السلام عليكم
كتب الكاسر عندما كان عضوا أهم الأخطاء الشائعه لمرتادي المنتديات نتمنى من الجميع قراءته والعمل على التعاون مع الكاسر العضو.
فيه ناس منزله مواضيع اش حلاتها ... تتمنى كل الناس تقراها .... بس المشكله ان اصحاب المواضيع يموتون مواضيعهم بأنفسهم .... مايردون مره ... يجمدون كلش ... يخلونك تحس ان رايك مو مهم ومال أمه داعي.
فيه ناس بس مطامر بين المنتديات .... وهاتك ياقص ولزق ... نفس الكلام بنفس الأخطاء الإملائيه والتنسيقيه ..... لا والمشكله بعضهم ما يقول منقول ... الأمين منهم يقول ... بس ما يقول رأيه هو في الموضوع .
فيه ناس ما هي حاطه هدف من مشاركتهم في المنتديات ... ما عنده فكره عن نفسه ..عن طريقته في التفكير ... مبادئه ... وهذي أهم شغله .. منها الواحد يقدر يحدد طريقة ردوده ومشاركاته.
فيه ناس تغير ... (من الغيره) ... ياليت يبطلوا هيك شغلات واذا انهم تمام .... يسوون أحسن من اللي يغارون منهم.
فيه ناس تزعل بسرعه ... ما تأخذ الأمور بهدوء .. وتفترض حسن النيه .. وتفكر في الموضوع زين ... لا يزعلون ويردون بنفس اللحظه ... يطلع الشرر من عيونهم ويبان في كتاباتهم... طيب حافظ على هدوئك او أجل الرد .. حافظ على نظرة الناس لك... احترامك للأخر هو دليل احترامك لنفسك.
فيه ناس تكتب لهم شكل ... يفهمونه شكل تاني .... ليش مدري.
فيه ناس كل مشاركاتها سطر ونص ... مليانه أخطاء إملائيه ونحويه وتنسيقيه ... وكلش ... طيب كيف ممكن نستفيد منهم.؟
فيه ناس كثير .. ما تقراء الموضوع ... تطمر على إضافة رد على طول ... وإن قرت الموضوع ما تقراء الردود اللي عليه .. وبرضه يرد.
فيه ناس طيبه مررررره ... تنخدع بسرعه .. المشكله انه على حساب نفسها ومستقبلها.
فيه ناس تكتب مواضيع وكل يوم تشوف الردود اللي عليه ... بس ما يردون .. ما يعبرونك مررره ... طيب قل كلمه صغيره ... والشاطر من اللي ردوا يفهم انه شخص غير مرغوب فيه .. عشان ما يتوهق ويعلق على مواضيع ها الناس مره ثانيه.
فيه ناس ما تحبك مررره ... كذا لله ... يا اسمك مو زين يا توقيعك ما جاز لهم ... يا ... يا... وأحيان كثيره بسبب سوء الظن يحسبونك تقصد شئ ما قصدته... المشكله انهم ما يقولون لك عشان يريحون أنفسهم ويريحونك ... ويمكن تبريرك يلغي الغشاوه الموجوده .
والخاص موجود ... ممكن تقول رأيك بكل بصراحه بس لازم يكون بمنتهى الأدب ....
فيه ناس كل مشاركاتها بالعاميه ... طيب خلوها نص كذا ونص كذا ... كثيره ..؟ طب ثلثين عامي وثلث عربي مرتب ... خلوا مستوانا يطور وحنا نقرأ لكم ... نبي نشوف كلمات راقيه وصياغات احترافيه ... من جد نبي نتعلم من بعضنا ...
لازم بعد شهرين من الآن إن شاء الله يحس كل واحد فينا إن مستواه في الكتابه تطور .. طريقة تفكيره في الأمور تحسنت .... عاداته السيئه تغيرت ... قرائته للنصوص سارت متعمقه... من جد طفشنا من سطحية التفكير.
فيه ناس يصورون أنفسهم للبقيه .. انهم ما يركعون لله ركعه .. من جد غريبه.
فيه ناس مافيه وحده من مشاركاتهم ذكروا الله أو ذكروا بالله .... والله من جد ما يسير.
فيه ناس متجهمه ... عبوسين ... عمليين زياده ... ما مره تشوف البسمه في كلامه.
فيه ناس وجودهم مثل عدمه .... ما يشاركون ... وان شاركوا ما ردوا.
فيه ناس إذا اختلفوا تبان معادنهم الطيبه .... وفيه ناس بالعكس.
فيه ناس يسجل من هنا ويبداء ينتقد من هنا .... وينزل مشاركات من هنا .. كثير مرات ها المشاركات على (جمالها) ما تتماشى مع توجه المنتدى ... ياليت يعطون انفسهم فرصة اسبوع يراقبون المواضيع والردود ويفهمون التوجه العام للمنتدى اللي بيشاركون فيه ... وبعدين يشاركون.
فيه ناس تكتب وما تراجع ابد لا قبل ما تعتمد الموضوع ولا بعد ما تعتمده ... نسيوا ان سر الكتابة الزينه هو المراجعه .
فيه ناس رازين ماسنجراتهم ويقولون نبي نتعرف .... والله سالفه... !!!
انا عندي لهم دعاء على ذمة راويه ... انه اذا استمر عليه الشخص ثلاث أسابيع بنيه صادقه .... يجي له زبون (قصدي خطيب) على كيف كيفه..
بعلمكم به ... بس من هنا الى هناك ... زينوا النيه.
فيه ناس ما ترغب في تعليق الرجال على موضوعاتها .. عشان كذا لازم يكتبون في بداية موضوعاتهم التعليق للجميع والردود للنساء.. أو الردود للنساء فقط. أو "أرحب بردود الرجال وأعتذر مقدماً عن الرد عليها"
وأخيرا من عندي (الكاسر العضو) ... فيه ناس راح تزعل علي ... على بالهم أقصدهم ... بس الحقيقه أني ما أقصد أي أحد ... بل بالعكس اعتبر كل الأعضاء بهذا المنتدى اخوان أشقاء وأخوات شقيقات .. اتمنى اشوف مستواهم فوق ... مره فوق.
أنا أقول .... فيه ناس وفيه ناس ... وفيه ناس أغلى من الألماس.
نقاط متفرقه ...
يرجى عدم المشاركه بما مجموعه موضوع أو اثنين خلال اليوم الواحد.
هناك مسابقه للأعضاء الجدد في ركن التهاني مع المواضيع المثبته هناك.
من اساسيات اهداف أي مشترك في أي منتدى هو تطوير الذات.
ومن دلالات احترام العضو لذاته هو نوعية واخراج مشاركاته.
ومن دلالات احترام العضو للآخرين تتبع مواضيعه والرد على من علق عليها.
ومن دلالات زود تألق العضو .. الرد على المشاركات وفتح محاور للنقاش وليس للجدال... وان لم يكن ..فالبعد عن الجدال أقصر طريقه لكسبه حتى لو لم يقتنع الشخص بالفكره لا شكلا ولا مضموناً .
.............
ويبقى الإحترام ما بقي الحياء
ملاحظه...
لتلوين مشاركاتكم وتغيير الخط اكتب مشاركتك او ردك كاملا ..
ظلل النص بأكمله .. اختار الخاصيه الأولى مثلا حجم الخط (4) مثلا
اختار الخاصيه الثانيه (وبدون ان تظلل مره أخرى) .. وهكذا
اختار الخاصيه الأخيره اللون (اخضر )مثلا... يعني التظليل في المره الأولى فقط.
لابد أن يكون إختيار خاصية اللون آخر شئ... والله أعلم.
أخطاء شائعه ... لا تقع فيها...
ا
05-10-2002 | 12:27 AM