تعالوا قولوا لي رايكم ......بصراحة

مرحبا اخواتي الكريمات

بحاول اجاوب لكم على السؤال اللي محيرنكم ،، وانشاء الله تقتنعون
هل قرأتم مرة او علمتم ان المرأة احتمالها للتعب النفسي اكبر من احتمال الرجل ؟
وان الرجل احتماله البدني اكبر من احتمال المرأة ؟

ضعي نفسك في محله :
طول السنة وهو يعمل ويشتغل ويلف ويدور ؟
العمل - البيت - الزوجة - الاولاد - الاهل - السيارة - الجمعية - المدارس - الطلبات - الخدم - المصاريف - الفواتير - العمل الحر -الالتزامات ،،
هذا كله يسبب تعب نفسي للرجل ،، ويتمنى انه لو يتخلص منه ويرتاح ولو لمدة بسيطة

هنا يأتي تفكيره بالسفر لوحده لا لشيء الا للراحة والاستجمام
يعني يا سيدتي الفاضلة لو انه سافر معك او مع الاولاد لن يجد هذه الراحة
ستكون نفس الاعباء الا وهي المسئولية
الزوجة - الاولاد - المصاريف - الطلبات ،،
يعني ما بيتغير شيء من حياته ،، انما السفر بمفرده لن يحمله هما غير همه ومسئولية نفسه
بعد عناء هذه المده وخاصة في ظروف الحياة الحالية والضغوطات ، يتمنى الانسان لو يحصل على اجازة من كل شيء ولو لمدة قصيرة

اختي الكريمة
اتمنى اني استطعت ان اوصل وجهة نظري بشكل صحيح
لا تزعلين اذا سافر لوحده ،، بالعكس يمكن هذا الشيء يقربه منك بدون ما تشعرين
مو كل واحد يسافر لوحده بالضرورة انه يرتكب خطأ او غلط
مرات الوحده والابتعاد عن الجو المحيط بك يجعلك تفكر وتعتيد ترتيب حياتك بشكل افضل
ثقي فيه مثل ما تثقين بنفسك
واصبري ان الله مع الصابرين ،، والله بيعوضك خير عن صبرك

اختي الكريمة
اعلم انك بتقولين والمرأة ما تبغي تاخذ اجازة وترتاح ؟؟
نعم ،، ومن حقها الاجازة ومن حقها ترتاح ، بس المرأة راحتها في بيتها ،،
وسفرها بدون اولادها قلق لها وهموم وتفكير ،،
يعني اجازتها في بيتها وبين اولادها ،، خاصة ان الوظيفة حارمتنها من رؤية اولادها والقرب منهم
فيا عزيزتي لا تزيدين نفسك تعب وهموم وتقعدين تفكرين في
سفر زوجك لوحده
اوجدي له العذر وبعدها بتحصلين الاجابة الشافية للسؤال

تحياتي لكم جميعا

اسمحي لي اختي نجلا دبي استغربت من قولك


اشجعه عشان يستغرب تصرفي ويشك فيه وهو بنفسه يغير رأيه ويلغي السفر ؟؟
لانه في هالحال ممكن يفكر ليش اشجعه واخليه يسافر بدون اعتراض مني ؟؟
واخللي " الفار يلعب في عبه "

ممكن توضحي ؟

عشان ما ودي اكون فهمتك غلط

اكيد شايفله وحده
ويبغى يرجع ياخذ راحته معاها

اختي الكريمة رومي

لا تفهميني غلط

انا اتكلم عن نفسي ولا اطبق كلامي على الجميع ؟؟
انا من النساء اللي تزوجت رجل ما يقعد بالبيت ابدا ..
اذا بتصدقين يصير لنا اسبوع ما نتشاوف ،، انا اخرج من البيت قبله وارجع بعده
وهو يطلع من البيت بعدي ويرجع قبلي ،، في ساعة دخولي للبيت يكون هو مستعد للخروج وما يرجع الا وقت متأخر
بالنسبة لي ،، لاني انام بدري ... او انه مسافر طول الوقت ،، وهكذا
وانا ما اقول اني اشك فيه وفي طلعاته لا بالعكس دايما ابرر له واوجد له العذر ،، خاصة انه يتحجج بالعمل
لكن تدريجيا حسيت انه ابتدا يتناسى وجود الزوجة بالبيت
وحاولت اني انبهه بكل الطرق وما لقيت فايدة ،،
مرة قريت للكاتب القطري د. احمد عبدالملك مقال في مجلة كل الاسرة
مفادها ان زوجة كانت تعاني اهمال زوجها واكتشفت خيانته لها وحبت انها ترد له الصاع صاعين فصارت تتصرف معاه بريبة
الى ان ادخلت الشك في قلبه ومن يومها وهو نسى الدنيا كلها وقعد بس يراقبها " وطبعا هي كانت بريئة " وشوفي مراقبته لها قربته منها تدريجيا
وما اكذب عليك عجبتني القصة وحبيت انفذها
والحمدلله نجحت هالخطة معي
وارجوك لا تفهميني غلط لان اخته واختي كانوا على علم باللي اسويه عشان ما يظلمني ولا يقدر يشك في اخلاقي
وهالكلام ما اطلب من كل زوجة انها تنفذه ،، لا كل زوجة على علم بشخصية زوجها وطبيعته وتعرف كيف تمشيه على مزاجها
مرات الزوج يكون غافل عن زوجته وصفاتها الحميدة وخصالها الزينة ،، ويبغى له من ينبهه
وكل شي يجي بالهدوء والتفكير السليم
الحمدلله يا رومي انا الحين سعيدة ومستانسة ما اقول لك كل طلباتي اوامر لكن اغلب مشاكلي انحلت
ما ادري وضحت الصورة لك والا ازيد

انا فهمت نفس الكلام اللي قلتيه ... ( لا تزعلين مني اختي ما قصدي شي )

بس الاسلوب مرة غريب اني اخلي زوجي يشك فيني عشان ينشغل بمراقبتي ويجلس اكثر وقته معاي !!

بصراحة ما عندي استعداد اقلل من قيمة نفسي او اخليه يشك فيني حتى لو كانت خطة عشان ارجعه لبيته

يمكن نفعت معاك بس انا ما احب احط نفسي في هالموقف ابدا

عندي طرق ثانية مثل الحوار الجدي والنقاش الهادئ والاسلوب الرقيق في المعاملة والأهم من هذا كله المواجهة

ومثل ما قلتي اللي ينفع معاك ما ينفع مع غيرك ... بس لمن الزوج يشك في زوجته وحتى لو اكتشف انها بريئة باعتقادي ان هالشي يخلي في شرخ في علاقتهم يعني انا راح اتضايق منه انه شك فيني حتى لو كنت انا السبب وهو راح يستمر في شكه

اشكرك على التوضيح

والله موضوع لذيذ والردود جميله .. لكن انا كان لي تجربه مماثله وكنت مسافر تبع وفد من الشغل

وزوجتي الصراحه كان موقفها رهيب وكل شويه تسألني يعني مفيش حد ممكن يسافر بدل منك .. يااخي كلم مديرك وقوله عندي ظروف خليه يطلع واحد بدالك

قلت لها ده فيها بدل سفر حلو وعموما هو اسبوع واحد .. لقيتها بتبكي .. قلت في نفسي والله ماحسافر حتى لو حصل ايه عشان شفت دمعتها .. وفعلا طلبت اعفائي من السفر بسبب ظروف عائليه وجدت الفرحه مش سايعاها عشان ماسافرتش .. رغم ان فيها فلوس

والحمد لله .. تعرفوا لو كانت ماعملتش كده كنت حاكون متدايق جدا .. لازم الزوج يحس انه مهم لزوجته ويجبر خاطرها بدون خناق او عصبيه وده بيكون شعور حب حقيقي

عزيزتي نجلاء
لايمكن أخلي لحظة شك تدخل قلب زوجي مهما كان وصدقيني اغلب الرجال وليس كل الرجال ممكن في لحظة شك يدمر بيته
لازم نعرف أن هناك فروق فردية بين الناس وليست كل الطرق تنفع مع الكل
في حريم مايهتموا بسفر أزواجهم لحالهم لكن النتائج كانت وخيمه ومن حق كل وحدة تحافظ على بيتها وزوجها
وبعدين إحنا مومقصرين معاهم بشي ولا محاصرينهم هم يطلعون ويسافرون للعمل ويقابلون أصحابهم يعني ماخذين حقهم وزيادة
فليش يفكر يسافر لوحدة خصوصا لدولة فيها إختلاط ......
عموما وجهات النظر لاتفسد للود قضيه ووجهة نظرك لها إحترامها

RoOoOmy_M يعطيك العافية على المداخلة الرائعة

سبحان الله .. الموضوع جاء في محله ...




كإن زوجي قاعد بيننا ؟؟؟:no:




البارحة في الليل كنا نتحدث انا وزوجي عن السفر وعن الاجازة وعن البلدان إللي حابين نزورها ....


