مشكلتي الغريبه ..

أول شي برد على أمل مفقود
انتي جربتي وايد من اللي في داخلي بس غلط
يعني انا صح في داخلي مب مقتنعه بزوجي بس محد في خاطري و انا مب خياليه وايد و ابا فارس احلام مب موجود بس انا لما قررت اني اتزوج ما فكرت في الزواج كمسؤوليه اكثر من انه هروب

والحينه اقول اللي يبا يهرب من شي لا يظن ان الزواج هو الحل


-----
عيون والله انا لي الشرف لو انج بتصيرين ربيعتي .. انا اباها من الله ارابع حد .. بس ما اسير مكان ولا اشوف حد ما يصير امشي في الشارع و اقول حد يرابعني ؟؟ هههههههههههه

و ان شاء الله ناويه اصبغ شعري

---------
أم قنونه ان شاء الله ما بقول بحاول الا ان شاء الله اول ما احس بهالاحساس بصلي
------
alfirdows
وايد وايد عجبني كلامج بس كيف اقنعه بيسوي اول مرة بس ثاني بيتهاون لاني طلبتها منه مرة قالي انتي يوم تبين تقرين انا ابا اشوف مباراة ولا اطلع
---

روح الورد
مشكورة اختي على الرد

السلام عليكم ...عندي بس سؤال بسيط وهو هل انتي تاخذين حبوب منع حمل او اي علاج اخر؟؟

خاص لا ااختي

----------
مشكلتي يا عالم اني مب قادره احب زوجي
مع انه ينحب و طيب بس العيب فيني
ما اقدر اجبر نفسي و اقول هالشخص أحبه
مع اني كلمته قالي ما اقدر اجبرج يعني ايب عصا واقولج حبيني
كيـــــــــــف احبه كيف احب حياتي
كيف احب المكان اللي عايشه فيه

عزيزتي

ليش ما تفكرين تشتغلين ،، حتى لو فترة بسيطة و تخلين بنتج في الحضانة

ما راح تخسرين شي ،، و راح تغيرين الروتين

تحياتي

ياليت سنه كامله و انا اقنع فيه و بعد ما فتح له هذا الموضوع انه مضايقني قال خلاص بدور لج شغل بس بترجعين و تقولين مضايقه و مب سعيده

احيانا اخاف يكون كلامه صح
و لاني ما اطلع الا معاه اخاف اني اطلع لاي مكان بدونه و اواجه المجتمع

يعني انتي لما تزوجتي ما كنتي مقتنعه فيه هو شخصيا كثر ما كنتي مقتنعه في سالفه الزواج عشان تتخلصين من الضغوط اللي كانت عليج وقتها ..
تصدقين الشيخه احس انج مب فاهمه نفسج ولا تعرفين شو تبين.. احيانا تحسين انج تحبين ريلج بس فيج بروود فضيع ناحيته رغم هالحب ولا تدرين شو السبب .. يعني في داخلج انتي تحبينه لكنج مب قادره تعكسين هالشي للخارج وتوضحينه بصورته الطبيعيه لانج ببساطه للحين مب حاسه فيه .. تحبينه لما تشوفينه يهتم بج وببنتج .. تحبينه لما تحسينه يغار عليج .. ولازم تحبينه لانه صابر عليج لان الريال مهما كان في النهايه ما يحب يفرض نفسه على انسانه ما تحبه .. وصدقيني لانه يمووت فيج هو صابر ولا تتوقعين انه مب مهتم .. يمكن انتي ما تبينين له هالشي بس هو اكيد يحس بالحب لما يكون ظاهر من القلب والا لما يكون مجرد تمثيل بارد .. ويتمنى من كل قلبه انه يفوز بقلبج ورضاج في الاول والاخير .. وعشان جذا شوفيه يسوي المستحيل عشان يرضيج ..

