كيف تكون زوج مرغوب به ؟

الزواج مبني على الاثنين .... وبذل الجهد لابد يكون من الجهتين ... يعني حتى الريال لازم يتمسك في مرته ... ويحافظ عليها ...

مو بس لازم إلا ضروري عشان يحسس الزوجة بأنها شي مهم بحياته

لان ما اعتقد في شخص على وجه الأرض يرفض النعمه لما تييله بمعنى " ان اذا الشخص كان معاي زين ولا ضرني ولا قصر معاي بالعكس أعطيه عيوني " ...

ياليت هالكلام يفهمه كل الأزواج ويقتنعون فيه

- يعني لما تسألك مرتك وتطلب منك شي ..... تعلم شلون ترد عدل !! ...... يعني خلك دايما مهتم " هلا حبيبتي .. آمري!" ... واذا كنت مشغول " كاني عمري يايلج بس اخلص اللي عندي "

(يعني تعلم تكون ذرب في التعامل ... لا تصير دفش ودثوي)

كل اللي تبيه الزوجة كلمه سنعه ورد حلو

- خل أسلوبك راقي بالتعامل ... بين مرتك وأعيالك ... يعني الفاظ بذيئة كيفك تقولها بالدوانيه وانت تتحلطم بالسيارة ... لكن في بيتك لا تقولها ...

ما طلبنا غير الاحترام والكلمة الحلوة .. وما تقدون عليهم !!

- أسلوب اللي كلا إنت ذكي واتعرف ومرتك غبية وما تفهم ... لا تنزل من قدرها .. بينلها وعلمها وفهمها بدال الطنازه والتعيب .!!

صح لسانك :up:

- خل السانك حلوو .... وكلا حجيك ينقط عسل .... بس مو على مصاخه ... يعني ابسط شي لما تناديك ..رد عليها " هلا حبيبتي !"

جان الطوف يسمع ترى هو :down:

- لما تكون قاعد مع ناس .... لا تخالف مرتك الراي .. خلك في صفها دايما .. لانك لو حطيت روحك مكانها راح تتضايق انها تطلعك غلطان والا كلامك مو سليم جدام احد ..

ياربي على هالنقطة .. خلص عمري وأنا أطلبها منه

- لما تعصب .. حاول تتحكم بروحك .. والتفاهم زين .. وعط حق مرتك مجال تتكلم " لا تتعود على الصراخ والتسفل" ..

:up:

- خلك مع مرتك كل شي ... وسولف معاها ... شنو صار معاك كل يوم ... تقدر تقولها همومك ... وتاخذ رايها بشي ...وحتى اذا كانت زعلانه لازم اتعرف اتواسيها مو تزيد الطين بله ..

يعرف يحاجي الغرب لكن زوجته هي اللي غريبه عنه

- حلو انك تلاحظ أي تغيير صار بالبيت بالغرفه في مرتك .. وتبدي رايك بالاعجاب .. حتى لو مجامله بس لا تفشلها(حتى الاسلام سمح في ذلك ...)

مرات ... ونسيتها من زمان

- لا تصير جنك ياهل .. وأناني . وكلا انت التعبان والمريض المسكين .. ولحد يستخدم اغراضي ..!!

:down:

الاهتمام بالمظهر والنظافة :

- يعني انت ريال تروح الدوام تطلع تشتغل .. سواء بالصيف بالشتاء .. الجسم يحتاج سباحه وعطر .... واللي ما يدري في اختراع اسمه "ديودرن" مزيل رائحة العرق ..

هذا شي من أولوياته ويهتم فيه .. الحمد لله :up:

- ضروسك .. أسنانك .. حلجك .. بلــــــــــــيز فوق الزقاير والصفار والحالة الكسيفه .... هم ريحه نفاثه !!! رجاء الفرشه والمعجون صباحا ومساء ..

