هل هذا الشيء يصير عندكم والله لا؟؟؟

إلى هذي الدرجه مشكلتي ما تهمكم...


صراحه زاعلتوني...

من قال مشكلتك ماتهمنا، أحنه بهالمنتدى دوم نعاون بعض،، أولا الله يكون بعونك على تعب الدوام والفطور،،، بس عندي كم سؤال قبل لا أتناقش معاك،،، ليش ماتفطرين عند أهلك؟؟ دام أنتوا ماعندكم عيال وتوكم ببداية حياتكم...
ثاني شي ليش يجبرك تروحين بيت أهلك أو أهله كل يوم؟؟؟ ليش ماتقعدين بالبيت دام أن هو راح يتأخر عليك إلى هذا الوقت...

الله يعينج ويعطيج ألف عافية
مشكلتج مثل مشكلة وايد زوجات يعانون من الزوج ألي حاط يده في ماي بارد
بصراحة اعتقد نفس ما يقول المثل(ولدج على ما تربينه وزوجج على ما تعلمينه)
أنتي عودتيه انه ما يساعدج
طلبي منه يساعدج وأصري عليه بالطلب وقولي له أنا آشتغل مثل ما أنت تشتغل
وحتى الرسول عليه الصلاة والسلام كان يساعد زوجاته
مب عيب الزوج يساعد زوجته بس العيب أنه يشوفها تعبانه وما يحاول يساعده
الحمد لله زوجي من بداية زوجنا يساعدني في بعض من أشغال البيت ألي يقدر يسويه
( تدلعي وقولي ما أقدر بروحي أنا تعبانة أنا مريضة .. ما تعرفين تدلعين)

تدرين اشووووف الحل اللي بيريحج وبيريح ريلج ( استقالتج من الشغل ) :up: اذا كان الشغل مب ضروري طبعا

لنه دوامج وااايد تعب تقومين الساعة 5 :down: وترقدين فليل متاخرة

السلام عليكم ورحمة الله وبركاته ..:flower:
بصراحة مشكلتج واااايد حساسة .. الله يعينج
بس برايي تيلسين مع ريلج وتشرحين له الظروف إلي أنت أتمرين فيها
صدقيني نحن حاسين فيج لإنج شرحتيلنا المشكلة ويمكن إذا شرحتيله يتجاوب معاج ويتغير ...
وبعدين أنتوا في بداية حياتكم وهالمشاكل تستوي لكل عروس يديدة .. بس لازم تتغلبين عليها بذكائج
وأنت قدها وقدود ... أتمنى لج التوفيق في حياتج ..:smile:

مشكورين خواتي كلكم على ردكم علي:::

رانيا البحرينيه: ليش ما أفطر في بيت أهلي؟؟؟ جربت فطرت في بيت أهلي أول أسبوع من رمضان يومين يوم في بيت أهله...
وبعدين حسيت إنه راح يتضايق إني كل يوم والثاني أروح بيت فأحس إنه بيعايرني في يوم من الأيام...

وطبخت له 3 أيام ورى بعض وثالث يوم صار لي موقف وصار إللي في بالي قال لي إياها بالحرف الواحد أنا متزوج عشان كل يوم والثاني أروح أفطر في بيت ناس....

ليش يجبرني إني أروح بيت أهلي أو بيت أهله لأنه ما يحب إني أبقى في البيت لحالي وهو يدري إنه راح يطول في الطلعه فيخليني أروح عندهم...

لمياء بنت البحرين: مشكره حبيبتي على ردك...

بصراحة اعتقد نفس ما يقول المثل(ولدج على ما تربينه وزوجج على ما تعلمينه)
أنتي عودتيه انه ما يساعدج

تدرين إنه كان مره متعاون في أول أسبوعين من العرس وبعدين خلاص ما يرضى يساعدني في ولا شيء..

حاولت معاه قلت له أنا أطلع الصبح وأرجع إذا الدوام في الأيام العاديه الساعه 5 وإذا في رمضان الساعه 2 وأقوم على طول وأطبخ لك يعني ساعدني...

قال لي هذي وظيفة الحرمه ما هي وظيفة الرجال بعدين هذي أمي تشتغل ولا أحد يساعدها وهذي أختي بعد نفس الشيء وقايمين بواجب أزواجهم على أتم وجه ولا قالوا لهم ساعدونا...

قلت له فيه فروق بيني وبينهم... أول شيء هم عندهم خدمات وأنا ما عندي وثاني شيء أنا أشتغل وأصحى من الفجر وهم ما يشتغلون وما يصحون إلا على الساعه 2...

حبيبتي أثير إستقالتي بالعكس أحسها ما بتسوي فيني خير بالعكس الحين أنا أشتغل وشغلتي الكل يتمناها وراتبي في يدي أشتري أي شيء أبغاه و أوفر لمستقبلي... وأنا ما أدري إيش المستقبل مخبي لي...

