يا بنات والله اني تعبانه ومضايجه وفيني هم ما يعلم فيه الا الله

قبل 5 أسابيع كان موعد زفافي ،،، كنت من أسعد الناس ولكن في شغله كانت مضايجتني وهي إنه يدتي ما راح تحضر العرس ،،،

قبل اسبوع من العرس تعبت وخذوها على مستشفى خليفه ،،، وكان متابع حالتها ولد خالتي ،،والجميع منشغل بتجهيز العرس على أساس أنه الي تعاني منه مجرد التهابات بالرقبه ،،وجا موعد العرس والكل حضر ما عدا خالتي وولد خالتي الي ملازمين يدتي ،،

انا بعد يوم سافرت شهر العسل وانا هناك سمعت انه يدتي راح اتسافر لندن لأنه نتيجة التحاليل أثبتت أنها تعاني من التهابات شديده ولازم تنعمل لها عمليه،، وفعلا انعملت لها العمليه على يد أمهر الجراحين وتكللت العمليه بالنجاح ،، ولكن اضطر الدكتور انه ايشيل الاحبال الصوتيه يعني يدتي صارت ما تقدر تتكلم الا عن طريق جهاز معلق على رقبتها ،، فرح الجميع لنجاح العمليه ،، وقالوا لنا انها راح اتضل اسبوعين تاخذ علاااج وراح ترجع بالسلامه ،،

مر شهر واحنا ننتظر رجوع الوالده الغاليه الكل يحبها عندها 5 بنات ومن ضمنهم أمي وايضا لها 4 خوات وامها عايشه للحين ،، احنا الحمدالله عيلتنا كبيره ومتماسكه ودايما مع بعض انا عني عشت بيت يدتي أكثر مما عشت في بيتنا ،،

الي مسافرين مع يدتي يبون يرجعون على أساس أنه الدوامات راح تبدأ وعددهم 6 أشخاص ،، وقرروا تروح الدفعه الثانيه وهم أمي وعمي الي ماخذ خالتي وولد خالتي وزجته والله انه الكل يتضارب عسب منوه الي لازم يروح اخواني وحتى انا كنت أبا أسير ،، تخيلوا وصل عدد الي يبي يروح فوق ال10 أشخاص ،،،

ولد خالتي الي مع يدتي قال إنها راح اطول ويمكن اتظل 3 شهور ازياده وقال في كل شهر احد ايي ،، كان يسكتهم لين يحين الموعد الي راح يصارحهم بالكارثه ،،،

يوم الخميس الماضي كنت قاعده بيت يدتي أم أبوي ،،، عمي ريل خالتي كان موجود واهو من ضمن الي راح يسافرون لندن وكان يسولف وغلط جدامي وقال ان شاء الله راح يبدؤون بالاشعاع الكيماوي بعد اسبوعين لين تستقر حلة الجده ،، أنا انصدمت كيمااااااااااوي ليشششششششششش يدتي شو فيها عمي حس بالحرج و قالي يدتج كانت تعاني من ورم سرطاني ولكن الحمدالله السرطان ما انتشر في جسمها لأنه الورم موجود ورا عظمه هالعظمه بقدره الله منعت السرطان من الانتشار ،، وحلفني ما أخبر أمي ،،

ولكن يوم الجمعه البارحه كان يوم صعب للجميع،،، أمي وحليلها محضره شنطتها وراح اتغادر يوم السبت المفروض اليوم ،،، وتتكلم مع يدي المسكين الله يعينه على اساس أنه مطرش اغراض ليدتي ،، شفت ابوي يغمز لي على اسساس أطلع من الغرفه قالي ريلج يبيج برع سيري شوفيه لما طلعت أخذني لغرفه بروحنا وصدمني يا خواتي قالي أمج ما راح تسافر محد راح يسافر يدتج بيرجعونها بعد يومين،، خلااااص ما فيه فايده المسكينه السرطان منتشر في جسمها ،، حتى الكيماوي ما راح يفيدها بشي والطبيب حدد لها موعد شهر بالكثير وراح اتسلم روحها لرب العالمين وقالي لا اتخبرين امج خليني انا بقول لها بالتدريج ،،،

انا أتصلت بريلي وقلت له تعال لي الحين ما كنت ابي امي اتشوفني بهالحاله ،، ركبت السياره وقعدت اصيح وأصيح وأصيح وريلي تأثر وقعد يصيح معايه وداني بيتنا وبعد ساعه طلعنا على ابوظبي انا وياه نشتغل اهناك ،، واحنا على الطريج كلمني ابويه وقالي كل الموضوع ،، قالي يدتج المسكينه تعاني من الورم من 30 سنه ولكنه كان خامد وقبل 6 شهور تعبت وخذهوا على مستشفى صقر وذبحوها من العينات وعقب نقلوها على مستشفى سيف بن غباش وهناك عملوا لها منظار ،، وقالوا في احتمال ايكون عندها التهاب شديد أو ورم حميد ،، شوفوا التشخيص الغلط ،،

يا خوات مرض السرطان عباره عن خلايا شرات ذباب العسل تكون متجمعه في مكان واحد لكن اذا وضعت يدك على الخليه او رميتها بشي ينتشر الذباب بطريقه سريعه،،، كثر أخذ العينات وعمليه المنظار حفزت لخلايا السرطان من الانتشار وأصبح من الصعب السيطره عليها ،، أصبح من الدرجه الرابعه أخطر أونواع السرطان على الاطلاق،،،،

الي كان ايعرف الرجال فقط احنا الحريم ما انعرف بالموضوع خبروا يدي وقعد يدي يصيح و يقول لا حول ولا قوة الا بالله انا لله وانا اليه لراجعون عرفت أمي عن طريق خالتي والحريم كلهم عرفوا واخذوا يصيحون تخبلوا محد مصدق وأنا اولهم ،،،،

لكن الي للحين محد ايعرفه غير أبوي وولد خالتي وانا أنه الدكتور قال ما فيه فايده ما راح اتعيش اكثر من شهر حتى الكيماوي ما راح ينفع ،،

هالشي معذبني ما اقدر ارقد الليل ليت ابويه ما خبرني كان ايظن اني قويه واتحمل لكني ضعيييييييفه هذا امي الغاليه ما اتخيل انها تروح عنا بهالطريقه ،،، بيتها الي يجمعنا كل خميس وكل عيد وكل مناسبه ،،، يدي المسكين الي راح يعيش بروحه ،، والله وانا اكتب لكم احس انه الي قاعد يصير مب صحيح هذا كابوس مش قادره استوعب نفسيتي تعبانه أحس باليأس أحس انه الدنيا ما لها طعم من بعد يدتي ،، الحزن راح ايسيطر علينا لسنين طويله ،،، انا ما أريد اعيش بهالدنيا من بعدها ،،،،

ادعوا لها بالشفاء لعل الدعاء يرد القضاء

اللهم أنت ربي لا إله إلا أنت عليك توكلت وأنت رب العرش العظيم ما شاء الله كان وما لم يشاء لم يكن ، لا حول ولا قوة إلا بالله العلي العظيم أعلم أن الله على كل شي قدير ، وأن الله قد أحاط بكل شي علما ، اللهم اني أعوذ بك من شر نفسي ومن شر كل دابة أنت آخذ بناصيتها إن ربي على صراط مستقيم .

اللهم اشفي امي شيخه وعافيها يا رب العالمين انك على كل شي قدير .