السفر بالطائرة بعرباية الطفل

انا سافرت بالطائرة 12 ساعة وابني كان عمره سنة ونص
واخذت معي عربة المظلة لانها خفيفة وسهلة النقل
بس ما يسمحون بالعربة داخل الطائرة لكن يشحنون العربة مع الشنط في الطائرة

صعب اقول متى العمر المناسب للبيبي عشان يقدر يسافر
لان الاطفال يختلفون عن بعض
البعض هادئ وينام لوقت طويل والبعض بالعكس

ابني هلكني وكان صعب يجلس لمدة طويله لانه مايفهم شي

اذا البيبي صغير ممكن ينام لمدة طويلة بعد رضاعته , يعني شوية اسهل من طفل عمره 6 اشهر او اكثر
بالتوفيق :)

الله يهون عليج حملج .. وتولدين بالف سلامة ان شاء لله ..

الطفل ماله سن معين يركب الطياره ممكن من يوم واحد .. لكن لو عقب شهر احس زين .. لانه بتكونين عارفه للطفل .. متى يصيح جوعان .. او موسخ .. او اذنه من الطياره ..

انا ما سافرت ولا مره مع عيالي .. لكن بقول لج من تجارب .. صديقتي زوجها يشتغل في الصين .. فحياتها كلها سفر .. المهم اهم شي .. لا تكثرين بحمل اشياء كثيره بالطياره .. يعني شنطتج .. وشنطة

للبيبي .. اعرفي شنو تحتاجين كم رضاعه ممكن تاخذين بس 2 وتغسلينهم بالطياره .. واذا انت بترضعينه تاخذين الشال معاج .. الويبس .. الحفاظات .. غير ممكن ملابس البيبي تتوسخ ..

والعربانه .. لي باب الطياره وبعدين ياخذونها منج .. ويعطونج عند الوصول ..

طبعا .. حاولي تروحين بدري تخلصين امورج .. حتى بالطياره علي مهلج لا تزاحمين علي شان انتي ترتاحين ..

والله يكون بعونج .. ويسهل حملج وولادتج وسفرج ..

أهم شي لما توصلين المطار وتسوين check in عشان يشحنون الشنط خبريهم ان معاك عربانه على أساس يعطونك ورقة تلصقينها على العربانه.. وبعدين العربانه ياخذوها منك عند باب الطياره.. ومثل ما قالت لك الأخت روح الفانيلا لا تاخذي أغراض ثقيله في الطياره بس اهم شي اغراض الطفل الأساسيه (ملابس ومهاد أو لحاف خفيف وحفاظات ووايب وحليب ورضاعات وماء مغلي وبنادول احتياط للأذن أو ارتفاع الحراره بما ان الرحلة طويله) وممكن تاخذين لك بدله احتياط لأن البيبي احتمال كبير يوصخ ملابسك أو يستفرغ عليهم..

واشتري قارورة ماء من السوق الحره ممكن تحتاجينها في الطياره لأن كل السوائل ممنوع تدخلينها معاك الا من السوق الحره مسموح..

وأول ما الطياره تطير رضعي ابنك عشان ما يصير ضغط على اذنه..

ولو كان طفلك 6 شهور وفوق اخذي له لعبه (البلاستك لأسنانه) على اساس تلهيه..

ان شاء الله أكون أفدتك بالتوفيق يارب..