ولادتي بالتفصيل الممل

السلام عليكم جميعا .. :smile:

اشكركم من كل قلبي على تفاعلكم وتعاونكم وياي طول فترة حملي وفرحتكم لي بعد ما يبت ولي العهد ربي يخليه ...

واللحين بخبركم شو صار لي بالتفصيل قد ما اقدر ..:cool2:

يوم الجمعة ..حسيت انه فيني الم خفيف .. بس تعرفون عاد صار الموضوع عادي لأنه من الثامن وانا اتألم .. ومن التاسع كل يوم يزيد .. فقلت بطنش ادري انه نفس كل مرة ... :down: الظهر .. قلت خلني ارد اشرب زيت خروع مرة ثانية .. ادري ما بيسوي لي شي بس بعد .. انظف بطني ..

قمت وحطيت 4 ملاعق في عصير برتقال .. وقبل جي انا كنت شاربه وما سوى لي شي .. طبعا اشتغل عندي المغص .. لأنه قبل لا يسهل بطني ايني مغص .. واقول حق امي وخوات ريلي يقولون لي عادي .. هذا مب طلق ولدج يقص عليج كالعادة واونه لو فيج ويع ما بيكون شكلج جي ...

احبطوني طبعا.. :down: المغرب .. سرت ومشيت انا وريلي تقريباً ثلث ساعة .. وفيني الويع الي هو مغص من شرب الزيت .. ولأني الله يعزكم ما سرت الحمام فقلت هذي بداية الاسهال .. وريلي يقولي نفس الكلام ..

في الليل على الساعة 11 احس بألم ووقتها كنت فضيت بطني :o بس قلت هذي توابع عادي ..
المهم انا قلت لو رقدت ترا مافيني شي .. وفعلا رقدت .. بس ..

على الساعة 4 ونص الفجر .. نشيت ابا اسير الحمام لأنه كنت اذا ما اسير الحمام بطني يعورني من الضغط على المثانة .. وسرت وكل شي .. ما مداني رديت بنام ...

حسيت دفعة مب كبيرة وايد من الماي نزلت مني وكانت دافية شوي .. هني انا بطلت عيني ... قلت معقوله ما اكون فضيت مثانتي عدل :eek2: سرت الحمام مرة ثانية احاول افضي مافيني شي .. وما حسيت اني متخيسة وايد نفس بقع الماي وتدرون عاد انتوا انا قبلها كنت رادة من الحمام قلت عادي ..

سرت برقد مرة ثانية .. حسيت انه الماي بدا ينهد شوي شوي واربع عالحمام .. نفس السالفة .. مافي كنترول.. وماكان ينزل دفعة كبيرة .. شوي شوي .. بس هالمرة لاحظت اني تخيست بسرعة .. انا عاااااااااد مب مصدقة .. لأنه في نفس اليوم في الليل كنت ادعي ربي بطريقة ما تتخيلونها انه لو فيني ولادة ربي يبنها لي وما اسير المستشفى عالفاضي كالعادة .. والحمدلله الله استجاب لي .. وكنت ادعي بين كل صلاة واقامة بعد ..

قمت انا عاد .. بدلت ملابسي .. ووعيت ريلي وكانت الساعة 5 تقريبا الفجر .. وتدرون يوم سبت عاد دوامات .. سرت يلست عداله .. قلت له .. ( ها مستعد ) هو عاد الحبيب راقد ما يدري .. مبطل نص عين يقول لي على شو ..:eek2: قلت له مستعد تشوف ولدك .. قام بطل عينه وقال ( هاااااااااااااا) شو فيج فيج شي ..

قلت له تبطل علي الماي ... وانا اضحك .. قال لي يالله قومي بسرعة .. وقمنا شغل مراكض مادري على شو مستعيلين .. من بدينا نركب السيارة .. ابتدا عندي الويع.. وكان كل 4 دقايق .. وخبرت امي وقالت بتلحقني عالمستشفى بس يسيرون خواني المدرسة ..

الحمدلله ذاك اليوم الاشارات في الشوارع ما لعوزتنا كنا نوصل الاشارة حمرا ما يمدينا نوقف وتصير خضرا :D2 .. طبعا انا مب قادرة اوقف .. وقت الألم .. فحصوني وكل شي .. وطلعت 3سم الى 4 انقهرت والله .. بس الحمدلله التخطيط هالمرة يبين انه فيني ويع قوي :D2

يات امي .. وطلعوني العنبر .. وانا اتألم وامي وريلي عندي .. مرة يقرون علي .. مرة يسولفون ويضحكون.. وانا اسبهم واهاوشهم متفيجين .. ويبوني امشي لكن انا مب قادرة قلت لهم ما ابا ..

المهم الساعة 8 الصبح تقريبا نزلوني عنبر الولادة .. وانا الألم يشتد عندي .. مب قادرة اوقف .. طبعا هم نزلوني لأنه الماي تبطل عني ما فحصوني عشان يعرفون كم .. بدلولي ملابسي وكل شي .. رقدت على السرير وتوني اقول يالله .. والألم يزيد .. والدكتورة يالسة تكتب في الاوراق .. وريلي على يميني .. اول ما رقدت قال لي ( شدي ) :D2 الدكتورة نقعت عليه ضحك قالت شو انته الي بتولدها .. وغير جي كنت بعدني يعني .. وانا عاد معصبه من الويع واقوله وانا ابا اضحك شو اشد ..

تميت اعاني ويا الألم والاكسجين .. كان يدوخوني والله .. وكنت انام بين الطلقة والثانية .. وبدا الطلق يبرد .. وامي وريلي يوعوني على طول .. وانا اعصب اقولهم ( خلوني ارقد شو تبون فيني برتاح شوي ) امي تقولي جي بتتأخرين .. بس انا ماشي مجال راحة دقيقة انام فيها ..

بس والله انا ما ابا اخوفكم بس صراحة الم فضيع كنت احس انه مصاريني تتقطع من الألم لدرجة اني امسك ايد امي وريلي واتعصر من الويع وفجأه يشتد اكثر واهد يديهم ما يرومون يمسكوني حسيت اني مينونه وقتها والكشه اعوذ بالله . :D2

طبعا امي وريلي يضحكون ويسولفون مع الممرضة كانت اجنبية فنانة ما شالله عليها هيه الي ولدتني ... وريلي مستانس اني بولد خلاص وانا اتعصر .. اقولهم حرانه يهووني .. ولما يهوني .. ويزيد الويع افر الي في يديهم واضربهم .. عاد امي تبا تنسيني تقول حق ريلي يالله اللحين قوم سير يب لها خاتم الماس .. وانا اتويع .. جان قول ريلي اوكي بسير الحين .. قلت له لاااااا انا ابا انقيه :D2 متفيجة والله ..

بدوا الممرضات يجهزون الاشياء وانا احس اني بموت من الألم واقول خلاص سووال لي عملية مب قادرة .. وبديت احس بزفرات على تحت اني ازفر .. بس هم يقولون بعدج الراس مب مبين .. وانا اموووت قهر .. وازيد .. وريلي يعلمني .. يقول لي لا تشدين اذا ما فيج ويع من اييج الويع شدي ( خبره :D2 ) وبدوا يشوفون الراس .. وانا ازيييد واحس انه صوتي انبح من كثر ما اتعصر والله .. وادعي واقرا وشوي اخربط وعلى هالحاله .. لين ما اتسهلت الحمدلله .. وطلع حبيبي (مصبح سميناه على اسم ابو ريلي) ) الساعة 2 اللا ربع وقامت امي تبوسني وتحضني وريلي صاح علي .. وامي بعد وانا متوهه كأني ما اعرف شو السالفة والله كان شكلي غبي ههههههههههههههه

حطوه في صدري والحمدلله كل شي كان اوكي .. وعقبها خيطوني الحمدلله غرزة وحدة .. وكل شي عدى على خير .. والله ما كنت اتوقع الولادة جي .. كنت احس انه الممرضة كانت تقصني بموس وقت طلوع الراس اقول لأمي هذي يالسة تجرحني تقول امي لا ما اتسوي لج شي .. ماكنت ادري اني انا بروحي يالسة اتقطع ...

الحمدلله على كل شي .. ادري قصتي طويله وحشرتكم وايد بس انا خبرتكم كل شي بالتفصيل .. والله دعيت قلت يارب ترزق بنات المنتدى بالذرية الصالحة وتجزيهم خير .. :)