المهم .. وفي نهاية حديثنا يقولي : إنه بس يرجع من سفرنا ، راح يسافر مع أصحابه كم يوم وبيرجع ... وإنه راح ينزلني من المطار ، وهو راح يكمل سفره علىطول ..

أنا إنصدمت من كلامه ... وتذكرتكم يابنات .. لأني أمس قريت الموضوع وشفت مشاركاتكم .. وقلت بيني وبين نفسي الحمدلله زوجي مو من هالنوع ... وإني الحمدلله مرتاحة من هالموضوع ...

ولكن للأسف .. إكتشفت إن زوجي مثله مثل أي رجل آخر متزوج .. :sad:

المهم يابنات .. ماأطول عليكم السالفة ..



بس خلص زوجي جملته .. نزلت مني دمعه .:cry:. بدون ماأحس ... وحاولت إني أكلمه بكل هدوء وأبين له وجهة نظري .. ولكنه كان يحاول أن يقنعني بكل طرقه ..
وقعد يقولي : إني مو مقصر في حقك .. راح أسافر معك أي بلد تختاريه ، وراح أقضي معك أجمل الأوقات .. ولكن أنا من حقي إني أسافر مع أصحابي وأستمتع معاهم ، لأن السفر مع العائلة تختلف مع السفر مع الأصحاب .. وهناك في أزواج مايسفرون زوجاتهم أي مكان ، أنا عالأقل راح أسفرك أي بلد تختاريه ... وووو ..

قلت له : إذا أصحابك ياحبيبي مو مرتاحين في حياتهم الزوجية وغير مهتمين بزوجاتهم وووو ... فلا تخليهم يخربوا عليك حياتك الزوجية ... ولاتكون أناني .. أصلاً إنت كيف تفكر إنك تسافر وتتركني لوحدي ؟؟ والناس إيش راح يقولون عنا ؟؟ : سافر مع زوجته وبعد مارجعوا تركها وراح سافر مع أصحابه؟؟؟؟؟؟؟؟

وطبعاً حاولت معه كثير كثير .. وقعد يقول : أنا لو سافرت مع أصحابي فهاذا لايعني إني إرتكبت جريمة .. أوا إنها نهاية العالم .. وخليكي واثقة فيني أكثر ... وأنا مايهمني كلام الناس وووو ...


وفي نهاية الحوار إللي دار بينا .. قالي : خلاص مثل ماتبين ... ماراح أسافر . بس إنتي لاتضايقي نفسك ...





أنا الصراحة مو عارفة إيش أعمل ؟؟؟ حاسة الدنيا سودة في وجهي ...

هل أنا اتصرفت صح .. أو إني استخدم معه اسلوب آخر ..

أنا متأكدة إنه راح يعمل إللي في راسه .... (i)(6)


بس أنا متضايقه .. لأن زوجي حطني في موقف محرج جداً جداً جداً ...

اخواتي الكريمات ،، اخواني الاعزاء

صبحكم الله بالخير

ابدا اختلاف وجهات النظر لا يفسد للود قضية

وبالنسبة لي انا ما نفع معاي الا هالطريقة ،، وبالعكس ما احس ان اسلوبي هذا قلل من شأني خاصة اني بالفعل بريئة ،،
وكثري انا ما اظن ان في وحده اعطت زوجها مطلق الحرية ،، تصوروا ان في اول اسبوع للزواج ما كان يرجع البيت الا الساعة 2
وابد ما كلمته ولا ناقشته ،، لاني ادري انه سهران بالمجلس في بيتهم وعند اخوانه وربعه ،، وبعض الازواج ما يجي بالعنف ولا بالتهديد
والحوارات والنقاشات في وقتنا الحالي بين الرجل والمرأة خاصة الزوجين - ومع وجود بعض الرجال اللي صايرين سلاطين زمانهم - معدوم
لذلك " من له حيله فليحتال " وانا ما احتلت على زوجي الا بعد 9 سنين زواج
وانا اظن ان كل وحده فيكم ما اكملت ال5 سنوات زواج ولا انا غلطانه واعتقد انكم ربات بيوت والقلة موظفات
لان عقب 12 سنة زواج واربع اطفال بتعرفين ان هالمواضيع كلها مو بالشيء المهم انك تناقشينه
لانه بتصير اشياء واشياء في الحياة والدنيا بتخليك تنظرين اليها وتنسين سفر الزوج وسهره واصدقائه واهله واهلك
بتجيك مواضيع اكبر واكبر من هذا كله
وسامحوني على ردي ولا اقصد الاساءة ولا التقليل من احد

عزيزتي نسمة الحياة

لا تزعلين ولا تضايقين نفسك
مادام انت تعرفين انه بيسوي اللي في راسه ،، كوني راضية واقتنعي
لا تستغربون من كلامي ،، ولا تقولون اني مو عارفة امشي حياتي ،، لكن انا ما احب اضغط على زوجي كثير عشان ما يلزم ويسوي اللي براسه
شوفي .. بعض الرجال اذا مو اغلبهم يعاندون في مسائل بسييييييييييييطة بدون ما يفكرون فيها ،، واذا لقوا رفض من المرأة في موضوع اصروا عليه
لا لشيء الا لعدم الاحساس بالانكسار والخضوع لانه بطبيعة الرجل ما يحب التنازل ولا الانصياع
فانت من الافضل ان لا تمانعيه ولا تعانديه ،، وكلام زوجك صحيح في نساء كثيرات ما يعرفون السفر مع الزوج ،، فما دام الزوج يفكر فينا ولو لجزء بسيط المفروض اننا نحمد الله عز وجل
وانت عوضا عن شعورك بالضيق او بالزعل فكري بالناحية الايجابية انك سافرت واستمتعت وبترجعين بتجهزين نفسك لاستقبال عام جديد من المدارس والعمل و.. و.. و..

نسمة الحياة
كوني نسمة على نفسك اولا ثم على زوجك ،، والحين الحمدلله الهواتف متوفرة في كل بيت وفي كل مكان تقدرين تتصلين به في اي وقت
اجل ايش تقولين عن امهاتنا المسكينات اللي كانوا ازواجهم يغيبون عنهم بالشهور ولا يدرون عنهم اي شيء
حبيبتي ..وافقي على سفره برضاك احسن من انه يسوي شيء غصبا عنك وتتضايقين اكثر واكثر
وادعي له بالهداية والتوفيق وان يروح ويرد لك بالسلامة

ويا الله جهزي نفسك للسفر ولا تنسين صوغتنا

اختي نسمة ... هو اللي قال لك انه ماراح يسافر عشان مايضايقك

يعني زوجك مراعي مشاعرك ... اهم شي انتي لا تغيرين رايك وحاولي تبسطيه في سفرتكم المشتركة عشان يعرف مزايا السفر مع زوجته وأولاده ..وبما انه قرر يترك السفرة عشان خاطرك .. وافقي لا تفتحي على نفسك باب انتي في غنى عنه وعوضيه بطرقك الخاصة

اختي نجلا دبي ...

توقفت عند جمل عديدة لك اسمحي لي اناقشك فيها ( واختلاف وجهات النظر لايفسد للود قضية )

شوفي .. بعض الرجال اذا مو اغلبهم يعاندون في مسائل بسييييييييييييطة بدون ما يفكرون فيها ،، واذا لقوا رفض من المرأة في موضوع اصروا عليه
لا لشيء الا لعدم الاحساس بالانكسار والخضوع لانه بطبيعة الرجل ما يحب التنازل ولا الانصياع

انا في رأيي ومن خلال تجربتي الشخصية وتجارب اللي حولي مثل امي وصديقاتي ... اعرف الرجل اللي ينظر لزوجته بعين الاحترام والتقدير والشكر لها على كل ما تبذله في سبيل خدمته وخدمة بيته واولاده وخاصة لو كان الزوجين يحبون بعض وما يتعاملون بمدأ الندية ... مايفكر انه اذا زوجته قالت له ماابيك تسافر يعني انها تبي تكسر كلمته وتخليه يخضع لها !!!!!! استغربت كثير من كلامك
المفروض ان الزوج اذا قال بسافر مثلا والزوجة قالت له انها ترفض ... المفروض انه يفسر هالشي بحبها الشديد له وعدم رغبتها في فراقه

فما دام الزوج يفكر فينا ولو لجزء بسيط المفروض اننا نحمد الله عز وجل

نحمد الله انه يفكر فينا ولو بجزء بسيط !!!!!!!!!!!!!!!!!!! يعني هل بعد العشرة وحسن المعاملة والتفاني في الخدمة وكل اللي تسويه الزوجة لزوجها لازم تحمد ربها انه يفكر فيها ولو بجزء بسيط ؟؟؟؟ اسمحي لي اختي انا اذا عطيت زوجي كل محبتي واهتمامي ووفرت له كل مايحتاجه وكنت عايشة معاه بسعادة فأنا اطالبه بكل تفكيره مو بس بجزء بسيط

اختي الخبرة في الحياة خاصة مع الزوج ... ما تجي بطول العشرة بس ( تحكمها عوامل اخرى يطول شرحها ) فيه زوجات يعرفون طبيعة ازواجهم حتى لو كانت فترة زواجهم قصيرة وللأسف فيه زوجات وبعد عشرة ثلاثين سنة او أكثر مو قادرة تفهم زوجها ولا تعرف كيف توصل الى قلبه واحترامه لها ...

لي عودة

أنا مخطوبة

بس مرة سافر عني مع أخوة وأصحابه

وواثقة فيهم بس قهر والله

بس رديتها له ورحت العمرة بعد ما جاء بأسبوعين

اختي الكريمة رومي

انا ببتدي من حيث انتهيت ،، ان الخبرة في الحياة الزوجية ما تأتي من طول او قصر المدة ،، وانا اخالفك الرأي ،، فلو كان هناك موظفان في شركة واحدة قضى احدهم 15 سنة وعنده ثانويه عامة والاخر 5 سنوات وعنده شهادة جامعية تعتقدين مين اللي خبرته اكثر في العمل الاول ولا الثاني ؟؟؟ اترك الاجابة لك بعد عودتك

وبالنسبة للازواج فهم بشر وناس فيهم الزين وفيهم الشين وليسوا ملائكة ،،
ولا تظنون اننا عايشين بجحيم ولا بحرب ولا معارك ،، ولا تظنون اننا بمشاكل على طول ،، لا تطنون اننا ما في بيننا نقاش وحوارات ،، وبالاخير لا تحطون في بالكم اننا ما نتبادل الاحترام مع بعض ،،
لكن كوني صادقة يا رومي مع نفسك اذا في يوم مثلا والله لا يجيب هذا اليوم لزم زوجك على شيء وانت رافضتنه وما نفع معاه نقاش وجدال وجهات نظر ايش راح تعملين بتتركين البيت وبتروحين لبيت اهلك ؟؟؟
صدقيني لا تظنين ان ما في احترام بيننا بالعكس ،، حتى الحل اللي اتبعته مع زوجي في سالفة السفر ،، لا تتوقعين انه اوجد بيننا مشكلة ،، بالعكس انا مازلت امارس حياتي بشكل عادي ،، يعني وظيفتي ، وخروجي مع صديقاتي ، حتى المطاعم ، والسينمات ، و مراكز التسوق ، والنادي الرياضي ، واسوق سيارتي وكل شي اسويه مثل قبل وعادي ما تغير علي شي
لكن نقطة العناد مازالت موجودة عنده ،، علشان كذا ما اشد معاه كثير ،، ومرات احط نفسي في مكانه واوجد له العذر
وقصدي بالجزء البسيط " لاحظي الاجابة عن نفسي "
الحمدلله انني احتل جزء من تفكيرة افضل من لا شيء ،، لانني متأكدة ان تفكيرة ما بيكون خالي 100% لي ،، اذا اين سيذهب الاولاد والعمل والاهل والاصدقاء والحياة ككل اذا اخذت انا كل تفكيره
حبيبتي رومي اذا ما ابغي ينهدم بيتي او اولادي يخسرون ابوهم لازم اطيع الزمن " ان ماطاعك الزمن طيعه "
ومو معناة ان الزوج يبغي يعيش حياته لمدة اسبوع او اسبوعين في السنة بيضرني بشيء
ومو لازم اوقف له على الدقة وعلى الوحدة لا بالعكس لازم اساير الحياة عشان ما اخسرها كلها
مع العلم انني من عائلة غنية واملك رصيد محترم بالبنك وعندي وظيفتي وراتبي ،، يعني في كل الاحوال اذا لا قدر الله وحصل الانفصال ما بخسر شيء مادي
ولكن انا افكر في اولادي ، وفي بيتي ،، اللي بنيته واسسته هالعمر كله وبخسره عشان لحظة عناد
ومو معنى سفر الزوج لوحده عدم احترام لي ،، هذا انا من اربع سنوات كل سنة اسافر والحمدلله وسفرتنا مو اقل من شهر انا وزوجي واولادي ،، وما تغير علينا شيء
مرات يا رومي تشوفين ازواج شايلين زوجاتهم من على الارض شيل والله يعلم ايش اللي يصير من ورا ظهرها ،، خاصة ونحن نعيش بهالزمن ،، يعني انت كيف تحكمين على احترام الزوج انه يلبي طلباتي واذا قلت نعم قال نعم واذا قلت لا قال لا .. ولا كيف ؟؟؟
باكر تكبرين وتعرفين ان الحياة اخذ وعطاء وعشان تعيشينها صح لا توقفين عند اشياء بسيطة وتدققين على اشياء صغيرة

أشكرك يانجلا دبي على ردك بموضوعي ...

