شو اتسوون في الاسبوع الاول من السنة الدراسية؟؟(شاركوا علشان نستفيد)

:smile:

مرحبا

شكرا أختي ع الموضوع فعلا موضوع رائع ومفيد وانا كل يوم أتخيل السنه الجايه كيف بتكون ؟؟!! وأخطط بيني وبين نفسي الاشياء اللي ودي أسويها واللي ودي أتجنبها من أخطاء السنتين اللي طافوا علي في التدريس .

أتمنى أشياء كثيرة تتغير سواء تتعلق فيني أنا أو تتعلق بالاداره او بالطالبات ....

فمثلا :
1- مليت من النشاط خلاااااااااص وقلتلهم وحذرتهم اني ماراح أكون مسؤوله عن نشاط أبغا أكون " مربية فصل " ...صحيح متعب لكن أبغا أجرب شي جديد ...خاصه اني بكون مسؤوله عن طالبات معينات مش بنات النشاط يوم أشوفهم وشهر يهربون من وجهي عشان ما أكلفهم بشغل ...وفي النهاية أضطر أكتب اللوحات والمطويات بروحي ويجوون يتسطرن لي في المعرض وكأن الشغل اللي معروض من تعبهم !!!:mad2:


2- أتمنى أكون مثل ماكنت منضبطه في المواعيد والوقت وأقلل من الغياب لاني بصراحه أحيانا أصاب بحالات اكتئاب من التدريس خاصه لما أبذل جهد وأصور أنشطه وأصحح ولما أمتحن الطالبات أفاجأ بالدرجات البايخه :down: وعاد وش يسكتني صيااااااااح ويغرق بيتنا من الدموع :cry: حتى أهلي طفشوووا مني وأمي تعذبت مني المسكينه تسكتني وتقولي حرام كوني حبوبه مع البنات ولا تعصبي عليهم يبالهن لين يفهمن :angry: وأنا بنتها حبيبتها ما تحس فيني وفي أعصابي التلفانه :sad:


فعشان كذا أتمنى أكون أكثر متحكمه في أعصابي ويكون بالي طويل وما أستسلم بسهووووله (wink)


3- أتمنى أكون اجتماعيه أكثر مع المعلمات لانه حلو يكون جو العمل جو مليء بالتعاون والمحبه وكل وحده يكون قلبها على الثانيه ...حلو السؤال عن بعضنا بعض وحلوه الزيارات المتبادله لانها تزيد الألفه والتعاون وتخلي اليوم الدراسي يمر خفيف ونشتاق للدوام اليوم اللي بعده ...أيضا جو التعاون يخلينا مبدعين أكثر ونستفيد من تجارب بعض ...خاصه اذا ماكان للحسد والحقد وجود بينا.....بصراحه الحمدلله السنه اللي طافت كانت أحسن من السنة الاولى أنا أسميها سنة ( الحش والحسد) الله لايعودها من سنه :no:

4- أتمنى اني أكون أكثر جرأة وإيجابيه .....<===حياويه البنت :shy:
حتى من طالباتي خاصه بالاسبوع الاول أكون مستحيه منهم ...وساعات بيني وبينك أخاف منههم(r) ......ياختي بنات هالزمن الوحده ماتأمن من ردة فعلهم اذا أمرتيها على شيء أو قلتي لها شي ...عشان كذا لازم الوحده تكون مرنه بين الشده واللين .
ناويه أتدرب على الشيء هذا مع أخوي الصغير :bigsmile: بروح له بعد شوي


5- أتمنى اني ما أأجل شغلي واصحح أول بأول وأحضر وأستعين بمراجع خارجيه ...أما عن الأنشطه والاختبارات القصيره الحمد لله نصها مخزن عندي بالجهاز والبقيه أشتغل فيهم الحين :up:

6- فيه بنات أذوووني بالاتصالات وخليت أخوي يرد على مكالماتهم ويصرخ عليهم ويهددهم اذا رسلوا رسايل أو دقوا مره ثانيه :s2
عاد أنا ماأعرف كيف أتصرف ...وكل يوم أتخيل الموقف على كثر تطنيشي لهم بس وماارضى اعطيهم االرقم ولا أعلمهم وين أسكن ولا أي معلومات شخصيه عني لكن الله يهداهم حركاتهم غريبه وتخووووف :think:
والله محتاره شو أسوي مع هالحركات
مع اني للعلم شريره شوي ومااعطيهم وجه بس ماخلن لا الشريره ولا الطيبه في حالها :D2


