الحقوني قبل ما اخرب بيتي

منك البدايه

ترسلين له ربيعاتك انتي صاحيه ؟؟؟

حتى لو مايكلم بتحببينه بالمغازل ورمس البنات

لا يابنتي غلطتك البدايه

حتى لو يعرف من زمان انتي لا تدققين فيها اهم شي انتي بعدك عرف احد

خانك ويا احد ؟؟؟


انتبهي لنفسك

:eek2: بعد كل هذا وتجولين تشكين فيه
حرااااااااااااااام عليج لاتخربين بيتج بيدج
والله انت غلطانه وستين غلطانه
شلون رضيتي انج تسوين فيه كل هذا شلون عطيتي رقمه لرفيجتج

بالله عليج لو تزوجتوا شلون بتشوفين بوجه رفيجاتج وهما عارفين انج مب واثقه من ريلج وانهم هما سوا كذا وكذذا


استهدي بالله ياالطيبه وابعدي الشيطان وافكاره السوده من راسج ولا تخربي بيتج
الرجال شاريج ويحبج ولا لو هو مال لعب وحركات بنات كانت رضى يكلم الاولى والسالفه واضحه انه هو ماكان قصده يلعب مع رفيجتج الثانيه والا مااتصل فيها علشان تفهمج السالفه


والله قهرتيني حييييييييييييييل ورحمت حال الرجال
بس اكيد انت عاقله ومستحيل تكررين هالسوالف من ثاني

الله يسعدج معاه ويبعد عنكم وساوس الشيطان

وانت بنفسج جلتيها وايدج طبعت حروف الكلام انه الشك بيخرب بيتج


وتأكدي انه الغيره الزايده عن حدها مرض والشك انتحار

اللي بتعمليه غلط
رجل متل هاد ما لازم تشكي فيه

حبيبتي أم محمد

واضح عيك انك تحبين خطيبك موت وتغارين عليه من نسمة الهوا

واهوا يبين عليه نفس الشي

يمكن الشي اللي سويتيه كان لغرض معين واهو التأكد من استقامة خطيبك والحمدلله ظهر الحق وبين لك بدون ما يدري انه يمشي في طريق مستقيم

خلاص

كل شي على ما يرام فليش الشك

لا تحولين حياتج جحيم والسبب الشك

دامج واثقة من نفسك وانتي تعرفين انه يحبج خلاص

لا تحطمين راحتك النفسية عشان وساوس الشيطان

خلي حياتج تمشي طبيعي وعيشي كل لحظة حلوة فيها وابتعدي عن الشك لأنه بسبب لج انتي المشاكل

الله يهنيج ويهديج

السلام عليكم ورحمة الله وبركاته

أنا أشوف من ردت فعله أنه أنسان مستقيم

فياااااااريت لو تتعوذين بليس وتركي عنك الشك الي هي اصل نهاية كل عش زوجي

وأنتي تو ماخضتي الحياة الزوجيه وتشكين فيه بكره وش راح تسوين لو تم الزواج

عيوني أبعدي عنك بليس وسواسه وخلي الثقه هي الي بينكم كذاااا راح ترتاحين وتمشي حياااااتك على أفضل حاااال

الله يسعدك ويوفقك قولي امين

ولك مني كل التقدير والحترام


مملكـــة القلوب

:eek2:

السلام عليكم ورحمة الله وبركاته

أية يا حلوة كبريها في راسه وخليه يتعرف على ربيعاتج عادي

أنت صاحية معقوله اللى قاعده تسوينه يا ليتني مكان ريلج والله لو شكيت فيج انج انتي اللى تسوين هذي الحركات تعرفين شو بيكون ردي عليج ؟؟؟


والله لأتكلم مع اللى تطرشينها تتصل فيني ....

يا حبيبتي سويتيها مرة وشفتي خلاص مو لازم تعيدينها والله الريال يطفج كيف يعيش مع وحدة تشك فيه،،،

يا عمري نبي مصلحتج يا الغالية بسج من حركات اليهال وأملكيه بذكائج وطريقتج ... وإذا زودتيها ترى الريــــــــــتال بيطفج وبتقولييت سبحان الله العتب قالت .......


اللى تحب خواتها في الله دائما العتب ....

الله يهديك يا ام محمد مو هذا تصرف عدل؟؟

انتي اللي غلطانه من البداية فتحتي قدامه ابواب الشياطين

يعني بتضمنين زميلاتك وماتضمنين خطيبك وابو عيالك مستقبلا

يعني حتى لو موحاط باله مغازل ممكن وحده من زميلاتك تحتفظ بالرقم وتستمر على الازعاج وقتها كيف راح توقفينها عن طريقك؟؟؟؟

المهم اللي صار صار

ومبين ان زوجك عاقل وبيحبك
فتعوذي من ابليس وخليه لك درس

يا اختي انتي ما تشوفي مسلسلات!!!!!!! ما شاءالله عليك يعني لهذي الدرجه واثقه من صديقاتك يا عزيزتي صديقتك خليها مجرد صديقه فقط لا تخلينها تعرف كل الي بينك وبين خطيبك حتى لو كنتي واثقه منها ثقه عمياء الايام تتغير ويمكن اي وحده من الي تخبريهم يتصلوا بخطيبك عشان انك شاكه فيه يمكن تتمناه لها من غير ما تحس لانه رجال زين وتراه ما منها السبب بتكوني انتي السبب وما تلومي الا نفسك وبعدين ليش كلما زعلتي او شكتي قلتيله انا ما اباك والله تحملي في يوم بيتعب منك وبيقولك انا الي ما اريد وحده شكاكه مثلك وما بتلاقيه قدامك يا عزيزتي ان بعض الظن اثم وشوفي كم اثم خذتي من ظنك فيه حرام عليك فكري زين وريحي بالك زوجك طييييييييييييب وزين والدليل اختباراتك المزعجه له نجح فيها و بامتياز ومع مرتبة الشرف بعد ممكن اشألك سؤال لو هو حط واحد من اصدقائه يتصل فيك عشان هو شاك فيك ايش كنتي بتسوي ؟؟؟؟؟؟؟؟؟؟ الشي الي كنتي بتسويه فيه هو بيسويه معاك لو اكتشف الي انتي تسويه فيه .
للعلم انا سمعت عن وحده كانت تدخل صديقتها المتزوجه عندها البيت باستمرار وكانت واثقه فيها لانها متزوجه وعندها اطفال عشان كذا كانت حتى الطبيخ تخليها تساعدها فيه وطبعا بعد مده انقطت الصديقه عن بيت صديقتها ولما راحت تسأل عنها قالوا لها انها تطلقت وتزوجت واحد ثاني وطبعا راحت هذي تخبر زوجها عن سالفة صديقتها المسكينه الا بعدين انصدمت بالخبر زوجها تزوج صديقتها وانهارت الحرمه كيف وليش ؟ لكن بعدين لما فكرت عرفت انها هي كانت مشاركه في اللغلط لانها دخلت صديقتها لبيتها وخلتها تعرف كل اسرارهم لكن ايش تسوي ترا على اساس انها امنت منها لانها متزوجه وعندها اطفال فما معقوله راح تتزوج ثاني .
ترا القصه حقيقيه انا ما اريدك تشكي ف صديقاتك لكن اريدك تعتدلي شوي اريدك بس تهتمي في خطيبك وتهتمي في صديقاتك بطريقه معتدله لا تدخليهم في اشياء ما تخصهم .

:down:

يالمينونه

انتي صاحيه والا لا



اخرته على اللى تسوينه بتزوج وحده من ربعك


لا تطرشين ربعك


كيد النساء لا تنسين

تعوذي من بليس و استهدي بالله و لا تبيعين اللي شاريك

ترا بعدين الرجال يطق و ينفجر و ما يكون عندج شيب الا الندم و الصياح اللله يهديج و يوفقج

السلام عليكم ورحمة الله وبركاته

فعلا أختي ما غلطتي لمّا اخترتي عنوان الموضوع...

( أخرب بيتي )...

الحين في واحدة في الدنيا...مهما كانت تشك في خطيبها...تعطي رقمه لصديقاتها علشان يغازلوه و يعاكسوه...يعني لو هو ما بيعرف في هذه الأشياء...خليتيه يعرفها...و يجربها...و بكرة يحبها كمان...و إنتي الضحية...

عارفة مثل ( على نفسها جنت براقش ) ؟

و ليش كل هذا الشك ؟ الرجل مهما كان...لو حس إنه زوجته تخنقه بشكها المتواصل...و صدقيني مهما كان يحبها...راح يبعد عنها في لحظة...لأنه ما بيطيق هذا الطبع أبدا...

في مثل مصري يقول ( عقلك في راسك...تعرف خلاصك )...

إنتي واحدة كبيرة و عاقلة...إحنا قلنا لك عواقب هذا الفعل...حابّة تستمري بكيفك...مع إني أتمنى تقرأي كلام المشاركات مرة و اثنين و ثلاثة و تستهدي بالله و تستعيذي من الشيطان الرجيم...و تشملي زوجك بالحنان و العطف و الرعاية...بدل الشك و الغيرة و البنات...

فديتكم والله مشكورين والله كلامكم وايد حلو ما اعرف شو اقول صدق رب اخ لم تلده لك امك وانا هاي مشكلتي ما عندي اخت تنصحني


والله انا وايد ما عندي اسلوب وياه وايد احس بالذنب وصدق كلامكم والله في ربيعات ما يتأمنون
وانا كنت وايد اثق في ربيعاتي وحته لو اتضاربنه مثل المينونه اقول كل شي بس الحين وايد تغيرت وايد


ادعولي بالهدايه يالسه احاول اتغير الريال زين ما ابا اخسره بس اقولكم الصدق احس انه بدا من الحين يتعب من طباعي وانا ما ابا ينفر مني


جزاكم الله كل خير يسعدكم ربي ويحقق امنياتكم

الله يهديك ويوفقك يا أم محمد ويسهل دربج ويخفف من الشك الي عندج (ان بعض الظن إثم )
ومهما صار وشكيت في زوجج لا تخلي صديقاتج يدخلن ما بينكم ابد

والله البنات ماشاء الله عليهم كفوا ووفوا

الله يساعدك على نفسك والله يساعد زوجك عليك

غلط غلط غلط غلط

حرام عليش تهدمين بيتش بأيدش الشك ما يجيب الا المشاكل

ليش تسويين جذي في حياتش وفي خطيبش هالفقير المسكين


نصيحه مني اختي خلي عنج هالشك والريبه وأذا ما تبين الرجال لا تعذبينه معاج وتجيبين المشاكل له وهو بعدين ما بيحس بالثقه في نفسه وبيخاف من أقل حركه يسويها

:eek2: