مخطوبه لايحبها خطيبها... تريد حلا؟؟

لا ياختي طالما هو مثل ماوصفتي مالذي يجبرك على ان تكوني تحت رحمته

كم هو عمرك الان
وهل هو هذا الشخص الوحيد الذي تقدم لك منذ ان فسختي خطبتك
استخيري الله وافعلي ماهو خير لك

شكرا على مرورك اختي الفاضله ..
صحيح هو لم يكن الشخص الوحيد الذي تقد لخطبتي ولكني حرصت على الاختيار لانني لااريد في نفس مشكلتي الاولى مع خطيب لايفهمني
ووقع الفاس في الراس ..

عمري الان 23 سنه
ولكن المجتمع هل سيقبل بفتاة تفسخ خطبتها مرتين
وانا بلفعل لاريد ان امر بمعناة تلك المرحلة فما لقيته
كان شديد ..

انا اريد عن حلول استطيع بها ان اغير معاملته لي ..
هو متشدد في الدين .. لايستخدم النت
لم يقراء في حياة قصص ... لايعرف شي عن امور المراءة
ولاكفية التعامل معها .. يرفض ان يطلع على كتب
ترشده الى مهو صحيح.


ماذا افعل انني اموت ؟؟؟
ارجوكم ساعدوني

حياج الله اختي أحب الورد

بقولج كلمتين عيوني بس

النار ما تحرق الا ايد صاحبها ....واذا بتعتمدي على كلام الناس....فترى كلام الناس ما يخلص ..ولو كنتي مشعلة حياتج كلها شهد :pain:

وهاذي حياتج وانتي اللي راح تعيشي وياه طول عمرج مو الناس......والمحروق هو اللي يحس بالألم مب غيره :confused:

فانصحج تتركيه دام لهالدرجة هاذي الصفات فيه ..وخاصة انج بس مخطوبة.. يعني ما في شي للحين

والله بيعوضج خير ان شاءالله...اهم شي راحتج النفسية عيوني

هلا والله بيك اختي ،،

قبل مانتناقش بالموضوع ودي اقول لك شيئين :1- انتي لسا صغيره والايام قدامك ممكن يجيكي خطاب كثير ،،
2- مو عيب ان الوحده تفسخ الخطوبه لان فترة الخطبه فيها الشخصين يعرفو بعض،، وتكوني انخطبتي وفسختي مرتين والا تتزوجي وتتطلقي لاسمح الله؟؟ ( انا مااشجعك على فسخ الخطبه بس حبيت اوضح لك هالشيئين عشان ماتتوقعي ان فسخ الخطبه عيب)

وبخصوص خطيبك ... أنا من رأيي انك تتناقشي معاه لان هذا شي طبيعي في معظم الرجال انهم مايعترفو بالرومانسيه ومايهتمو بالهدايا وبكثرة المكالمات وبالتدليع ،، لانهم بطبيعتهم جافين ..
وانتي وضحيله وفهميه انو انتي انثى ومحتاجه حنان واسلوب حلو ،، وقوليله ان البنت تبسطها هديه بسيطه او كلمه حلوه اوورده ووضحيله كل اللي في نفسك .. وقوليله انو البنات بطبيعتهم ينبسطو من الكلام الحلو ،، وامدحيه وقوليله انه هو رجل مرره كويس وعاجبك ومقتنعه فيه بس انتي محتاجه لهذا الشي لانك بنت وماتبين تسمعين المدح من اي احد غير خطيبك وزوجك .. وانتي اذا جا يوم ابعتيله عطر أو محفظه وقوليله انك لما رحتي السوق عجبتك هذي الهديه كثير وشريتيها له ...

يعني جربي معاه هالاسلوب ،، وحطي في بالك انو معظم الرجال زي الاطفال :pain: يمشو على اللي تعوديهم عليه .....:up:

واذا مانفع معاكي هالاسلوب استخيري واعملي اللي تحسي انه بيريحك ...

وتسلمي يالغاليه،، واسفه على التطويل،، وانشالله اكون افدتك ..:shy:

والسلاااااااااااام

بسم الله الرحمن الرحيم

عزيزتي أحب الورد


مالذي تقصدينه بأن عمرك 23؟؟

هل تقصدين بأنكي كبيرة؟؟

المهم

قرأت قصتك اكثر من مرة

عزيزتي...أنا من نفس سنك ومن نفس بلدك..

