أيتها العاملات ...... كيف أحوالكم ؟؟؟

اختي ريم الله يكون في عونك

انا حالي حالك موظفة بس صار لي فترة اطول من تزوجت للحين ما عندي اطفال فالمفروض ان حياتنا تكون مرتبة ومنظمة

اختي الزوج على ما تعوديه يعني انتي لو عودتيه انه لازم يساعدك في الترتيب أو على الأقل ما يسوي فوضى راح ترتاحين شوي

انا بعد اتعب من الدوام لأنه طويل بس الحمدلله قادرة احافظ على بيتي نظيف ومرتب طول الوقت ... انا اجيب شغالة امي عشان ترتيب الملابس وتنظيف بسيط كل اسبوع ... وطالبة من زوجي انه يساعدني لان البيت مو بس بيتي لوحدي وانا موظفة حالي حاله

صحيح احيانا ينسى او يستكسل عن المساعدة بس انا اذكره من وقت للثاني بطريقة لطيفة .. وما انسى اشكره على المساعدة عشان يتشجع ويساعدني

انتي قولي لزوجك كيف تبغاني انظف البيت ويظف مرتب على طول انت ترمي ملابس في كل مكان مثلا ؟؟؟

بعدين اذا ما ساعدتني ورجعت من الدوام بس عشان انظف وارتب شلون بتظل فيني طاقة اجلس واسولف معاك ؟؟؟

لازم النظام يكون شعاركم .. انا طول ايام الاسبوع مافيه سهر .. بس ارجع من الدوام ارتاح شوي وبعدين اطلع مع زوجي شوي نروح كافيه لو نتمشى شوي او سوق والسهر يكون يوم الاجازة بس ... والحمدلله صار لي سنة وتسعة شهور وكم يوم واحنا ماشيين على هالنظام وان شاء الله بيساعدني اكثر في رمضان ... اصلا الوحدة ما تقدر تمشي بيت لوحدها حتى لو كان صغير خاصة ان معظمنا كنا مانسوي شي في بيوت اهالينا ولا متعودين على الشغل

بمساعدة بسيطة منه وبوجود شغالة Part time للشغلات الكبيرة راح يظل بيتك مرتب ووقتك الفاضي اكثر ... بس اهم شي يساعدك

اختي

و د الإمارات

خوش أفكار و الله

بالنسبة للفكرة واحد ما أقدر للأسف اطبقها لأن المكان إللي اشتغل فيه ما يوافق

و اافكرة 2 ما اريد اكون ثقيله على أحد

أما بالنسبة للأفكار الباقية بصراحة روعة

و ممكن تتناسب مع ريلي لأنه عنيد

مشكورة الغالية

مرموم الغالية

و أولا الله يكون في عونك يعني حالي ملخبط و انا ما عندي لسة أطفال

إللي عندهم أطفال الله يكون بعونهم

أوافقك ان افكر الأخت ود الامارات مناسبة

و انا فعلا بدأت ابحث عن وحدة بالساعات مرة و لا مرتين في الأسبوع

um hamdan

وي

حالتج كانت صعبة الحمد لله انها عدت على خير

رووووووووومي الأنيقة المرتبة

أصلا بدونما تقولين انا متأكدة انه بيتج مرتب

كيف لا و انت ما شاء الله عن مشاركاتج و افكارج في قسم الديكور !!!

ما شاء الله

االله يتتم عليج هدوء بالج و يرزقنا جميعا

والله أنا أعاني من نفس المشكلة.. بس أنا أداوم و أدرس 3 أيام في الأسبوع.. تلاقيني طالعة من الساعة 6 الصبح و أوصل 8 في الليل!! بس الحمدلله الغداء والعشاء أهله متكفلين فيهم و ساعات هو يوم يرجع اييب وياه عشاء.. تنظيف البيت مرة في الأسبوع لأنه ما يحب أن البشاكير يدخلن الملحق الا اذا حد وياهن.. بس عموما أحول اني أستغل الوقت في التنظيف.. يعني أذا الدنيا لااااااااااااااااااااايثة و ماشي وقت أرتب و هو برع بس بسرعة بسرعة ألايي الأغراض في الكبتات عشان ما يشوف اللوث!! أهم شي من أحصل وقت أولع الدخزن و أخلي الملحق كله يدخن.. لأنه من يشم الريحة يعرف اني سويت شي و رتبت.. عندي كواية بخار فمرتين في الأسبوع أيمع العبي والثياب و أكويهم بسرعة..من أول ما عرسنا ما حاولت اعامله كأني زوجه من واجبي أخدمه.. صراحه كان مبدئي مبدأ الأجانب أنا وانت متساوين.. أنا أخدمك و أنت تخدمني.. أول الأيام خاصة بهدلته في موضوع الحمام و النظافة.. ما أخليه يوصخ شي!! و هو أصلا طبعه نظيف ما شاء الله فتعود على أسلوبي.. و أنا تعودت اني ما أفرفر أغراضي كل مكان مثل ما كنت متعوده... عشان جي حاولي توضحين له انج بشر ما تقدرين تسوين كل شي.. لازم هو بعد يتفهم و على الأقل ينظف وراه و يراعيج..
يا ريت تجربتي فادتج :)

مش متزوجة بس ادرس
وادعيلج الله ايسهل عليج اختي

أختي meaw

فكرة ان في ايام العطل احاوزل اسوي شي ( اكل ، لبس جديد ) حلوة :)

مشكورة

الأخت deeeb

مشكورة على الدعوة ( اللهم آمين ) و لك مثل ما ذكرت

الله يساعدك اختي أنتي توك عروس وما عندك هذيك الألتزامات الكبيرة من عيال وغيرها عيل لو تشوفيني أنا صدقيني بتهون مشكلتك .
شغالتي العزيزة ما نقت اتسافر غير الحين من أسبوعين وأحنا داخل علينا رمضان وانا دوام من الصبح لحد الظهر وعندي طفلين أكبرهم عمرها 3 سنوات وواصغرهم سنه و7 شهور بيت طابقين وكبير تخيلي شغل البيت من طبخ وغسيل وتنظيف كله فوق راسي وشغالاات مؤقتات مافيه دورت لحد ما دار راسي. تخيلي كلي يوم انام الساعة 12 قبلها طبعا مافي راحة من ردتي من الدوام على طول خم ومسح لأن أرضية البيت رخام يحتاج لها عناية وغرفة التيلفزيون فيها كربت فيبالها كنس بالمكنسة وغسيل الملابس يوم ورا يوم واليوم اللي مافيه غسيل يكون فيه كوي . يعني حالتي حاله الله يعينا هذا غير المطبخ وشغله وغير ربشة اليهال ماشاءالله ولدي من النوع الفوضوي واللي يحب يستكشف كل شي بطريقة ما تتصوريها .

هوني عن نفسك حبيبتي ترا كلنا أنعاني بس شو نسوي بغينا نتزوج ونصير أمهات وربات بيوت ولا بعد نساء عاملات وصدقيني ولا اللي جالسات في البيت مرتاحات ترا شغل البيت ويهال مرهق لكل وحده منا .

هلا الغالية...


والله انا مب متزوجه.. ولكـــــن فكرت لو مريت بهالموقف شو بسوي..

تعرفين شو خطر في بالي... اولا زهبي ثياب ريلج اللي بيلبسها على الطاولة او السرير قبل لا تطلعين .. عشان مايفتح الكبت و يعفس الدنيا... واول ماترجعين.. رحي ربع ساعه.. على الاقل... بعدها.. ممكن ترتبين شوي البيت.. يعني تنظيف البيت كل يومين..

وسوي شرات خواتنا مايسوون.. يعني يثلجون الاشياء للاستخدام السريع..
مثل السمبوسه والشوربات.. وهالاشياء. والحمدلله بلادنا فيها اشياء كثيرة جاهزه يا دووووب سخنيها و اكليها.. وتراها صحية اكثر من الاكل اللي نسويه..

يعني ممكن تسوين لريلج عشاء معتبر..

وعندج الخميس والجمعة.. ممكن تيبين خدامة من بيت اهلج او اهله.. وتساعدج وانت ارتاحي..
او انتي وخواتج.. ممكن تتساعدووون.. وتشتغلون وانتوا تضحكوووووووووون.. وصدقيني هذا بيخفف وايد من معاناتج

اتمنى اني افدتج.. وتحياتي لج

أختي أم أنوار

الله يخليج عيالج و يبارك فيهم

بس بصراحة الله يعينك ، كل شي فوق راسك

الحمد لله على كل حال ، ان شاء الله كلنا ننال الأجر و الثواب من بعد التعب


الأخت خواطر ان شاء الله ترزقين بالزوج الصالح و امورج طكلها تكون تمام

خواتي

اشكركم على نصائحكم و تعاونكم معي

وأنا حبيت أطمنكم عني بالنسبة لهالموضوع مثل ما أتفقنا و يا أنجل أيز و مرموم و باقي الخوات

أولا الحمد تكلمت مع ريلي و تحينت ساعة صفا

و قلتله أنه يعطيني فرصة انظم اموري و وافق

على أن أترك العمل أذا ما استطعت التوفيق

و الحين استعنت بوحدة بنظام الساعات تجيني مرة كل أسبوع و بحاول أييبها أكثر

لسة اموري ما تنظمت

بس ادعولي الله يوفقني

و شكرا مرة أخرى لكن جميعا و جزاكن كل خير :)

الحمد لله حبيبتي..الله يوفقج ان شاء الله..و شوي شوي راح تحصلين امورج تعتدل ...كلنا كنا شراتج :)