بقولج الغاليه هذا كله من الشيطان ومن الفراغ اللي تعيشينه .. وايدين سافروا عن اهاليهم بس الحمدلله ما صار لهم هالشي ووايدين يالسين في البيت وبعد مب حاسين بهالشي .. لانهم ما عطوا الشيطان فرصه لمثل هالافكار .. وانتي عطيتي الشيطان باب يدخل منه لحياتج ويوهمج بكل هاللي تحسينه ..
حاولي تشغلين وقتج وتقربي اكثر من ربج وادعيه يحببج في ريلج وحياتج .. لا اتعبين نفسج بقوله انا مب قادره احبه لانج اصلا تحبينه ومب محتايه الا لتغيير الروتين اللي تعيشينه عشان ترد الحياه لعيشتج وقلبج وانتي حاولي وعندج اشيا وايده غير الدراسه وسوالف البنات .. بعدج في بداية مشوارج معاه والعمر جدامج وياه والحياه حلوه لما تعيشينها لجل خاطر انسان يحبج ويغليج ودامج تزوجتي مالج الا زوجج .. قولي هالشي لنفسج واقنعيها فيه وشيلي عنج هالوساس ولو يتج في يوم روحي لزوجج وكلميه في نفس الوقت حتى لو تكرر معاج هالشي مليون مره دوم لما تحسين بضعف روحي له ..
بس المهم انج تقررين في داخلج انج خلاص تحبينه اكثر من كل شي وبتسوين المستحيل عشان هالحب يزيد ترى والله النفسيه على ما تقنعينها .. وتفاهمي انتي ونفسج عاد:smile:

الله يوفقج ويسعدج مع زوجج ويخلي لج بنتج امين

والسموووحه الغاليه

أمل مفقود كلامج وايد أثر فيني
كلامج وايد قريب
صح انا احبه بس مب الحب اللي الكل يعرفه
انا احبه و ما ابا اجرحه احبه و ما اباله الاذيه
احبه و ما ابا يتعب او يمرض
بس ما احبه حب الكل يعرفه


انا حياتي ما تخلا من المشاكل بالعكس فيها مشاكل لو وحدة ثانيه تقلب الدنيا مرة اختي قالت لو انتي في موقفي شو بتسوين ضحكت و قلت لها سالفه و قلت لها لو انتي في موقفي شو بتسوين .. انا ضحكت و تناقشت عادي و حليت الموضوع

يمكن انتي تشوفين اني ابالغ في الموضوع بس صج مضايقني .. مب حاسه بطعم اي شي اسويه لما اطلع او ايي بتقولين نفسيا
بقولج يمكن بس لو انتي طالعه على البحر بتقولين انا الحينه مستانسه ولا لانج اصلن تستانسين لما تسيرين البحر ؟

انا ممكن اقول اني فرحانه و اصدق هالشي بس لما اقعد افكر ما اتذكر شي واحد خلاني مستانسه ..

يمكن ما تصدقين فكرت اني اكتب مذكراتي اي شي يفرحني اكتبه .. و يوم اكون مضايقه اقراه يمكن احس بالسعاده و انا اقراه

السلام عليكم و رحمة الله و بركاته

هلا بيكي أختي jami...

إنتي تضغطي على نفسك كتير أختي...ليش تفكري في تفاصيل التفاصيل ؟

يعني تكوني في موقف...و فيه سعادة جاءت عليكي...ليش تقولي لنفك...هل أنا سعيدة علشان أنا سعيدة واللا شعور لحظي...؟

هذا السؤال نفسه كفيل بأن يقلب سعادتك حيرة و هم...

إنتي تحللّي الأمور أختي...و تفكري كثير...و ترسمي لحياتك منحنى آخر...غير اللي موجودة عليه هي...و بالتالي تبدأي تقارني الواقع بالخيال...و تتعبي...

في ناس كثير ما تحب أزواجها حب العشق و الجنون...و اللي بينهم عشرة طيبة...

لكن مع ذلك متفنين و مبدعين في حياتهم...و لحظة حلوة بينها و بين زوجها تشعل نار الحب بينهم...

و لو أردتي صديقة في أبوظبي...يشرفني أكون صديقتك فعلا...و هذه الأخت 3yoOon_AD بتكون معانا...يعني شلة كويسة...

صدقيني أختي لو صادقتي ناس...و شفتي مشاكلهم...و عشتي معاهم...راح تعرفي و تقدري النعمة...

و لو إشتغلتي...راح يعود عليكي بفايدة كبيرة جدا...لأنك بتعيشي في محيط أكبر...و تشوفي ناس أكثر...

و فكرة العمرة فكرة حلوة...و بنتي سافرت فيها عمرة و هي عمرها شهرين بس ! و الحمد لله كل شيء كان تمام...قعدنا هناك 10 أيام...في شهر أبريل الماضي...و الحمد لله إنبسطنا جدا...

*******************************************************

شكرا أخ أبو داحم على التنبيه...تم تعديل الآية...الله يغفر لي خطأي إن شاء الله...