7- أتمنى أني أكون محضر خير زي ما أنا وما أتأثر باللي يصير من شكاوي وحش ونميمه ،،يعني أكون أكثر ايجابيه وأهدي المواقف ...أنا عادة أنطم وأسكت واخلي الطرف الثاني تعبر عن شعورها عن معلمه او المديره او حتى الوزير ....حتى الوزير ما أدافع عنه :gum:

حرام مو ؟؟!! (r) خلاص انا ناويه أدافع عن الكل واكون محضر خير :cool2:


شوووو كمان ؟؟؟!!!:smile:


8- أتمنى أعمل مسابقات ثقافيه للطالبات على مستوى مرحله معينه عشان نغير شوي من الروتين اليومي ...فمثلا مسابقه بين طالبات صفوف الأول الثانوي مثلا في محتوى الماده اللي ندرسها او معلومات عامه او أسئله متنوعه ....
هذا يساعد ان الطالبه تحب المدرسه وتحس انه في كل يوم شي جديد

نفس الشي العام الماضي فيه فكره مانفذتها مع انه كل شي كان جاهز وهي مسابقه بيني صفوف مدرستي وصفوف مدرسة صديقتي في منطقه ثاانيه يجون مدرستنا ونعمل المسابقه والمدرسه اللي تفوز تتكرم ...

ان شاء الله ننفذ الفكره هذي السنه :smile:


الله يوفق جميع المعلمين والمعلمات لخير وصلاح أجيال المستقبل


وتحياتي لك يا اختي وشكرا خليتيني أعبر عن شعوري وأمنياتي :shy:

أنا ما عندي خبره لو كنت أعرف خبرتج

بس أنت خبريني لأني مبتدئه.

مذهلة....انتٍ فعلا مذهلة:)

ما شا الله عليج ..... تفكيرج وااااايد حلو... و نفسيتج احلى:).....نصيحة مني.... ديري بالج من العين....لأني انا انصبت بالعين..... امراض.. و كسل... و كله مالي نفس.... طبعا هذا كله في النسة إلي طافت....لما كنت توني متعينة.... انكرفت كرااااااااااااااااااف.....مع اني معلمة ايديدة... وااااااايد عطوني شغل في المدرسة... و خلوني اشرف على مشروع.... انا الوحيدة إلي اشرفت عليه بدون مساعدة ..... مع ان المشاريع اتديرها فرق عمل.... انا كنت فريق العمل...... و طلعت ابمشروع خل المدرسة تنشهر و الطالبات بغوا ينتقلون للمدرسة بسبب هالمشروع...... في السنة الثانية إلي هي السنة إلي طافت..............كنت كسلااااااااااانه.......و مالي نفس........و مهملة........ و غير الامراض...إلي اعرفهم قالولي هذي عيين ما صلت على النبي.... المهم انا اتعلمت من تجربتي:)..... اتعلمت اني ما اسمح لأي شخص (حتى لو كان وزير التربية) بأنه يستغلني على حساب وظيفتي الاساسية و هي التدريس!! ممكن اشتغل... بس لو هذا الشغل اثر على طالباتي....... مستحيييييييييييل اسمحله بهالشي.....
تحياتي لج حبوبة:)

أناهيد.....مبروك على التعيين:).....حاولي اتمرين على هالمواضيع علشان تاخذين فكرة عن التدريس... و يا مرحبا بج

اهدافي و طموحاتي للسنة الجديدة.....

1- انا بنتقل لمدرسة مشتركة(اعدادي و ثانوي) و ناوية ان شا الله اني اصحح اخطائي في السنة الماضية (بالذات التأخير).
2- تصميم كراسة للطالبات (بدال الكراسات إلي يشترونها).. ان شا الله بس يعطوني المنهج إلي في بالي:)
3- الاستمرار في استخدام الكمبيوتر كوسيلة تعليمية
4- تجنب مجالس الحش و النميمة ..... لأنها سبب كل المصايب بين المعلمات من خلافات و شجارات
5-اذا كنت ضمن مجموعة متعاونة من معلمات المادة.... بحاول ان ايكون بينا فريق عمل واحد.......و اذا ما في تعاون.... برفض اي عمل جماعي... لأن مستحيل اتكون روح الجماعة في ناس يبون هم إلي يتميزون على حساب زميلاتهم
6- تكوين فرق من الطالبات المجتهدات في كل صف لمساعدة زميلاتهم الضعيفات.... (هذا المشروع طبقته من اول سنة اتعينت فيها)
7-البحث عن الطالبات الموهوبات و دعمهن
8-إنشاء فريق للمسرح
9-تجهيز مسابقة للقراءة
10- اعداد يوم خاص للشعر الانجليزي
11-اعداد مسابقة في كتابة المقال (للمرحلة الثانوية)
12- دورة في الثقافة السينمائية

هذي اهم الاهداف.....

:clap:

الله أهدافك رائعه وفيها إبداع ماشاء الله عليك ،،،،،الله يحفظك من العين وإن شاء الله تحققين كل أهدافك وطموحاتك ,,,,


أما عن سالفة الاستغلال يوووووووه أنا أستغلوني استغلال لين اخترب كمبيوتري خخخخخخ وفلست من الاوراق اللي اشتريها وأصورها ....

حتى فيه وحده من غير ذكر اسماء :no:

استغلتني باسم الصداقه وانا ياحليلي حسبالي صديقتها قمت اسوي لها شغلها واشيله معاي البيت ....هيه هيه ذيك الايام كنت مخطوبه أسولف مع خطيبي وأكمل لها شغلها وأنسق لها الشغل وتروح للاداره تعرضه ولاتجيب سيرة حرف من اسمي تنسب الشغل لها هي بروحها ........المهم أنا ما كنت اهتم كنت أحب أخدم وأساعد ....
لين يوم من الأيام احتجت أصور 3أوراق ورحت لها وانا أبد ماشكيت لثانيه انها ممكن ترفض أو تردني :sad:
تصدقين نست كل شي وقالت لي " لا ممنوع مقدر أصورلك !!!":eek2:

عشان كذا بعد هالموقف تأدبت وقلت تووووبه أساعد أحد محد يستاهل أخلص شغلي واذا عندي وقت أجلس عند أهلي واجد أبرك لي من اني اخلص شغل ناس عديمين ذوق واحساس ....


على فكره أفكارك رهيبه شجعتيني أخطط من جديد وأفكر في اشياء ثانيه
يسلموووو على الموضوع مره ثانيه وربي يعطيكي ألف عافيه :smile:



تحياتي

:flower:

الله يبارك في حياتج mayana

أريد أعرف كيف الكراسة اللي بتصممينها

و ينفع أسويها للرياضيات ؟؟؟

:flower:

:flower:

:flower:

هلا و الله مذهلة:)

المساعدة حلوة..........بس لا افراط و لا تفريط:)

و انا بعد مريت بنفس الموقف..... بس اتعلمت:)....من عقبها قررت اني ما اعطي حد ويه زيادة عن اللزوم....بساعد بس حسب امكانياتي و طاقتي:).... حتى الموجهة والناظرة...ما سمحتلهم يستغلوني بأي شكل:)... طاااااااااااالباتي هم اهم من اي شغل اكلف به...

و يا مرحبا بج

هلا تناهيد

انا ما عندي فكرة عن مادة الرياضيات.... بس اعتقد ممكن:)

شو الاشيا إلي يكتبونها الطالبات في كراسات الرياضيات؟
اعتقد كل درس ايديد له قوانين و قواعد للحل....

كل درس خليه بهالطريقة....

طبعا عن طريق برنامج الووورد.... صممي صفحة بحدود سميكة..... و خلي جزء فاضي لكتابة التاريخ...بهالشكل

تاريخ اليوم هو:.....................................

و عنوان الدرس انتي اكتبيه حسب المنهج.....مثلا....متوازي الاضلاع..

تعريف... و القانون.... و مثال..... و تحت المثال سؤالين ايحلونهم الطالبات اثناء الحصة.... و 3 اسئلة تحل كواجب في البيت....

انتي عاد ضيفي و غيري حسب الدرس.....بس اهم شي الاخراج الفني للكراسة:)

و يا مرحبا بج

مشكوره وايد mayana

بس شو تقصدين ( تكون الصفحة بحدود سميكة) ؟؟؟

يعني يكون لصفحة إطار واضح أو عريض تقصدين هذا؟

و شو طريقة عمل ( أوراق العمل)؟؟؟

و ملف الإنجاز؟؟؟

تناهيد
سويت صور من جهازي علشان اراويج شو قصدي:)

انا سويت بسرعة..... بس لو يلست يلسة عليه بيطلع الشغل احلى من جيه



صورة الصفحة و هي كاملة.... طبعا لازم اتضيفين صور (clip art ) باللون الاسود و الابيض....لأن الصور الملومة مع التصوير مش حلوة

القسم الاول من الصفحة


القسم السفلي


انا ما عنديه فكرة عن الرياضيات.... بس سويت الصفحة هذيك على السريع:)

هذي صفحة من كراستي إلي سويتها العام..