أفهم الذي ترمين إليه

خبرتي في الأمور قليلة...لكن...أنت الآن في مرحلة زمنية محايدة...

أنقذي نفسك فأنت لم تبعدي كثيرا عن الشط...

ان كونك تفسخي خطوبتك للمرة الثانية أهون لك من أن تحملي لقب مطلقة..

لا تبالي بنظرة المجتمع..المجتمع لا يرحم ورضاء الناس غاية لا تدرك..

عزيزتي ...العبرة بالنهاية...وأولا وأخيرا صلي الإستخارة كثيييييييييييييييييرا
وأكثر من مرة...وفكري


والله ييسر لك الخير.

حبيبتي صدقيني الأخوات معاهم حق إنتي توك صغيرة مايصير تدفنين نفسك بهالحياة عشان المجتمع أو الناس لأن الناس راح يتكلمون وينقدون أي شي حبيبتي إستخيري وريحي عمرك يمكن تلقين إللي يقدرك ويعزك وينسيك والله يووووووووووفقك ويسعدك ياااااااااااارب بس لازم تفرحينا معاك وتقولين وش صار عليك:smile::smile:

هلا اختي ..

عيوني انا مع كلام خواتي وخاصه الاخت هيفا...


تكفين لا تورطين نفسك في شي تتحسفين عليه بعدين واذا مخطوبه مرتين

يا قلبي فيه حريم يتطلقون مرتين واكثر والحمدلله ربي رزقهم بازواج مره حبيبين

والله يوفقك الى ما يحبه ويرضاه

(واهم شي اتذكري اسهم الليل والدعااااااااااااء والله ربي راح يرشدك )


تحياتي لك ولا تقطعينا وعلمينا الخبر اول باول:up:

اتركيه حبيبتي و ما عليك بكلام الناس
انت بعدك صغيرة و باين عليك مثقفة و انت جامعية متعلمة
لا تضحي بحياتك من اجله

شكراً لك اختي الامثى على موساتك
وشكر الف مرة الى الاخت hyooof
صدقني ياختي العزيزة بانني حاولت معه اكثر من مرة
شرحت له امور كثيره انا احتاجها منه ... هو لايعيرها اي اهتمام
قدمت له هدية ثمينه عبارة عن ساعه.. وعطر .. وطقم مكون من قلم .. ميداليه ... كي اكسب محبته .
لكنه اخذها بكل برود ووضعها جانبا ولما اصريت عليه ان يفتحها.
قال لي بانه لايحب ان يلبس الساعات فهو يستغني عنها بلجوال
وهو لايستخدم العطر لانه يسبب له حساسيه
وغيرها من الاسباب .... يعني لاداعي لااستخدام طريقة المجاملات هذه


انا ياختي العزيزه في داخلي قناعة بانه لو استمرينا على هذا الوضع الغير
المتكافى في التفكير 0العواطف لن تكون هناك حياة بل ستكون مقبرة لكل احساس جميل داخلي ..
رغم ذالك كله احاول ان اعطى نفسي فرصة لتكيف مع رجل لايؤمن بلتحظر
ولايستوعب بانه الفتاة تغير تفكيرها ووضعها عن الفتاة القديمه ..
والله ياختي انا لااجد سبب وجهيا يجعله يعاملني تلك المعاملة .. فهو لايكلمني ولايتصل بي الا اذا قمت انا بلاتصال به .. لايسال عن حالي
ولا عن ظروفي ولا حتى عن نتيجة اختباري ..
وانا اخبرته بانني تعبة واريد حلا للوضع اجابني بانه غير مستعجل على الامر.. واذا اصريت عليه وشرجت له ضيق نفسي ضحك ساخرا بانني لاعاني شي فانا لايبين على اي مرض واي تعب ...
لانني بكل جهد احاول مدارة الامر عن انضار الاخرين .


