ياجماعه اذا انا غلط صححولي....؟؟؟

والله صدق ياجماعه اختلاف الراي لا يفسد للود قضيه....
بس الغاليات انا استفسر ما اهاجم حد... بس والله صدق بعض الاحيان يكون العطاء اكبر من الاخذ بوايد ....لدرجه انه الواحد يخلي الحرمه مكام الريال والعكس....
ياجماعه صدق تهادوا تحابوا... بس بالمعقول ...مب انا اروح واحجز الفندق بحسابي وفستان العرس والشبكه ومصاريف السفر لاني اغنى بوايد عن الريل .... ساعدي ياعمري مب غلط ...بس ما اتكونين بنك مفتوح لحسابه الشخصي.. اذا انتي موافقه عليه الله يوفقكم ان شالله بس انتج تصرفين على كل شي هذا اكبر غلط...شو رايكم اني اعرف وحده تدفع مصاريف الشقه الي هيه مع ريلها ساكنين فيها بحجه انه ريلها مب طايع يدفع...ولا صارت تدفع مصاريف البقاله وفاتوره التلفون وغيره...هذا حق يعني ...هذا كله ماكان من البدايه... بس مرات يقولها انا هذا الشهر ما عندي ادفعي انتي ...وهيه الغشيمه اتحبه وتدفع..وهو يكدس الفلوس ...واخرته شو ...تزوج عليها بفلوسها....هذا شو ما كان يحبها وتحبه..ومتزوجين عن حب وغرام ....
ياعمري اهدي زوجتج اغلى الهدايا واحسنها بعد... انا والله ما تطوف مناسبه وما اتكون هديتي جاهزه من شهر ...وبعد بدون مناسبه اهديه بعض الاحيان... لاكن هو يقلي وين هديتي والا تعادلي ادفعي انا وانتي نفس الشي ..لا والف لا بعد... ليش الاعتماد الكلي لا....هذا الي اقصده....
حاسبوا الريايل ترى مب مثل الحريم
ورد على الي اعترضوا على الريال الي طلق زوجته اول يوم عرس بسبه رقصها...هو صدق ماعنده سالفه ...بس شفتوا كيف يتصرف بعض الريايل ...يتصرفون بدون عقل بعض الاحيان وهذا الغلط الي فيهم..

....

شوفي من ناحيه حجز الفندق طبعا عليه هو الرجال وهو اللي يسويها

بس مااتوقع فيه مانع لو جبت له هديه بيوم الزواج هو قدم لي صباحه

وانا اقدر له هديه بسيطه بالعكس مااحس فيها شئ وانا سويتها

رغم اني متزوجه من 3 سنوات ... والحمد لله انبسط فيه واجد وللحين محتفظ فيها ....

:clap: كلامك صحيح 100%

عندنا ولله الحمد كل شئ على الزوج واهله من دفع المهر وتأثيث البيت وحجز الصاله وتوابعها


يعني انتي :up: صح يالغاليه


مع التحيه

وعليكم السلام ورحمة الله وبركاته

ماشاء الله عليك أختي شهادة

كلامك عين الصواب

الله يخليك ويبارك فيك يا رب:smile:

لو يطلب الكرة الارضية تحت تأشيرة من عيونة أجيبها له ...

أتوقع أنه ماهو حرام ولا عيب أن الوحدة تعطي زوجها في زواجها هدية لان هذا شي يفتخر فيه الزوج ان الزوجة تذكرتة في عز زحمتها بصراحة مو كل مناطق السعودية فيها هالعادت والتقاليد التي مأنزل الله بها من سلطان وأتوقع ان لو أملك الدنيا بمافيها تحت رموش زوجي ..... بس بصراحة ماعجبني كلامك ألا في شي واحد أن الزوج عليه تكاليف الزواج من وألى ....
وهذا اللي طلق زوجتة أكبر بهيم في العالم ...
على فكرة هذا الكلام اللي أحسن فيه حاليا يعني ماراح تغير وجه نظري ...

وأختلاف الرأي لا يفسد للود قضية ...

ليالي الغرام ..... اختي انتي ليش معصبه.... انا ما تكلمت عن هديه الزوج في ليله العرس بس ...ليش تاخذين المساله بحساسيه زايده.... انا تكلمت عن اشياء المفروض انه الزوج يتحملها اكثر من المراه وكانت الهديه مجرد مثال مش موضوع.... هدي اعصابتج الغاليه....وان شالله الكره الارضيه تحت امر زوجتج اذا طلب .....بس لا تزعلين . وعلى فكره حبيبتي وجهه نظر المخطوبه والمالكه غير تماما عن المعرسه ... والي خاضت الحياه مع الزوج ...

شهادة تسلمين حبيبتي على طرح هالموضوع للمناقشة

انا معاج في كل كلمة تقولينها .. بس للأسف احنا عاداتنا الزوج يدفع المهر يعني بحدود 100 الف وكل التجهيزات على أهل العروس .. سواء الزهبة ولا فستان العرس وغير فستاين العزايم بعد العرس وغير القاعة ومصاريف المعازيم .. والحياة غالية الصراحه ..
لو بايدي جان خليت القاعة عليه احسن ..
وحدة من قريباتي تقدم لها واحد من اهل صديقتها .. للأسف كان زواج فاشل من الأساس .. مسكينه قص عليها وهي ما خلت شي ما سوته عشانه ... غرقته بالهدايا من ايام الخطوبة .. حتى المهر طلبت شي بسيط جدا معنه قادر يدفع المهر العادي .. وسارت اتسلفت حق مصاريف العرس .. والنتيجة في النهاية عاملة اسوأ معاملة ما وفر لها بيت بروحها .. ويابت طفلين والحين يالسه مطلقة عليها مسؤولية كبيرة ..
وغيره وايد عندي بس ما ابي اتكلم وايد اخاف تملون


وشي ثاني بعد هدية ليلة العرس المفروض تكون على المعرس .. في نظري ان معظم الريايل ما عندهم أسلوب التهادي اللي اشوفه حوالي .. الا نادر منهم تشوفينهم يهتمون .. والمفروض الزوج يهدي زوجته في ليلة عرسه .. لكن اذا ما كان يوعي هالشي .. احس مادري بيحز في خاطري .. وانا عن نفسي طاف ما بهديه :o


وأشكرج مرة ثانية أختي على طرح الموضوع

من ناحية حجز الفندق او الصالة اكيد بتكون من صوب الزوج..
وبالنسبة للهدية تراها ما فيها شي ابدا ان العروس تهدي زوجها هدية بليلة الخطوبة او العرس بالعكس هذا شي حلوو..يعني مو في كل شي المفروض البنت تكون خجولة والهدية ما فيها اي نوع من الجرأة او عدم الرزانة في نظري.. وبالعكس في بعض الرجال يحبوا ان زوجاتهم يعبرون لهم عن حبهم بأي طريقة وما يحبون الخجل الزايد عن حده ..والمفروض ان المرأة مع زوجها ما تكون خجولة المفروض تخلي الخجل والحياء لبرى البيت يوم هي مب معاه..مو معنى كلامي انها تكون قليلة حياء معاه بس اقصد انها تتخلى شوي عن حياءها وتعبر له عن مشاعرها واحاسيسها تجاهه ترى هذا يسعد الرجال مووت..

يعني كلامج فيه شوي من المبالغة اختي شهادة من وجهة نظري..واتمنى انج تتقبلين كلامي بصدر رحب حبيبتي..اتفقنا؟؟؟؟

تحيااااتي:smile:

السلام عليكم ورحمة الله وبركاته

هذا يعتمد على العادات والتقاليد

احنا عندنا الزوج يدفع المهر والزواج على العروس حسب الرغبة ..........


وبعض العوائل تفرض فرض انه العريس اللي يقوم بالزواج فاذا رفضوا


فايش الحل هو انه تحجز هي القاعه افضل من انها تتطلق اوو تروح على

بيت زوجها من غير فرررح


__________________

والله كلامك صح ومضبوط ميه ميه:up::up::up:

كاتب الرسالة الأصلية : قمـ 14 ـر
الصاله والفندق والسفر وكل تكاليف العرس اكيد راح تكون على الزوج

لكن مافي اي مانع اذ اهدت الزوجه زوجها في اول يوم، يعني يمكن وهي رايحه تزهب عجبها شي واستحلته لزوجها مافيها شي بالعكس فكره حلوووه.. ومافيها اي نوع من الجرأه عسب تقولين وين حيائها..