أحلى قطوه شرحت له الموضوع أكثر من مره بس لو الجدار يسمع هو ما راح يسمع...

تدرون إني أجي أنظف البيت لحالي وهو طبعا قاعد أخلص تنظيف الصاله وهو قاعد فيها أروح الحمامات أنظفها أرجع الصاله مرمي كلينكس في جهه وأوراق في جهه ثانيه والريموت على الأرض والمخاد حق الكنت عند الباب...

أطلع من الحمامات أروح الغرف أنظفها أرجع الحمام مره ثانيه أشوف ملابسه على الأرض... وأتكلم وأتناقش إن إللي تسويه ماهو زين في حقي صراحه أحس نفسي كأني شغاله ما كأنه ما خذني حرمه حقه وهو لا حياة لمن تنادي...

يقول لي لا تنظفين أبدا... خلي البيت يتوسخ ويتوسخ ولا تنظفينه لأني ما أحب أسمع المحاظرات هذي...


أحس مشكلتي عويصه بس ماني عارفه كيف أحلها...

هي فعلا مشكلة

بس الحل في ايدك .... الحين انا اصحى من فجر الله واروح اشتغل وارجع عشان اطبخ وانفخ وانظف ولا فيه تقدير ولا حياة لمن تنادي !!!

خليه يجرب ان البيت يظل مو مرتب والدنيا مقلوبة فوق تحت خليه يشوف هل يرتاح في هالجو .... جربيها ماراح تخسرين شي

بصراحة موقفه اناني جدا ... الوحدة فينا صحيح هي المسؤولة عن البيت ونظافته بس لازم هو يكون له دور لو دوره في الحياة بس انه يروح الدوام ويرجع عشان يرجع يطلع للديوانيات ؟

لازم يساعد في شغل البيت ... على الاقل انتي تطبخي شي خفيف وهو يغسل الصحون

يكنس

يرتب

على الأقل مو انتي تتعبين وهو يرجع يحوس الدنيا ولا فيه تقدير ولا مراعاة للتعب اللي تتعبيه

بصراحة انا حاسة فيك ..... انا مثلك اطلع من البيت الساعة 6 الا ربع وارجع العصر ... احيانا اتضايق من زوجي لمن يشوفني اشتغل وهو كل الي يقوله حبيبتي ارتاحي

حبيبتي لا تتعبين نفسك جاية من الدوام ................ طيب يا أخي قوم ساعدني

بس الشهادة لله اني اذا طلبت منه شي يساعدني على طول ولا يقصر
حالي من حاله هو موظف وانا موظفة خاصة انه يشتغل شفتات ويوم ال weekend عنده غيري ويقدر يسوي شي في هاليوم على الأقل يكنس ويمسح

ساعات اعصب مرة واموت قهر لمن اكون انا مشغولة في الطبخ والتنظيف وهو على الكنبة بس واحط حرتي في الشغل وكل شي ينرفزني خاصة لمن يقول لي انا قلت لك بجيب شغالة ... بس احيانا افكر فيها بعقل هو جاي من الدوام وانا بعد .. هو ماعمره جبرني اني اطبخ او انظف او اشتكى من شي .. ولا جبرني اني ارجع من الدوام وابدل واغسل وادخل المطبخ

من بداية رمضان كل يوم نروح بيت اهلي نفطر .. اسوي شي بسيط معاي واروح ولا يشتكي لانه عارف اني اتعب خاصة اني لا انام بعد رجعتي من الدوام ولا شي

انصحك انك تتفاهمين معاه .. انتوا توكم في بداية المشوار وبعدين راح يتعود ويصير صعب تغيريه ... الزوج له دور كبير في البيت غير انه يشتغل ويصرف على البيت
ولا انصحك تتركين وظيفتك .. خاصة انك حاليا مرتاحة من الأطفال فليش تجلسين في البيت

وقولي له انك تبين ترتاحين في البيت بعد الفطور هو يطلع بكيفه وانتي تفرجي على التلفزيون وبعدين نامي بدري .. انتي مو مجبورة تنامي الساعة 1 الليل وانتي موظفة

الله يعينك بس انا مع الاخت ( ابنك على ماتربيه وزوجك على ماتعوديه ) هو شكله متعود على الكسل في بيت اهله ويفكر المرأة بس للخدمة .. انتي لازم تفهميه العكس وهو يكون شريك معاك في كل شي حتى لو كان دوره بسيط

شجعيه انه يكنس الصالة مثلا .. واشكريه لمدة 5 ايام على خدمته النبيلة يمكن يحس بالتشجيع ويتحمس ويساعدك اكثر

الله يعينج اختي والله ... انا ماقدر استحمل اشوف زوجي مو متعاون معاي... شكله دلووع اسمحي لي..

ليش ما تجيبين شغاله؟؟ وايد احسن لج واريح لج صراحه واذا مانع انج تجيبين شغاله قوليله انت اشتغل معاي خلاص واكيد وقتها ماراح يتكلم ....


الله يساعدج اختي

الصراحة حالتك وايد صعبة، إذا كان زوجك من هالنوع،، حاولي تجلسين معاه أكثر من مرة وتشرحين له الوضع مثل مايقولون (كثر الطق يفج اللحام) يمكن يقتنع في النهاية...

وفكرة الأخت رومي بعد تنفع، أهوه زوجك الحين تعلم على المكان يكون نظيف ومرتب، خلي كل شي مكانه ولا تشيلين ولا تنظفين وراح يكره هالشي وراح يبتدي يساعدك،، شوفي آنه زوجي بعد في أول شهور زواجنه يرمي ثيابه بالغرفة وكل شي معفوس بس من كثر ماحنيت عليه، تعلم الحين يرمي ملابسه بسلة الغسيل ويشيل كل شي ويرجعه مكانه،، يعني السالفة يبي لها شوية طولة بال...


والله يفرجها عليك ويسهل أمورك وبشرينا بالأخبار الزينة...

إللي يقهرني إنه لما يروح بيت أهله وأمه تطبخ أو تسوي أي شيء على طول يناديني ويقول لي بسرعه سوي هذا عن أمي...

يعني يحس إن أمه تتعب لما تطبخ..

وإذا جات تحط الفطور لنا خليه عنك أمي خلاص أنا أحطه عنك... وينادي علي بسرعه حطيه عن أمي....

يعني الزبده إنه عنده إحساس بأمه بس ما عنده إحساس بي أبدا...

بالنسبه إني أخلي البيت يتوسخ.. ما أحب أشوف مكان وسخ... من نفسي على طول أقوم أسوي الأشياء وأشيل وأحط...

وأعدل وأنظف وأغسل... جربتها عشرة أيام ما نظفت شيء في البيت ما تكلم ولا كلمه صحيح ما صار البيت زباله بس فيه وسخ...

بس أنا كرهت الوضع وعلى طول قمت أنظف...

مشكورين خواتي رومي و رانيه البحرينيه و De3LaT_7aBeBY.

خاطري إني كل يوم أفطر في بيت أهلي بس أحس إني داخلي ما يرضى بعد ما قال لي أنا متزوج عشان كل يوم أفطر في مكان...

وأنا أكره إن أحد يمن علي في شيء صراحه...

ليش ما أجيب شغاله؟؟؟ أنا لسه عروسه جديده وأنا معاه عايشين لحالنا ما أحسها تصير عدله إني أجيب وحده تغثني من الحين...

لما أجيب عيال يحلها ألف حلال....

وأنا كمان غيوره كثثثثثثير على زوجي ولا أبغى وحده رايحه جايه لي وكل ما أطلع من الغرفه أشوفها في وجهي...

أو تسوي الحركات المعتاده للشغالات عشان تشذ النظر للرجال....

السلام عليكم و رحمة الله و بركاته

هلا بيكي أختي...

الموضوع محتاج له صبر و طولة بال...من غير محاضرات...لأنهم ما بيحبوها أبدا...

و ما تتعصبي و لا تحرقي دمك...

هذه الأمور بتيجي بالسياسة...تكوني بتقولي له عن شغلك...و إنتي واقفة في المطبخ...قولي له يا حبيبي بس إمسك عني هذه...من غير ما يشعر...

طيب خلاص خلصت الأكل...بس ضع الطبق هذا على السفرة...

يعني بأسلوب ما تخليه يشعر...و صدقيني راح يتغير...

أنا كنت نفس حالتك...بس بالسياسة..كل شيء يمشي...

و مش شرط كل مرة زوجك بيستجيب...بس راح تلاقي تحسن...

من غير ما تكلميه و لا شيء...خلي التغير غير محسوس...

الحياة الزوجية في الأول صعبة جدا....و محتاجة صبر...و كل شيء بيتعدل بعدين...

و بالنسبة للأكل بره...أغلب الأزواج ما يحبوه...بالذات في بيت أهلك...

زوجي مثلا يحب ياكل في البيت...مع إني أرجع بيتي الساعة 2:30...و عندي بنت...بس ما أنام...و أدخل المطبخ علطول و أبدأ أطبخ...و زوجي يروح ينام...

و ما أكلنا في بيت أهلي غير مرتين بس من أول رمضان...و في بيت أهله مرتين كمان...

و كله في البيت عندنا...حتى لو تعبانة...أنا عارفة إنه يرتاح في بيته..خلاص...أجتهد لتحقيق رغبته...

لكن وقتها بعد الإفطار...ما أروح عند أحد...أدخل أنام أو أجلس مع بنتي...لأنه صعب جدا جدا أخرج ...لأني مرهقة من الصبح...

و صدقيني كل هذه الأشياء بتكون ذكريات بعدين...و راح تلاقي الأمور سارت على أفضل ما يكون...

و عليكي بهذا الدعاء ( اللهم اجعل زوجي لي كما أحب...و اجعلني له كما يحب...و اجعلنا لك كما تحب و ترضى )..
:)

مشكوره أختي مرموم...

( اللهم اجعل أزواجنا لنا كما نحب...و اجعلنا لهم كما يحبون...و اجعلنا لك كما تحب و ترضى )..

السلام عليكم 0000000000000000 الله يعينك عليه اكيد كل رجال بنظره هذا شغلنا احنا وبس وهم عليهم طلبات البيت 0000 حاولي تكلمينه بهدؤ وتفهمينه ان اهو له دور في البيت 0000 انا حسيت بلتعب لما رحنا للخارج ماكنت احسب انها متعب شغل البيت الا لما جربت زوجي يقول لي انا ابي اساعدك اول الايام صج كان يساعدني بس الحين قليل 000 لاكن لما اطلب منه مايقصر يساعدني000000000000 انت بيني له تعبك وخليه يحس فيكي 0000 وفهميه ان الحياه تعاون 000000000000 ((((((((( الله يسعدك يا عزيزتي )))))))))))

السلام عليكم و رحمة الله و بركاته

شوفي أختي هذا الموضوع ...فيه نفس مشكلتك...

من هنـــــــــا

الســــــــــلام عليكم ورحمة الله وبركاته

عزيزتــــــــي، حاولي تتكلمين ويا زوجج وتقنعينه إنه على الأقـــل اذا بيوديج بيت اهلج أو بيطلع انه يرجع بدري لأن هذا مش عدل يخليج لوقت متأخر وانتي وراج دوام من الصبح .. .. بس لازم اتصرين على موقفج ، عفواً بالتفاهم طبعاً انا مااطلب منج العصيان بالعكس نحنا نبغي نحل المشكلة باذن الله. وحاولي تتقربين منه أكثر وخذي وعطي وياه في الكلام. وفيه شغلة نسيت اقولها لج.. .. قوليله انه مب حلوه كل يوم والثاني ماخذني لبيت اهلي وتخليني عندهم لوقت متأخر شو بيقولون عنك، يمكن ساعتها بيحس شوي.

وبالنسبة لشغل البيت اذا تم على ما هو عليه طبعاً بالنسبة لج حاولي اتخلصين اللي تقدرين علية والأهم والباجي خلية وقوليلة انج ماقدرتي اتخلصينه كونج تعبانة وصايمة وهو يتحمل النتايج.

والله يحنن قلب زوجـــج عليج يارب.

مشكوره أم خالد
بس فيه نقطه أتوقع إني لو قلتها له بيحط في خاطره علي

(قوليله انه مب حلوه كل يوم والثاني ماخذني لبيت اهلي وتخليني عندهم لوقت متأخر شو بيقولون عنك، يمكن ساعتها بيحس شوي.)

لاتنسوني من الدعاء

الله يعينك اختي

بس تدرين شو الحل

جيبي لك خدامه حتى لو توك عروس

كلنا دخلنا بيونتا والشغالت معنا

بالعكس بتريحك

ومللغيره داعي بصراحه الراحه زينه
بتشتغلين طول اليوم
ومتى تهتمين بزوجك اذا تصحين بدري وطول اليوم شغل وبالليل تعبانه
الشغاله هي الحل المناسب
لان مستحيل زوجك يساعدك في شغل البيت
تمنياتي لك بحياه سعيده

مشاء الله عليكم يابنات :clap:
كلكم شاطرين في شغل البيت
بس معقوله الوحدة لما بتجلس تشتغل طول اليوم بتقدر تتزين لزوجها وتجلس معه وتعطيه من وقتها ؟؟
انا لما كنت عروسة كانت شغالة ام زوجي تجيني دايما تنظف
وشغالة امي تغسل الملابس
انا كنت اطبخ بس ( احيانا )
وزوجي من ايام الخطوبة كان يقولي بجيب لك الشغالة ورفضت بحجة انها بتقلقني في عشنا .. يعني مو حلوة تشاركني بداية حياتي مع زوجي..
بس والله من اول ماولدت جبتها..
صعبة جداً علي اني اهتم بالبيبي واعطي من وقتي لزوجي وفي نفس الوقت اهتم في بيتي :cry:
احياناً ودي انها ماتكون موجودة .. بس احتاجها كثير لاني تعودت عليها خلاص .. ولاني ماتعودت على شغل البيت
اللي بغيت اوصله لك عزيزتي .. ان احيانا الظروف تجبرنا على حاجات ماودنا فيها