لماذ ترفض العروس السكن مع حماتها؟

بالنسبه لي ومن تجربتي الشخصيه أنا ندمانه أني رضيت أسكنه في بيت أهل زوجي...

بس لا زم أوضح أن عمتي أو حماتي ما يخصها بالموضوع لأنها حرمه كبيره وااايد بالسن وطيبه جدا وزوجي أخر العنقود فما قدرت أحرمها منه..

بس المشكله هي أهل الزوج..

وأقصد اخوان الزوج. لأني مش قادره أخذ راحتي مع وجود رجل غرييب بالبيت..

يعني برى الغرفه لازم حجاب ولبس واسع كم طويل و ممنوع الميك أب.:down::pain:

وهذا اللي يضايق بالاضافه للاحساس اني دايم تحت المجهرمن خواته والفضول الدائم والرغبه بالتفتيش داخل الغرفه ومعرفه كل السوالف اللي تصير بيني وبين أخوهم..

وهذا كوم ولما تزعلي من زوجك كوم..

كل البيت يحس باللي صار مهما حاولت أداري..:down::down::mad2: :mad2: :mad2: :mad2: :mad2:

تسلمين اختي حورا على مشاركتك

تحياتي لك

السلام عليكم ورحمة الله وبركاته

حبيبتي أشكرك على طرح ها القضية الهامة

بصراحة ها الشي يعتمد على مقدرة الزوج المادية

يعني لو هو مقتدر وقادر انه يفتح بيت مستقل لي فليه البهدلة واكيد الوحده تحب انها تطلع من بيت اهلها لبيت بروحها من غير ما يشاركها احد فيه يعني تكون لهم مملكتهم الخاصة

بس اذا كان ماديا غير مقتدر وهو رجل صالح فمستحيل اني أضغط عليه بحكاية البيت

واذا كان اهله وحيدين وبحاجة لمن يداريهم فاكيد راح اوافق أعيش معاهم وطبعا لو كان تعاملهم معاي كويس وما حسسوني اني زوجة ابنهم وخلاص

يعني ها الشي بالنسبة لي يعتمد على مقدرة الزوج ماديا وعلى اسلوب اهله

وأتمنى انك باقي الاخوات يطرحوا لنا ارائهم وبخاصة المتزوجات حتى تتاح الفرصة للبقية بأخذ العبرة



تحياتي للجميع

اختكم

malaak

حلى باتشي بس من صنع ايدي

ساعات ... لاصحاب الذوق الرفيع فقط

يمممممم مكرونة بالجبنة

و عليكم السلام و رحمة الله و بركاته

تسلمين اختي malaak

على مشاركتك الجميلة و اعطاء الرأي

اول شي السلام عليكم

ثاني شي الموضوع حلو بس غريبه ان مافي وايد ناس يقولون رايهم...مع انه الشغل الشاغل لكل متزوجه او مقبله على الزواج


و ثالث شي انا ضد فكره السكن مع اهل الزوج بشده و بكل ما اوتيت من قوه


و كلامي كله من خلال ما اسمعه و ما اراه و ليس عن تجربتي لاني و الحمد لله لا اشتكي من اهل زوجي يعني لين الحينه سمن على عسل مثل ما يقولون و ان شاء الله ما نختلف ابدا...و رفضي لفكره السكن معهم هو ناجم من حرصي على استمرار علاقتنا الجيده لاني مب مستعده اخسرهم و ادخل في دوامه المشاكل الكنه و بيت الحماه...

و دايما المشاكل الي اسمعها او اغلبنا يسمعها تتلخص فيما يلي ..و هذي بعض المشاكل


تلاقون الزوجه دائما تشتكي و تقول ...البيت كله اخوانه ما اخذ راحتي و لازم انتبه في كل دخله او طلعه و اتغطى...او تقول خوات زوجي دايما في غرفتي و ما يطلعون منها و يسمحون لانفسهم بان يفتحون كبتاتب الخزائن و ادراجي و يلعبون بمكياجي و عطوري كانهم ببلاش و مب انا مخسره عليهم ...و دايما يدورون عن كل شي يديد اشتريه و يااااويلي اذا اشتريت شي و ما راويتهم او ما قلت لهم ..و غير البعض يشتكي من التحقيق على كل دخله و طلعه وين رايحه و من وين يايه كانهم هم اولاء امرج ... و يا مكثر النعزات او التلميحات عن كل جديد تشتريه الزوجه انه من فلوس اخونا و يا ويلها اذا ما سلفتهم شي يبونه من عندها و يعمممون على كل ممتلكاتها انها من فلوس اخوهم اي هو زوجها اصلا ..و حتى لو كانت اصلا هي تشتغل و تشتري لنفسها او اشياء تمتلكها من قبل الزواج ...و كانها تصرف من فلوس ابوهم مب اخوهم اي هو ريلها و ملزوم فيها و غيره من الشكاوي


و اهل الزوج دايما يقولون ....هي كل تيلس او تقعد في غرفتها ما تيلس وياها حتى لو انها دخلت الغرفه ولو دقيييقه يا ويلها ... و اذا وحده منهم بس لمحتها تتكلم بالتلفون يقولون هذي طول الوقت تتكلم بالتلفون ..و بعد يقولون انها ما تساعدنا و تيلس مثل الاميره و تبينا نخدم عليها اذا البيت مافيه خدم ... و اذا البيت فيه خدم يقولون كل تاخذ شغالتنا و نحن مجتاجينها و هي تشغلها عن اشغالنا...و اذا جابت لها خادمه خاصه فيها يقولون ما تخلي خدامتها تساعد شغالاتنا او يقولون خدامتها خربت اخلاق او طباع شغالاتنا ....و غير انها كل يوم روح بيت امها ما تقعد ويانا مع ان عالبا ما يكون الزوج عنده اكثر من اخت متزوجه و هم كل يوم يزورون امهم و كل يوم في بيت امهم ...و غير التدخل في تربيت الزوجه لاطفالها دايما يقولون تاخذ عيالها و تروح حتى نحن ما نشوفهم.. و التعليق على تربيتها لطفالها و اذا نطقوا بكلمه غلط يقولن هيه من قلته التربيه ....مع ان الاطفال يلقطون كل الكلام ...و دايما التعليق على التصرفات الغلط الي يصدرها الاطفال انهم تعلموا هذي الاشياء في بيت خوالهم يعني كان خوالهم ما يعرفون يربون عيالهم و كان عيال العمام هم احسن و اادب و قمه في الاخلاق ...هذا و باالضافه الي شكاوي اخرى كثيييييييييره


و ما يزيد الطينه بله مثل ما يقولون لو في البيت فيه زوجة اخو ثاني ...تبدا المقارنات بين السلفات والله فلانه سوت لنا و فلانه ما سوت ...و فلانه جبوبه و فلانه وغده ...و غيره


و هذا غير النقاشات الحاده و هذي شو تعني و هذي شو تقصد بالجمله الي قالتها ...اكيد قصدها نتعزني و لا تعايرني و غيره


حتى لو كانوا اهل الزوج احسن ناااااااااااس بالدنيا و لو كانوا ما يعاملون الزوجه ككنه و لو حتى هي ما تعاملهم كاهل زوج ...ما دام انهم سكنوا ويا بعض في بيت واحد لاااابد ما يجي اليوم و يطلع الكل على حقيقته تصير الكنه كنه و الحماه حمه


مره سمعت مثل سوري في مسلسل مرايا وااايد عجبني يقول

اعدا اعداء المراه ..كنتها و سلفتها و بيت حماها

الحينه شو رايكم في كلامي صح و لا خطأ؟؟؟

و اعذروني على الاطاله

أختيه مرمر ... :clap::clap::clap::clap::clap::clap::clap::clap::clap::clap:



مشكوره ماقصرتي في كلامج .... كل إلي قلتيييه صح 100% ...


وحتى لو أهل الزوج كانوا زيينيين ويااااج لابد أيي يوم وتستوي مشاكل بينكم ... فالأحسن والأفضل أنه الزوجه تسكن بروحها دام الزوج يقدر يسكنها في بيت بروحها ...


بس إذا ماعنده أي إمكانيه تيلس مع أهل الزوج لفتره وبعديين تستقر بروحها:up:

أنا مع الأخت مرمر في كل كلمة قالتها

و شخصيا ـ لو يجيني نصيب ـ راح أحط أول شرط إني اسكن بعيد عن حماتي ، حتى لو شقة غرفة وحدة و صالة :D2


بصراحة انا أشوف شوف العين اللي يعانونه أهلي و على راسهم والدتي


مستحيل أكرر هالسيناريو

الوحدة تبغي تكون ملكة في بيتها.. وعشان تحقق هالشي تفضل السكن بروحها مع زوجها وعيالها بس..
لكن اذا كانت الحماة بروحها وما عندها غير هالولد ( اللي هو زوج المستقبل) فمستحيل أرضى اني اعيش بعيد عنها.. وبحطها في عيوني ( لأنها أم الغالي وما لها غير الله سبحانه ثم هالوليد وانا )

مرمر ... والله نطقتي باللساني

أول سنة أنتي تاج على روسهم ..

والحين ثاني سنة بدو يتغيرون شوي شوي ..

والله يستر ..

البعد أحسن علشان تحافظين
على علاقتج فيها.....

