انحلت مشكلتي بعد سنه ونص .. وجايه ابشركم

"بسم الله الرحمن الرحيم

اللهم صل على مُحمد وآل مُحمد

بتاريخ 12 شهر 8 2012 كتبت لكم مُشكلتي ..

وضيقتي واخذت مشورتكم .. وعدتكم اني راح انزل لكم اي تطور راح يصير بموضوعي

وهذا رابط المشكلة ..


[ محتاجه مشوره منكم سنتين وانا متردده ومحتاره وبدخل الثالثه...!]


وهذا ماحصل بعد ما كتبت لكم ..


بعد ما كتبت لكم جلست افكر واخذ راحتي في الموضوع بجديه ... وجلست اعالج نفسي روحانيا من الخوف اللي يعتريني ..

مارحت مع اخوي خلال 6 أسابيع لانه كانت اوراق واشياء مي جاهزه وانا بغيت فتره اطول

ظليت فترة اخذ نقاهه عشان العقدة تنفك زيادة ..

وطلبت من ربي اذا السفره خيره لي يسهلها واذا لا فراضيه با اللي يصير

واذا رزقي في ديرتي يارب لا تكتب لي السفره واذا راحتي بالسفره فانت ادرى بمصلحتي

وقلت يارب انا باسوي كل شي لاخر لحظه بقدم وباخذ دورات اكثر

وفعلا


سويت اخر الخطوات..

اخذت سيرتي الذاتيه واوراقي ودرت على الاماكن اللي اقدر اقدم فيها شخصيا ...

وانتظرت انتظرت ..
وتوظفت اسبوعين في رسبشن مستشفى وبعدين بدون سابق انذار قالوا لي باي لانه يبون موظفه بس تخلص اشغال اسبوعين ويطردونها..

بعدها ..
نفسيتي طاحت بالقاع وهالتجربه عطتني كف محترم ووعاني ان مالج رزق في هالديره ..


ورحت وقدمت على الفيزا وانا لازلت متردده ..
وعلى ما ابوي يخلص اوراق مهمه ويطبع اشياء للسفاره تاخذ اشهر ..

استغليت الوضع واخذت 3 كورسات قصيرة ...

وقدمت على عمل تطوعي ... وبعد ما قبلوني [ سُبحان الله ربي مو كاتب لي ولا قاسم لي رزق في بلادي ]

وكنت اعمل بالاسباب ..
عشان بعدين ما اندم واقول لو سويت ولو ما سويت ...

وبعد كل هالتعب ..
يتسهل كل شي وسافرت سبحان الله ربي كاتب لي هالسفره ..
ورحت ودرست وتفوقت وتم تكريمي في المعهد ولا زلت ادرس فيه ..
وكل المدرسين والمدرسات يقولون انتي ذكيه ومجتهده ..

شتان بين دراستي في السعوديه وهنا ..
في السعوديه حسسوني اني انسانه غبيه وما انفع لشي ..
وفي امريكا درجاتي كلها A

والحين ابوي يقولي قدمي وجربي على الماجستير ...

واذا الله سهل ...

وانتي مرتاحه هناك استقري ...
وتوظفي ..

وانا بيني وبينكم قلت خلاص عملت كل شي علي كورسات واخذت وتقديمات وقدمت وحتى على التطوع قدمت كل شي يطري على البال سويته ...


واذا راحتي بالغربه ..

اهلا بغربه جعلتني ابنة لها ...

وصدق اللي قال [ اريق ماء وجهي في وطني فاحتضنتني الغربه ]


[ الشي اللي مقويني اكثر واللي ما ذكرته القرب من الله في البلد والغربه ]


الحمدلله رب العالمين على كل شي ...
فعلا ان الله مع الصابرين


اشكر كل اللي ردوا علي في مشكلتي وساندوني وعطوني من وقتهم ...<3<3

المهم اني الحين اكلمكم من الغربه ..
واليوم بيكون توزيع شهادات الليفل اللي خلصته :)


في أمان الله:B: