عندي لكم طريقة سويت حلو وهو الرنجينا ..
مادري اذا تسمونها تسميات ثانية في بقية الدول ..
لكن عندنا في الإمارات اسمها الرنجينا ..
وتتواجد في محلات الحلويات الراقية ..
ولها جمهور كبير .. لأن طعمها مميز وحلو جدا ..
للشيبان والشباب والبزارين ..
خل نبدا ..
المقادير:
4 أكواب ونص طحين رقم 2 (الأسمر)
نص كوب سكر بودرة
454 غرام زبدة غير مملحة (الكبيرة) لازم تكون طرية
ملعقة ماء ورد
ملعقة ماء زهر
معجون تمر (يبيعونه جاهز) أو أي تمر لين انزعي نواه
ملعقتين صغيرتين جرفة مطحونة (أو حسب الرغبة)
فستق مطحون للتزيين
الطريقة:
نحمر الطحين في قدر مع الجرفة..
بعدين ننخله في ملة ونضيف له الزبدة والسكر ونعجنه عدل لين ما يتجانس..
وعقب نرص نص الكمية في قالب ونضربه عدل عشان يتماسك..
وبعدين نسوي من معجون التمر شرايح ونغطي بها سطح الطحين..
وبعدين نرش فوقه ملعقتا ماء الورد والزهر (عاشت اللغة العربية)!!:D2
وعقب نصب باقي الطحين ونضربه عدل عشان تتماسك الطبقات..
ونرش على الويه فستق مطحون..
بعدين نغطيه بورق ألمنيوم ونحطه في الثلاجة لمدة ساعتين..
واول ما نطلعه نقصه على طول على شكل مربعات صغيرة..
ونحطها في صينية التقديم..
وممكن تحطون كل مربع في أوراق التقديم الصغيرة..
يطلع شكلها حلو ومرتب..:up:
أتمنى تعجبكم ........... ردوا عليه اذا جربتوها..
وأي استفسار أنا حاااااااضرة..:smile:
