اطلبي اي وصفة لعلاج اي مشكلة من مشاكل شعرك وانا حاضرة...ولايردكم الا لسانكم

امممممممممم تسلمي يالغالية..
مشكلتي
شعري صارت متعرج كثير في الوسط من ناحية الجذور رغم انه ماكان كذا .. ايش الحل
وبطيئ النمو ويتقصف بسرعة وقصيته قبل اسبوع ..

ايضا كثر الشعر الابيض عندي ..

والله يوفقك ويسعدك

تحياتي.

ياربي لك الحمد علي كل حال:shy:

اختي شعري يتساقط وجاااف وقليل مره ومافيه لمعه

اما الطول ما يهمني لاني احب القصيرررر لكن اتمني انه يكثف

والله يجزاكي خير يالغاليه

مشكلتي ياعزيزتي

شعري صار خفيف عن اول ونفسي يرجع زي ماكان ؟؟؟؟

واذا فيه شي يطوله مافي مانع؟!!!

ولكي جزيل الشكر

السلام عليكم ورحمة الله وبركاته

الاخت حبوبة القلب
بالنسبة للتعرج عندي لج حلين
الحل الاول انج تاخذي باميا وتخلينها تغلي بكمية من الماء لين مايصير الماء فيه المادة اللزجة اللي بالباميا يعني الرغوة وجذي
وتشيلين الباميا منه وتاخذين الماي وتغسلين فيه شعرج وتخلينه ساعة او سعتين وتغسلينه
وان شاء الله مع الوقت بتشوفين التعرجات خفت او ممكن تختفي

الحل الثاني هو طريقة الترمس بس تطول شوي اكثر من البامية
وهالطريقة تفرد التعرجات وتطول الشعر
تجيبين ترمس مر مطحون وتاخذين كمية تكفيج وتنقعينها بماء حار من الصباح الى المساء يعني طول اليوم
وقبل ماتنامين تغسلين شعرج فيها وتخلينه ماتنشفينه بسشوار او شي
ونامي فيه للصبح
والصبح تغسلين شعرج
ومع الاستمرار بتلاحظين التعرجات بدت تروح وشعرج راح يطول ان شنء الله

الحين نجي للتقصف
طبعا انسي انه الشعرة اللي تقصفت بترجع مثل اول يعني لازم تقصين الاطراف المتقصفة
وبعدين تسوين ماسكات تساعدج انج تتجنبين التقصف
الحين انتي مادام قصيتيه قبل اسبوع معناته التقصف راح
بعطيج طريقة ممتازة لتغذية الشعر وتنبيته وهي على فكرة من دكتور جلدية
اخذي صفار بيضة وملعقة كبيرة زيت زيتون وملعقة متوسطه فيتامين سائ اللي ينحط للاطفال بالحليب
انتي روحي اي صيدليه قوليله ابي فيتامين سائل اللي بالقطارة للاطفال بيعطيج
وهو اي ماركة عادي المهم انه فيتامين
اذا ماحصلتيه اخذي حبوب سينترم اخذي حبتين وطحنيهم وحطيهم بالخلطة وحطي الخلطة هذي على فروة راسج مع التدليك وخليها نص ساعة وكرريها مرة بالاسبوع
وان شاء الله من ثاني استعمال بتلاحظين النمو في شعرج وانه بدا ينبت شعر جديد
وبما انه هالوصفة فيها زيت زيتون فهو راح يساعد شعرج على العودة للون الطبيعي

ان شاء الله تستفيدين من وصفاتي وبلغيني بالنتايج اول باول :up:

السلام عليكم ورحمة الله وبركاته

الاخت سوود العيوون
بالنسبة للتساقط اهم شي تتأكدين انه ماعنج فقر دم او مشاكل صحية لانه وقتها العلاج الخارجي ماراح ينفع
لكن راح اعطيج وصفات رائعة ومجربة لهالمشكلة
هذي وصفة ممتااازة وانا شخصيا مااستغنى عنها لشعري وعالاقل احطها مرة بالاسبوع
تاخذين صبار طبيعي اللي ينباع بالمشاتل
اخذي ورقة منه طبعا الورقه طويله انتي قسميها 3 اقسام ل 3 استعمالات وحطيهم بالثلاجة بس اخذي القسم اللي بتستعملينه وشيلي الشوك اللي عالجنبين وقطعيها وحطيها بالخلاط وحطي معاها اما زيت ذرة او زيت جوز هند وانا انصح ببراشوت او سوي مثلي احط معاه 3 ملاعق فاشكول بالثوم او اي كريم حمام زيت تحبينه مع ملعقة عسل
وخلطيهم بالخلاط وبعدها حطيه بشعرج لمدة ساعتين وغسليه عادي نفس كل مرة
وبتشوفين شعرج شلون راح ينبت بسرعة والتساقط يختفي نهائيا
انا دايما استعملها مع الفاشكول لانه احسن شي

وفي طريقة تقريبا مثلها وهم بعد ممتاااااازة وايد وتغذي الشعر وتكثفه
تجيبين الصبار مثل ماقلتلج وتشيلين الشوك وتحطينه بالخلاط وتجيبين جوز الهند الثمرة نفسها وتاخذين كمية بسيطة من الماء اللي فيها وتاخذين منها من داخل وتبشرينها يعني تغرفين من الثمرة نفسها من داخل وتبشرينه وتاخذين ملعقتين من المبشور وتحطينه بالخلاط مع ملعقة زيت اي زيت تفضلينه ماعدا زيت الزيتون او تحطين ملعقة حمام زيت
ونفس الشي تحطينه بشعرج ساعتين وتغسلينه
تتكررين العملية مرة الى مرتين بالاسبوع وان شاء الله راح تحسين بالفرق قبل مايمر شهر حتى بتشوفين الحيوية على شعرج والنعومة واللمعة

وعندج الخلطة اللي قلتها للاخت حبوبة القلب مالت الفيتامين وايد زينه بس مشكلتها انها شوي تنشف الشعر وانتي اساسا شعرج جاف عشان جذي لاتستعملينها الا اذا حسيتي شعرج استعاد حيويته وطراوته

واتمنى اسمع ردج وتجاربج مع الخلطات قريبا :up:

السلام عليكم ورحمة الله وبركاته
الاخت لحظة صمت
بالنسبة لمشكلتك الاولى رجي للخلطات اللي في ردي اللي قبل كتبتهم للاخت سوود العيوون وان شاء الله ينفعونج
وبالنسبة للتطويل انا انصحج بزيت عافية مع الحلبة ممتاز للتطويل والتكثيف بعد بس على الله تتحملين الريحة :pain:
وهو عبارة عن فنجان حلبة مطحونه تحطينها في علبة زيت عافية متوسطة لمدة 10 ايام وتبدين تستخدمينها وصدقيني بتشوفين الطول والنعومة اللي ماصارت

وفي طريقة ثانية هم تدخل فيها الحلبة بس ممكن تستغنين عنها وتسوين الوصفة من غير الحلبة
الخلطة عبارة عن علبة زيت النارجيل اللي لونها أخضر او ممكن باراشوت ينفع بعد
حبتين موز تستعملين القشر بس قشر الموزتين
ملعقه كبيره او ملعقتين من الحلبه واذا بغيتي تخففين الريحه احمسي الحلبه لين يصير لونها بني غامق
طريقتها تجيبين الزيت وتحطينه بقدر وعلى النار وتحطين عليه قشر الموزتين والحلبه
لين يغلون مع بعض وتطفين النار وتغطينه اربع ايام
باليوم الرابع تحطينه بالخلاط وتخلطينه وتحطينه بعلبه وتبدين تستخدمينها على الشعر
ساعتين وتغسلينه واتمنى لك شعر كثيف وطويل انشاء الله :up:

[SIZE=6]السلام عليكم ورحمة الله وبركاته

هلا وغلا اختي فديت الكويت:

مشكووووووووووووووووره وااايد على هالوصفات اللي تهبل


واذا ما في مانع اذا عندج وصفه حق القشره وشي يطول الشعر

بسرعه اكون شاكره لج واااااااايد :z_thanks: :z_thanks: :z_thanks:

وفديت الكويت واهلها يا ربي:o:o:o:o[/SIZE]

السلام عليكم ورحمة الله وبركاته

أختي العزيزة مشكورة على موضوعك و على تطوعك لمساعدتنا و جزاك الله خيرا و بارك فيك و أسعدك

أنا عندي مشكلة بشعري و هي كثرة القشرة. بعد غسل شعري بيومين أو ثلاثة يبدأ يظهر بكثرة و يسبب لي حكة في فروة رأسي و أنا طبيعي شعري دهني و باغسله مرتين بالأسبوع لكن احيانا أكسل و أتركه أربع أو خمس أيام بدون غسيل و مشكلة القشرة بتزيد وقتها، أعمل ايه؟؟ في حاجة طبيعية ممكن أستعملها مع العلم إني محجبة و الطرحة بتفضل على رأسي من 5.30 صباحا إلى 6.30 مساءا و أحيانا إلى 11.30 مساءا في بعض الأيام. فهل من نصيحة تعطيها لي؟؟

أشكرك مرة تانية و جعله الله في ميزان حسناتك إن شاءالله

أختك

أمل

السلام عليكم ورحمة الله وبركاته

هلا و غلا بــــــــــــ فديت الكويت وفي اهل الكويت كلهم

بصراحة مادري ويش اقول الله يعطيك الف عافية

جهد جبار تشكرين علية

مشكلتي ان شعري الي اسفل الرقبة وابغاة يطول بسرعة قبل الاجازة واطراف الشعر مقصف واذا قصيتة راح يقصر من جديد

فــــــــ لو سمحتي فية شى يطول من غير ما اقص الاطراف

ولكي خالص التحايا

زهرة الفل:cool2:

اما شعري.ماساه يا فديت الكويت
انقذييييييني
انا اصلا مسويتله تمليس من زمان
بس احس انه شكله ميت خلاص ..ما فيه حياه
وبعدين احس انه متقطع من فوق وتحت وفيه تعرجااااااااات
يعني ...........:down:
احس انه مشوهني:down:

السلام عليكم ورحمة الله وبركاته
الاخت النجمه
مشكورة على الترحيب الحلو وماقصرتي وان شاء الله اقدر افيدج باللي اقدر عليه
بالنسبة لتطويل الشعر كما ذكرت في ردودي السابقة خلطة زيت العافية مع الحلبة ممتازة جدا للتكثيف والتطويل
والخلطة الثانية اللي فيها زيت جوز الهند مع قشر الموز وااااايد ممتازة ومافي احد جربها الا وشكرني عليها وان شاء الله تنفع معاج يارب
وعندج الوصفة اللي قلتها بأول رد وهي الترمس المنقوع ممتازة لتطويل الشعر وفرد تجعداته
وفي وصفة مجربه تشبه وصفة الترمس وهي عبارة عن ورق الكافور المجفف تطحنينه وتاخذين مقدار فنجان صغير وتنقعينه في ماء ساخن تقريبا كأسين ماء
لمدة ساعتين بعدها تغسلين الشعر بهالمنقوع بعد ماتصفينه وتتركينه اذا قدرتي طول اللي او عالاقل 4 ساعات
ومع الاستمرار لمدة عشرة ايام ان شاء الله بيبين الطول بالشعر

اما بالنسبة للقشرة راح اجاوبك انتي والاخت الفاضلة amaladel
اللي اشكرها على ترحيبها الجميل:up:

هناك عدة وصفات صراحة لعلاج القشرة وابسطها واللي استخدمها عادة لما احس بالقشرة بدت تطلع فيني
هي الخل والماء
خذي كاس ماء واضيفيله ملعقتين كبار خل تفاح او اي خل بس يفضل التفاح لانه الانفع وبعد ماتتسبحين وتغسلين شعرج بالشامبو قبل لاتطلعين من الحمام غسلي شعرج بالخل والماء يعني تكون هذي الشطفه الاخيرة وبعدها ماتشطفين الشعر بالماء لا خلاص
ولا تخافين من ريحة الخل لما ينشف الشعر بتروح
وترى هالطريقة تنفع اذا استخدمتي خلطة فيها حلبة او ثوم او شي فيه ريحة توخر الريحة:up:

الوصفة الثانية هي مغلي ورق الاس او الريحان
تاخذين ملئ يدك ورق ريحان وتطبخينها في لتر ماء وبعد ماتصير دافية تصفينها وتغسلين الشعر فيها وهالعلاج ينفع لعلاج القشرة والتساقط معا..

الوصفة الثالثة هي منقوع اكليل الجبل في لتر ماء مغلي لمدة ربع ساعة وبعدها يصفى وتدلك به جلدة الرأس...

الوصفة الاخيرة وهي تنفع خصوصا للشعر الدهني وهي مزج كمية من السائل الموجود داخل جوز الهند مع بعض عصير الليمون وبعض الماء الفاتر وتدلك به فروة الرأس ويترك نصف ساعة ويغسل الشعر كالعادة

بالنسبة لك اخت amaladel
مادام تضطرين تلبسين الحجاب فترة طويله حاولي يكون من اقمشة قطنيه عشان يقدر الشعر يتنفس
لانه تغطية الرأس هالفترة الطويلة هي سبب رئيسي للقشرة والدهون في الشعر
وان شاء الله تجدين في وصفاتي مايفيدك

السلام عليكم ورحمة الله وبركاته
الاخت زهرة الفل
اهلا وسهلا فيج وانتوا خواتي وتستاهلون كل خير وان شاء الله اقدم كل شي يفيدكم يارب
بالنسبة لوصفات التطويل ذكرتها بالرد اللي قبل ياليت ترجعين لها وان شاء الله تفيدج
بس لازم تقصين الشعر عالاقل كل شهرين او 3 اشهر مرة
وقصي كمية بسيطة يعني يادوب 1 سم وصدقيني بهالطريقة ومع العناية بيطول شعرج اسرع لانه الاطراف التعبانة تاخذ من عافية الشعر الصحي وتتعبه معاها لكن اذا قصيتها بيقدر شعرج يستفيد اكثر من الخلطات :up:

السلام عليكم ورحمة الله وبركاته
الاخت الملاك الغريب
بالنسبة لشعرج هو الحين محتاج منج عناية مركزة بعد المعالجات الكيميائية اللي خضع لها
راح اعطيج جم وصفة ان شاء الله ينفعونج ويساعدون شعرج على انه يستعيد عافيته ان شاء الله
الوصفة الاولى
ومقاديرها كالتالي
علبة زبادي كامل الدسم
ثلاث ملاعق زيت ويفضل براشوت او عافيه
ثلاث ملاعق عسل طبيعي
ثلاث ملاعق مايونيز
ثلاث ملاعق حمام زيت ويفضل فاشكول انا انصح فيه
تخلط مع بعض وتوضع لمدة ساعة على الشعر مع تدليك فروة الرأس ويغطى الرأس بقبعة بلاستك ثم يغسل الشعر بالطريقة المعتادة وصدقيني هالوصفة ممتازة اذا سويتيها بالاسبوع مرتين لمدة شهر وبعدها بالاسبوع مرة بتشوفين شعرج شي ثاااااااني كله حيوية وحياة ولمعة ونعومة

وهذي خلطة ثانية تقريبا تشبهها مع اختلاف بسيط بس هم ممتازة
مقاديرها هي
ملعقتين اكل زيت اى نوع الا زيت الزيتون لا نة يسبب الجفاف
ملعقتين فاشكول بالثوم او حمام زيت الخلطة السرية بالمكسرات لانهم احسن شي للشعر
ملعقتين عسل
ملعقتين زبادى
بيضة بس الصفار
تخلط جميعها وتوضع على الشعر مع عمل حمام دافى بفوطة ساخنة وتترك لمدة نص ساعة ويغسل وتكرر مرتين فى الاسبوع
تستخدم للتقصف - للتساقط - وتغذية الجذور - ولنعومة الشعر

يعني ممكن تستخدمين الخلطتين بالاسبوع كل وحدة مرة وبعد اسبوعين بتشوفين الفرق ان شاء الله وبتدعيلي باذن الله

السلام عليكم ورحمة الله وبركاته
اشكرك على تعاونك الرائع والله يعطيك العافيه
انا مشكلتي ان اطراف شعري متقصفه مع اني اقصها

واذا كان فيه شئ يطول الشعر الحقينا به
والله يجزاك خير

بسم الله الرحمن الرحيم

السلام عليكم ورحمة الله وبركاته

أختي الفاضلة

مشكورة على الوصفات و النصائح الغالية و على ردك المفصل. وفقك الله و حفظك و جزاك خيرا على عملك الصالح. إن شاء الله أعمل بنصائحك.

تحياتي و تقديري

السلام عليكم ورحمة الله وبركاته
الاخت ارياف الله يعافيج ولاشكر على واجب
بالنسبة للشعر المتقصف اهم شي قبل البدء بعلاجه هو قص الاطراف لكن اذا استمر التقصف معناته ان الشعر يتعرض لعوامل او سوء معامله تؤدي لتقصفه
حاولي تتجنبين السشوار المتكرر والعلاجات اللي تدخل فيها الكيماويات مثل الصبغ والتمليس وما الى ذلك
وتجنبي غسل الشعر بماء حار استخدمي الماء الفاتر احسن

وهذي بعض الوصفات البسيطة لمساعدة شعرك على تجنب التقصف وعلاجه:
تاخذين كمية بسيطة من الزعتر الجاف او الطري او اكليل الجبل وتغلينه في ليتر ماء وتتركينه يفتر وبعدها تصفينه وتدلكين فروة الرأس فيه وتكررين العملية الى ان يختفي التقصف.
طريقة ثانية وهي عبارة عن صفار 3 بيضات مع ملعقة كبيرة زيت زيتون وتفرك به جلدة الرأس والشعر الى الاطراف ((طبعا اذا شعرج طويل تزيدين الكمية)) وتتركينه ساعة وتغسلينه عادي وتكررين العملية مرتين بالاسبوع لحين زوال التقصف.


اما بالنسبة لتطويل الشعر فقد ذكرت خلطات عديدة في ردودي السابقة ياليت ترجعين لها وتختارين الانسب لكي

السلام عليكم ورحمة الله وبركاته
الاخت amaladel
لاشكر على واجب وجزاك الله خيرا على ردك الطيب
وانا ناطرة نتايج استعمالك للوصفات وان شاء الله يصير شعرج مثل ماتبين واحلى:up:

شكرا يا اختي على الموضوع و يا ريت تقدرين تفيديني:pain:


انا سويت رجيم قبل سنة و تساقط شعري كثييييير بس الحين و قف التساقط...لكن المشكلة انه صاير مررررررره خفيف :down:


ما عندج خلطة لتكثيف الشعر؟؟؟

السلام عليكم ورحمة الله وبركاته
الاخت saroona1984
بالنسبة لتكثيف الشعر احسن طريقة هي الصبار اللي كتبت عنه في ردودي السابقة وراح اعيده لج
تاخذين صبار طبيعي اللي ينباع بالمشاتل
اخذي ورقة منه طبعا الورقه طويله انتي قسميها 3 اقسام ل 3 استعمالات وحطيهم بالثلاجة بس اخذي القسم اللي بتستعملينه وشيلي الشوك اللي عالجنبين وقطعيها وحطيها بالخلاط وحطي معاها اما زيت ذرة او زيت جوز هند وانا انصح ببراشوت او سوي مثلي احط معاه 3 ملاعق فاشكول بالثوم او اي كريم حمام زيت تحبينه مع ملعقة عسل
وخلطيهم بالخلاط وبعدها حطيه بشعرج لمدة ساعتين وغسليه عادي نفس كل مرة
وبتشوفين شعرج شلون راح ينبت بسرعة والتساقط يختفي نهائيا
انا دايما استعملها مع الفاشكول لانه احسن شي

وفي طريقة تقريبا مثلها وهم بعد ممتاااااازة وايد وتغذي الشعر وتكثفه
تجيبين الصبار مثل ماقلتلج وتشيلين الشوك وتحطينه بالخلاط وتجيبين جوز الهند الثمرة نفسها وتاخذين كمية بسيطة من الماء اللي فيها وتاخذين منها من داخل وتبشرينها يعني تغرفين من الثمرة نفسها من داخل وتبشرينه وتاخذين ملعقتين من المبشور وتحطينه بالخلاط مع ملعقة زيت اي زيت تفضلينه ماعدا زيت الزيتون او تحطين ملعقة حمام زيت
ونفس الشي تحطينه بشعرج ساعتين وتغسلينه
تتكررين العملية مرة الى مرتين بالاسبوع وان شاء الله راح تحسين بالفرق قبل مايمر شهر حتى بتشوفين الحيوية على شعرج والنعومة واللمعة