وأشكرك الأخت رومي على وقفتها معي ...


بس أنا أخاف يانجلا إني لو وافقت على سفره .. يسير ياخذها حلاوة ... يعني : لو وافقت أول مرة ، أخاف يرجع يسافر مرة ثانية وثالثة ورابعة .. ووقتها ماراح أقدر أمنعه من السفر لأني وافقت على سفره من أول مرة ..
وإنتي عارفة الرجال ماينعطوا عين ...

والله مو عرفة إيش أقول له ؟؟ أو أي اسلوب أستخدم معه ؟؟؟


وحابة أقولك يارومي : إنه فعلاً سكر عن الموضوع ، وما هان عليه يزعلني .. أبس أنا عارفة إنه راح يعمل إللي في راسه ..
وراح يرجع يفتح الموضوع ولكن بطريقة ثانية ..

زوجي وأنا عارفاه ...

بسم الله الرحمن الرحيم
السلام عليكم ورحمة الله وبركاته

قرأت هذا الموضوع بتمعن

بالنسبة لي

أنا لا أمانع في سفر زوجي مع أصحابه لأن بالفعل السفر مع الشباب غير

بالنسبة لي أنا أقيد حرية زوجي في سفره معي

من حيث اختيار الأماكن التي نذهب إليها ونوعية الطعام وحتى الفنادق

فلو أحب أن يجرب شيئ غريب مثلاً في المواصلات أو السكن أرفض بحكم أنوثتي وخوفي من البهذلة

عشان كذا لما يحب يسافر لوحده ما أمانع ولكن بعد عدة شروط

أولها : أن يراقب الله في السر والعلن

ثانيها : أن يتقي الله ولا يقرب محرم

ثالثها : أن لا يسرف في اللهو واللعب لأن الإنسان محاسب على كل دقيقة من عمره

وبعد ذلك أوكل أمره لله هو الرقيب والحسيب

وكل إنسان مسؤول عن تصرفاته

وبعدين والله هذي فترة نرتاح من بعض شوي

أصلاً أنا أموت في النوم عند أهلي

وانبسط واستانس معاهم

فهذي فرصة لتجديد الحياة فيما بيننا

وسلامتكم

أختكِ
المرتحله

معاك حق يالمترحلة في كل كلمة قلتيها ..

بس كيف ممكن تثقي في زوجك ... وتكوني واثقة فيه ثقة عمياء ...

اختي الكريمة المرتحلة
انا معاك 100%

والعزيزة نسمة الحياة
كل زوجة ادرى بطباع زوجها والاسلوب اللي ينفع معه

والثقة بالله اولا ثم بنفسك وتوكلي على الله ودايما رددي انك احلى ما في الكون وان زوجك ما بيلاقي احسن منك

النجم الساطع
مت من الضحك على كلمة خلاص ماني مسافر سديتي نفسي
هاهاهاهاهاي
زيت سويتي
احسن
ماله داعي يسافر مع ربعه
تصدقين عاد لو انا قايلي اذا رجعنا من السفر راح اسافر مع اصحابي
طوال السفره معاه راح يضيق خلقي وما ابي الوقت يمشي لاني ما ابي ارجع
ويسافر بعد ما ارجع
بس ما راح اخلي اسويها هوووووشه كبيره لا صارت ولا استوت
ماله داعي خلاص
ايام السفر مع الاصحاب وولت ايامها
صرت شريره مو شريفه

دمتم سالمين
اختكم شريفة

بسم الله الرحمن الرحيم
السلام عليكم ورحمة الله وبركاته

غاليتي

نسمة الحياة

ما دام الانسان مرتبط بالله عز وجل فلماذا أقدم الظن السيء

كل إنسان مسؤول عن أعماله فمتى ما زرعتِ رقابة هذا الزوج لنفسه ومراقبة الله في أفعاله فلا بد أن تثقي به

والله شاهد على كل ما يقوم به

فأنا متوكلة على الله حق التوكل

ومن يتوكل على الله فهو حسبه

ومن يتوكل على الله يجعل له مخرجا

أختكِ

المرتحله