تشوفوني غلطــانه ..؟؟!!!

العين الساحره

تعلمت أرضى واقتنع بعيشتي مهما كان الحاصل لي في هالدنيا وصدقيني ماقول غير الحمدلله على كل حال

تسلمين الغاليه



عاشقة الجوري 50

تسلم لي نظرتج يالشيخه ويعطيج العافيه على مرورج الكريم
الله يثبتنا وياج على الطاعه اختي ويسهل امور الجميع امين
تسلمين على كلامج ودعواتج الطيبه ويزاج الله الف خير




Memaya

سبحان الله كل شي وله حكمه والله اعلم الجميع والحمدلله على كل حال

تسلمين الشيخه وربي لا هانج



أم أسووله

تسلمين الغلا على احساسج الطيب فيني
والله يعينا وياج ويثبتنا على الطاعه امين

مادري..اصابعي عاجزه عن كتابه اي تعليق..:(

ماعرف شقول حبيبتي...

الله يعينج...بس دوم حطي في بالج شي واحد...اللي صار مكتوب لج من قبل ما تنولدين...ومكتوب على ولد عمج بعد...ما في شي في ايدكم تسوونه...وتذكري دوم..ان ريلج المسكين ماله ذنب في اي شي..وهذا هو القدر...اللي لازم تستسلمين له ..والله بيعوضكم خير

لب لفواد

ما ادري اذا كنت مستانسه لان فيه حد قادر يفهم احساسي على طبيعته او اني زعلانه لاني ما تمنيت احد يكون مكاني او عايش على الاقل هالشعور الصعب في يوم ابد

مثل ما قلتي الشيخه كل شي صار والحمدلله على كل حال والواحد لازم يرضى في النهايه ولو ما كان برغبته يغصب عمره ويتعلم .. وهذا اللي انا احاول فيه كل هالسنين وما زلت ..

الله يهون عليج الشيخه ويعينا وياج ويكتب لنا الخيره في الدنيا والاخره امين



^^روز^^

انا راضيه يالغاليه وادري وهو بنفسه يدري ان كل اللي صار خيره لي وله والحمدلله ..
لكــن ولو كان العقل مقتنع بالواقع يبقى القلب عايش على ذكراه ..
قربه مني في بعض الايام واقصد لما يرجع للبلاد وانا اكون عند اهلي ولو ما اشوفه الا من ورا الدريشه وهو طالع او داخل يخليني اذكره غصبن عني او حتى يوم اسمع صوته يلاعب عيالي وياخذهم وياه يذكرني بأيام طفولتي معاه .. احس ان الماضي يعيد نفسه مع عيالي ..
واحس انه يشوفني في عيونهم ..

والمقارنه كثر ما احاول اشيلها من بالي ما اقدر والله
غصبن عني احس اني اقعد اقارن بين الاثنين وهالشي كان وااايد متعبني في حياتي قبل لكن الحين خف هالتعب شوي لاني خلاص تعودت وعرفت الفرق بين الاثنين ..
مهما كان في النهايه انا لزوجي واخلاصي وحناني مستحيل اعطيهم لاحد غيره

تسلمين الغلا والله يوفقج دنيا واخره امين

ماقدر اعلق ع كلامج موووووووووووووول ..

بس والله اني دعيت لج من قلبي :) ..

سوي استخاره .. في كل شي استخيري ربج .. وان شاء الله بتنسين ..

السمووووووحه ..

والله عورتي قلبي قصتج وااايد مؤثره :(

الله يعينج ويعينه ويصبركم والحمدلله على كل حال

واحسن حل انكم تقنعونه انه يتزوج حتى لو انتي تكلمينه

لأنج اقرب وحده له واكييد بيسمع لج ..

دلوعه زوجها2005

تسلمين الشيخه وكلامج كله على العين والراس ..
الله يحفظنا من الوساوس ويصبرنا ويعوضنا كل خير ان شاء الله

يعطيج العافيه الغلا والله يحفظج


n3nooo3aa

الله لا يراويج الا كل خير وسامحيني على دموعج الشيخه

يعينا ويصبرنا ويحفظنا وياج من كل شر امين

تسملين



gonson

اشكرج الغاليه والله اني من الضيقه اللي فيني كل هالسنين حسيت بنفسي ما اقدر اصبر اكثر وابغي ابوح لحد باللي في قلبي ..
الحمدلله على كل حال والقصه انتهت من زمان لكن أثرها هو اللي باقي ومب طايع يروح ..
هذا وانا متزوجه وعندي عيال كيف هو عيل الوحيد اللي ذابح نفسه في شغله والله اعلم بهمه وضيقه ..
البنت تقدر تبوح وتخفف على عمرها لكن الريال صعب وايد صعب خااصه هو ..
الله يوفقج الشيخه ويحفظج من كل شر وينولج كل اللي تتمنيه ويكون فيه خيره لج امين

الله يعينج اختي والصراحه قصتج وايد مؤثره وخاصه انج ماعندج خوات تشكين لهم بس ولا يهمج احنا خواتج
وترى هاي النصيب المكتوب لج
والله يهنيج ويهني ولد عمج ان شاء الله

7abeebty wallahi qi99tik ma bat7ammaluh .....bte3refee a7iss anooh nafsiyytee ta3bat bimujarrad ilqi99ah

bas na9ee7ah laki min u5t ilik.....ma t5alli ishshee6an yel3ab birasik....wa lazim tenseeh '3a9ban 3annik..

Rabbna a36aki zoujik 7alal lik t7ebbeeh ma troo7i tdawwree 3al mashakel....please inseeh

mujarrad i7sas annik te7ibbeeh '3ala6

l id3ee ktheer wa qoomee billeil wa u6lubee min Rabbna innoh tenseeh wa yzawwjoh bi bint il7alal>>>> Inshallah il7all bitkoon lamma yetjawwaz huwwe....

Ma 7ad iloh qudrah 3a inqazik min illi inte feeh illa Rabbna....((Wa qala Rabbukumud 3oonee astajib lakum)) ma tay'asee wa id3ee......Rabbna by3eenik yal '3aliyeh

wa in qult shee' '3ala6 fahuwa min ishshee6an wa99ab min Rabbil 3alameen

u5tukum Salsabeel

من بدايه الموضوع حسيت انه يحبك ويموت فيك
وخصوصاً لما كان يقول

عرسنا بنفس الليله وتكاليف عرسك كلها علي

يعني واضحه وضوح الشمس .............
لكن سبحان الله النصيب يصيب

عالعموم الله يوفقك ويسعدك مع زوجك ولد عمتك
وعسى ان تكرهوا شيء خيراً لكم

[grade="FF1493 8B0000 FF1493 8B0000"]
أهلا أختي هذي أنا،إتعرفين لما أقرى قصتج كأني أقرى قصة من القصص الحزينة

وبالفعل قصتج مؤثرة..

لكن أنا عندي فكرة ألا وهي ليش النظر للقصة من خلال هالمنظور المأساوي،إرجعي شوي

في تفكيرج للماضي،لما اعترف لج بعد ماملجتي،بالمشاعر إتجاهج،صراحة هنيه كان الفاصل

الحقيقي كان لازم يشوف حل،وإنتي بعد كان لازم تشوفين حل للموضوع،المسألة من البداية كانت

تحتاج تفكير عميق،شو الفايدة تبتعدين عنه،والنتيجة ضيق وحزن طول العمر..الواحد يا إختي

يبذل بالأسباب قلتي إن أهلج وافقوا لولد عمتج،حتى ماخذوا رايج،واعتقد انهم كانوا يشوفونج

راضية ومستحية.. لكن من البداية أختي حتى لو صارت الملجة،كان لازم تكلمين الأهل وتخبرينهم

إنج مو مرتاحة وتريدين الانفصال قبل الزواج،مافيها شي أختي كل شي قسمة ونصيب،حتى

ولد عمج غلطته إنه ماخذ موقف حاسم..

أنا ما ألومج بعد هالسنين،خلاص اللي صار صار وكل شي قسمة ونصيب...وبالفعل لو فكرنا شوي

بنشوف إن ولد عمج أنسب لج تدرين ليش لأنه ربج كاتبنه لج والدليل حياتكم ماشية وبطريقة مقبولة

لو ماقلنا ممتازة..

نرجع لولد عمج،يمكن من نعمة رب العالمين انه ماتزوجج،إتعرفين ليش،تتذكرين يوم قلتي انه ظل

سنييين طويلة ماتزوج.. بعد ما تزوجت اللي يريدها،هذا يدل انه شخصية حساسة جدا،وهالنوع من

الشخصيات على فكرة وايد صعب صح طيب وحنون لكن يمكن ما يكون الزوج المناسب،وانتي

بنفسج ذكرتي انه حساس جدا...الشي الثاني اللي أريد أقوله لج،إنه نظرتج المثالية له،ناتجة عن

طريقة تعامله معاج من كنتي صغيرة،الفرق في العمر والنظر اليه كالأب الروحي والحنان والدلع

والتفهم لمشاكلج،وطبيعي راح يعاملج جذيه لأنج في نظره كنتي الصغيرة اللي تحتاج لمعاملة

معينة،لكن لو كان يتعامل مع وحدة كبيرة طبيعي الطريقة راح تختلف،لذلك لا تقارنين نقاشج مع

زوجج بنقاشج مع ولد عمج،لأن الفارق العمري بينج وبين زوجج بسيط،وطريقة تفكيركم

متشابهه،فلما تغلطين أو تختلفين معاه ماراح يتفهمج مثل أي شخص أكبر منج وايد في العمر..

أختي إسمحيلي طولت عليج لكن لازم نفكر في شي جدا مهم،رب العالمين ماخلقنا في هالدنيا

عشان نعاني ونعيش بحزن وضيق..لازم أي مشكلة نمر فيها يكون شعارنا الرضا بما كتب الله،هذا

المكتوب ليش نزعل،والحمدلله على كل حال،الأمر الثاني لازم تتأقلمين مع الوضع،عشان زوجج

وعيالج،صدقيني هم الحياة الحقيقية،أي نعم عندج ذكرى جميلة لولد عمج،لكن أهم شي لازم

إنعرفه مش كل شي جميل لو عايشناه راح يكون بنفس الصورة الجميلة والمثالية اللي تمنيناها،لا

تتحسرين يالغالية يمكن لو كنتي تزوجتيه،يمكن ماراح تكونين سعيدة..

السعادة الحقيقية هي أسرتج الصغيرة...تكمن في عيون عيالج،ونظرة رضا من زوجج..

والله يرزق ولد عمج بالزوجة الصالحة،ماتدرين يمكن يفكر بالزواج بعد ماكان ناسي الفكرة تماما..

الله يوفقج يارب،آمين

في أمان الله[/grade]

وعسى أن تكرهو شيئا وهو خير لكم / ما تدرين يمكن هذي صلاح من رب العالمين الله يهديج ويوفقج مع زوجك وأولادك

ما احلاه من واقع

الحب جميل ولكن للي يعرفه

كنت اتمنى تكون النهايه حلوه مثل مابتديتي فيها

بس اطوي الماضي كذكرى جميله

وانظري للمستقبل وتغني بحب زوجكي

حتى تكوني مخلصه له

فهناك اناس كثيرون احبوا ولكن منهم من نالوا مبتغاهم ومنهم من لم ينالوا ذلك الحب ليدخل مرحله الذكرى

وفقكي الله

عمري و الله الله يعلم انج قطعتي قلبي

حبيبة قلبي ،، ما عندي أكثر من اللي قالو لج الخوات الله يجازيهم خير ،، لكن بقول لج قصة اختي يعني مع قليل من الاختلافات و لكنها مشابة

اختي الله عطاها جمال و الحمد لله ،، و نفس الشي كان يونها خطاب و كانت ترفضهم ،، في هالفترة كانت علاقتها ببنات عمتي جدا قوية و كانت على طول في بيت عمتي ،، و تنام وياهم ،، و علاقتها قوية مع اولاد عمتي و تدرس وياهم ،، و كانت تميل بمشاعر تجاه ولد عمتي بس طبعا ما كانت تقدر تصرح ،،و حتى عمتي تموت عليها لدرجة ما تتخيلونها ،، المهم بعد ما خلصت اخي الجامعة و اشتغلت صارو يخطبونها أكثر ،، و مع الوقت امي صارت تلح عليها ان حرام اللي قاعدة تسويه ،، و جاها ولد محترم و من عائلة زينة و ما بنعاب فوافقت عليه ،،

المهم ان عمتي و ولد عمتي لما درو بالخبر انصدموا و احنا انصدمنا بعد ،، لان عمتي كانت تبي تخطب اختي حق ولدها ،،

لي الحين اتدكر ان عمتي سافرت ما حضرت الملجة و لا الخطوبة ،، هي ما كانت زعلانة بس ما تقدر تجوف اختي يزفونها لواحد غير ،،

هدي السالفة مر عليها جم سنة ،، بس اختي ما قطعت بيت عمتي ،، بالعكس تمت تزورهم ،، عرفت زوجها على ولد عمتي ،، يعني مو مثلج قطلعتي العلاقة اللي صار لها سنوات ( فجأة ) عشان جدي لي الحين تدكرين بس لو خليتيها للأيام ترى بروحها بتشغلج و اليهال بياخدون وقتج ،،

عمري اختي الحين علاقتها مازالت قوية و عمتي لي الحين تحب اختي وايد ( و تحبني آنة بعد ) <============

نصيحة مني ( انتي تحبينه و تحبين له الخير ) بس بعد تحبين ربج ونفسج أكثر و أكثر حاولي تشغلين وقتج و لا تخلين عندج وقت فراغ عشان لا تفكرين

الله يوفقج و يسعدج دنيا و آخرة

تحياتي

الله يصبرج انشالله ويجزاج خير على صبرج

بس حبيبتي المقارنه بين زوجج وولد عمج هروب من الواقع (الحياة فيها الحلو والمر وولدعمج
ماعاش معاج زوجه. تتوقعين لو عاش معاج كزوجه راح يكون الوضع على ماهو عليه اكيد
بتكون بينكم مشاكل مثل اي زواج عادي (وحتى زواج الحب فيه مشاكل وايد )) حاولي تعيشي
واقعج واللي صار صار وخلص

وفي سبب ثاني يخليج اتفكرين بولد عمج احساسج بالذنب ناحيته وهذا اللي حسيته من كلامج
(واحساسج بالغيره لمجرد التفكير انه بيتزوج وحده ثانيه لانج تخافين تفقدين الهروب
وتكونين دايما بالواقع ) وحلج انج اتخلينه يتزوج ولو انج توصليله رساله تقولين له
( ما اقدر اعيش وانا حاسه اني السبب بتعاستك احس بالم شديد واحتمال اكلم اهلي
واقولهم السالفه اذا انت ما تزوجت (مجرد تهديد له )) لانه حلج الوحيد انه يتزوج
ويعيش حياته مثل باقي الناس


واسفه اختي اني طولت عليج وتفلسفت وايد على راسج
لانج لو تحبينه صج جن صارت العيشه مع ريلج مستحيله واللي انا اشوفه انج تحبين ريلج حييييييييييييييييييييييييييل والله يخليه لج ويهنيكم انشالله

واسفه مره ثانيه وتذكري الايه
وَعَسَى أَن تَكْرَهُواْ شَيْئاً وَهُوَ خَيْرٌ لَّكُمْ وَعَسَى أَن تُحِبُّواْ شَيْئاً وَهُوَ شَرٌّ لَّكُمْ وَاللّهُ يَعْلَمُ وَأَنتُمْ لاَ تَعْلَمُونَ }البقرة216

Jokanda

الله يعين اليميع على الطاعه امين
تسلمين يالشيخه وانا محتسبه لربي والله كريم
يزاج الله الف خير


البستكيه

ما يحتاي تدمع عيونج يالشيخه
كلها مجرد قصه مرت احداثها في زمنها وانتهت
وان شاء الله ما تلقين في حياتج الا الشي اللي يسعدج دنيا واخره امين
تسلمين الغاليه



angel eyes
يعطيج العافيه يالغلا على كلامج الطيب
كل اللي قلتيه عقلي حاس فيه وفاهمنه ..
صدقيني احب زوجي وما اتمنى لي وياه الا كل خير ..
وان شاء الله الزمن بيكون كفيل انه ينسينا اللي راح والسالفه مب محتايه الا لشويه صبر ..

تسلمين الغاليه والله يحفظج لاهلج امين

الامـــارات

دعائج لي يكفيني يالغلا
ومافيه شي في الدنيا احسن من الدعاء لانسان في ظهر الغيب
تسلمين حبيبتي والف شكر لج على مشاعرج الطيبه

الله يحفظج يارب



~"مناير الكويت"~

الله يسلم لج قلبج امين وسامحيني ما كنت ابا لكم الضيقه معايه
الغاليه ولد عمي انسان كبير فاهم وعاقل والمشكله انه ما يبا حد يتدخل في حياته ابد خاصه من ناحيه الزواج .. وانا حاولت فيه وطرشت له اكثر من شخص لكن بلا نتيجه ..
لو تشوفين مرت عمي حالتها بتكسر خاطرج وهي تحاول فيه لكن ماشي فايده
الله يهديه ويوفقه باقي حياته امين
اشكرج على مرورج وتسلمين الغلا والله يوفقج دنيا واخره امين

السلام عليكم
قلبي وياك حبيبتي ........والله قطعتي قلبي وحاااااااسه فيك.....بس والله انك انسانه عاقله وفاهمه .....لأنك احترمتي زوجك وقدرتيه
لأنه يستاهل :smile:
الله يوفقك مع زوجك وصدقيني يمكن لو تزوجتي ولد عمك ماتحسين بالراحه اللي انتي حاسه فيها مع زوجك .....والله أعلم .......وأهم شي انك تشغلين وقت فراغك ياقلبي ....والله يحفظك ويوفقك ويفرج همك ياااااااااااارب
الله يوفقك دنيا وآخره حبيبتي
اختك
لمو

نبـــــع الكوثر

تسلمين يالشيخه وعطاج ربي الف عافيه على مشاعرج الطيبه
صح كنت اتمنى لو تكون لي اخت اكبر عني تنصحني وتوجهني لكن بعد الحمدلله عندي اخوان على الاقل واحبهم ويحبوني وهاي روحها نعمة من رب العالمين
كلنا خوات هنا مثل ما قلتي والله ينولج كل اللي في خاطرج يا رب



salsabeel

مشكورة الغاليه على النصيحه وصدقيني لي ديني وعقلي والتزاماتي اللي تخليني ابعد اي تفكير بالغلط من راسي ..
قلت قبل انا بعقلي اختار زوجي لكن قلبي للحين للاسف ما يطاوعني بس ان شاء الله مع الزمن كل شي يتغير والله اعلم بالحال بعدين ..

الله يحفظج يالشيخه ويرزقج كل خير دنيا واخره امين

* ْ * عبير الورد * ْ *

كل شي كان واضح بس ...!!!!! الله اعلم باللي كان في الخاطر وقتها ..
الله يوفقنا وياج الشيخه وعساه يرزقج بكل خير دنيا واخره
تسلمين يالغلا




أميرة البجع

هلا الشيخه فكرت وايد في كلامج وراحت افكاري لبعيد معاه غصبن عني ..
بالنسبه لموقفي وموقف ولد عمي قبل الملجه او حتى بعد الملجه ..
صدقيني يالشيخه نحن في عايلتنا كلمة طلاق شيليها من راسج ولو شو ما كانت الظروف فما بالج ان زوجي هو ولد عمتيه ومافيه اي عيب اقدر ارده عشانه !!!!!!!!
تعتقدين ان اهلي بيسمعون كلامي وبيقولون خلاص ما تبينه بنطلقج منه .. صدقيني مستحيل
حتى انا بنفسي كلمة طلاق ما احب اتنطق بها كيف تظنين اني اقدر اعيش في واقعها وانا اكره مجرد الكلمة وما اييبها على لساني حتى ولو كنت ضامنه زواجي من ولد عمي ؟؟!!..
انا قلت قبل اني كنت راضيه في ولد عمتي رغم ان الاقتناع ما كان كامل فيه عشان ابويه واهلي
واصلا حتى لو كنت رافضه ما فيه شي بيغير من الواقع لاني اعرف اهلي ..
يمكن غلطتي كانت اني ما وضحت لولد عمي وقتها اني مب مرتاحه عدل واني احس بشي من هالقبيل وغلطته هو انه اكتفى بسؤال واحد وتحليل من عنده اني ما افتكر فيه كزوج ..الله اعلم

فعلا ولد عمتي زوج مناسب لي وحياتي معاه ماشيه بصوره حلوه صدقيني بس انا ابغي اكون كلي له مب بس مجرد احساس بالراحه والرضا فيه .. ابغي احس باخلاصي في الحب له ومابغي شي من الماضي يحسسني اني اخونه لو بمجرد فكره عابره تمر في بالي عن ولد عمي ..

بالنسبه لولد عمي فهو حساس نعم ووايد بعد لكن فيه ناس يالغاليه قادرين انهم يحكمون احاسيسهم ويعيشون مرتاحين لو كان رضاهم واقتناعهم باللي جدامهم كامل او شبه كامل ..
هو يمكن ما كان بيكون لي الزوج المثالي ويمكن معاه ما بقدر اعيش بالسعاده اللي عايشتنها الحين ويمكن مثل ما قلتي تعامله معايه قبل بيفرق عن تعامله لي بعد الزواج ويمكن اشيا وايد تتغير بعد .. وانا ما بقولج اني ما احاول اقنع نفسي بكل هالكلام لان مالي غير هالشي الوحيد اللي احاول به اغير كل اللي في قلبي صوبه ..
انا ادري ان الله يوم كتب لي نصيبي مع ولد عمتي راد لي الخيره والافضليه وحتى ولد عمي يعرف هالشي وانا مب عايشه حزينه طول حياتي ولا مستانسه بعد دوم لكن حالي متفاوت بين هذا وهذا شرات كل البشر ..
انا بس ابغي قلبي يشارك عقلي واخلص بكل ما فيني حتى بتفكيري لزوجي وادري انج فهمتيني وادري ان حياتي هي بيتي وعيالي وزوجي والحمدلله احب زوجي وهالشي روحه يأكد لي اني بنسى لكن متى .. الله كريم ..

الغاليه مشكووووره واايد على كلامج .. تفكيرج حلو وعقليتج متفتحه وايد
الله يوفقج ويخليج لغاليج ويرزقج باللي فيه خيره لج امين
السموحه طولت عليج والله يحفظج

الغالية22


اكيد صلاح من رب العالمين ..
تسلمين على دعواتج الطيبه والله يحفظج ويوفقج يا رب


العين الزرقاء

الحمدلله على كل حال الشيخه
والله له حكمه من كل هذا وانا راضيه بحكمته

تسلمين يالغلا والله يسعدج دوم يا رب ويكتب لج الخير في كل خطوة امين