بالنسبة لملف الانجاز..........هو ملف ايساعدج على توثيق كل شغلج إلي اشتغلتيه طوول السنة..... الحصص النموذجية.... حضور دورات.... اعداد دورات....المشاركة في الاذاعة و غيرها من الانشطة....طبعا الموجهة هي اتقول شو اتسون بالضبط:)

ملف الانجاز مش مطبق في الشارجة:).........الحمدلله:)

و اذا عندج اي سؤال اتفضلي:)

>>>>>>>>>>>>>>دااشه عرض:D2
انا ما يخصني في الموضووع لاني بعدني طاالبة في المدرسة بس بما انكم معلماات بعطييكم نصاايح من طالبة عاانت من بعض معلماتها :smile:
1- عاملي الطالبة كاخت لج او اذا كنتي اكبر عنها بواايد عامليها كبنتج
2- دايما خلي ويهج مبتسم والله انتو ما تعرفون هالابتساامة شو تسوي انا كانت تدرسني السنة اللي طافت معلمة عربي بصراااحة كنت اكره حصتها وبسببها استويت اكره العربي بعد مشكلتها تدخل الصف وهي مبوزة ومعصبة وحالتها حاالة وتقووم تصاارخ بصووت عالي :pain: لييش ما ادري بدوون سبب (عافانا الله)
3- غيري من طريقة التدريس عااد كييف ما ادري ....انتو اللي تدروون :cool2:
4-حاولي انج تخلين الحصة مشوقة يعني تخلين الطالبات يشتاقون لج ولحصتج مب يطفشوون منج:smile:
5- اخر شي بغييت اقوله انه مثل ما المعلمة لها احاسيس ومشااعر ونفسية بعد الطالبة لها احاسيس ومشااعر ونفسية متقلبة :smile:حلوة هاي متقلبة هههههه يعني مرات تيي الطالبة ما لها نفس تدرس وتكون يالسة تكتب عالطاولة او تتلهى باي شي فتقوم الالبة تعصب وتقولها اذا مب عايبتنج الحصة طلعي بره :pain:بالله عليكم هذا اسلوب انسانة متعلمة ومتحضرة ومتخرجة من الجامعة وقاعدة تدرس الطالبات
ليش ما تكلمها وتفهمها وتشوف شو فيها بداال ما تصاارخ في ويها وتفشلها جدام البناات

ادري اني رازة بويهي في موضوع ما يخصني بس حبيت اني اشاركم رايي
:smile:صح نسيت اقوول اختي اناهيد مبروووك على التعيين :smile:
والسموووووووووحة على الاطالة
اختكم بنفسجة العين:shy:

mayana

هذا كله و على السريع ... وايد حلو

شكرا على الجهد اللي بذلتيه و أدري اني تعبتج معاي لكن الله يجعله في ميزان حسناتج...


بنفسجة العين

لا رزة ويه و لا شئ ........ بل بالعكس ...كلامج حلو ... و أرجو أن نستفيد منج أكثر و أكثر .........
و الله يبارك في حياتج بس أنا عندي تدريب و الله يسمع منج و أتعين...

السلام عليكم ورحمة الله وبركاته

ماشاء الله عليكم وعلى أفكاركم يا مربيات

عني انا الصراحة السنة الي طافت اتبهدلت وايد لأنها كانت أول سنة لي

وانذليت من المدرسات ايما ذل عافانا الله ماشي تعاون إلا بثمن

وانا من النوع اللي اكره اللي ايذلوني واللي يتكلمون عليه المهم
بإذن الله باتعلم من اخطائي اللي طافت


1- بما أني بدرس صفين ابتدائي دنيا والمناهج راح تتغير ب(لغة عربية وتربية إسلامية) بحاول اني الأشياء اللي يتطلبها كل صف على حدة

باشتري دفترين درجات وبنظم فيهم اسماء الطالبات بالكمبيوتر وكل فصل دراسي بصووووب

2- من البداية بجمع قدر كبير من المعلومات والألعاب التعليمية لكل درس من الدروس (همتكم معاية)

3- باستخدم الكمبيوتر بإذن الله وباقي التكنولوجيا (على الله ايوفرونها لنا)

4- بحاول قدر الامكان يغلب على التدريس طابع المرح

5- بسوي مسابقة بين صفوف الابتدائي الدينا (مسابقة حفظ سورة من كتاب الله مع التجويد ) بالتعاون مع احد الزميلات وبخليها اتابع البنات بعد ما اولد ما باجي إلا شوي

6-
باهتم ببرامح الإذاعة (وايد أحب الإذاعة) ومن خلالها ممكن أسوي مسابقة للمعلمات في الاذاعة المدرسية
:up:
هذا والله اعلم

الحمد لله على السلامه الورديه ... وين رحتي؟؟؟

اختفيتي مره وحدة أنت و أم عبد الملك ...


الله يسامحكن

سامحينا يا اختي اناهييد الأشغال ما تخلص


والله ايعينا ويعينكم على حمل أمانة التعليم


همتكم بالأفكار اليديدة

مسموحه و لا يهمج ...