اما اختي العزيزه

lilac butterfly
اشكر حظورك ومؤازرتك لي ... انا صحيح عمري 23 سنه ولكن مجتمعي
ومحيط عائلاتي تجبراني على التفكير الف مرة قبل الاقدام على اي خطوة

فياعزيزتي ... انا ارتبطت سابقا بقريب لي ولم يحصل بيني وبينه اي نوع من التفاهم لانه الامر تم بنوع من الاجبار ودخلت فيه العادات والتقاليد الباليه حيث تسمى البت لابن عمها او خالها وهذا ماحدث معي ... الا انني لم استطع الاستمرار مع شخص لااحمل له اية مشاعر .. ومايربطني به سوء تقليد انا متبرة منه .
صدقني لم يقتنع اهلي باسبابي ... ومرضت مدة من الزمن مما جعل والدي يرضخ اخيرا وسمح لي بفسخ الخطوبة .. ودخلت في صراع مع مجتمع لايرحم ....
ولااريد ان اخوض ذالك الصراع مرة اخرى ..

ادعو لي بالفرج والخلاص من هذا الهم
بان ياخذ الله روحي ويفكني من هذه الدنيا الدنيا

اختكم في امس الحاجة لدعاء
فهي لم تعد تشعر بلحياة .

اختي احب الورد...

ما ادري شو اقولج.. احس انه قصتج مع خطيبج وايد قريبة من حالتي .. بس في اشياء مختلفة كثيرة..
انا هم عمري 23 و مخطوبة من زمان ..(3 سنوات) قبل سنتين كنت على اتصال معاه ..كان اول شي وايد زين معاي ..بس بعدين قام وايد يهيني ...لدرجت انه يتطنز و يتمصخر علي..الحين الواحد إلي يحب خطيبته ..بيتمصخر عليها؟ ..فوق هذا وايد يتحكم فيني في كل صغيرة و كبيرة .. ويشك وايد.. مرة وصلت فيه لدرجت انه سبني .. انا تا متحملت .. لما شافني ما تحملت ..ادعى انه كان يمزح...
كلامه وايد متناقض و لين الحين يا اختي العزيزة انا مو فاهمة شخصيته الغريبة
ساعات ايقولي انه يحبني ..ويقول شوية كلام حب ..بس اتصدقين انه ما يوصل قلبي؟؟ احسه مو من قلبه ..
ذيك الايام وايد صبرت عليه و كنت دايما انهار و ابكي لاني ما اقدر افسخ الخطوبة.. هذا غير المشاكل إلي بين اهله و اهلي..
اختي ما بطول عليج ..بس ابي احسسج انه فيه احد مثلك..
عزيزتي انا لين الحين مخطوبة ..لآ صارت ملجة ولا تحركوا ولا كأني بتزوج بتقولين ليش ما تفسخين الخطوبة ..بقولج انه المشكلة أني انا إلي اخترته ..ولازم اتحمل العواقب..
بس الحمدلله متوكلة على ربي و دايما استخير ربي في هالشي ..
ايماني برب العباد هو إلي مصبرني ..و الله كريم انشالله..!!
عزيزتي ..لو فيه امل انج تتركين هالانسان ..لا تترددين.. ..انا فاهمة شو إلي تمرين فيه عدل.. وانه شي مو هين..بس انا في حالتي ما اقدر افسخها للاسف ...صعبة جدا و من سابع المستحيلات.. لاسباب عديدة..ولاحول لي ولا قوة..ربي يفرجها علينا ..قولي امين
واسفة على الاطاله ..

والله يالغاليه دام الحاله كذا معاه ،،، ودامه مايسأل عنك ولا يهتم بيكي !!

انا والله ماودي اقول لك هالحكي بس انا من رأيي انك تفسخي خطبتك لانو هذا شي مايحتمل ،، واكيد بعد ماتستخيري ،،
وايش دراكي يمكن ربي قدر لك هالشي عشان يوفقك بواحد احسن منه ،،
ولاتفكرين بالناس لان الناس مايعجبهم العجب،،
وانتي بس استخيري على فسخ الخطوبه وسوي اللي ربي ييسره لك ،،

والله انشالله يوفقك ويسهل لك امورك:shy:
والسلام

السلام عليكم ورحمة الله وبركاته

اختى احب الورد والله انى سالفتك تقطع القلب لكن انتى على البر احمدى ربك انا عمرى بنفس عمرك ومتزوجه وعندى طفل لكن ايش الفايده وانا سكت على الغلط من البدايه مثلك لانسان تفكيره غير عنى وفى النهايه افكر بالطلاق ترا انا من نفس بلدك واعرف زين ايش يعنى طلاق افسخ ملكه لكن الفسخ ولا الطلاق والله ربى بيعوضك خير عن هذا الانسان ولا تقولين ملتزم الالتزام مو كذا الالتزام يعرف حقوق المراء مو يهينها كذا ماحبيت اثقل عليك ولا اقولك افسخى ملكتك لكن هذا افضل الحلول لانسان مايستاهلك وبعدين انتى حاول تورينه انك تبغين تبعدين عنه حسسيه شوى بجفاء او انك مثلا اتركيه لاتسالين عنه هو احتمال يحس باسلوبه انه غلط تعاملى معاه بنفس اسلوبه احتمال يفيد معاه وبعدين ابيك تشوفين موضوعى هنا فى المنتدى راح تشوفين بنفسك نتائج عدم التفاهم من البديه وش توصل بعدين صح انا داخل فيها عوامل كثره لكن اختلاف الشخصيات والاراء والتربيه بمعنى اصح هو الى وصل لكذا

وحبيت اقول Miss Wanted .. ليه من سابع المستحيلات انك تفسخين ملكتك ياعيونى انتى على البر وترا فسخ الملكه ماهو حرام ولاعيب ولا ابغض الحلال مثل الطلاق لان مابينكم عيال او طفال يتهدمون بالعكس كل واحد يشوف طريقه بدل ماتبنون بيت وتهدونه بعدين

والله يهدى جميع رجال المسلمين .. واختى احب الورد طمنينى على حالك وانشاء الله انى بدعيلك وانتى ادعى لى الله يفرج همى وكربى

شوفي اختى
الى ايده بالمويه مش مثل الى ايده بالنار
انا مرت بتجربه فاشله مثلك كنت اعتقد ان اهم شئ اتخلص من خطيبي وبس ومشكله المجتمع اعطيتها طناش قلت العالم ايش دخلهم بحياتى
ولكن للاسف ندمت اشد الندم بذات لما تناظرى عيون الناس تحسين الشفقه بعيونهم وكانهم يقلون مسكينه ........حلوة بس مالها نصيب واحيانا اسمعها
لكن الداهيه ان المجتمع بيفكر طالما انت فسخت معناها تطلقت والمطلقه حياتها نكد بنكد كله عشان انها مطلقه ولا
احيانا تجيك طلبات زواج من شخصيات مالها دين ولا خلق واذا رفضتى تقول لك الوحده منهم ليه ما توافقين اصلا انت مين راح تتزوجين الا من هذى الاشكال
اعرف شعورك
واخاف امر بنفس التجربه مثلك (على فكره انت صغيره مو مثلى انا 28سنه)
بس لا تطلبين الطلاق الا لشديد القوى..........يعنى لو مد ايده عليك لو شفتيه يعمل شئ حرام او ما يصلى
وهذا الواقع العربي كل الرجال بيقلو انهم رومنسين وهم ما عندهم رومنسيه يبون هم يتبسطون وانت مجبره تبسطيهم مو عشان نفسك لا عشان ما يتكلم عليك او عشان كلام الناس
عيشى حياتك الان بطول والعرض
لا تخلى جل حياتك هو زوجك اعطيه ما يرضي الله وانت اتمتعى كمان لا تخلى الرومنسيه اهم شئ بتفكيرك اشغلى نفسك بالكتب او العمل
صدقينى الرومنسيه مش السعاده الى راح تلقيها عن الشباب الخليجى والسعودى بذات
ابتعدى عن الرويات الرومنسيه والافلام ........ابتعدى عن اى شئ فيه رومنسيه حتى لا تسؤ حالتك اما بنسبه لخطيبك اساليه ايش هوايته واتعلميها ناقشيه فيها ودورى عن الامور الى يحب يحكى فيها يمكن خطيبك عقلانى
كونى مثله تطبعى باطباعه
ابحثي عن شئ يخليكم على اتصال فكرى يعنى يمكن هو من النوع الى يحب العلم
واهم شئ عليك بالاستخارة والصلاه باخر الليل
(ادعي هذا الدعاء قد تكشف لك الكثير من الامور المخفيه عنك ...اللهم خذ بيدى في المصائب واكشف لى وجوه الحقائق)
اتمنى ان اسمع عنك كل خير ولا تنسينى من دعائك
راح ارجع بادعيه قد تساعدك باذن الله

Gd,l

الله يفرجها عليكم جميعا

وأنا من رئيي أختي أنك تسخيرين والله يهديك الى طريق الصواب الي فيه خير لك

ولايهمك النااااااس أنتي الي راح تعيشين معه مو هم

وبعدين أحس أنه يحاااااول يخلصك منه وأعتذر على هذا الكلام يعني تطفير بشتى الوسائل

بس قبل لاتتسرعين في أتخاذ أي قرار حاولي تفهميه اكثر وقولي له ان كان مقتنع فيك وأنه تصرفاته تضايقك وراح تضايق اي انسانه لو هي بمكانك

والله يسهل ويكتب لك السعاده في الدارين

ولك مني كل التقدير والأحترام




مملكــة القلوب

اختي الله يعنيج ع بلواج ويصبرج عزيزتي...

بس ليش كل البنات يفكرون اول شي بالمجتمع؟؟؟ وبكلام الناس او عيون

الناس؟؟؟

حبوبه..... في وحده اعرفها كانت مالجه وتطلقت من ريلها بعد ما شافت انه

ما فيه امل وكان دايما يأجل العرس... ويعاملها معاملة الكلاب عزج الله ويصتسغر شأنها

اختي بعد طلاقها مباشره خطبها واحد...

اسم عائلته يرن في المجتمع واخلاقه ودينه الكل يشهد له بالخير..

شوفي كيف ربج كريم؟؟؟؟ لا إلله إلا الله.. ماشاءالله....

ربنا سبحانه وتعالى.. يعوض وياجر الصابرات منا.. انتي خلي عقلج وقلبج مع الله عزوجل وصدقيني ماخسر اللي يوكل نفسه ويسلمها للخالق تبارك اسمه وتعالى...
والناس دايما تتكلم... حتى اذا مالجه وحتى اذا معرسه .. كلام الناس ابد ما ينتهي.... بس انتي خلي قلبج قوي وقوي شخصيتج ومنعي التردد والامعيه في هالأمور... اذا انتي شفتي انه مامنه فايده .... صدقيني
بظلين عايشه حياتج معاه بتردد وغصب وضعف..

بس انتي حاولي تتقربين منه... واكشفي اسباب هالمعامله...

انا ادعي لج يا اختي انها اتكون شده وتزول .. وربي يفرج عنا وعنج انشاءالله...

تحيــــــاتي
*جــــوليت & رامبـــــو*

شكرا اخواتي العزيزات على ردودكم...

انا صحيح ضقت درعا بحياتي .. ولااستطيع ان اشكي حالي الى احد لانه وضعي حساس وانا التي اصريت على اختياري له لاني فعلا ارغب بلاستقرار والبدء من جديد ..
نصحوني اهلي بتريث في اتخاذ القرار ... ووصفو لي حالته الاجتماعية
حيث انه مسؤل عن اهله . وبانه وضعه المادي اقل من المستوى المعيشي الذي انا فيه .. وشكله وطريقة لبسة البسيطه .. رغم كل تلك الامور وقبلت به لانني اريد رجلا يقف بجانبي واحس بلحياة معه .
ولااريده لماله وحسبه ونسبه وشكله فكل تلك الامور فانية .. مادمت اخلاقة حسنه .. وهو انسان ملتزم .. اريده
هذه عبارتي التي قلتها لوالدي ..