السلام عليكم ورحمة الله وبركاته

برغم أني مو متزوجه بس أشوف السكن لوحدك أفضل لاأسباب عديده

لكن مايمنع بقائك ببيت أهل الزوج أذا كانت ظروفه الماديه ماتسمح

مجرد وجهة نظر

تحياااااااتي

السلام عليكم ورحمة الله وبركاته
انا اعتقد انه بعض الزوجات ترفض السكن مع اهل زوجها لخوفها من المشاكل الي ممكن تحصل وقتها طبعا الزوج راح يرفض انه ينتقل لسكن في منزل اخر..
اما بنسبة ليه اذا كنت عارفة الإنسانة الي راح اعيش معها ماعندي مانع لكن اذا كنت ما اعرف عنها اي شي ما اعتقد اني راح اوافق الا في حالة واحدة اذا كان الزوج المنتظر وحيد امه ومالها غيره راح اضحي واووافق:D2

انا ضد السكن مع الحماه الا اذا كانت الظروف تحتم ذلك اذ كانت وحيده مثلا فمن غير المعقول تركها تعيش وحدها لان من حقها علي ابنها ان ي}نس وحدتها
اما غير ذلك فتجنباً للمشكل يستحسن ان لا يحصل هذا مع استمرار الموده بينهما و التواصل

مشكورة لكم جميعا اخوتي

تسلمون على المشاركة و ابداء الرأي

من ناحيتي انا ارفض السكن مع اهل الزوج

السلام عليكم ورحمة الله وبركاته

وانا بعد ارفض اسكن معاهم


اريد اكون بروحي و اسوي اللي اريده


والبس اللي اريده على كيفي


بدون تدخل من اي حد او خوف ان حد يشوفني كذا

السلام عليكم ورحمة الله وبركاته
الصراحه الموضوع وايد حلو وانا راي من تجربه شخصيه الوحده اتعيش روحها وي ريلها احسن لها من انها اتعيش وي اهل ريلها .... ولاسباب عديده ومنها :
1-تاخذين راحتج مع ريلج اتحسين انج عايشه في مملكتج وانج ما الج الا ريلج وماله حد غيرج ....

2- تلبسين اللي تبينه واتجددين من عمرج ابدون ماتحسين انج مقيده

3- اتسوين كل اللي تبينه فالبيت لانه بيتج ومحد يعترض او يلومج واتفاجاين ريلج باشياء حلوه مثل عشا رومنسي تغير الديكور بين فتره وفتره وكسر الروتين واتجددين حياتج من وقت لثاني

4-تطبيخ وشو ما طلع اللاكل ريلج ما بقولج مب حلو وله ملحه زايد بس اذا طبختي فبيت حماتج الكل بعلق وبنحرجين :o...

5-واذا صار بينج وبين ريلج سوء تفاهم اترومين اتحلين الموضوع بكل هدوء اذا كنتي وي حماتج ماترومين اتسوين شي وكيف تتصرفين والحماه اتحس ابكل حركه فبيتها ...

6-واذا الحماه سافرت بشكارتها يودي عاد لازم انتي اتسوين واتساعدين بتحسين اشوي اشوي انه كل شي بيرد عليج وانتي بتسوين الشغل كله عشان تثبتيلهم انج ربت ربي :D2

7-والحلو فالسالفه كلها ماتكونين متقيده باوقات الطلعه والدخله تطلعين متي تبين واتين متي تبين وي ريلج بدون رقيب ..

8-من غير االلي بتاخذينه لج او لريلج لازم بيسألونج شو عندج شو شاريه الحماه مب قصدها تسال بس فضول ومع الايام بتبتدي الغيره واتحن الام وتبي ولدها يدلعها اكثر من حرمته وتبتدي اتقول اشياء اتضايج وغير يوم خواته فالبيت لازم ايبلهم مثل ما ايب حق حرمته ولا بياخذون فخاطرهم

9-واذا حملتي وقام ريلج يدلعج ابدون قصد جدام امه اولها بتستانس بس عقب بتحن ليش هالكثر انت اتسوي وليش واحنا يوم كنا نحمل عادي نتحرك ونشتغل ولا كانا حمل ما صار فينا شي .....

اسمحولي خواتي اذا طولت عليكم واتمني اني ما بالغت بس صدقوني الوحده اتحافظ علي قدرها وي اهل ريلها احسن من انها تدخل علي طول حياتهم يمكن هم ما يتقبلون كل وحده اتربت علي اسلوب معين اتروم اتغير فريلها اذا كان في شي بس ماتروم اتغير فالعايله كلها خلنا واقعين وبعد ارد واقول مب كل العوايل نفس الشي فالواحد من البدايه يحافظ علي العلاقات ويتجنب المشاكل .....

المثل يقول : سير بعيد تعال سالم :smile:

بارك الله فيكم اخوتي

شكرا لكم على المشاركة و النقاش

اني احترم رأي كل واحد منكم

موضوع فعلا حلو:up:

تدرون اني انا حاطه شرط من شروط العقد

اني اعيش ببيت لوحدي لان مثل ماقالوا كثير من

البنات المشاكل جايه جايه عاجلا ام اجلا عشان كذا

انا شرطت هالشرط لان الوحده مابتحس باستقلاليتها

الا اذا عاشت لوحدها مع زوجها