قصه.....ارجو من الجميع التعليق

[align=justify]بسم الله الرحمن الرحيم
اخواني واخواتي اعضاء منتدى عروس اود ان اعرض عليكم هذه القصه :
هذه قصة واقعيه سردتها لي اخت بطل القصة، وفي عيونها القهر والالم على والدها وارادت ان تعرف هل هي ووالداها واخوتها على حق؟
وبالنسبة لي كاتبة القصه اولا اشكركم مقدما على وقتكم الثمين الذي منحتوه لقراءة القصه وابداء ارائكم وتعليقاتكم، وثانيا آسف على الاطاله والأسلوب العامي(الركيك).
قصة اب وام واولاد منهم البنات والبنين اكبرهم ولد هذا الولد مدلل من ابوه وكان يعامله معامله خاصة غير عن اخوانه وانا ما اقصد المعامله اللي هي الضرب والقسوة والحب والاكل والشرب لا،اقصد المعامله المادية يعني الفلوس هذا الولد خلص دراسته الثانويه وسافر الى الخارج ليأخذ لغة سافر وانصرف عليه ما انصرف الاف الدولارات ولما رجع لا معاه شهادة ولا الفلوس اللي كانت في يده ويقول انها ضاعت عليه او انسرقت واخوانه الثانين في البيت يا حسره عليهم مدارس حكوميه ومصاريف شهريه لا يقارن باللي ينصرف على المدعي الاخ الكبير المهم رجع ولا كأنه عمل شي،ابوي ابغا سياره (حاضر) ما كان يسمع من ابوه الا كلمة طيب وحاضر واخوانه طبعا داريين باللي يدور حوليهم وشايفين انهم لما يطلبوا من ابوهم شي لازم تحقيق سين وجيم قبل الوصول الى مرادهم وحتى البنات المساكين يطفشون من الاسئله ويتنازلوا عن طلباتهم التي لا تساوي شيئا من طلبات بطلنا، المهم بغا سياره حصل، بغا يبيعها ويشتري موديل اجدد حصل، بغا كمبيوتر حصل، بغا لاب توب حصل مافي شي نفسه فيها الا وحصل عليها، واذا فكر ابوه انه يرده قام زعل وعصب ولأ انا على حق ولازم احصل على كل شي طبعا الوالد كله الا زعل ولي عهده زي مايقول، هذا اخوه صعبت عليه الدراسه الثانويه في القسم اللي يبغاه حاول مع الوالد انه يدخله مدرسه خاصه ومخفضه رفض رفضا باتا في حين ان الولد العزيز يصرف عليه بالهبل، المهم اخونا الصغير شايل في قلبه ما كمل دراسته ياعيني عليه، المهم ولدنا ما حب انه يكون اقل من احد وزن على راس ابوه واقنعه باسلوب (الكذب) انه لازم يسافر بره ويحصل على شهادة البكالريوس على الاقل،الوالد ماهان عليه ولده قله حاضر ودرس في جامعة من اغلى الجامعات في الخارج وطبعا حسب كلامه انها جامعه رخيصة والوالد المسكين صدق، لكن لما وقع الفاس في الراس وسجل الولد وبدا يطلب مصاريف شهريه غير متوقعه عرف الوالد العزيز انه ولده ضحك عليه، لكن قال مادام الله منعم عليّ خليني اعلمه بكره حيشتغل وحيكبر اسمه وحيحطني على راسه، (مع انه الله منعم عليه بس ما كان يعدل بين اولاده ابدا ابدا والاولاد حاسين بالفرق بس عشانهم طيبين زي امهم اللي لا بتهش ولا بتنش كانوا يقولوا المهم اكلين وشاربين وعايشين العيشه اللي نبغاها (بس على فكرة الاب مو بخيل لانه معيشهم زي الخلق والناس مو ناقصهم شي هذا في نظر الناس بس في نظر اولاده مقصر عليهم مقارنة بالأخ الكبير) ورجع الولد معاه الشهاده اللي خلى ابوه يطير من الفرحه وعيونه تقول هذا ولدي رافع راسي،وطبعا الدراسه استغرقت اربع سنوات ويخترقها الاجازات اللي كانت مصاريفها مصاريف ثانيه حرام الولد يدرس ويتعب ويرجع لبيت اهله ويقعد، لا لازم يغير جو ويسافر مع اصحابه وينصرف عليه الشي الفلاني، ويرجع يكمل دراسته، رجع والمفروض انه يشتغل بشهادته، لكن لا قام يضحك على ابوه بكلامه المعسول والفخم،رح اعمل مشروع وعوائده السنويه مبالغ تغري وراس المال ماراح يطول عشان يرجع، والوالد شاف ولده ما شاالله يفكر ومخه نظيف وقام ساهم براس المال على اساس انه ماراح يطول عشان يرجع، خاض المشروع مع صاحبه بالنص طبعا، اول شهر الدخل ماشي والتاني اقل شويه والثالث اتخاصم مع شريكه وقال خلاص نفض الشراكه واعطيني فلوسي(هذا اللي يبغاه(فلوسي)) طبعا انتوا معايا الفلوس فلوس ابوه مو بفلوسه، شريكه قال اوكي اعطيك حقك(شريكه فهمه في الشهور اللي قضاها معاه وعرف انه الفلوس تعمي عينه وكمان عارف انه ابوه هو اللي ساهم براس المال وطلع ولد نزيه وكلم الوالد وقاله على الحكايه والوالد قال خلاص سلمني الفلوس وطبعا بطلنا مو داري عن اللي يدور من وراه، وهنا نفهم ان الوالد اصلا ثقته مو قد كذا في ولده عشان كذا طلب من الشريك وحرّص عليه انه يسلمه الفلوس، لما عرف بطلنا الحكايه اللي تدور من وراه قام تخاصم مع ابوه وقله ليش مافي ثقة، انا رح اخذ الفلوس واعطيك هي كذا فشلتني قدام الزفت شريكي وطلعتني ولد قدامه وأبوه متأكد انه اذا هو استلم الفلوس كانت طارت بس ما حب يجرح حبيب قلبه وسايسه وطبعا الولد مارضي بس قال يالله اشوفلي مكان تاني اطير الفلوس، يوم قام من النوم ويهدد اما تزوجوني ولا اكمل الماجستير طبعا في الخارج، ابوه المسكين قال يالله خليني ازوجه احسن يمكن يعقل، يعني ابوه عارف انه مجنون، زوجه وطبعا الولد مسكين ماعنده ابوه تكفل بمصاريف الزواج من الألف إلى الياء وفي هذي الاثناء الولد لقى شغله محترمه في احد الشركات براتب بسيط كمبتدئ وهذا اللي ساعد ابوه في انه يزوجه، تزوج الولد وصار عريس وعلى فكره السكن في عمارة الوالد خرّج مستأجر يدفع، ودّخل ولده المصون، وبعد فتره وعلى قوله من دعاوي زوجته لقى وظيفه محترمه جدا وبراتب محترم جدا مع البدلات وبما فيهم بدل السكن خلاص الولد عايش مرتاح بيت وزوجه وولد في الطريق وعمل ممتاز،وهذا كله وماحد راضي من اخوانه واخواته على اللي قاعد يصير والام كمان مو راضيه عن اللي يصير في عيالها بس هذا كله عند الوالد مو مهم المهم يكون هو راضي وولي عهده راضي ومرتاح وخلاص، وكل ما احد طلب شي من دراسه في معاهد او أي مصاريف يشوفها الوالد انها بعزقة فلوس ومالها داعي يرفض ولما يحطوا نفسهم في وضع مقارنه مع اخوهم الكبير يقولهم ابوهم انتوا اصلا بتكرهوه (وانا اقول انهم لو كانوا فعلا يكرهوه فما حد زرع هذا الكره الا ابوهم) المهم العيال اشتغلوا وقفوا على رجولهم -وبدون نكران -بمساعدة ابوهم في بادئ الأمر والبنات توكلوا وتزوجوا ومنهم القاعدات في البيت يستنوا نصيبهم، ومر الزمان ودارت الايام والكل ماشي في احسن حال الين ما وهن الوالد وضعف وما صار يشتغل تقاعد عن العمل ما عنده غير هالايجارات اللي يلقطها، ولسه عنده ولده الصغير يدرس في الخارج وعند مصاريف بيته وبناته ومصاريف اخرى، الحين لما ضعف قام يلجأ لبناته ولحرمته ولعياله (دون الكبير) ويشكيلهم الحال، تظنون انه يطلب منهم فلوس لأ، بس يشتكليهم من حبيب قلبه ولي عهده اللي من يوم ما اشتغل ما فكر انه يذوّق ابوه ولا أمه شي من عرق جبينه ولافكر انه يساعد ابوه في تحمل بعض المصاريف ونسيت اقلكم انه كان مشتري سياره -هذا بعد ما تزوج-بفلوس ابوه وقال انه رح يقسطله المبلغ قسطله لمدة بسيطه ماوصلت لربع ثمن السياره وخصم مبلغ من السياره برضى والده وقال اكملك الباقي بعدين لظروف معينه، وبعدها ولدنا المصون نسي الموضوع ونسي سالفة الفلوس الباقيه او تناساها، ومافكر انه يسدد له باقي المبلغ مع انه شايف وعارف انه ابوه صارت ظروفه تعبانه وحالته وقوته مو زي الاول، وبعد فترة ليست بقصيره من عجز الوالد-الله يخليه ويطول بعمره-وزيادة مصاريف اخر العنقود، فكر بس متأخر انه يطالب ولده بباقي مبلغ السياره وهو مبلغ ليس ببسيط، ويطالبه بدفع ايجار البيت بما انه ياخذ بدل سكن، اولا لما استجمع الوالد العزيز قواه وطلب منه باقي اقساط السياره، هب في وجه ابوه وقاله انت سامحتني بباقي المبلغ ويحلف ويقسم في وجه ابوه انه مسامحه بصوت عالي واسلوب(وسخ) في الحديث، لدرجة انه نزل دمعة امه اللي كانت حاسه بظلم عيالها التانين بسببه، وبعد ماعصب الولد وتنافخ في وجه ابوه رضي وهو غير راض بانه يدفع الباقي، وفي نفس الوقت ابوه فاتحه في موضوع الايجار، طبعا وقعه كان عنيف على الولد ويقول: ابويه انت تطالبني بايجار البيت هذا اخر شي كنت متوقعه منك.(يلعن ابو دارك، ابوك استناك سنين وساكت عنك يقول يمكن في يوم يحس بابوه ويساعده بما انه مرتاح ماديا) ابوه يقوله مو انت تاخذ بدل سكن خلاص اعطيني اياه عشان اقدر اوفي مصاريف اخوك الصغير ولا كنت انا اصلا مستفيد من ايجار البيت وقلت اعطيك اياه الين ما توقف على رجلك، تخيلوا ايش قال، قال: يعني قصدك انا اسرقك؟ انا ماني بدافع ايجار. قاله ابوه يعني ترفض تساعدني؟ خرج بطلنا من بيت ابوه من دون ما يسلم عليه ولا على امه ورزع الباب وزلزل البيت.
وهذه هي القصة واسفه على الاطاله واطمع في سماع ارائكم وتعليقاتكم، وهل برأيكم يحق على الوالد مطالبة ولده بدفع الايجار؟ وهل يحق للولد ان ينهر اباه بعد كل هذا؟
وهذا شئ بسيط من حياة الولد مع والده ولو كنت ساذكر القصة بتفاصيلها لما استوعب منتدانا العزيز طولها ولا دنائة بطلها....