قصة من ولادتـــــي ((تجربة بعيدها بعد 9 سنوات))

سلام عليكم يا بنات ويا امهات ويا حوامل


اولا الحمد لله رب العالمين على نعمه وعطاياه الذي رزقني بمولوده اسميتها *آلاء* وهذا فضل من الله


اني كان موعدي 14/9/2005 و هذي اول ولاده ليي

في تاريخ 28/8 حسيت بتعب وبالبيبي ما تتحرك( والدكتورة قالت لي اذا ما تحركت اكثر من 10 مرات لازم اروح الطواريء لأنه مثل ما قلت لكم من قبل ان الماي الي حول الجنين كان قليل) , انزين وهي في هذاك اليوم ما تحركت خير شر من الصبح الى الساعة 11 باليل خفت وقمت ركيض على الطوارىء

وقالت لي الدكتورة لازم ترقدين بالمستشفى علشان ملاحظه وهيلا هب ودوني مستشفى جدحفص ولما وصلت شافتني الدكتورة وقالت لي باجر بنسوي ألترا ساوند وبعد يومين طلق صناعي(لين ادخل 38 اسبوع) وهي قالت جذي واني عيوني ما قدرت اجودها عن الدموع

وبس مشيت الدكتورة الا البيبي تتحرك وظليت الأيام الي قعدتها وبيوم اللي مقرر لي طلق جت الدكتورة الصبح وكشفت على عنق الرحم ووسعتني وبغيت اموت من الألم وحطت لي الطلق الي هو تحميلة الساعة 9.30 الصبح وقالت لي لا تتحركين لساعتين وحطت لي التخطيط وكنت هاديه ونفسيتي مرتاحه لأني طول الليل واني اقرأ القرآن واقول خلها على رب العالمين وهو الي كاتبنه لي بيصير


وظليت راقده لثلاث ساعات ما تحركت وبعدين قررت اقوم امشي وامشي وامشي وجا الم كلش بسيط بالكاد احس فيه ولين صارت الساعة 1 الظهر والألم زاد لحد ما صار الأم يستحمل يعني احس انه عندي الم بس عادي اضحك وامشي واكلت رطب وقلت برتاح اشوي وجات الممرضه وسوت لي حقنه شرجيه علشان بطني يمشي ولما رحت الحمام الله يعزكم جا اسهال قوي وجا الألم القوي معاه وظليت اصيح لحد ما جاتني امي وقعدت معاي وشوي شوي الألم يزيد ويزيد وطلعت عن وعيي وقعدت كل ما جا الألم اصيح ولما ارجع لوعيي اتنفس وامي خذتني وقمت امشي معاها واجود الجدار وظليت امشي لحد خلاص ما قدرت اوقف

وخذتني وجيت على السرير وخلاص الألم صار لا يحتمل وبدا الصراخ امي تهديني بس ما قدرت كل ما تجي الطلقه اصارخ وكان الألم كل 5 دقايق وساعات اقل من 5 دقايق وكنت للحين بالجناح الي تنومت فيه ما اخذوني لغرفة الولاده وشربوني ماي مع نبات وزاد الألم اكثر واكثر وامي نادت الدكتورة وجت وفحصتني وطلعت متوسعه 3 سم وقالت لي خلاص اهدي منوديش داخل(غرفة الولاده) ومنعطيك ابره علشان تنامين وخذوني على الكرسي المتحرك وكانت الساعة 6 المغرب ودخلوني بيت الأشباح خخخ

في بيت الأشباح (غرفة الولاده )

دخلت وظليت قاعده على الكرسي لأنه ماكان فيه سرير فاضي حق ولاده وظليت اتألم بس الألم خف وصار يتأخر شوي وظليت على الكرس نصف ساعة تقريبا ويوم فضى سرير ودوني داخل الغرفه وكنت فيها بروحي وحطولي تخطيط واكسجين ويا المغذي وكل شوي يجون يكتبون في الأوراق ويطلعون واني بروحي اتألم وبعد شوي جت ممرضه وضربتني ابره ما اعرف مالت شنو (الظاهر انها علشان تسرع التوسع لعنق الرحم )** وطبعا صاروا ثلاث ابر** وظليت اطالع الساعة تمر وكل شوي اقول بولد الساعة 7.30 وتمر واقول 8.00 وتمر ..............وفي خلال الألم ظليت ارجع (وراي وراي من اول الحمل لين الولاده حشا مو نساة هذي)

وما عطوني ابرة مخدر حق الألم وظل الألم يزيد ويزيد وقلت خلاص بموت شكلي وكنت اقرأ سورة الزلزله واعدد اسماء الله واتوسل ليه يخلصني لأنه هو الوحيد القادر على انه يخلصني ويسهل عليي


وظلت الساعات تمر لحد الساعة 9.30 زاد الصراخ وجابتلي الأكسجين الي فيه مخدر وقالتلي اخذي نفس وآخذت كم نفس ورحت في عالم ثاني وصرت اهذي اقول كلام مو في محله وشوي إلا اقعد على الألم

وطبعا كنت بروحي بالغرفه محد معاي لا ممرضات ولا دكتوره وأخر مرة قبل ما يختفون قاسو التوسع وكان من4إلى 5 سم وخلاص منها ما شفتهم


وظليت اعاني لحد الساعة 11 إلا حسيت اني قاعده ادفع بدون وصرت خايفه ومو عارفه شنو صاير وكنت بروحي وانادي عليهم ما في احد جا والجرس بعيد عني وكان السرير مرتفع وظليت ادفع وادفع وادفع وحسيت بشيء ثقيل والم وايد تحت وطالعت وشفت شعر وكمت اصارخ من الخوف الحقوني البيبي طلع البيبي طلع ألحــــــــــــقــــــــــــوني وجو ركيض وقالت لي تعالي على جنب السرير وافتح رجلش والمقص في يدها وبدون ابرة المخدر وشييييييييييييييييك ودفعت دفعه قويه وطبعا الصرخه كانت طويله لحد ما طلعت البيبي وكحت وابتسمت وخلاص كلشي تبخر بس شيء خفيف من الألم وأخذوها وحطوها على بطني شوي وكان لونها بنفسجي وقالولي بنت بنت واخذوها وولدت الساعة 11.30 في الليل والساعة 12 إلا ربع وعقب ما طلعت البلاوي الي داخل ونظفت قامت تخيط وبدون ابره مخدر واقول في بالي ليش ما عطوني ابره ليش ليش أخ أي أخ أخ أيييي وهي تقول لي في الم اقول ليها اي واجد تقول لي خلاص شوي وخلاص (كانت فلبينيه) وهي الي ولدتني وكملت وخذوني علشان امي وزوجي يشوفوني وما طلعت من غرفة الولاده إلا الساعه 4 الفجر

والحمد لله بعد تعب تسع شهور من الآلام والترجيع عندي هالحلوه البنوته ضحكتها تسوا الدنيا وتستاهل تعبتي عليها الله يحفظها يارب ويرزق الجميع الذريه الصالحه ويقوم كل الحوامل بوقتهم ويسهل عليهم يارب



وخلاص ............ يلا عقب 9 سنين بقول لكم قصة ولادتي الثانيه