ثانية قولي له عندي والدي كلمه و شوف رأيه...

و إن شاء الله خير...

بدعيلك من كل قلبي أن الله يوفقج
وأتمنى لج كل خير ..
وتذكري دايما ً( وعسى أن تكرهوا شيئاً فهو خير لكم)
يمكن مب مونصيبج ترى نحن البنات وااايد نحلم بس للأسف مب كل أحلامنا تتحقق ..

حبيبتي انا اقول صلاي صلاة استخاره احسن شي وبعدين الله اذا كاتبلجح فيه نصيب راح تخذينه والله يوفقج

صلي استخاره اول شي اهم شي الاستخاره ولا تقولين طافني القطار ولازم اتزوج باستخاره او بدون لانه الاستخاره ضروريه
شي ثاني اختي انتي غلطانه والف غلطانه بعد الريال بعمره ما يحب انه حد يقارنه بريال ثاني ويقلل من قيمته وقدره وانتي بدون قصد عايرتيه بالثاني وعنده حق يحنق..عنده كل الحق يعني الريال يكد ويكدح عشان خاطرج وواضح انه يحبج تقومين انتي تعقين عليه كلام يحسسه انه كل اللي يسويه على الفاضي..بدال لا يقلى كلامه يعطيك العافيه والله يقويك ويطول بعمرك..تقوليه فلان وعلان
كلامي قاسي عليج بس ماعليه انا مع الحق..والحق في صفه..وذا ظروفه ما اسمحته يتزوج الحين ولازم مهله عيل اكيد في سبب وهو انه بعده عاجز عن الاستعدادات للعرس..بعدين ليش ما تساعدونه وتخففون عليه اعباء العرس يعني قللو المهر مثلا عشان يروم الريال على الزواج وتكاليفه والرياييل مخابر مب مخابي ولا مناظر

انا من رايي عقب الاستخاره واذا حسيتي بعدج انتي تبينه..صالحيه وابد لا تقارنيه بحد وعلى فكره معلومه بس احب اقولها لج وكل خواتي العرايس..صح الريال برجولته وعقله وشخصيته القويه والواثقه..بس بعد كل ريال في داخله طفل صغير في حاله الزعل يطلع منه كلام طفل عمره 10 سنوات ويمكن اقل هالشي ما يتعارض مع رجولته لانه هذي طبيعتهم..

احتويه حبيبتي وخففي عليه وعطيه الكلمه الحلوه اللي تكون حافز له ولا تهديه بالكلام القاسي وكأنج مب حاسه فيه
وبعدين خبري هلج انه يبى مهله ومافيها شي..خذوهم فقراء يغنيكم الله..واصبري عليه انتي حصلتي حد يتقدملج غيرج يتمنى ومب طايل..انتي بأيدج تفرحين ولا تقولين عن عمرج الحزينه ولا تيبين القراده لنفسج..اصبري وادعي الله وخلج قريبه من ربج ثم ريلج وان شاء الله الله يرزقه من حيث لا يعلم ويفرج عليكم وتتزوجين ونفرح فيج ويا العرايس كلهم يا رب