الغاليه ليش ما تقعدين مع نفسج دقيقه وحده بس وتذكرين فيها شي حلو انتي سويتيه معاه او هو سوالج اياه ..
اوكي خلصت الدقيقه وتذكرتي زيدي بعد دقيقه ثانيه وهاتي موقف ثاني ضحكج معاه ..
خلصتي الدقيقتين عشان خاطره هاتي موقف ثالث غالي عليج صار لكم سواء ايام الخطوبه او الزواج ..
للحين تذكرين التفاصيل الحلوه اللي قضيتيها معاه .. لما ياب لج اول هديه مثلا .. لما يبتي بنتج الله يحفظها لج ..
ما تحسين انج اشتقتي له ..؟؟ روحي دقي له لا تطولين في السالفه بس قولي له اشتقت لك وصكري عنه ..

روحي اشغلي نفسج بالبيت او ببنتج .. اترييه لما يرد ومن خاطر خاطرج استقبليه بأحلى ابتسامه .. مب لازم تكون ابتسامه حب بس المهم انها ابتسامة رضا وتقدير على كل اللي يسويه لج ولبنتج عشان راحتكم .. ومافيه احلى من كلمة الله يعطيك العافيه هنا ..
لا تضغطين على نفسج باجر باذن الله بتحبينه بس اصبري وخلي الحب ايي طبيعي حبه حبه على قولتهم ..لان الحب مب كلمة وتنقال ولا هو احساس ايي بين يوم وليله .. الحب الحقيقي هو اللي ينولد عقب عشره طيبه بين الاثنين مهما طالت المده .. بس اهم شي انج تاخذين بالاسباب .. يعني تعطين نفسج الفرصه انها تحبه بأنج تتقربين منه اكثر وتشوفين الاشيا الحلوه فيه قبل الشينه .. وان شاء الله ريلج ما فيه الا كل خير مثل ما هو واضح .. شاركيه في كل شي وعودي نفسج عليه اكثر من قبل .. يعني خلي اعتمادج الاول والاخير عليه هو لانج محتايتنه حتى في لقمة العيش .. لا تقولين انا بدونه عادي اقدر اعيش .. لان الحرمه ولو راتبها في يديها في النهايه هي بدون ريال تموووت ..تصدقين اعرف وحده كانت تبغي واحد واهلها جبروها تاخذ غيره .. تقول كرهت زوجي كره ما تتصورينه وحتى لما يابت ولدها الاول تقول كرهته زياده وبقيت معاه وانا كارهتنه وكارهه العيشه كلها لين ما يبت بنتي الثانيه تقول ما ادري شو صار فيه انجلبت وقمت اموووت على طاري ريلي واغااار عليه واحبه حب مب قادره اوصفه ..

شفتي كيف طولت لين ما حبته .. في النهايه حبته حب كبييير ما كانت تتوقعه .. هذا وهي كارهتنه فما بالج بنفسج انتي اللي تحبين ريلج بس مب قادره للحين تحسين به.. يمكن لو غبتي عنه فتره تحسين انج عاديه مب مهتمه واايد لهالشي ولا تحسين بلهفه حقيقيه عليه بس صدقيني لو طالت هالفتره اكثر او انج فكرتي كيف هي حياتج بدونه ما بتلقين نفسج الا وهي مشتاااقه له .. احيانا نحب ناس بس ما نتقرب منهم لانا ببساطه نشوفهم في البعد احلى واغلى ..
وتذكري دوم اي حركه بسيطه منج له او منه لج تقرب من بينكم .. لا تقولين ماقدر اجبر عمري والسالفه مب محتايه لجبر.. شوي شوي والسالفه روحها بتصير بعدها طبيعيه ومب محتايه لحد يحركها لان القلب هو اللي بيتصرف وقتها ..

اتمنى لج السعاده والراحه في حياتج وعسى الله يوفقج لكل خير امين

هلا اختي جامي...

انا كنت مستحيه اطرح مشكلتي هني في المنتدى

لاني احس ان الناس بتستخف ابها

ويمكن حد يقولي انتي بطرانه عالنعمة

بس لقيت انج انتي وغيرج تعانون نفسي...


كنت مفتكره ان السبب هو العيال

(صارلي سنه و3شهور معرسهومافي اطفال)

قلت يمكن إذا حملت تتغير حياتي...

بس اشوفكم عندكم عيال ماشاء الله وبعد نفس الشي...

والسبب (بالنسبالي على الاقل) مش الروتين نهائيا

لانه حياتي مافيها روتين بتاتا..

زوجي يداوم شفتات

وانا اتنقل بين بيتنا وبيت اهلي

وكل اسبوع شكل..

الله يعينا

وانا اعرف عمري لو كان في حياتي روتين جان تعقدت من صج..



انا لما يلست مع نفسي وحاولت اني احلل السبب

طلع اني احس بالتقصير تجاه الكل

وجني مب مسويه اللي علي وزيادة

احس اني ابا اعطي للي حواليني فوق طاقتي

ولانه فوق طاقتي

ماراح اقدر اسويه ابد

وهالشي يخليني اعيش الانسحاب

موجودة وكاني مش موجودة


احس اني مب مفيدة

ومحد راح يحس بغيابي لو صار لي شي..

آآسفه احس اني غثيتكم وما قلت شي مفيد

السموحة

اول شي ابا اقول ما تتصورون كيف ردودكم تسعدني ما تخيلت ان راح تلفت انتباهكم

مرموم و الله شجعتيني اسير العمرة راح اكلمه مع انه قالي لما شوي تكون اكبر عن هالعمر و عادي نخليها عند حد نعتمد عليه
مشكورة حبيبتي و يشرفني انج تكونين صديقتي



أمل مفقود
ما اعرف شو اقولج بس كلمه شكرا شوي في حقج .. كل اللي قلتيه بسيط بس ما اعرف كيف دخل في خاطري و ودي الحينه اقعد مع نفسي و ايب ورقه و قلم و احاول اتذكر كل شي حلو و اكتبه عسب ما انساه


توليب
صدقيني يا اختي انا كتبت الموضوع و انا متخوفه وايد من رده الناس
ما توقعت حد يرد ممكن يشوفون الموضوع سخيف بس صج مضايقني
و ما تصورت ان في ناس مثلي يحسون مثلي
لما كنت اكلم المقربين مني
كانت كله حلوله تناسي هالشعور
او انج سخيفه ما عندج سالفه
او اي شي ثاني بس من غير حل

اتمنى انج تساعدين نفسج و تلاقين الحل
و انا ان شاء الله بساعد نفسي و بجبره يساعدني
لان مثل ما قالت الأمل اذا ما حبيته اليوم بحبه باجر ان شاء الله

بس اذا حطيت في بالي اني حزينه بتم طول عمري هالحزينه اللي ما بتتغير و بخسر احلى اللحظات اللي ممكن اعيشها في حياتي
مع بنتي و زوجي


و على فكرة انتي الحينه ما عندج اطفال ممكن تستغلين هالشي في اشياء وايد طلعاتكم لفندق او سفراتكم ماراح تضيع في تسكيت الياهل او مرضه او تبديله و ارضاعه
حلو يكون عندج ياهل بس احيانا تتمنين ما يكون عندج قيود و مواعيد لاشياء ثانيه
انا على طول حملت ما حسيت اني عروس او مستانسه يمكن هالشي اللي ما خلاني اتقرب من ريلي وايد و احبه
على طول حصلت عمري ام و عندي مسؤوليه


مشكورين وايد على كل كلمه

jami
عندي سؤال ارجو انج تجاوبيني بس ابيج تتذكرين زين وانا شبه متأكده أن اللي فبالي صح
هل تعانين من هالمشكله أكثر في فصل الشتاء يعني اوائل شهر 11 و12 ويمتد هالشعور لحد شهر مارس وبعدين يبدأ فالفتور جاوبيني وبرد عليج ..........


انا فأنتظار الرد

مممم
من ناحيه ريلي بقولج لا
انا راح اقولج شي
انا تزوجت و بعدها بسبوع حملت و في الحمل كنت احس اني اكرهه
وبعدين ربيت و يبت بنتي انشغلت معاها
يعني انا ما حصلت فرصه اني احبه مع انه طيب وياي بس مشاعري و نفسيتي تجاهه صفر


بس انا ما انكر ان في كل سنه يزيد عندي الحزن لدرجه اني اقعد ابكي بطريقه هستيريه ...