هم الحمد لله عارف هالشي :up:

- حتى الريال يحتاج انه ينظف بعض الاماكن من الشعر ... مو يقول انا ريال عادي اصلا إغراء ....لازم يداري هالناحية ..

:up:

- يعني يشوف شكله واللي مرته تحب يعني مثل ( لحية - قفل - بدون شوارب - ديرتي ) ... ويهتم في قصة شعره ونظافته .

:up:

- يعني بليز بليز ... قرض اظافرك ... شغل العقد اطول آخر ظفر ( ترى ويــــــــــع ) ... سواء إيد والا ريل ...

:up:

- وسوالف ساعة ذهبيه ( اصلا حرام الريال يلبس ذهب) ... وشغل خواتم وسلاسل ...سوالف الراب وخواتم المشعوذين ... (ما فيها حلا كلش ) .. وتروالي الاكسسوارات حق البنات .. يعني حدك الدبله بس ..

:up:

- يعني وانت قاعد بالبيت لا تصير شايب شغل مكسر لا وبدون اندر وير ( الله يفشلك) ....البس .. يعني شورتات .. بجامات سنعه .. تريننجســــوت ...

:up:

الصفات :

- الحنان ... خلك حنون كثر ما تقعد .... طول ما انت يمعها دفها بحنانك ..يعني وانتوا مثلا بالصاله قاعدين تطالعون التلفزيون ... قولها "حبيبتي تعالي قعدي يمي وحط ايدك على جتفها .."

أو مثلا : حط راسك في حظنها ... تدلع عليها .. بين انك تستانس معاها ... وتحب تتقرب منها .

وقت اللي يبي ما لازم أخالفه لكن ينطلب منه هذا المستحيل

- الحب ... اول ما اتيي لمها حيل .... قولها احبج ... ولهت عليج ... حتى لو تتصل عليها في وقت اهيه ما تتوقعة وتقولها " واي ولهت عليج "

كان .. فعل ماضي

- المرح والوناسه .... كلا جد بجد ما لاينفع وفيها ملل .... تغشمر معاها انخش عنها ... تعافر .. خرعها ... المهم تمرون بلحظات ما تنسونها ... حتى لو تلعبون ظلمه....

كان .. فعل ماضي

- الكرم .... اعوذ بالله من البخيل .... اذا ما صرفت الفلوس على بيتك واعيالك وين توديهم !!! ...

( شغل اشتري جراغي ...اقط فلوس على مخيم الربع... والا

اسافر ..) ... يا أخي قطهم على بيتك ابركلك ...

الحمد لله ما يقصر علي بس لا أطلب منه وقت حاجتي :down:

- الصراط المستقيم .... خلك ماشي سيده دام تبي مرتك تكون بالمثل .... تصونك صونها .. تحبك حبها ..( يعني لا تخربط وتكام بنات وتخونها ) ..... ترى اكره شي اللي عيونه زايغة .

خلصت أيام عمري وأنا أطلب هالشي

- الشجاعه .... خلك ريال قول وفعل .. يعني لا تصير خيخه وما عندك كلمة ... مرتك تبيك وقت الشدايد وريال يسندها ويستر عليها .. لا تصير سكانه أمه .... والا كلمه اتييبك وتوديك .... وبعدين عيب تشوف زهيوي .. تقول حق مرتك انتي طقيه !!!

مع الكل إلا معاي :down:

- السنع ... يعني سواء مع مرتك أو عيالك ... مع اهلك .. اهلها .. خلك ذرب سنع .. اتعرف تتصرف تكلم ...مو كلا روحي انتي بروحج .. روح معاها .. موكلا مالك خلق شي .!!

:up:

- الصراحه ... شغل لف ودوران والجذب اللي ما له داعي .. عـــــــــــــــيب .. عيب .. مرتك بتكون عارفتلك يعني بتجذب على منو .. وبعدين الجذب حبله قصير ما ردها بتطيح عليك.

أبيع عمري بس يصارحني :up:

- العدل .... لا تمشي الامور على كيفك .. حط نفسك بنفس الموقف .. واعترف بالغلط .. وتأسف بعد .. كل شي له حد ..

أموت ويفهم هالحجي

الحياة الاسريه :

- لازم تطلع مع مرتك او انت وعيالك كلكم مع بعض .... تتغدون والا تتعشون بره .. او تودي اعيالك ألعاب .. تتسوق مع مرتك .. وتعطيها رايك ..

عجزت وأنا أطلب

- لازم تشتري أغراض الجمعية .. وتشتري احتياجات البيت .. هذا واجب عليك ..وتسأل دايما شنو يحتاجون ..

يقول ما يحب .. مو مشكلة عندي

- حلو إنك تدخل بهديه او شي حلوو حق مرتك ... وحلو انك تفاجئها بأشياء لا يمكن تتوقعها ... أو بالدوام مثلا طرشلها ورد في مناسبة معينه " اصلا راح تطير من الفرح " ..

بالرومانسية ما مثله أثنين .. بس بمزاجه

- حلو تلعب مع اعيالك ... تقضي وقت بالبيت .. لازم اتحس ان عندك اسره وانك زوج وأبو ..

شكله للحين مو مصدق

- خل عندك طولت بال حق مشاكل العيال ... والبيت ... وحاول تحلها بدال التذمر ..

:up:

الحياة الرومانسية :

- هذا أهم جزء بالموضوع كله ... خلك رومانسي ... والرومانسيه فــــــــن ... لكن مو صعب ... الرومانسيه بالكلمه ... بالحركه ... اختيار الوقت المناسب .. الأستعداد النفسي ... حتى المكان ...

:up:

- ترى الحياة الزوجية وبالتحديد... وقت ممارسة الحب ... دائما اللوم على المرأه وانها بارده ولا تعرف تتصرف وتوفر الرضا الكامل للزوج !!.... المرأه بطبعها حياوية .. والرجل والمعروف دايما هو المتحكم وسيد الموقف ... لابد ان يزيل الخجل ويعرف كيف يتصرف ...

:up:

- المصارحة حلوه في هذه الأمور ... حتى يسعد الاثنان معا ويتحقق الرضا الكامل .... وهذا ليس عيب ..

:up:

العيب الحقيقي : لما يستمر هذا الوضع البارد والتذمر ... ويلجا بعدها الزوج او الزوجة للعلاقات المحرمة والخرابيط .

:down:

- لابد من توافر التهيئة النفسيه والمكانيه والزمنية ... يعني شغل يلا بسرعه وأي شي .. ما ينفع .. لابد يكون في تقدير لوضع الزوجة وهل اهيه في صحة تساعد .

:up:

- إذا مرتك ما تلبسلك كلمها قولها فهمها قولها أحب جذي تسوين جذي ... ما فيها شي !! .... اشترلها مره شي على ذوقك .. بين لها بمجله مثلا أحب جذي .. حتى لو تسريحه معينه صبغه معينه قولها اللي يعجبك ..

مو مقصر :up:

- ترى مو معناته انت ريال معناته اتعرف كل شي وعندك ثقافة جنسية كامله ... وانك مو مقصر على مرتك ...لازم تسألها شنو تبي ؟ وشنو تفضل ؟ وهل اكتفت بالكامل ؟

:up:

- شيل من بالك الافكار الخايسة .. اللي مرتي ما تقول جذي ما تسوي جذي .. " أحس جنها مثل البنات اللي رايحين فيها " ..هذا ان دل دل على تفكيرك المصين ...

إذا تكلمنا طلعنا شينات :down:

- حلو انك تاخذ اجازه إنت ومرتك ... تسافرون مكان هادئ تغيرون جو .. مو كلا قاص عليها ومسافر مع ربعك ..( وماشاء الله كلا بتييب بضاعة والا تشتري سياره!! )

:up:

- ترى ما فيها شي اذا سويت فكره او مفاجاة ... وحطيت شموع وسويت ديكوريشن حلوو وقلت حق مرتك يلا شوفي ... عادي ترى هالسوالف مو بس حق الحريم ..

كان .. بأيام الخطوبة او بعد شوي والله ما أذكر

عش الزوجية :

- لازم يكون عندكم مكان ... صج يتسمى شقة او مكان ينسكن فيه .. غرف كفايه ومطبخ وتكرمون حمامات ..... اوكي بالبداية يمكن يكون هالشي تقزوره ... لكن الوحدة ما تقدر تستحمل أكثر .. يعني مسكنها في محكر !!

الحمد لله :up:

- بعدين اهتم اشوي في بيتك ..الاثاث .. الصحيه .. الكهرباء .. مو كلا انزين انزين وماكو شي ...!

:up:

- إدفع الايجار أول بأول ... مو ياهل انت بعد حسبالك مطوف مكالماتك ..!!

:up:

الاخلاص :

- بدونه الزواج يخترب ... اذا ما اخلصت حق بيتك ومرتك واعيالك ... بعد خلاص شنو فايدتك !!

حجي روايات .. على قولته :down:

- اذا تبي مرتك تخلص لك يا أخي اخلص لها ... عاملها بالمثل ...!!

:up:

- صلح الغلط بدال لا تعفس الدنيا !! مو حسبالك راحتك بره مع فلانه وعلانه !!

:up:

- وانت تمشي بالسوق مع مرتك اذا وحده فصعه تطالعك صد عنها .... مو طايحله مكاسر وجنه العيد ..

:up:

- وبعدين لا تقص على عمرك ... انا مخلص حق مرتي " خو بس فريند " ... لا يما هذا لما تتزوج امريكية قول هالحجي !!

وإلا تدري ... دامك فري جذي بعد ييب حق مرتك فريند !! اشمعنه انت ..

هذا على جثته .. وفيها قطع أرقاب :down:

- لما ما تقصر على مرتك وتقولها الحجي الحلوو .. وتروح اتكلم من وراها .. وتقول " انا ما قصرت معاها كل شي مسويلها " ... شنو هالحجي شنو هالتناقض ..!! ...يعني صج عايش حياة مزيفة .... انزين ماكو شعور !! والا يعني هذي يسمونها كماليات جدام الناس ومرتك !!

سنين واحنا نتكلم بهالموضوع وفي كل مرة سامحيني وآخر مرة :down:

كل زوج ينظر حق تصرفاته وشنو اللي سوا وشنو للحين ما سوا ... لا يقول ما أدري والا ما كانت عندي تجارب كل الناس جذي ... في شي اسمه سؤال في يسمع في يقرا ...

ويحاول يعدل الوضع ... لان خلاص تزوج وخصوصا لما يكون في اعيال ....

يعني حاول انك تعطي مو بس تاخذ ...

حلم كل زوجة وطلبها الوحيد

:up:



اسمح لي أخوي asa
أحيي فيك هالشجاعة اللي خلتك تنقل هالموضوع المهم
على الله كل الأزواج تقتنع فيه وتحاول تنفذه

الاخت الفاضله الشكر موصولا بردك والترتيب الممتااااااااااااز


وفقنا الله تعالى لما يحبه ويرضاه ولك خالص الشكر والتقدير واتمنى الخير للجميع:up:

الف شكر لك اخ"asa"

موضوع رائع

ان شاء الله يستفيدون منه المتزوجين

وعقبالنا بعدين

السلام عليكم ورحمة الله وبركاته

:clap:

موضوع رااااااائع.....لكن مين يسمع او يشوف :confused:


يالله الحمد لله

:shy::shy::shy:هاهاها

السلام عليكم ورحمة الله وبركاته

اشكرك الكريم

على مشاركتك القيمة

جزاك الله كل خير وبارك الله فيك

أدعو الله عز وجل ان يوفق جميع المتزوجين وان يبارك لهم ويسعدهم

اللهم آمين

تحيتي لك