قصه ولادتي..

بسم الله الرحمن الرحيم
السلام عليكم ورحمة الله وبركاته

رجعت إلكم بعد غيبه طويله .. والحمد الله .. الله رزقني بولد سميته حميد ..
وطبعا بقولكم قصه ولادتي .. اللي ما بنساه طول عمري ..

يوم الثلاثاء بالليل 3/5/2005 لاحظت إفراز بني خفيف .. ودريت إني مقربه .. هذا كان قبل موعد الولاده بعشره أيام .. طبعا ما كان فيني ويع .. تأكدت إن كل أغراضي جاهزه .. وخذت ملابس بنتي وولدي عند عماتهم .. وبعدها رقدت ..

يوم الأربعاء 4/5/2005 زادت الإفرازات .. طبعا لبست فوط صحيه .. لأن الإفرازات تحولت لقطع كبيره لونها مايل للبني .. والطلق بعد ما بدى عندي .. وبالليل الحاله النفسيه صارت زفت .. الإفرازات تزيد وما أحس بأي شي .. المهم شربت زيت الخروع مع عصير البرتقال .. وقلت لزوجي إذا ما حسيت بطلق صباح الخميس براجع دكتورتي .. وبعدها رقدت ..

فجر الخميس 5/5/2005 .. الساعه ثلاث الفجر .. بدا مفعول الزيت .. وحسيت بمغص شديد في بطني .. وبعدها كرمكم الله صابني إسهال شديد .. وبعد الإسهال ضلت الآلام وبدا الطلق عندي .. وكان منتظم كل عشر دقايق .. شربت ماي زمزم مقراي فيه أدعيه الولاده .. وجلست في ماي ساخن لمده ساعه .. والطلق أخذ يزيد علي .. المهم بعد ما تقارب الطلق عندي كل خمس دقايق .. أخذ يتباعد الين صار كل ربع ساعه .. عقب كل ثلث ساعه .. عقب كل نص ساعه .. ألين وصل ساعه بالضبط .. المهم كان هذاك اليوم مطر .. وقمت أمشي في الحوش .. وأدعي ربي إنه يفرجها ,, وكنت حاطه أمل إن الطلق يرجع بس للأسف كانت المده بين الطلقه والطلقه ساعه .. طبعا أم زوجي شافتني في الحوش أمشي .. وقالت شكلج يقول إند بتولدين اليوم .. قلت إلها إن شاء الله .. وخبرتها سالفتي.. وأصرت إن نروح للمستشفى بس أنا ما طعت .. وبدا الوسواس عندي .. قلت في خاطري ممكن المشيمه فيها نزيف وهذي الإفرازات منها .. وظليت في خوف ألين الساعه وحده الظهر .. عقبها خذت أم زوجي وزوجي ورحنا المستشفى .. في المستشفى ركبوا جهاز التخطيط .. وبين في الجهاز طلقه كل ربع ساعه .. بس أنا ما كنت أحس فيهن ..ولما قاسوا النفس .. لقوني فاتحه (صفر ) .. يعني كل هاذاك الطلق والنفس بعدها ما فاجه .. المهم الدكتوره طلبت تنويمي في المستشفى لأنها خايفه من هذي الإفرازات .. بس أنا طلعت على مسؤوليتي .. وإستمر الطلق عندي كل ساعه .. وبالليل مشيت ساعه كامله .. ورجع الطلق مره ثانيه وصار كل عشر دقايق .. و اللي في البيت كلهم طايرين من الفرح وأنا كنت أستمد القوه منهم .. وكانوا يحسبولي بين الطلقه والطلقه .. والساعه وحده بالليل خذت العيال وحطيتهم عند عماتهم .. لأنه كنا متوقعين ولاده .. طبعا الألام زادت وصار بين الطلقه والطلقه ثلاث دقايق .. وأنا أعتصر من الألم .. بس للأسف للمره الثانيه بدأ يتراجع الطلق ألين صار بين الطلقه والطلقه ساعه..وبعدها خذتني نومه ...

يوم الجمعه 6/5/2005 صحيت الساعه العشر .. ورحت أشوف عيالي .. أول ما دخلت الصاله قام الكل يضحك علي .. وعمتي تقول الله يسامحج ما رقدت الليل يالسه أترياج .. وين راح ويع أمس .. قلت إلهم خلاص الويع راح .. وشكلي ما بولد .. وطبعا الإفرازات تحول لونها لبني مايل للإحمرار.. وضليت يوم الجمعه على هذي الحاله طلقه كل ساعه .. وكانت الطلقه بارده .. وبالليل مشيت ساعه .. ورد الطلق مره ثانيه .. وصار حامي .. وكل عشر دقايق .. وقلت في خاطري سالفتي سالفه الأيام الماضيه ومستحيل أولد .. المهم العيال هالمره خذتهم معاي ومارضيت أنيمهم مع عماتهم مع إن أم زوجي أصرت .. وقلت لعمتي نامي أنا مستحيل أولد الليله واللي فيني منان .. المهم خذت لي دش ساخن وجلست في ماي حار لمده ساعه .. وبعدها الطلق صار عندي عفسه ... مب منتظم مره كل عشر ومره كل ثلاث دقايق ومره كل خمس دقايق عقبها كل ربع ساعه .. غير إنه مره حار ومره بارد .. خذت لي حبه بندول وقلت أنام أحسن لي . .. لما جيت أنام الطلق كان مستمر وكان مخربط .. تميت أغفي شوي .. وأقوم على الطلقه .. والساعه 2,20 بالليل حسيت بشي يطلع مني .. صرخت على زوجي .. وقام بسرعه وأخذ العيال لعماتهم وصحى أمه .. رحنا على المستشفى .. وطول الدرب ونحن في السياره .. ولا طلقه جتني .. وقلت لعمتي الويع راح أحسن أرد البيت .. قالت لي عمتي خلينا أول شي نطمن عليج .. وإذا ما شي ولاده بنرجع .. وفي المستشفى ظل الطلق نفسه .. مب منتظم ومره حامي ومره بارد .. المهم لما فحصتني الممرضه الساعه 3,30 حصلت النفس فاتحه 8 سم .. أنا هنيه قمت أصيح وأقول لعمتي أنا ما فيني ويع كيف فتحت 8 .. وياويلي كيف بولد .. وعمتي حليله تقول لي الحمد الله إنه ما فيج طلق ولا تحسيبه .. المهم فتحت الممرضه كيس الماي وزاد عندي الطلق بس مب هاذاك الزود .. وعلى الساعه أربع إلا ربع حضرن أربع ممرضات وقالن خلاص ولاده وعالساعه أربع إن شاء الله بتكونين والده .. ويالله كل ما تحسين بطلقه دفعي .. ضليت أكثر من خمس دقايق أتمنظر فيه وهن يطالعني .. ويقولن شو مدام ما في طلق .. وأنا أرتجف من الخوف لأن الطلق وقف وبرد .. راحت الممرضه تفحص الجهاز وقالت الطلق موجود بس إنتي ما تحسيبه .. عقبها تميت أحس بطلق بارد يعني خفيف خفيف .. ويروح بسرعه يعني نفس الومض بسرعه يختفي ..ضلينا على هالحاله أنا والممرضات ساعه إلا ربع .. وأنا أدفع بدون طلق .. وبدون فايده .. والطلق يبن إنه حامي في الجهاز وأنا ما أحس إلا بويع خفيف .. عقبها الممرضه دخلت يدها وتمت تحيس راس ولدي وتحيسه وباقي الممرضات ماسكاتني وعمتي تصارخ .. وتقولي دفعي حتى لوما فيج ويع تراهم بقتلونه لج .. وكانت حالتي حالة قمت أصيح وأدفع وأدعي .. والممرضه تحيس هاذاك الراس ألين ظهرت ولدي .. وما إرتحت ألين سمعت صيحته ..

طبعا خاطوني خمس غرز داخليه ووحده خارجيه لأني كنت أدفع بدون طلق .. وضليت أسبوعين بعد الولاده ما أقدر أمشي ولا أتحرك .. كنت أحس إني مشلوله .. وكله هذا بسبت ولادتي المتعسره .. والحمدالله على كل حال .. الحين صرت أحسن .. والبيبي بخير.. بس شوي دلوع ومتعبني في رقاده .. أدعوله بالهدايه .. والصلاح..