راي خطأ يحتمل الصواب وراي غيري صواب يحتمل الخطأ

والسموحه

مثل راي اختي قمـ14ــر

مشكورين الغاليات على ابداء الراي ...وكل واحد له وجهه نظر مختلفه عن الثاني .... وفي الاخير الله يستر على كل وحده مع خطيبها او زوجها ان شالله يارب

كلامج صح 100 % .........
خصوصا إن الريال لو تعود على
شيء من البدايه صعب إنج تغيرينه
بعدين ........ يعني هو راح يتريا
كل شيء منج ..........

إختي فعلا فرحت يوم قريت كلامج لنه هذا هو رايي بس في الفتره الأخيره قمت أشك...أنا مش مرتبطه بس عندي صديقات و أهل مالجات...استغرب من اللي يسونه في فتره الملجه...ويوم أسألهن يقولن عادي...الريال يستانس....بس أنا الصراحه مع كلامج...و أشوفه قله حيا منهن....


شكرا إختي على الموضوع و يزاج الله خير

الحين نقلبت الايه استغرب من بعض البنات اللي يقولون سوينا وحطينا وجبنا بالقاعه في ليله عرسي :s2
لانه عندنا كل شي على الزوج ولو ماكان قادر انه يسوي عرس مو ظروري يسوي حفله صغيره نسميها استقبال محفوفه ومن غير طق ولا رقص تفي بالغرض واذا على سالفه الهديه انا اشوفها فشله ان المراه تهدي زوجها في الصباحيه او الدخله بدال ماتكون منه اهو تجي مني انا وبعدين على راي بعض البنات لاحقه على توزيع الهدايا ان شاء الله :D2

وعليكم السلام ورحمة الله وبركاته

ماشاء الله عليك أختي شهادة

كلامك عين الصواب من ناحية حجز الفندق او الصالة

ومن ناحية هدية الزوج انا اشوف مافيها شي

كل وحدة لها وجهة نظر ما ادري لية التعصيب كلة

وانا يوم زواجي كنت شارية مع دبشي طقم عطور لزوجي وساعه بعد

لانة ماقصر معي ايام الملكة ويوم الصباحية أهداني تعليقة الماس:shy:

وأرجع وأقول اختلاف الراى لايفسد للود قضية يا بنات

تحياااتي

لي عودة للنقاش

:clap: :clap: تسلمين اختي على هالموضوع :clap: :clap:
عندنا الريال عليه كل شي طبعاااا ممكن يخير العروس بالحجوزات والترتيبات وهو عليه الدفع بس هي تدفع مايصير!!!
والي ماعنده كيف يبا ياخذ بنت الناس ببلاش!! وكيف يرضى على نفسه ان العروس واهلها هم الي يصرفون على العرس اكيد بيحس بالنقص ومايقدر يحط عينه في عين اهل زوجته وبيكون مكسور جدامهم...
المفروض انها يا ترضى بالي راح يحطونه في العرس او تأجل الموضوع لين يقدر يدبر روحه...
والهديه الصراحه مادري انا ماهديت ريلي بس في بنات يهدن مع انه احلا ان الزوج هو الي يهدي (الله يعين الرياييل) :D2

:shy::shy::shy::shy::shy::shy: مشكورين ياعمري على المرور....وكل حد له وجهه نظر مختلفه....واختلاف الراي لا يفسد للود قضيه ان شالله

الصاله والفندق والسفر وكل تكاليف العرس اكيد راح تكون على الزوج

لكن عن الهديه اعترض معك لانك صراحه كبرتيها مره
اصلا من باب الحياء فالزوج جاب لك شبكه وجاب لك هدايا المسكين حتي هلك اخرتها
تدخلين عفشك بيته ويشيله موكب سيارات مافيه هديه ولو بسيطه تفرحين بها قلبه
اعتقد الي تدخل عفشها علي زوجها بدون هديه مافي فوجها حياء