ولكن بعد الخطوبة ندمت على كلمتي تلك واقتنعت بانه والدي على صواب
صدقوني لم احسسه بلفروق التي بيني وبينه لاني لااؤمن بها
ولم اطلب منه شي يفوق طاقته ( علما بانه دخلة لاباس به )
كان مندفع في بداية الامر مرات كثيرة اخبرني بانه محظوظ وبانه الناس تحسده لانه يملك ملايملكه غيره من الجمال والدلال ........
ولكن بعد مده تغير وتحول الى شخص عنيف حاد الطباع عنيد مصر على موقفه يجرحني ويهينني لاقل الاسباب يصفني بلمتمرده .
هو لايحب قراة الكتب وانا قارئة جيده اقرى كل ماتقع عليه عيني
يصفني باني لاافهم شي .
هو لايدخل النت ولايعرف كيف يتعامل معه ويصفني باني اضيع وقتي فيه
صدقوني لااجد لغه لتفاهم والتخاطب معه ..


ارجو كل من تقرى مشكلتي ولها تجربه مماثله وتغلبت عليه
ان تنجدني بلحل لانني ساحاول باقصى جهدي .. لانني لااحتمل ان اموت مرتين ..

وشكر خاص لكل من قراءة المشكله وحاولت ان تساعدني فيها
وتاكدن باني لن ولم انساكم من دعائي
وجزاكم الله الف خير ..

الله يفرج همك يارب

ويسخره لك انشاءالله

في حلقة ضايعة لازم تدورين عليها وتحليها واستخيري ربك

واعرفي مهما يصير فان هذا شي مقدره ربي وكاتبه من قبل ماننولد

بس انتي خذي بالاسباب وصلي وادعي وربي يهونها عليك .

صراحه كانك تتكلمين عن خطيبي السابق
لكن خطيبي رغم ان اقل منى مستوى ثقافي وعلمى واقتصادى كان شايف نفسه كثير على وعلى اهلى تقولى مغرور ومتكبر مثل البالون المنفوخ بس فاضي من جوا
المهم الله يعينك ويستر عليك ويسعدك

عزيزتي أحب الورد ،،
انتي الحين وضحتيلي شي ،، وهو انه كان كويس بالاول وكان يمدحك ويقول لك ان الكل يحسده عليكي ،، يعني يعرف يتكلم ويعبر ويمدح لو كان وده ..
لكن بعد فتره تغير ،،
وانا اللي اتوقعه انه حس انه اقل منك وانك متفوقه عليه في اشياء ،، وكمان يمكن ان اللي مدحوكي عنده مازالو يمدحوكي،، فهو أحس بنقص وحس انك افضل منه ،، فانقلب الى رجل عنيد حاد الطباع يبغى يثبت رجولته قدامك وسيطرته عليكي ،،
وحب انه يبين لك انك مو شي اساسي عنده ،، اوبعد اذنك يعني ولاتفهميني غلط ،، هو يمكن يبغى يذلك عشان يحس بكرامته ورجولته وبانه مسيطر عليكي وعشان كذا يذلك ويهينك ويصفك بالمتمرده..
وهذي العقده يعاني منها كثير من الرجال ،،
وخصوصا انه شافك تتفوقين عليه في غير الماديات ، بثقافتك وحبك للقراءه وكمان اطلاعك على كل شي عن طريق الانترنت ، السبب اللي خلاه يقول لك انك ماتفهمي شي....

فانتي ابتعدي عن رجل من البدايه حاسس انك افضل منه وغير واثق من نفسه ،، لانو عند بعض الرجال اذا الرجل حس ان زوجته افضل منه في شي ،، بدأ يهينها ويهين كرامتها ...
فانتي يالغاليه استخيري الله وان ارتحتي في فسخ الخطوبه افسخيها واتوكلي على ربك ...

وكمان لازم المره الجايه انشالله تاخذي درس وتفكري كويس لما يتقدم لك شخص وتستشيرين اهلك وتاخذي برايهم والاهم تستخيري لربك ... عشان ماتغلطي غلطتك،، لان هذي حياة ثانيه واولاد ومستقبل لازم تفكري فيه زين ..
وحطي في بالك انو بدل الرجال فيه الف رجال ،، وانتي مازلتي صغيره وبيجيكي انشالله اللي ترضي دينه وخلقه وترتاحي معاه ....

واعذريني على الاطاله ،، وعلى تقليب الكلام (شوي عاميه وشويه فصحى):pain:
والله يوفقك انشالله ونسمع عنك اخبار زينه:shy: