والله اني محتاره من زمان ... ان شاء الله تساعدوني و اقرر و يرتاح بالي

1 .تؤيدون عمل المراه و الا لا؟؟ و ليش ؟؟ و خاصه اذا ما في مجال الا انها تشتغل اماكن مختلطه !!

شغلها ويا الرياييل بياثر على سلوكها ؟؟ الصراحه اشوف وايد بنات من اللي اشتغلوا تغيروا 360 درجه ، يعني قبل لا تشتغل كانت تستحي من الرياييل ، اذا تعاملت ويا ريال ترتبك بس مجرد ماانها اشتغلت استوت جرييييئه و عادي عندها ريال حرمه كله واحد ،،، وهذا ما لا اؤؤيده فهل كل الموظفات هكذا؟

بالنسبة لي أؤيد عمل المرأة إذا كانت حابه تشتغل وتقضي وقت فراغها .. او ذا كانت محتاجه .. والشغل مب عيب ..

أما إذا كان الشغل في أماكن مختلطه .. طبعا الله سبحانه نهى عن هالشي .. بس لو ما حصلتي شغل وحالتج الإجتماعية تتطلب انج تشتغلين .. حاولي تشتغلين وتكون شخصيتج جدامهم قوية يعني ماشي أي مزح أو أي استلطاف ..يعني لا تفتحين المجال أنج اترمسينهم او يرمسونج عن حياتج فقط في حدود العمل ...

بالنسبة للبنات ورايج فيهن .. فأقولج هالشي بيستوي أكيد .. إذا تعودت الوحده على هالناس . خلاص بتشل الكلافه بينهم وهالشي غلط طبعا .. المفروض الوحده تكون رزينه وبالذات في هايالأماكن


2 .و اذا كنتي تدرسين مسائي ، بتفضلين الشغل في الصباح و الا لا ؟؟ و هل يمكن عملها يؤثر على دراستها او علاقتها باهلها لضيق الوقت ؟؟ و هل بياثر على دينها و عبادتها ؟؟

أختيه بالنسبالي ما كنت أدرس مسائي .. وأنا أفضل الشغل يكون الصبح أحسن للحرمه ..

وبالنسبة للتأثير .. بالعكس الوحده اتروم اتنظم وقتها .. مره للدراسه ومره للأهل .. وأنا أعرف بنات وايدات معانا في الجامعه يشتغلن ويدرسن ..والحمدالله امنظمات حياتهن ...

أما بالنسبة لدينها .. فأقولج يا أختيه أنه الدين بيكون أول شي .. يعني اتركي امور دنياج وأدي عباداتج وين ما كنتي .. ولا تودرين أي فرض من فروضج ..

3 .هل معاشك سيكفي لتكاليف الجامعه و فاتوره التلفون و مصاريفج الخاصه و اذا سافرتي عليك دفع مصاريفج ، وستضطرين لشراء سياره و دفع اقساطها؟؟؟؟

ابصراحه أشوف انه كل هاذه طبعا ما بيكفي .. لو قدرنا أنه معاشج في حدود 7000 درهم .. وانتي احسبي معاي .. مثلا5000 للجامعه .. 300 للتلفون .. ومصاريفج الخاصه في حدود 1500 .. وهاذه غير وغير الأحتياجات إلي انتي تبينهن ... يا اختيه الحينه 10000 ما اتسوي شي ... ولكن ..؟؟؟؟ انتبهي لكملة لكن .. إذا حاولتي اتحطين ميزانية واتخططين قبل ما تصرفين أي شي .. أكيد بيكفي وبيوفي ..



4 .و هل انتي من الاساس تؤيدين السواقه ؟؟؟

بالنسبالي أنا أسوق ... أول شي لأني محتاجه السياره وبالذات لإني ادرس في الجامعه فمضطره أسوق لأنه ما في حد بيتفيج كل يوم يوديني ويبني ... ما أنتي إذا كنتي محتاجه فسوقي أحسن من أنج تركبين مع دريول .. لكن لو كانت متوفره عندج المواصلات فما يحتاي اتسوقين ..


اختيه الغاليه ... الشغل مب عيب .. وابصراحه في زمانه هاذه الكل محتاي انه يشتغل .. حاولي اول شي انج تشتغلين في مكان كله حريم .. يعني دوري هالأماكن وقدمي عليها ... وإن ما حصلتي وحصلتي في مكان مختلط .. فحاولي مثل ما قلت لج أنه تكون شخصيتج قوية لا تاخذين وتعطين مع الرياييل وايد ... والله يوفقج ...:up:

اؤيد عمل المراة وايضا السواقة

:cool2:

انا أييد عمل المراءه


بس اذا مش مجبوره مب لازم تشتغل في مكان خلط
دور مكان منفصل احسن دراء للشبهه وكلام الناس
بعدين الخلط يغير الوحده يخليها فري وعادي عندها تسولف مع شباب بصراحه مو حلو بعدين شحادج دوري شغل كله حرريم

اما عن المصاريف يعتمد على المعاش وطريقة صرفج الخاصه

اما اذا بأثر على الدراسه اكيد بيأثر هاي شي طبيعي عمل صبح ودراسه بليل واذا متزوجه الله يعينج مافي وقت لريلج واذا عندج عيال المصيبه اكبر
بياخذ من وقتج واايد هاي شي طبيعي
وايد بتتعبين

اما عن السواقه انا مايدها كلش

وكل وظروفه وكل وبيئته
واذا مو مجبوره وعندج اهل يصرفون عليج او زوج مقتدر ادرسي بس ولاخلصتي اشتغلي

السلام عليكم ورحمة الله وبركاته

أهلا بك أختي فيف...

بصراحة سؤالك صعب...لأنه الواحد ساعات يعمل أشياء يضطر يعملها...بس هو ما يكون راضي عن نفسه بصراحة...

يعني لو شفتي هذه الفتوى للشيخ صالح العثيمين...على هذا الرابط...

من هنـــــا

و شوفي هذا الموضوع اللي يوضح خطر عمل المرأة...

من هنــــا

بس عن نفسي...أنا أعمل...و عملي مختلط...و قد حاولت جاهدة...بكل ما أستطيع...و ما زلت أحاول أن يكون عملي منفصل...و لكن هذا غير متوفر في مجال تخصصي..و مؤخرا...بدأت أبحث في غير مجال تخصصي عن عمل منفصل...

لكن أيضا هذا له شروط...يعني أنا أشوف سيدات صارت معاملتهم مع الرجال كإنهم إخوة..طول اليوم يحكوا عن حياتهم...و يستشيروهم...و يطلعوا مجموعات يحتفلوا بعيد ميلاد أحدهم...الكلام صار عادي...و الضحك صار عادي...و ستر الحياء كلها راحت...

هذا كله خطأ كبير أختي...يعني عن نفسي ما لي علاقة بيهم إلا في حدود العمل...ما يعرفوا شيء عن حياتي الخاصة...ما في ضحك و لا كلام من غير داعي...لأني أتذكر دائما أنه كما تدين تدان...تخيلي جات واحدة و ظلت تضحك و تتكلم مع زوجك في العمل ؟ أكيد راح تزعلي...لذلك اللي ما ترضيه للناس ما ترضيه لنفسك...

بالنسبة للسواقة...في الأول ما دوّرت على الرخصة...بعدين قرفت و تعبت من التكاسي...ما قدرت أتحمّل بصراحة...و مواعيد عمل زوجي غير مواعيد عملي نهائي...لأنه دكتور و شغله شيفتات...

لذلك...كان لابد من الرخصة و السيارة...و أنقذوني من أشياء كثير بصراحة...و لو كان زوجي فاضي...يبقى هو اللي يوصلني علطول...يعني أطلع بس كام يوم في الأسبوع لما يكون زوجي مش موجود...و الباقي هو يطلعني بصراحة...الحمد لله رب العالمين...

هذا ما حدث معي أختي...نقلته لك كاملا...

الله يوفقك يا رب...صلي استخارة و الله الموفق...

السلام عليكم ورحمة الله وبركاته..

تؤيدون عمل المراه و الا لا؟؟ و ليش ؟؟ و خاصه اذا ما في مجال الا انها تشتغل اماكن مختلطه !!
أنا أؤيد..
مثال: انا اشتغل لاني ما احب قعدة البيت والملل انا شغيله واحب اتحرك واسوي شي وايد احب الشغل.. وطبعا كل وحده تشتغل على حسب الظروف..

شغلها ويا الرياييل بياثر على سلوكها ؟؟ الصراحه اشوف وايد بنات من اللي اشتغلوا تغيروا 360 درجه ، يعني قبل لا تشتغل كانت تستحي من الرياييل ، اذا تعاملت ويا ريال ترتبك بس مجرد ماانها اشتغلت استوت جرييييئه و عادي عندها ريال حرمه كله واحد ،،، وهذا ما لا اؤؤيده فهل كل الموظفات هكذا؟

اشتغل في مكان مختلط بس اخلي شخصيتي قويه يعني ما اخذ واعطي واضحك واتمادى.. الشغل عندي شغل.. وما عندي وقت للمزاح وحتى اذا اي حد تمادى اتركه او ارد عليه بجد.. وكل وحده وشخصيتها ومن المكان الي طلعت منه ومن التربيه الي اهلها ربوها.. والي تفصخ الحيى والله هاي وحده ما تستحي لان الحياء من الدين..

و هل معاشك سيكفي لتكاليف الجامعه و فاتوره التلفون و مصاريفج الخاصه و اذا سافرتي عليك دفع مصاريفج ، وستضطرين لشراء سياره و دفع اقساطها؟؟؟؟

انا اشتغل لاني اساعد زوجي لبناء البيت.. طفرت من قعدة الشقه وليش اني احب الشغل..

و هل انتي من الاساس تؤيدين السواقه ؟؟؟

اؤيد وانا اسوق لان محد يتفيج لج وزوجي دوام عمله في منطقه ثانيه في العين وانا اشتغل في دبي.. وانتي جيه تخدمين نفسج بنفسج وما تطلبين من اي حد ولا تسمعين مذلة حد..

شكراً حبيباتي عالردود

نعم وبكل تأكيد

عادي أختي ممكن الوحدة تشتغل بمكان مختلط لكن حاشمه عمرها يعني مو فري وما دام الوحده تشتغل تبي حد يشلها ويرجعها فمن الحين اللي راح يكون فاضي لك غير نفسك تتعلمي سياقة وتكون عندك سيارة.

ميزه السعوديه ان مافيها اختلاط بالعمل الله يخليها لنا يارب:up:

السلام عليكم ورحمة الله وبركاته

الاخت الغالية فيف والعزيزة

تؤيدون عمل المراه و الا لا؟؟ و ليش ؟؟ و خاصه اذا ما في مجال الا انها
تشتغل اماكن مختلطه !!

عزيزتي عن رأيي لا أؤيد عمل المرأة اذا كانت أم ولها ابناء بتاتا الا اذا كانت
ظروفها تحتم عليها العمل .

وبالنسبة للأماكن المختلطة أؤيد اذا كانت مكاتب نسائية يعني الاحتكاك

سيكون بنسبة قليلة جدا تستطيع من خلالها التحكم بسلوكياتها .. وفعلا

عزيزتي نجد فئة كبيرة جدا جدا جدا وضعي خطين حول هذه العبارة من

الفتايات يكن سلوكهن قبل العمل ملتزم وبعده لا حول ولا قوة الا بالله .

وهذا ما لا اؤؤيده فهل كل الموظفات هكذا؟

طبعا لا بس معظمهم وعلى فكرة ترجع وتقول انا أكلم فلان على انه أخوي عادي ما فيها شيء والله المستعان

اذا كنتي تدرسين مسائي ، بتفضلين الشغل في الصباح و الا لا ؟؟ و هل يمكن عملها يؤثر على دراستها او علاقتها باهلها لضيق الوقت ؟؟ و هل بياثر على دينها و عبادتها ؟؟
لا أفضل العمل والدراسة الا اذا كانت منازل او انتساب وليس لضيق الوقت

فقط بل للجسد عليك حق فالصباح عمل وتخرجين من العمل الى الدراسة

صعب ولكن يعتمد على طاقة الانسان فالله لا يحمل الانسان ماله طاقة له

في شيئ ..

و هل معاشك سيكفي لتكاليف الجامعه و فاتوره التلفون و مصاريفج الخاصه و اذا سافرتي عليك دفع مصاريفج ، وستضطرين لشراء سياره و دفع اقساطها؟؟؟؟

عزيزتي بالتصرف الصحيح والانفاق المتزن سيكفي ان شاء الله حتى ولو كان الراتب لا يتعدى 3000 درهم

و هل انتي من الاساس تؤيدين السواقه ؟؟؟

نعم اويدها بشدة ولكن فقط لقضاء حاجياتك وانهاء اعمالك الضرورية

وبعدها stop لأن علم وما فيه احد ما يبي يتعلم ، ابسط شيء بتروحين

المستشفى ...

وبارك الله فيك وسدد خطاك

أختك العتب

عن راي الشخصي يا اختي العزيزة

المراة مكانها ببيتها رغم اني اشتغل!!

وبصراحة ندمت اني قدمت اوراقي للعمل لانه مكان عملي اولا مختلط


ثانيا المراة ما تتحمل البهدلة

البهدلة للرجال مو للحريم

عن نفسي متضايقة كثير من حركات المدراء

اشتكي من المدير اكثر من شكوتي من زملائي

الحمدلله زملائي حاطة خطوط حمراء لايمكن يتعدوها وهذا طبعا يعتمد على حسب شخصية المراة نفسها


اسال الله العظيم رب العرش العيظم ان يزوجني رجل يسترني ماديا ومعنوي

بحق هذا الشهر الفضيل

بالنسبة للسواقة..انا اؤيد سواقة المراة اذا محد فاضيلها يقضي حاجاتها

على الاقل احسن من الركوب مع السائق الاجنبي وبهدلة التكاسي

مشكورة عزيزتي على الموضوع الاكثر من رائع

بالنسبه لعمل المرأة انا مع عمل المرأة في الاشغال اللي مافيها شفتات ولا اختلاط
الا اذا كانت المرأة محتاجه فلا مانع :smile:

اما عن السواقه انا ضد تعلم المرأة للسواقه :down::down:

هذا رايي ولج التحيه حبيبتي :shy:

السلام عليكم ورحمة الله وبركاته

أختي ريوووف صدقتي بالسعوديه العمل مو مختلط ولله الحمد

لكن عندك الطب والتمريض والتغذيه أختلاط :pain:

وأكيد كل وحده تعمل هي توصل رساله ولازم ماتخرج عن هذا الأطار وتكون في كامل حشمتها ولها حدود في التعامل

وأنا ماكان عندي مانع في الأختلاط أبداااا..؟؟

لكن ..!! بعد الي شفته غيرت رأي شوي لأن طبيعة العمل المختلط تحتم علينا الأحتكاك بالجنس الثاني وهذا شئ يضايقني جدااا:down:

لكن هذا التخصص الي حبيته وتمنيته ولابد أتحمل :cool2:

ولكم مني كل التقدير والأحترام

مملكة القلوب

الاختلاط انا ضده مهما كان الشيطان شاطر واذا انتي واثقه من نفسك اكيد ما راح تثقين في كل اللي حولك .........
اما السواقه فاانا اؤيدها وبشده مع اني سعوديه وما اسوق بس على الاقل لو اسوق افتك من الذل اللي مشغول لا يوصلني واللي يشوف ان مشواري ماله داعي وبعد الحاح طويل ادق على التكسي وطول الطريق اكون خايفه منه يسوي لي شي .......

مهنة التدريس اكثر مهنة تناسب المراة

ما فيها اختلاط والاجر والثواب فيها كبير والله يعين المعلمات

بس لو فرضت الظروف على اى وحدة تشتغل فى مكان اختلاط لازم تراعى ربها وتحط الخطوط الحمر بينها وبين زملاء العمل