ماجاوبتيني زين سألتج عن أي فتره فالسنه تزيد عندج المشكله في الشتا اكثر صح حاولي تتذكرين اكبر المشاكل متى صارت كل سنه

و الله اختي ما اقدر اتذكر بالضبط بس اتذكر انها تكون في فترة المدارس لما كنت ادرس
بس اي فترة ما اذكر و كنت احزن بشكل كبير لدرجه اني ادخل الحمام و اصيح لين اتعب بدون سبب
بس عمري ما حاولت احدد الفترة او التاريخ



بس حبيبتي انا اشوف ان الموضوع ما يخصه في موضوعي الاصلي
انا اتكلم عن احساسي بعدم السعاده بشكل عام و عدم احساسي بالحب تجاه زوجي

مع اني ما انكر ان كلامج صح في فترة اتيني حاله حزن

jimi
واضح انج تعانين من الأكتآب وترى هذا شي عادي بعض الناس عندهم قابليه أكثر من غيرهم وارجو انج تهتمين فالموضوع وتروحين لطبيب الموضوع مايخوف راح يعطيج فيتامينات او اقراص معينه وبتستفيدين صدقيني ترى الاكتآب مش نفسي اكثر من انه عقلي وفي ناس عندهم مشكله في كيمياء المخ ويبغيلها ضبط انا اعرف ناس كانو على حافة الانهيار وخذو علاج واستفادو وايد ..........

بالنسبه لسؤالي عن اي فتره تعانين اكثر اذا تحسين انج كل سنه في الشتاء تكتئبيتن اكثر فأنتي مش لوحدج ترى فيه ملايين مثلج وثبتو هالشي علميا ويسمونه اضطراب فصل الشتاء وانا وحده اعاني من هالاظطراب وآخذ فيتامينات واقراص اوميغا 3 والحمد الله اهون وكل كلامج اللي تقولينه انا اعاني منه يمكن هالشي وراثي بعد وعلى فكره انا مثلج متزوجه وعندي بنت بس مش سعيده او احس اني مش سعيده والاكتآب هو السبب مش ريلي ولا اي احد غيره وسلامتج .......................

اختي الغاليه ......اسفه بكون صريحه معك

بس لازم اسألك
انت قبل زواجك كانت لك علاقه حب ؟وانتهت بالفشل؟


لأن كثير اعرفهم تعرضوا لصدمات بعد قصص حب او يمكن قصه حب وحده لكن اثرت فيهم ........صدقيني البنات مو مثل بعض ....يمكن هالشئ يكون بعقلك الباطن يمكن القصه ناسيتها انت .......بس اثارها اثرت عليك .......يعني انا اعرف بنات ازواجهم شايلينهم شيل وهم تركوا الغلط ونسيو الماضي ..........لكن ييقولون ان حتى كلمه احبك مايحسون فيها زي اول لما كانوا ييقولونها لأول حب ........مع انها بعقلها متأكده ان زوجها افضل من حبها الاول ......ومتأكده بعد ان زوجها يحبها اكثر وحبه لها حقيقي وصادق



عيوني




هذا افتراض على حالات عشتها

يمكن تكوني منهم وممكن لا




وبالتوفيق ان شاء الله

تحياتي لك

شاختي jami ما شاء الله البنات ما قصروا

الروتين القاتل هو اللي يسبب كآبة من نمط الحياة وشعور للانسان بانه غير سعيد

جددي في حياتك وغيري من نظامك .. سافري .. اشتغلي .. ادرسي .. خذي دورات .. رياضة

راح تلاحظين الفرق

ذرة من المجرة
هو بصراحه قالي شو رايج تسيرين عند طبيب بس انا كنت متخوفه من الفكرة ما كنت ابا احس انها مشكله مرضيه او غيرها فاهمتني ؟


غصن الرند ... مشكورة اختي على الرد .. مشكلتي انا اني اطمح وايد انا كان يعجبني شاب في العايله بس ما توقعت انه امه تخطبني لاسباب .. و بعد ما ملجت سمعت انها بغت تخطبني بس عاد ما قالولي حقه ولا حق اخوه انا قلت احسن .. بس احيانا اقعد اقول لو ما استعيلت


رومي و الله هذا اللي احاول اني اسويه .. لان حياتي ممله لدرجه تذبح و وحدة فضيعه


--------


بس ابشركم بنات بعد ما سمعت نصايحكم .. من امس و اليوم علاقتي مع ريل تغيرت حتى هو المسكين شرالي ساعه فندي
و الغريب اني اول مرة افرح بهديه منه مع انها مب اول هديه بس اول مرة احس اني فرحانه

مشكورات حبيباتي